Read tsotso SAMWELI 15 Bible Online

SAMWELI 15 - tsotso bible

SAMWELI 15

¹Samweli yavoolela Saulu, “Ninzi neye wu Mwami Nyasaye yaruma, khwitsa khukhuvekha makura khuva Mwami wa Israeli. Khulwa yako, uhulishitsi nunundi likhuva liu Mwami Nyasaye avoolanga.

²Mwami Nyasaye wi Mikaanda Chiliihe avoolanga, ‘Niitsa khusalilitsa Vaamaleki shichila vakuuka vavo vakwana Vaisraeli, lwa vali nivarulanga mu shivala shia Misri.

³Simukha utsi nunundi ukwane Vaamaleki, nu khutivitsa shia shindu shiosi. Uvuli khulekhakhu, khali mundu wosi khutsililila khuva mwoyo. Uliitsa khwiira vandu vasatsa nende vakhali, vaana nende vaana vatoro, tsing'ombe nende makondi, tsingamia nende tsipunda.’ ”

⁴Saulu yalaanga halala mukaanda kwa vasikali veve voosi, navavalitsa nivali mu litaala lia Telahimu. Vali vasikali tsiheelefu tsimia tsivili khurula mu lusomo lwa Israeli nende tsiheelefu likhomi khurula mu lusomo lwa Yuda.

⁵Saulu nende vandu veve, vasimukha nivatsia mu litaala lia Amaleki, nivavikonekhakhu mu luhoongo.

⁶Yavoolela Vakena, “Ruli hanu mutsi. Leshi Vaamaleki varikale vonyene, nikanyalikha mbuli khutivitsa munyi halala navo. Mwakholela Vaisraeli voosi malahi, lwa varula mu shivala shia Misri.” Vakena vasimukha nivatsia ihale wene, khurula mu Vaamaleki.

⁷Nalwo lwa Saulu yakwana Vaamaleki, khuraanjila mu litaala lia Havila khutsia khutukha Shuri, khuluveka luli ivukwi wi shivala shia Misri.

⁸Saulu yavukula ni tsingulu Mwami Agagi wa Vaamaleki, nashili mwoyo; khali niyiira vandu va Agagi voosi.

⁹Navutswa Saulu nende mukaanda kwa vasikali veve, valekha khwiira Mwami Agagi; khandi shivasinzakhu makondi malahi nende tsing'ombe tsindahi, vimoli vikhomeelu nende vimeme vikhomeelu via makondi, inoho khali shindu shiosi shiali ni shioneshe shilahi tawe. Vativitsa vutswa vindu vialolekhanga ni vitamanu, inoho vivula vukhonyi vwosi.

¹⁰Mwami Nyasaye yavoolela Samweli,

¹¹“Mbelele mu mwoyo kwanje, khani shinali narovola Saulu khuva mwami tawe. Umali khunzambakhana khandi wambakhane khulonda mivaalo kaanje.” Samweli yali nu vurima, nasaala khu Mwami Nyasaye vutukhu vwenovo vwosi.

¹²Litukhu lialondakhu mu mavwevwe, Samweli yavukha mu tsindolo, narulaho khutsia khwakanila Saulu, navutswa yavoolelwa ndi Saulu umali khutsia mu litaala lia Karameli, wa yumbakha shindu shiu khwitsutsishilakhu mwene luyali lwelwe, nashiama natsia mu litaala lia Gilugali.

¹³Lwa Samweli yali niyakhatukha khuye, Saulu yamuvoolela, “Samweli, Mwami Nyasaye akhukasitse! Mali khurweshitsa lilako liu Mwami Nyasaye yambolela.”

¹⁴Samweli yamureeva, “Shichila shina mbulilanga makondi nende tsing'ombe nitsiana?”

¹⁵Saulu yamuchipa, “Vasikali vaanje varulitsa khu Vaamaleki. Vavikha vulahi makondi malahi nende tsing'ombe tsindahi khusinzila Mwami Nyasaye, uli Nyasaye wowo khuli musango; navutswa khwativitsa tsiarikala tsiosi.”

¹⁶Samweli yavoolela Saulu, “Honjela! Lekha khuvoolele ku Mwami Nyasaye, ambolele mukolovo kuvele vutukhu.” Saulu yamuchipa, “Mbolela.”

¹⁷Samweli yamuvoolela, “Khali niiva wilechelitsanga shiuli shindu tawe, navutswa nivi mwimilili wa vandu vi tsimbia tsia Israeli. Nyasaye neye wakhuvekha makura khuva Mwami wa Israeli;

¹⁸yakhuruma utsi khukhola muhinzilu, navoola, ‘Simukha utsi khutivitsa vandu vatamanu yavo, nivali Vaamaleki. Uvakwane khutukha lwa wiira voosi.’

¹⁹Shichila shina nu wambakhana khulonda lilako liu Mwami Nyasaye? Shichila shina nu wilukhachila khuyaayayo vindu, nuvula khukhola makhuva ku khuyaanzitsa Mwami Nyasaye?”

²⁰Navutswa Saulu yamuvoolela, “Nalonda lilako liu Mwami Nyasaye. Narulaho ninzia khuli yali nambolele, nindera Mwami Agagi, khandi ninziira Vaamaleki voosi.

²¹Navutswa vandu vaanje valekha khwiira makondi makhomeelu nende tsing'ombe tsikhomeelu, tsia vali nivavukula ni tsingulu; navutswa valera miruku hanu mu litaala lia Gilugali khusinzila Nyasaye wowo, khuli shihanwa shiu musango.”

²²Nalwo lwa Samweli yavoola, “Ni shina shiu Mwami Nyasaye yayaanza: Khulonda malako keke inoho vihanwa nende misango? Nu vulahi muno khulonda malako keke khuvira khumusinzila makondi mamiiko ku musango.

²³Khuhinganyinya khulonda malako ku Mwami Nyasaye nu khutamanu muno khuvira vuloochi; khandi khuva nu vuhaaka khulolekhanga khuli khukhola vwoni nu khusaala khu misambwa. Lwa wambakhane khulonda likhuva liu Mwami Nyasaye, khali umali khukhwambakhana yivi khuva mwami.”

²⁴Nalwo lwa Saulu yavoolela Samweli, “Kholi vwoni. Nambakhana khulonda malako ku Mwami Nyasaye nende mivaalo koko; shichila ninzi waria vandu khandi nimbulishitsa ka venyanga vakholele.

²⁵Navutswa nunundi khureevanga nuyaanza, usemehe vwoni vwanje. Ungalushili nikanyalikha nzililile khusaala khu Mwami Nyasaye.”

²⁶Samweli yamuvoolela, “Shinzitsanga khukalukhayo nivi tawe; shichila nivi wambakhana khulonda likhuva liu Mwami Nyasaye; khandi Mwami Nyasaye umali khukhwambakhana khuva Mwami wa Israeli.”

²⁷Lwa Samweli yali narulaho atsi, Saulu yakumila nahaanda khwi ikaanzu ya Samweli, manirandukha.

²⁸Samweli yavoolela Saulu, “Mwami Nyasaye umali khurulitsaho vwami vwi shivala shia Israeli khurula khu yivi nunundi, khandi uheele mundu wundi mulahi mwene khuvira yivi.

²⁹Nyasaye wa Israeli uheelwangwa vukhumi shianyala khukaata inoho khukalukhanyinya ka yenyanga kakholeshe tawe; shichila ye shiali mundu, unyala khukalukhana yambakhane khukhola ka yenyanga kakholwi.”

³⁰Saulu yamuvoolela, “Kholi vwoni. Navutswa nuyaanza umbee luyali imbeli wa vimilili va vandu vaanje nende Vaisraeli voosi; kalukhayo ninzi, nikanyalikha nzi khusaala khu Mwami Nyasaye, uli Nyasaye wowo.”

³¹Samweli yakalukhayo na Saulu; ma Saulu nasaala khu Mwami Nyasaye.

³²Samweli yavoolela Saulu, “Nderela Mwami Agagi wa Vaamaleki.” Mwami Agagi yitsa khuye, natechelanga naria, nakanakananga mwene, “Khuli vuli vululu muno mundu khwiirwa!”

³³Navutswa Samweli yavoolela Mwami Agagi, “Khuli lwa yivi wiira vaana va vandu vakhali ni shivavi shioshio, nindio khandi mama wowo atsitsanga khuvula khuva nu mwana wosi.” Nalwo lwa Samweli yareemaka mu vitonye Mwami Agagi imbeli wa havundu ha vandu vasaalilanga khu Mwami Nyasaye mu litaala lia Gilugali.

³⁴Khulwa yako, Samweli yasimukha natsia mu litaala lia Raama; navutswa Saulu yakalukha ingo wewe mu litaala lia Gibeha.

³⁵Samweli shiyalolakhu Mwami Saulu, khumatukhu koosi ka yali nashili mwoyo tawe; navutswa yamwikhula. Mwami Nyasaye yavelela muno, shichila yali wavekha Saulu makura khuva Mwami wa Israeli.