Read tsotso SAMWELI 19 Bible Online

SAMWELI 19 - tsotso bible

SAMWELI 19

¹Saulu yavoolela mwana wewe Yonatsani nende varumishi veve voosi, makhuva khulondokhana khuli vanyala khwiira Daudi. Navutswa Yonatsani yali wayaanza muno Daudi.

²Khulwa yako, yamuchelihitsa navoola, “Tata wanje Saulu akhavanga khuli anyala khukhwiira. Uve mucheli mukamba mu mavwevwe; rula utsi khwivisa, umenyeyo.

³Niitsa khurula nzi khusinjila himbi na tata wanje mu mulimi havundu ha uliitsa khuva nuwivisi; khandi muvoolele makhuva khulondokhana khu yivi. Niiva nanyola likhuva liosi khurula khuye, niitsa khukhuvoolela kavooli.”

⁴Yonatsani yitsominya Daudi khu Saulu navoola, “Yivi mwami, lekha khukhola khu shindu shitamanu murumishi wowo Daudi. Ashili khukhukholelakhu shindu shitamanu; khandi shia shindu shiosi shia yakhola ni shiu vukhonyi khu yivi.

⁵Yihaana mwene khwiirwa lwa yiira Goliati. Mwami Nyasaye yakhonyanila Vaisraeli nivakuura. Lwa mwalola kikholekha, mwasangala. Khulwa yako, shichila shina wenyanga khukhola khu shindu shitamanu mundu uvula vutamanu khuli Daudi lwa wenyanga khumwiira vuchila shivune shiosi?”

⁶Saulu yahuchilila makhuva ka Yonatsani yali namuvoolele, niyisuuha khuvirila mu lira liu Mwami Nyasaye khuvula khwiira Daudi.

⁷Yonatsani yalaanga Daudi namuvoolela koosi makhuva ka vali nivalomolome. Yamuhila khu Saulu, ma Daudi narumishila Saulu khuli yamurumishilanga lukhuraanga.

⁸Litukhu lindi, liihe liaraanga. Daudi yarula natsia khukwana Vafilisti. Daudi yavakwana, navakuura vutamanu muno, navo nivilukha.

⁹Litukhu lindi, roho mutamanu wali naruli khu Mwami Nyasaye, yinjila ni tsingulu mu Saulu. Saulu yali niyikhale munzu mwemwe, nakumile lirimu mu mukhono kwekwe. Daudi yaliho, nakhuvanga shilili shieshie.

¹⁰Saulu yachelitsa khulivira Daudi khwi lisisi ni lirimu lielie; navutswa Daudi yiheeba, ma lirimu lienelo, nilihaanda mu lisisi. Daudi yilukha maniyihonolokha.

¹¹Saulu yaruma vandu valala mu vutukhu vulala vwenovo khutsia khulinda inzu ya Daudi khandi vamwiiri mu mavwevwe litukhu lilondakhu. Navutswa Mikali, wali mukhali wa Daudi, yachelihitsa Daudi, navoola, “Niiva unyala khuvula khwilukha nunundi vutukhu, utsitsanga khwiirwa mukamba.”

¹²Khulwa yako, Mikali yishitsila Daudi mu litirisha, ma Daudi niyilukha.

¹³Mikali yavukula shifwanani shiu musambwa ku mu inzu yavo, niyalishitsa khu shitali, navikhakhu ipilo yalombwa khu vwoya vwi imbuli ha murwi hi shitali, khandi navimbakhu mulinjeti.

¹⁴Lwa Saulu yaruma vandu khwitsa khukumila Daudi, nalwo lwa Mikali yavavoolela, “Alwalanga.”

¹⁵Navutswa Saulu yavaruma khandi vatsi valole Daudi. Yavavoolela, “Ndereli numumuchinjili khu shitali shieshie, nikanyalikha mwiiri.”

¹⁶Navutswa lwa vandu venavo vinjila munzu, valola shifwanani shiu musambwa nishili khu shitali, khandi vwoya vwi tsimbuli ha murwi hi shitali shienesho.

¹⁷Saulu yareeva Mikali, “Shichila shina nungata, khandi ukholi mutsiku wanje khwilukha?” Mikali yavoolela Saulu, “Ambolele, ‘Lekha nzilushi. Shichila shina khwiiri?’ ”

¹⁸Daudi yilukha natsia khulola Samweli, wali nali mu litaala lia Raama, namuvoolela koosi ka Saulu yali namukholi. Nalwo lwa ye halala na Samweli, vasimukha nivatsia khumenya havundu halaangwangwa Nahihotsi.

¹⁹Saulu yavoolelwa, “Daudi amenyanga Nahihotsi, havundu hali mu litaala lia Raama.”

²⁰Saulu yaruma vasikali valala khutsiayo khukalushitsa Daudi. Vasimukha nivatsia mu litaala lia Raama, nivanyola Samweli nasinjile ni shituma shia vaprofeti, vali nivaprofetanga voosi. Khulwa yako, Roho wa Nyasaye yitsa ni tsingulu khu vasikali va Saulu, nivaraanga khuprofeta khuli vo.

²¹Lwa Saulu yahulila kali nikakholeshe, yaruma vandu vandi vanyishi, khandi khali nivaporofeta. Saulu yaruma vandu lwa khavaka, nivaporofeta khandi.

²²Lukhumalilikha, Saulu yasimukha mwene natsia mu litaala lia Raama. Lwa yali niyakhatukha khu shisima shikali shiali nishili havundu halaangwangwa Seku, yareeva havundu wa Samweli nende Daudi vali, navoolelwa ndi vali Nahihotsi.

²³Lwa Saulu yali natsitsayo, Roho wa Nyasaye yitsa khuye ni tsingulu, khandi naraanga khuprofeta khutukha lwa yatukha Nahihotsi.

²⁴Saulu yanavula tsinguvu tsietsie, naraanga khuprofeta imbeli wa Samweli. Yahongaho nakoni shekenye mbasu nu vutukhu vwosi. Nako kachila vandu nivavoola, “Khali Saulu anyala khuva ukwili muprofeti?”