Read tsotso SAMWELI 18 Bible Online

SAMWELI 18 - tsotso bible

SAMWELI 18

¹Lwa Daudi yali namali khulomoloma na Saulu, Yonatsani yalolela Daudi mwoyo mulahi, khandi namuyaanza muno, khuli mwene yali niyiyaanza.

²Khuraanjila khulitukhu lienelo, Saulu yatsililila khumenya na Daudi, namwikalila khukalukha ingo wavo.

³Yonatsani yakhola lilakano na Daudi, shichila yali wamuyaanza, khuli mwene yali niyiyaanza.

⁴Yonatsani yakhola lilakano liu vulina vwa matukhu koosi na Daudi, nanavula ikaanzu ya yali niyifwali, naha Daudi. Yamuha khandi inguvu yeye yu khukwanila, shivavi shieshie, vura vwevwe, nende mivanu nende lukhanda lwelwe.

⁵Daudi yakhola nu vusitsa shia shindu shiosi, shia Saulu yamuruma khukhola, ma Saulu namulomba khuva mulala khu vimilili va vasikali veve. Ka Daudi yakhola, kayaanzitsa vandu voosi, khali vimilili va vasikali vandi va Saulu.

⁶Lwa vasikali vali nivakalukhanga ingo, Daudi namali khwiira Goliati, vandu vakhali varula mu mataala koosi ki shivala shia Israeli, khwitsa khwakanila Mwami Saulu; vitsa nivimbanga tsinyimbo nivasieva, vimbanga tsinyimbo tsiu khwikhoya ni tsindumba nende vilili.

⁷Lwa vasievanga, vimba, “Saulu wayiira vandu tsiheelefu, navutswa Daudi wayiira vandu tsiheelefu makhomi na makhomi.”

⁸Saulu yali nu vurima, khandi ka valomolomanga shikamuyaanzitsakhu tawe. Yavoola, “Vavoolanga Daudi wayiira vandu tsiheelefu makhomi na makhomi, navutswa inzi nayiira vandu tsiheelefu vonyene. Valiitsa vwangu yuvu khumwamihitsa khuva mwami.”

⁹Saulu yatsililila khulolela Daudi mwoyo kwi imbotokha khuraanjila khulitukhu lienelo.

¹⁰Litukhu lialondakhu, roho mutamanu wali naruli khu Nyasaye yinjila mu Saulu ni tsingulu. Saulu yaraanga khuporofeta nali munzu mwemwe, nikhali Daudi yamukhuvilanga shilili, khuli yakholanga shia khase khosi. Saulu yali nakumile lirimu mu mukhono kwekwe

¹¹nalesa, nakanakananga mwene mu mwoyo kwekwe, “Nalesa khumulivirila khu lisisi.” Navutswa Daudi yiheeba hali khavili.

¹²Saulu yali waria Daudi, shichila Mwami Nyasaye yali halala na Daudi, khandi yali walekha Saulu.

¹³Khu, Saulu yaseevula Daudi khurulaho, namuha vunyali vu khwimilila vasikali iheelefu indala; ma Daudi nahila vasikali veve mu liihe

¹⁴natsililila khukuura mu shia shindu shiosi shia yakholanga, shichila Mwami Nyasaye yali naye.

¹⁵Lwa Saulu yalola khuli Daudi yakholanga shia shindu shiosi nu vusitsa, yamuria muno.

¹⁶Navutswa vandu vi tsisomo tsia Israeli nende Yuda, voosi vayaanza Daudi, shichila yavimilila khutsia khukwana mu liihe.

¹⁷Khulwa yako, Saulu yavoolela Daudi, “Mwana wanje wi shikhana mukhulundu Merabu ali hanu. Nzitsanga khukhuveshela khuva mukhali wowo. Kholela muhinzilu khuli mundu wamanya khukwana, khandi ukwane maahe ku Mwami Nyasaye.” Saulu yali ukanakane mwene, “Shikali ninzi mwene utsitsanga khwiira Daudi tawe; navutswa nzitsanga khulekha Vafilisti vamwiiri!”

¹⁸Daudi yavoolela Saulu, “Ninzi viina khandi vandu vi inzu yanje, ni vanga viina kanombe mbe mukuuka wu Mwami Saulu?”

¹⁹Navutswa lwa litukhu liali niliakhatukha lia Daudi aveshelwa Merabu, Merabu mwenoyo yahaanwa khu mundu wundi walaangwangwa Adurieli, khurula mu litaala lia Mehola.

²⁰Mwana wi shikhana wa Saulu walaangwangwa Mikali, vayaanzana na Daudi, khandi lwa Saulu yavoolelwa makhuva kenako, yayaanzitswa muno.

²¹Saulu yakanakana mwene, navoola, “Lekha muveshele Mikali khu kuve mureeko kukhukumila Daudi. Nikamali khwikholekha kario, Vafilisti valiitsa khumwiira.” Saulu yavoolela Daudi lwa khavili, “Utsitsanga khuva nunundi mukuuka wanje.”

²²Nalwo lwa Saulu yavoolela varumishi veve vatsi valomolome muvwivisi khu Daudi, vamuvoolele, “Mwami Saulu ayaanzitswi muno nivi; khandi varumishi veve voosi vakhuyaanza yivi. Yuvu navwo vwiyangu vwovwo vu khuhila mwana wi shikhana wewe.”

²³Varumishi venavo vakalushila khuvoolela Daudi makhuva kenako, Daudi navavoolela, “Nu luyali lukali muno khuva mukuuka wu Mwami Saulu, lukali muno khu mundu mumanani, khandi ushili khumanyikhanakhu khuli inzi.”

²⁴Varumishi va Saulu, venavo vavoolela Saulu, ka Daudi yali navooli,

²⁵ma Saulu navavoolela vavoolele Daudi makhuva yaka, “Mwami Saulu wambakhane khuheelwa vukhwi vundi vwosi, nikakhali vikhanda imia indala via vandu vashevelwi via Vafilisti, khuvanzila vatsiku veve.” Nindi khuli Saulu yenyanga Vafilisti viiri Daudi.

²⁶Lwa varumishi va Saulu vavoolela Daudi makhuva kenako, Daudi yayaanzitswa muno, ninganakani yu khuva mukuuka Saulu. Lwa litukhu liali nilialaakwa liali nilishili khutukha,

²⁷Daudi nende vandu veve vasimukha, nivatsia khwiira Vafilisti tsimia tsivili. Yalera vikhanda viosi vi mivili chiavo, naha Mwami Saulu, khu ave mukuuka wewe. Khulwa yako, Saulu yaveshela Daudi mwana wi shikhana wewe Mikali, khuva mukhali wewe.

²⁸Lwa Saulu yamanya ndi Mwami Nyasaye yali halala na Daudi, khandi ndi mwana wewe wi shikhana Mikali wayaanza muno Daudi,

²⁹Saulu yatsililila khumuria muno. Yatsililila khuva mutsiku wewe khumatukhu koosi, ka yali nashili mwoyo.

³⁰Vasikali va Vafilisti vatsililila khutsia khukwana; navutswa Daudi yavakuura mu shia liihe liosi, khuvira vimilili va vasikali va Saulu voosi.