Read tsotso SAMWELI 26 Bible Online

SAMWELI 26 - tsotso bible

SAMWELI 26

¹Vandu valala khurula mu Shiangalangwi shia Zifu vitsa khu Mwami Saulu mu litaala lia Gibeha, nivamuvoolela ndi Daudi yali wivisi khu Shikulu shia Hakila shili khundulu khwi shiangalangwi shia Yudeya.

²Khu, Saulu yasimukha vwangu nende vasikali va Vaisraeli vali vamanya khukwana natsia mwichendanyama mwa Zifu khukhavayo Daudi,

³khandi namenyayo mu maheemo himbi khundulu khu muhaanda kuli khu Shikulu shia Hakila. Daudi yali nashili mwichendanyama, khandi lwa yahulila ndi Saulu witsi khumukhava,

⁴yaruma vandu khurunishitsa manivanyola ndi ni katoto Saulu yali naliyo.

⁵Daudi yaraanga luchendo natsia havundu ha Saulu yali namenyi mu maheemo. Yalola havundu ha Saulu nende Abuneri mwana wa Neri, nali mwimilili wa vasikali vali nivakoni. Saulu yali nakoni mu maheemo hakari navutswa vasikali veve nivamuvotokhane.

⁶Daudi yareeva Ahimeleki, mundu warulanga mu Vahitse, halala na Abishai mwana wa Zeruya, nali amwavo Yohabu, “Ni viina khu munyi vavili umbeleshitsa khutsia mu maheemo ka Saulu amenyamu?” Abishai yamuvoolela, “Nakhuheeleshitsa.”

⁷Daudi nende Abishai vinjila mu maheemo ka Saulu yamenyamu vutukhu vwenovo manivanyola Saulu nakoni hakari mu maheemo; nasimiishi lirimu lielie nilisimiishwi himbi ha murwi kwekwe. Abuneri nende vasikali vali vakoni nivamuvotokhane.

⁸Khu Abishai yavoolela Daudi, “Nyasaye ukhuheele tsingulu tsiu khukuura mutsiku wowo vutukhu vunu. Lekha muliviri ni lirimu lielie mwene nunundi mamuminili hasi lulala lwonyene vutswa ni lirimu lianje -- shinyala khumulivira hali khavili tawe!”

⁹Navutswa Daudi yavoola, “Ukhasalilitsakhu Saulu tawe. Ni katoto Mwami Nyasaye alasalilitsa woyo wosi usalilitsa mwami wewe wayavekha makura.”

¹⁰Daudi yavoola khandi, “Nzisuuhanga khuvirila mu lira liu Mwami Nyasaye uli mwoyo ndi Mwami Nyasaye mwene aliira Saulu haundi litukhu lielie liliitsa khutukha liu khukhutsa, inoho aliitsa khutsia khukwana nu khukhutsila mu liihe.

¹¹Navutswa saalanga ndi Mwami Nyasaye anzikalili mbuli khusalilitsa woyo wu Mwami Nyasaye yavekha makura. Lekha khuvukule lirimu lielie nende ichupa yeye ya matsi makhuruli hanu!”

¹²Daudi yavukula lirimu nende ichupa ya matsi himbi ha murwi kwa Saulu, manivarulaho nivatsia. Mundu avulakhuho walolakhu inoho khali wamanya kali nikakholeshe, inoho khali wavukhakhu mu tsindolo. Voosi vali vakoni tsindolo, shichila Mwami Nyasaye yali uvalombi khukona tsindolo tsinyishi muno.

¹³Khu, Daudi yambukha natsia khuluveka lundi lu luhoongo nasinjila ha vutoonje hi shikulu ihale wene muno; khwali nu vwiyangu vuvambalalu hakari havo.

¹⁴Daudi yalaanjilila khu vasikali va Saulu khandi khu Abuneri mwana wa Neri, “Abuneri, unyala khunjipa tawe?” Abuneri yamuchipa, “Ni viina ulaanjililanga navushitsa mwami?”

¹⁵Daudi yamuvoolela, “Abuneri, shiuli mundu witsingulu toto? Ni viina unyala khwilekhanyinya khu yivi mu shivala shia Vaisraeli? Shichila shina nukhalinda muruchi wowo, nali mwami? Mundu wundi yinjili mu maheemo nunundi niyenyanga khwiira muruchi wowo, nali mwami.

¹⁶Abuneri, kukholi shikali malahi tawe! Nzisuuhanga khuvirila mu lira liu Mwami Nyasaye uli mwoyo ndi yivi halala na vandu vovo mutushili khwiirwa, shichila shiumwalinda muruchi wenyu, wu Mwami Nyasaye yavekha makura ave mwami tawe. Heenzi mulole! Ni hena ha lirimu liu mwami nende ichupa ya matsi, yali nili himbi ha murwi kwekwe vili?”

¹⁷Saulu yamanyishitsa vulahi mwoyo kwa Daudi navoola, “Mwana wanje Daudi, nivi ulomolomanga toto?” Daudi yamuchipa, “Muruchi wanje nuli mwami, ninzi ulomolomonga.”

¹⁸Daudi yamuvoolela khandi, “Shichila shina yivi mwami wanje uhitsanyinyanga inzi murumishi wewe? Ni shina shiakholi, khandi nu vutamanu shina vwakholi?

¹⁹Nuyaanza hulishitsa ka nyenyanga khuvoola. Niiva Mwami Nyasaye neye uchilanga nuwenya khungwana, haundi musango kulamulomba akalukhanyinyi kakanakananga khwenya khukhola. Navutswa niiva vandu navo vakholi kenako, saalanga ndi valaamwi imbeli wu Mwami Nyasaye! Vakhunganyinyi khurula mu shivala shiu Mwami Nyasaye khutsia khusaala khu misambwa chi tsimbia tsindi mu shivala shindi.

²⁰Ukharikakhu nziirilwi mu shivala shi tsimbia tsindi, ihale khurula khu Mwami Nyasaye tawe. Shichila shina mwami wi shivala shia Israeli yitsi khwiira inzi uli khuli injii? Shichila shina ambitsanga inzi uli khuli linyonyi liumbulimu?”

²¹Saulu yamuvoolela, “Kholi vwoni. Mwana wanje Daudi, kalukha. Shinzitsanga khukhusalilitsa khandi tawe, shichila uhonyinyi vutukhu vunu vulamu vwanje. Mbele mundu muyiingwa! Kholi shindu shitamanu muno!”

²²Daudi yamuchipa, “Yivi mwami, lirimu liolio nalio yili. Ruma mundu mulala khu vandu vovo hanu khwitsa khulivukula.

²³Mwami Nyasaye arunganga yavo vali vasuuvilwa khandi vakholanga likhola liu vulunji. Ambeele nunundi tsingulu tsiu khukhukumila, navutswa shimbele nasalilitsa yivi wu Mwami Nyasaye yavekha makura ave mwami tawe.

²⁴Khuhonyinyi nunundi, khandi saalanga ndi Mwami Nyasaye aninde ma atsililile khuninda vulahi mu milembe.”

²⁵Saulu yavoolela Daudi, “Mwana wanje, saalanga Nyasaye akhukasitse! Ulakhola vindu viu khuchenyinya khandi ni katoto ulakuura.” Daudi yasimukha narulaho, ma Saulu nakalukha ingo.