Read tsotso SAMWELI 10 Bible Online

SAMWELI 10 - tsotso bible

SAMWELI 10

¹Nalwo lwa Samweli yavukula ichupa ya makura ku musayituni, nasuundula khu murwi kwa Saulu, namukhumbelela, navoola, “Mwami Nyasaye umali khukhuvekha makura uve mwamihi wa vandu veve Israeli. Uliitsa khwamiha vandu veve, khandi uvalinde khurula khu vatsiku vavo voosi. Yishi nashio shimanyilu shimanyinyanga ndi Mwami Nyasaye umali khukhuvekha makura uve mwimilili wa vandu veve:

²Lwa utsitsanga khurula hanu nunundi, uliitsa khwakana na vandu vasatsa vavili himbi ha shilindwa shia Raheli, shili havundu halaangwangwa Zeliza khu mupaka ku lusomo lwa Benyamini. Valiitsa khukhuvoolela ndi tsipunda tsia wakhavanga vatsinyoli, khu tata wowo avuli khuheenda mwoyo, shichila tsipunda tsienetso; navutswa shichila yivi atsililile khureeva, ‘Ni khole shina khu mwana wanje?’

³Ulatsililila nu luchendo lwolwo khuraanjila hawenaho, khutukha lwa uliitsa khutukha khu musala museno kuli mu litaala lia Tabori, ha uliitsa khwakana na vandu vavaka, nivali khu luchendo lwavo lu khutsia khukholela Nyasaye musango mu litaala lia Betseli. Mundu mulala khuvo, aliitsa khuva niyimilili tsimbuli tsivaka; wundi aliitsa khuva nachinji mikati chivaka, khandi wa khavaka aliitsa khuva nachinji liseelo nilitsule idivai.

⁴Valiitsa khukhuha milembe khandi vakhuhe mikati chivili, chia nuhuchilile khuvukula.

⁵Numali khukhola ndio, uliitsa khusimukha utsi khu Shikulu shia Nyasaye, shili mu lusomo lwa Gibeha, nali havundu wu mukaanda kwa vasikali va Vafilisti vali. Uliitsa khwakana ni shituma shia vaprofeti mu vwinjililu vwi litaala, nivakholomokhanga hasi khurula khu vwaali khu shikulu, nivakhuvanga vukhana, tsindumba, indulelo nende vilili. Valiitsa khuva nivasievanga, nivalaanjilila nivavoola vuprofeti vwavo.

⁶Roho wu Mwami Nyasaye aliitsa khwitsa khu yivi ni tsingulu, khandi uraanje khuprofeta navo; ukalukhane khuva mundu lukanu.

⁷Lwa vindu vienevo vimala khwikholekha, uliitsa khukhola shia shindu shiosi shia Nyasaye yenyanga ukhole.

⁸Uliitsa khutsia mu litaala lia Gilugali imbeli wanje inzi nishili khutukhamu, wa khwakanila, mambane vihanwa viu khusambwa vi misango nende vihanwa viu khulera milembe vi misango. Uliitsa khunindaho khumatukhu saba khutukha lwa khuvoolela ka uliitsa khukhola.”

⁹Lwa Saulu yashiama niyenyanga khulekha Samweli, Nyasaye yakalukhanyinya mwoyo kwa Samweli. Vindu viosi via Samweli yali namuvoolele, vikholekha khulitukhu lienelo.

¹⁰Lwa Saulu nende murumishi wewe, vali nivakhatukha mu lusomo lwa Gibeha, shituma shia vaprofeti shiakana naye. Roho wa Nyasaye yitsa khuye vwangu, niyiyunga navo khuprofeta.

¹¹Vandu vali nivamanya Saulu, vamulola naprofetanga, nivareevana vene khuvene, “Ni shina shikholeshe khu mwana wa Kishi? Khali Saulu anyala khuva ukwili muprofeti?”

¹²Mundu wamenyayo yachipa, “Ni shina shia khuvoola khulondokhana khu vaprofeti vandi yava -- mukanakananga mwamanya vatata vavo vavivula?” Nindi khuli livoola lienelo liaraanga, “Khali Saulu anyala khuva ukwili muprofeti?”

¹³Lwa Saulu yali namali khuprofeta, yasimukha natsia havundu ha vandu vasaalilanga khu shikulu.

¹⁴Nalwo lwa khootsa wa Saulu yareeva Saulu nende murumishi wa Saulu, “Ni hena wamurula?” Saulu yamuchipa, “Khurula khukhava tsipunda. Lwa khwalola khunyala khuvula khutsinyola, khwasimukha nu khutsia khulola Samweli.”

¹⁵Khootsa wa Saulu yareeva, “Mboleli ka Samweli yamuvoolela munyi.”

¹⁶Saulu yachipa, “Yakhusuuvilitsa ndi vanyoli tsipunda.” Navutswa shiyavoolelakhu khootsa wewe makhuva khulondokhana khuli Samweli yali namuvoolele, aliitsa khuva mwami tawe.

¹⁷Samweli yalaanga halala Vaisraeli khwitsa mu litaala lia Mizipa khu Mwami Nyasaye.

¹⁸Yavavoolela, “Mwami Nyasaye, uli Nyasaye wa Israeli avoolanga, ‘Ninzi wamurulitsa mu shivala shia Misri, nimuhonyinya khurula khu Vamisri, khandi khurula khu vandu vandi voosi vamutambitsanga munyi.

¹⁹Ninzi Nyasaye wenyu, woyo umurulitsanga mu vutiinyu vwenyu nende mumanyakhano kenyu koosi; navutswa munyi munzambakhananga nunundi, khandi mumbolele muhe mwami. Khulwa yako, nu vulahi muno, yivunjelitsi vene halala imbeli wu Mwami Nyasaye, khulondokhana khu vandu vi tsimbia tsienyu nende tsinzivulu tsienyu.’ ”

²⁰Samweli yalaanga shia luhia imbeli, ma Mwami Nyasaye narovola vandu vuluhia lwa Benyamini.

²¹Samweli yalaanga vandu vi inzu ya vandu vuluhia lwa Benyamini imbeli, ma vandu vi inzu ya Maturi, nivarovolwa. Lukhumalilikha, Saulu mwana wa Kishi yarovolwa. Navutswa lwa vachelitsa khumukhava, shivamunyola tawe.

²²Khulwa yako, vareeva Mwami Nyasaye, “Khuliho nu mundu wundi wenyekhanga khutukha hanu?” Mwami Nyasaye yavoola, “Saulu ali yaho wivisi mu misiko chienyu.”

²³Khulwa yako, vilukhaka, nivalera Saulu khurulamu; khandi lwa yasinjila mu vandu, yali muraambi khuvira vandu vandi voosi, vali nivaliho.

²⁴Samweli yavoolela vandu voosi, “Mulolanga mundu wu Mwami Nyasaye arovole! Mundu avulakhuho mu vandu voosi khuli ye.” Nalwo lwa vandu voosi valaanjilila, nivavoola, “Mwami uhindile!”

²⁵Samweli yivaalila vandu vunyali nende mihinzilu chiu mwami; nahandika vindu vienevo mu shitabu, shia yatsia navikha Havundu Hatakatifu. Samweli yaseevula vandu voosi khutsia, shia mundu natsia ingo wewe

²⁶Saulu yasimukha natsia khandi ingo wavo mu litaala lia Gibeha. Vandu valala vi tsingulu tsinyishi muno, va Nyasaye yali nakalukhanyinyi mioyo, vasimukha nivatsia na Saulu.

²⁷Navutswa vandu valala varaanjitsanga vutamanu vavoola, “Mundu uyu anyala khuhonyinya khutsi munjila shina?” Vamuchaya nivambakhana khumulerelakhu shihanwa shiosi. Navutswa Saulu yahonjela vutswa.