Read tsotso LIKHUNULILWA 3 Bible Online

LIKHUNULILWA 3 - tsotso bible

LIKHUNULILWA 3

¹“Handichila injelosi yi likanisa lia Saride makhuva yaka: “Yaka nako makhuva karulanga khu woyo uli ni miroho saba chirulanga khu Nyasaye nende tsinyining'ini saba. Manyi ka wu kholanga; namanya ndi uli ni lira lilahi liu khuva mwoyo, khali niiva wakhutsa khale!

²Vukha, ma utinyilitse via ushili navio nivishili khukora viosi. Mali khulola ndi ka wakhola shikali ku vulunji imbeli wa Nyasaye wanje tawe.

³Khulwa yako, witsushitse ka wechitswa, manuhulila. Ukalonde khandi wikanile khurula mu vwoni vwovwo. Niiva uliitsa khwambakhana khuvukha, niitsa khwitsa khu yivi khuli shihuuvi, nivi uliitsa khuvula khumanya isaa yu khwitsa khwanje.

⁴Khuli na vandu vatititi mu litaala lia Saride, vashili khukholakhu vwoni. Valiitsa khuchenda ninzi nivali vanihu, shichila vatushili khukhola ndio.

⁵Yavo valiitsa khukuura valiitsa khukholwa khuva vanihu, khandi shiniitsa khurulitsa mira kavo mu shitabu shia vandu vali nu vulamu tawe. Niitsa khuvoola havulavu imbeli wa Tata wanje nende tsinjelosi tsietsie ndi navo vandu vaanje.

⁶“Mundu uli na maroyi ku khuhulila, lekha ahulishitsi ka Roho avoolelanga makanisa!

⁷“Handichila injelosi yi likanisa lia Filadelifia makhuva yaka: “Yaka nako makhuva karulanga khu woyo uli mutakatifu khandi watoto. Ali nu lufungu lwali lwa Daudi. Lwa yikulanga muliango, mundu avulakhuho unyala khwikala muliango kwenoko. Lwa yikalanga muliango kwenoko, mundu avulakhuho unyala khwikula.

⁸Namanya ka wu kholanga; namanya ndi uli ni tsingulu tsindititi; walonda khale liechitso lianje, khandi uli musuuvilwa khwinzi. Mali khukhwikulila muliango imbeli wowo, kwa mundu aliitsa khukhaywa khwikala.

⁹Hulishitsa! Uliitsa khulola ka niitsa khukhola vandu vi shituma shia Shetani venavo. Vivukulanga khuva vandu va Nyasaye, navutswa ni vavehi. Niitsa khuvakhola vakhusikamile, khu vamanye ndi ninzi wakhuyaanza.

¹⁰Lwa walonda makhuva kaanje, khali nu wikhutsila, niitsa khukhulinda mu milembe mumatukhu ku vutiinyu vuliitsa khwitsa mu shivala khuchelitsa vandu voosi vamenyanga khulilova.

¹¹Niitsa khwitsa vwangu yuvu. Vikha mu milembe via uli navio, khu mundu alivula khukhunuula shihanwa shioshio shi likuura.

¹²Mundu uliitsa khukuura, niitsa khumukhola khuva khuli irilu mu Litempeli lia Nyasaye wanje. Naye aliitsa khutsililila khuva mwoyo khumatukhu koosi. Niitsa khuhandika khuye lira lia Nyasaye wanje, lira li litaala likali lia Nyasaye wanje, nilili litaala likali liyia lia Yerusalemi, liliitsa khuva niliruli mwikulu khwishitswa hasi khurula khu Nyasaye wanje. Niitsa khuhandika khuye khandi lira lianje liyia.

¹³“Mundu uli na maroyi ku khuhulila, lekha ahulishitsi ka Roho avoolelanga makanisa!

¹⁴“Handichila injelosi yi likanisa lia Laodikia makhuva yaka: “Yaka nako makhuva karulanga khu Amina, mushiahidi uli musuuvilwa khandi watoto, mwamihi wa shia shindu shiosi, shia Nyasaye yalomba viranjilakhu.

¹⁵Namanya ka wakhola; namanya ndi shiulikhu mutsililu inoho muyiu tawe. Nakhikombi wakharovole khuva mutsililu inoho muyiu!

¹⁶Navutswa shichila washinda, ushili khuva muyiu inoho mutsililu, nzitsanga khukhusutsulula!

¹⁷Uvoolanga, ‘Ndi muhinda khandi nanyola miandu. Ndi ni vindu viosi via nyenyanga.’ Navutswa wakorwa khumanya ndi uli mu liiva litamanu, khandi vakhuvelanga tsimbavasi! Uli mumanani, shekenye khandi muvekhu.

¹⁸Khulwa yako, khukhonyanga inganakani yu khukuula itsahabu khurula khwinzi, itsahabu yasambwa khuvirila khu mulilu, nikanyalikha uve muhinda. Ukuule khandi tsinguvu tsindavu tsiu khwifwala khuvimba shekenye shioshio shi tsisoni. Ukuule khandi makura ku khwiveka mu tsimoni tsiotsio, ulole.

¹⁹Ngondeshelanga nu khusalilitsa yavo voosi va nayaanza. Uve ni lienya mu mwoyo, khandi wikanile khurula mu vwoni vwovwo.

²⁰Lola! Sinjile ha muliango nzikulitsanga. Niiva mundu aliitsa khuhulila mwoyo kwanje nu khwikula muliango, niitsa khwinjila munzu mwemwe khulia naye; khali ye aliitsa khulia ninzi.

²¹Yavo valiitsa khukuura, niitsa khuvahuchilila vikhale himbi ninzi mu shisoko shianje shiu vwami, khuli inzi nakuura khandi nunundi nzikhalanga himbi khu Tata wanje mu shisoko shieshie shiu vwami.

²²“Mundu uli na maroyi ku khuhulila, lekha ahulishitsi ka Roho avoolelanga makanisa!”