Read tsotso SAMWELI 3 Bible Online

SAMWELI 3 - tsotso bible

SAMWELI 3

¹Mumatukhu kenako, lwa mwana Samweli yali narumishilanga Mwami Nyasaye, Eli namwivaalilanga khuli akhola mihinzilu, likhuva liu Mwami Nyasaye liali nilishili khuhulilikhanakhu; khandi malolo khurula khuye shikaliho manyishi tawe.

²Litukhu lindi vutukhu, Eli wali niyavekhula, yali nakoni isiisi wewe munzu mwemwe;

³Samweli yali nakoni mu Litempeli liu Mwami Nyasaye, ha Lisanduku li Lilakano litakatifu liali niliavikhwa. Lwa itaaha yali nishiakhanga, nuvushili khu shia mu mavwevwe,

⁴Nyasaye yalaanga Samweli. Samweli yachipa, “Ndi hanu!”

⁵Niyilukhaka natsia khu Eli, navoola, “Ndi hanu, shichila unanji.” Navutswa Eli yamuvoolela, “Shiali ninzi ukhulaanji tawe; kalukha utsi khukona.” Khulwa yako, Samweli yakalukha natsia khukona.

⁶Mwami Nyasaye yamulaanga khandi, “Samweli!” Samweli yavukha natsia khu Eli, navoola, “Ndi hanu, shichila unanji.” Eli yamuvoolela, “Mwana wanje, shiali ninzi ukhulaanji tawe; kalukha utsi khukona.”

⁷Samweli shiyali wamanyakhu Mwami Nyasaye tawe: khandi yali nashili khuvoolelwakhu likhuva liu Mwami Nyasaye.

⁸Mwami Nyasaye yalaanga Samweli lwa khavaka; ma Samweli navukha mu tsindolo, natsia khu Eli, navoola, “Ndi hanu, shichila unanji.” Eli yamanya ndi Mwami Nyasaye neye walaanganga mwana wi shiyayi mwenoyo.

⁹Nalwo lwa Eli yavoolela Samweli, “Kalukha utsi khukona tsindolo, khandi niiva alakhulaanga, khutukha uvoole, ‘Mwami Nyasaye, lomoloma, shichila inzi murumishi wowo mbulishitsanga.’ ” Khulwa yako, Samweli yasimukha natsia khukona tsindolo havundu ha yakonanga.

¹⁰Mwami Nyasaye yitsa, nasinjilaho; khandi nalaanga khuli yali namulaanji yolo, “Samweli! Samweli!” Samweli yachipa, “Lomoloma, inzi murumishi wowo mbulishitsanga.”

¹¹Mwami Nyasaye yavoolela Samweli, “Lola, ndi himbi khukhola shindu mu shivala shia Israeli shilitsa khukhola mundu ulihulila makhuva khulondokhanakhu alichenyinywa.

¹²Khulitukhu lienelo, niitsa khurweshitsila Eli shia shindu shiosi shitamanu shiu khurishitsa shia navoola shiliitsa khwikholekha khu vandu vi inzu yeye, muliraanga khutukha mulimalilikha.

¹³Mbele nimuvoolele ndi nzitsanga khusalilitsa vandu vi inzu yeye khumatukhu koosi, shichila vaana veve vi shiyayi valomolome vindu vitamanu khulondokhana khwinzi. Eli yali wamanya vakholanga kenako, navutswa yali wa yambakhana khuvakaya.

¹⁴Khulwa yako, nzisuuhilanga vandu vi inzu ya Eli ndi khali musango inoho shihanwa shivulakhuho, shinyala khurulitsaho vutamanu vurulananga khu vwoni vutamanu yuvu.”

¹⁵Samweli yakona mushitali khutukha mu mavwevwe; navukha niyikula miliango chi inzu yu Mwami Nyasaye. Yaria khuvoolela Eli malolo kenako,

¹⁶navutswa Eli yamulaanga navoola, “Mwana wanje, Samweli.” Samweli yamuchipa, “Ndi hanu.”

¹⁷Eli yamureeva, “Ni shina shiu Mwami Nyasaye akhuvoolele? Ukhambisakhu khali shindu shiosi tawe. Nyasaye alakhusalilitsa vululu muno, niiva ulambakhana khumbolela shia shindu shiosi shiakhuvoolele.”

¹⁸Khulwa yako, Samweli yamuvoolela shia shindu shiosi. Samweli shiyamuvisakhu shia shindu shiosi tawe. Eli yavoola, “Ye mwene nu Mwami Nyasaye. Lekha mwene akhole shialolanga ni shilahi khuye.”

¹⁹Lwa Samweli yali nashihindilanga, Mwami Nyasaye yali halala naye khandi narweshitsa shia shindu shiosi shia yali navooli.

²⁰Vaisraeli voosi, khuraanjila khuluveka lulala lwi shivala khutukha khu lundi, vamanya ndi ni kilikali, Samweli nu muprofeti wu Mwami Nyasaye.

²¹Mwami Nyasaye yatsililila khuloleshela mu litaala lia Shilo, ha yalolekha khu Samweli khandi nalomoloma khuye. Lwa Samweli yalomoloma, Vaisraeli voosi vamuhulishitsa.