Read tsotso SAMWELI 2 Bible Online

SAMWELI 2 - tsotso bible

SAMWELI 2

¹Hana yasaala navoola, mwoyo kwanje kwikhoyelanga mu Mwami Nyasaye; tsingulu tsianje tsirulanga khu Mwami Nyasaye. Sekhanga vatsiku vaanje; nzikhoyanga shichila wambonyinya.

²“Mundu avulakhuho mutakatifu khuli Mwami Nyasaye; mundu avulakhuho uli khuli ye, mundu avulakhuho ukhulindanga khutsi khuli Nyasaye weru.

³Leshi khwichinjilila khwenyu; mukhalomolomi nu vwiloli tawe; shichila Nyasaye neye Mwami Nyasaye wamanya, khandi akhalachilanga vandu khu ka vakholanga koosi.

⁴Vura vwa vasikali vi tsingulu vwatong'olanyinywa, navutswa vwa vateteshele vanyolanga tsingulu.

⁵Vandu vali nivamenya nivalia vulahi vikura, nunundi vahinzilanga khu vanyole shia valia, navutswa vandu vi inzala yalumanga vayikura. Mukhali wali mukuumba wayivula vaana saba, navutswa mukhali wali niyivula vaana vanyishi warikala vutswa shikhaya.

⁶Mwami Nyasaye yiiranga nu khwisimushitsa, ahilanga vandu mu shihatisi khandi avarulitsamu.

⁷Mwami Nyasaye achilanga mundu ava mumanani, nu khukhola wundi khuva muhinda. Achehitsanga valala nu khuchingula vandi.

⁸Arulitsanga vamanani mu vumanani vwavo; khandi akhonya vavula shindu mu vutiinyu vwavo. Avalombanga vava valina va vamihi khandi khwikhalitswa havundu hali nu luyali. Misinji chi lilova ni chiu Mwami Nyasaye; neye walomba shivala khu misinji chienecho.

⁹“Alindanga vulamu vwa vandu veve vasuuvilwa, navutswa vandu vatamanu valiitsa khutivila mu shisuundi; mundu avulakhuho ukuuranga khurulana khu tsingulu tsietsie mwene.

¹⁰Vatsiku vu Mwami Nyasaye valiitsa khutivitswa; aliitsa khuvalindushila khuli likulu khurula mwikulu. Mwami Nyasaye aliitsa khukhalachila vandu voosi mu shivala; aliitsa khuha mwami wewe tsingulu; aliitsa khuchila mwami wewe wavekhwa makura khuheelwa vukhumi ni tsingulu.”

¹¹Nalwo lwa Elikana yasimukha nakalukha ingo wewe mu litaala lia Raama. Navutswa mwana Samweli yarikala mu litaala lia Shilo, narumishilanga Mwami Nyasaye, khandi niyechitswangwa na Eli.

¹²Vaana va Eli vali vandu vatamanu; shivalolakhu Mwami Nyasaye khuli ni shindu tawe.

¹³Vasalisi nende vandu vavetsanga nu mwiima ndi lwa shia mundu wosi yakholanga musango khandi lwa inyama ivetsanga niiya mu mulilu, murumishi wu musalisi yitsanga nakumile vuuma vwa miino kavaka.

¹⁴Yaliviranga vuuma vwenovo mu inyungu ya vateshelamu, ma musalisi avukula mwene inyama ya vuuma vurulitsamu. Nindi vakholanga Vaisraeli voosi vitsanga mu litaala lia Shilo.

¹⁵Navutswa khali shivana nishishili khusambwa, murumishi wu musalisi yitsaho avoolela mundu wu kholanga musango, “Ha musalisi inyama yatsia khuhembela; shianyala khuhuchilila inyama yuteshi tawe; navutswa imbisi yonyene vutswa.”

¹⁶Niiva mundu yamuvoolela, “Lekha shivana shiranje khuya, uvukule inyama ya wenyanga;” murumishi wu musalisi yakhavooli, “Shikali kario tawe, mbe lwenulu; niiva ulambakhana khumba, navukula mwene ni tsingulu.”

¹⁷Vwoni vwa vaana va Eli vakhola vwenovo, vwali vunyishi muno imbeli wu Mwami Nyasaye, shichila vali vachaya vihanwa via Nyasaye.

¹⁸Mumatukhu kenako, mwana Samweli yatsililila khurumishila Mwami Nyasaye, niyifwali shiambala shilavu.

¹⁹Shia muhika mama wewe yamunavilanga ikaanzu indititi amuhilila lwa yasimukhanga nu musatsa wewe, khutsia khukhola musango kwa shia muhika.

²⁰Eli yali wamenya nakasitsanga Elikana nende mukhali wewe, navoola, “Nzikombanga ndi Mwami Nyasaye akhukhonye wivuli vaana vanyishi khu mukhali uyu, valikalukha mu vwiyangu vu mwana wa yahaana khu Mwami Nyasaye.” Nalwo lwa vakalukha ingo.

²¹Ni kilikali, Mwami Nyasaye yakasitsa Hana. Hana yivula vaana vi shiyayi vandi vavaka nende vaana vi shikhana vavili. Nikhali mwana wi shiyayi Samweli yahindila, narumishila Mwami Nyasaye.

²²Eli yali wakhasakhula muno lwenolo. Yali wamenya nahulilanga shia shindu shiosi, khulondokhana khuli vaana veve vakholanga Vaisraeli, khandi khuli vakonanga na vakhali varumikhanga mu vwinjililu vwi Liheemo Litakatifu.

²³Eli yavareeva, “Shichila shina mukholanga vindu khuli vienevo? Vandu voosi vambolele makhuva khulondokhana khu vindu vitamanu via mukholanga.

²⁴Vaana vaanje, leshi khukhola vindu vienevo. Makhuva kambulilanga vandu vu Mwami Nyasaye nivalomoloma shikali malahi tawe.

²⁵Niiva mundu aliitsa khukholela wundi vwoni, Nyasaye anyala khumusemeha; navutswa ni viina unyala khusemeha mundu ukholela Mwami Nyasaye vwoni?” Navutswa vaana venavo vambakhana khuhulishitsakhu tata wavo, shichila Mwami Nyasaye yali waviritsa khuviira.

²⁶Mwana Samweli yatsililila khuhindila mu mmbili, khandi nayaanzitswa nu Mwami Nyasaye nende vandu.

²⁷Litukhu lindi, mundu wa Nyasaye yasimukha natsia khu Eli, namuvoolela, “Mwami Nyasaye avoolanga, ‘Lwa kuuka wowo Haruni nende vandu vi inzu yeye vali varukwa vu Mwami wa Misri, nilavushitsa mwene khu Haruni.

²⁸Ninzi warovola inzu ya kuuka wowo khurula mu vandu vi tsimbia tsia Israeli khuva vasalisi vaanje, vandumishile khu vwaali vwanje, khusamba vubani, khandi khwifwala shiambala imbeli wanje. Ninzi wavaha vunyali vukhuvikha shitonye shi misango chia vasambilanga khu vwaali.’

²⁹Uhang'ahang'anilanga khu misango nende vihanwa via nyenyanga nyole khu vandu vaanje shichila shina? Yivi Eli, shichila shina uheetsanga vaana vovo luyali khuvira inzi lwa uvalombanga khuva vakhomeelu shichila valiitsanga inyama indahi muno khu inyama yi misango chia vandu vaanje vakholelanga?

³⁰Inzi Mwami Nyasaye wa Israeli, nalaaka mumatukhu kavira ndi vandu vi inzu yoyo nende lwivulu lwolwo valiitsa khundumishila khuli vasalisi khumatukhu koosi. Navutswa nunundi shinyala khwenya kave, khuli nali nalaaka tawe! Nikhali, niitsa khuha luyali khu yavo vambetsanga luyali, navutswa yavo valechelitsanga inzi niitsa khuvambakhana.

³¹Hulishitsa, matukhu kaliitsa khutukha, lwa niitsa khwiira vasatsa vavukha voosi khurula mu vandu vi inzu yoyo nende mu vandu vu lwivulu lwolwo, mundu alivula khuvakhuho mu vandu vi inzu yoyo uliitsa khuhindila.

³²Uliitsa khunyakhana khandi ushendeshe lwa ngasitsa Vaisraeli vandi ni vindu viosi viamba nivaheele; navutswa shia mundu wosi shialiitsa khuva mu vandu vi inzu yoyo, uliitsa khuhindila wasakhula tawe.

³³Navutswa niitsa khulekha mulala khu vitsukhulu vovo atsililile khuva mwoyo, khandi andumishile khuli musalisi. Navutswa mundu mwenoyo, aliitsa khuvekhula nu khukoritsa lisuuvilitswa lielie; khandi vitsukhulu vovo vandi voosi valiitsa khukhutsa likhutsa litamanu muno.

³⁴Lwa vaana vovo vavili, nivali Hofini nende Finiasi valiitsa khwiirwa khulitukhu lilala, nako kaliitsa khuva shimanyilu khu yivi ndi koosi, ka navoola kaliitsa khuva katoto.

³⁵Niitsa khurovola musalisi uliitsa khuva musuuvilwa khwinzi nu khukhola shia shindu shiosi, shia muvoolela akhole. Niitsa khumukhola yivuli vitsukhulu, valiitsa khurumikha imbeli wu mwami wanje wavekhwa makura mihika ni mihika.

³⁶Mwitsukhulu wosi khu vitsukhulu vovo, uliitsa khwihonolokha aliitsa khutsitsanga khu musalisi mwenoyo khumureeva tsisenti nende shiukhulia; khandi aliitsa khumuvoolela nayaanza amuhuchilile akhonye vasalisi, khu anyole shiukhulia shianyala khulia.”