Read tsotso SAMWELI 21 Bible Online

SAMWELI 21 - tsotso bible

SAMWELI 21

¹Daudi yasimukha natsia khulola musalisi Ahimeleki, wamenyanga mu litaala lia Nobu. Ahimeleki yitsa natechelanga khumwakanila, namureeva, “Shichila shina witsi hanu yivi mwene wonyene?”

²Daudi yamuchipa, “Ndi hanu khukhola muhinzilu ku Mwami Saulu. Ambolele mbuli khuvoolelakhu mundu wosi, ka ye andumi khwitsa khukhola. Mali khuvoolela vandu vaanje vakanili halala havundu handi vutswa.

³Khulwa yako, ni viukhulia shina viunyala khuhaana? Mbe mikati chiranu inoho shia shindu shiosi shiuli nashio.”

⁴Musalisi mwenoyo yavoolela Daudi, “Mbulakhu mukati kundi kwosi tawe, navutswa mukati mutakatifu kwonyene; unyala khukuvukula niiva vandu vovo vashili khukona na vakhali vwangu yuvu.”

⁵Daudi yamuvoolela, “Nindio kali, vandu vaanje vashili khukonakhu na vandu vakhali. Shia khase khosi vandu vaanje ni vanihu khulondokhana khu mulukha, khali lwa khutsitsanga khukhola muhinzilu kwa shia khase khosi. Kanyala khwikholekha karina lwenulu lwa khuli khu muhinzilu mukali muno!”

⁶Musalisi yaha Daudi mukati mutakatifu; shichila nakwo mukati kwa yali nakwo kwonyene; kwali nu kurulitswi khu mesa indakatifu, nakalushitsakhu mukati kwali nu kushili nu luya.

⁷(Mwayi mukali khu vayi vi miruku chia Saulu walaangwangwa Dohegu, warulanga mu shivala shia Edomu yaliho khulitukhu lienelo, shichila yenyekhanga arweshitsi muhinzilu kwekwe khulondokhana khu idini.)

⁸Daudi yareeva Ahimeleki, “Ulikhu ni lirimu inoho shivavi shiunyala khumbakhu? Mwami Saulu yambolela nduliho vwangu muno, khali nimbula khuva nu vwiyangu vukhuvukula shivavi shianje inoho shiuchi shiosi.”

⁹Ahimeleki yamuvoolela, “Ndi ni shivavi shiali shia Goliati wali Mufilisti, wa wiirila mu Luhoongo lwa Ela; shili hanu inyuma wi shiambala, shialinjilwa mu inguvu. Niiva ushenyanga, unyala khuvukula -- nashio shiuchi shili hanu shionyene.” Daudi yamuvoolela, “Mbe shivavi shienesho. Khuvula havundu handi, ha khunyala khunyola shivavi shilahi shiene!”

¹⁰Khulitukhu lienelo, Daudi yilukha Mwami Saulu, natsia khulola Mwami Akishi wa Gatsi.

¹¹Varumishi vu Mwami Akishi vamuvoolela, “Uyu shiali Daudi, mwami wamihanga shivala shieshie? Uyu neye mundu wa vandu vakhali vimba lwimbo khulondokhanakhu, lwa vasievanga, ‘Saulu wayiira vatsiku tsiheelefu, navutswa Daudi wakhiira vatsiku tsiheelefu makhomi na makhomi.’ ”

¹²Daudi yakanakana khulondokhana khu ka vavoola, naria Mwami Akishi wa Gatsi.

¹³Khulwa yako, lwa vandu venavo vavetsaho himbi, Daudi yikholanga khuli woneshe murwi, khandi khwikhola khuli walalukha lwa vachelitsanga khumukaya. Yakhong'onda khu vilivwa vi litaala likali, alekha maree karoonya hasi khuvirila mu matelu keke.

¹⁴Mwami Akishi yavoolela varumishi veve, “Lolikhu mundu uyu! Wayonekha murwi! Shichila shina nu mumulera khwinzi?

¹⁵Ushili khumanyakhu vandu valalukha ni vanyishi munu? Shichila shina nu munderela mulalu wundi khunuminya murwi ni vikholwa vievie via malalu, via kholanga mu inzu yanje munu?”