Read tula Matta 12 Bible Online

Matta 12 - tula bible

Matta 12

¹We diko, n Yesu a suwe kuni alkamayu a difi̱kare ni̱bu Yafudame. Di̱ne chune, miyari̱m ki̱mu a le ki̱kiya ti̱changri alkamaitu ki̱kudu.

²Yo ni̱bu Farisamu a ku ti̱te, n chi a yi ki̱n ko, “Da̱ng miyari̱m mumu ki̱ma chi yilang a ko makitu difi̱kare ni̱bu Yafudam.”

³A ki̱nta chi ko, ta kibu chi n Dauda a ma ki̱dangu n ki̱n n ti fati̱bu ki̱mu a nwe chunanga?

⁴N Dauda n ti fati̱bu ki̱mu a le Kan Kwama na Wurchalimanu ki̱dangu chun a buwangu, a chau ki̱danne wu a nike we,[3] wu a no dakabu ka chadu yinangu yilangu a fwangu, ka fanseti a dakan ka chadu.

⁵Ka ta kibu we yilang Musangu yinangu fanseti ki̱ki yilang difi̱kare ni̱bu Yafudame we Kan Kwama di̱duna Wurchalimanu, ki̱chiru a ne ki̱lewenga?

⁶Mi̱n fwa chimi̱nu, nii wu a la kan Kwamane n we fi.

⁷Ka no ti̱yim chi ti̱kwa̱liyi ti̱tu ki̱yungditu ko, “Mi̱n bau ni̱r ki̱bune n ke niku ki̱tumangite.” A no ta swa̱babu bi̱bu yinang Kwamamu.

⁸Nangki̱n, Bwe Nii nang Tewuduwe difi̱kare ni̱bu Yafudam.

⁹N Yesu a du fiko a le di̱kan kan muraku ni̱bu Yafudam.

¹⁰Wuka nii we fiko wu fa̱la̱ngu a ngi̱rmane, yade n chi ki̱bau wa̱re wu ka tan Yesu ki̱ni ki̱le, a bi̱u Yesu ko, we yilangu, “A le ni ma nangang bekangu we difi̱kare ni̱bu Yafudam?”

¹¹N Yesu a yi chi ko, “Ka wukane chi̱n ki̱ni kwamiye, yinu a yar a bwir difi̱kare ni̱bu Yafudam, fangko a ne chakeda?”

¹²Nii a la kwami ki̱da yile? A le ni ma chi ti̱yilitu difi̱kare ni̱bu Yafudam n ti ki̱ku ni lekadu a lireku yili̱nangu.

¹³Yinu a yi nii wuko ko, “Tare fa̱la̱ngu. Nii wu a tar fa̱la̱ngu, fa̱la̱ngu a yati̱ li̱mangu yinang kangu fa̱la̱ng no wemi̱nang.”

¹⁴Aya ni̱bu Farisamu a chir, a yikan yaka dokadu yinangu n chi ka medu ka chi̱u Yesuwangu.

¹⁵Tiyangu n Yesu a swaan chitangu, a du fiko, ni̱bu nabwen a bunti̱ ki̱n we bwa a ya mi̱ne, n ki̱n a bera ni̱bi kwang.

¹⁶A ngau chimi̱nti̱ ki̱kure ko, “Ti̱fwaduwe ka m mi̱n n wure.”

¹⁷Ti̱tu a fwe ke a ri chitu fa̱ku Yichaya a fwaatu ko,

¹⁸“Bwe nangangemi, nang wu mang mi̱lane, wu a le ni̱r mi̱ne, mang ri ki̱nu ki̱ni Fi̱ki̱m mi̱mu, yinu mang mwata kuuti mi̱n bi̱yili̱mu.

¹⁹A ne kwila chi, a ne kukku keer ki̱nu. A ne le nelo ki̱ni didi̱kuni̱n.

²⁰Bi̱bu a ki̱tani̱mu n ki̱n ka tau chidu ki̱ni bwanu, yinang swa̱ku ki̱ku a bwa wuri̱mang. N ki̱n ka maka bi̱bu keku bi̱yili̱mang chiyangu ki̱bwadimu ka tidi ki̱ri̱ng, ka lami̱n ti̱n yo yile ka chau ki̱la we bwila.

²¹Di̱n ki̱nu ka kadu n nang fi kuuti ka yoon ni̱re.”

²²Yinu n chi a be ki̱mi̱ne ki̱ni wuka nii wu ki̱fi̱bti a tau a kubudi ki̱lwa̱bi̱dulwa̱be, n Yesu a be nii wu, ki̱kudi, ki̱fwati̱ ya̱mu.

²³Ni̱bi kwang a ya̱r yii, ki̱fwadu ko, “Wu nangki̱ bwe Dauda?”

²⁴Aya yo ni̱bu Farisamu a nwe ya̱m bi̱be, n chi a yi ko, “N ki̱n ki̱chaku ki̱fi̱bti di̱ne tikake Mai chi n Bayalsebul a ni dukan ko a ma ti̱te.”

²⁵Aya n Yesu a swan ti̱kuran chitu, a yi chi ko, “Ka bi̱ngai a le ti̱m ni̱bu me, yare a be we ti̱m bi̱ki̱mu. Ti̱nti̱ne, ti̱mu ki̱ma bi̱ngai mu, a ne ti kwiru.

²⁶Ka n Setan ki̱ kaka Setane, a yung n chi a newe fiwiine. Yaako ka tidi yire?

²⁷Ka mi̱n chaku ki̱fi̱bti ki̱ni dukan Bayalsebul ne, bi̱chimu ki̱chaki̱di dukan wuren? N chi ka mwata ya̱m chimu.

²⁸Aya ka mi̱n chaki̱ ki̱fi̱bti ki̱ni Fi̱ki̱m Kwamame, a yung Yaa Kwama a be chimi̱ne.”

²⁹A ne wu ka le lo naba dukane ka ma kuute we, ka a mwebu a kwababu nii we, yinu ka ya da ka ma kuuti̱te?

³⁰Nii wu a ne we ware n ti mi̱ne, fakware mi, nii wu a makaibu murke ki̱yaiyuyaiye.

³¹Di̱ne yiko mi̱n fwa chimi̱nu, ka nang wuwule ki̱le n ti swa̱bane, n Kwama ka du ni̱bu mi̱nu aya a ne du wu a swa̱ba di̱n Fi̱ki̱m Kwamane.

³²Kanang wuwule niye wu a tu Bwe Nii, ka du ki̱mi̱nu aya a ne du wu a swa̱ba Fi̱ki̱m Kwamame mi̱nu ki̱diya kwadu.

³³“Do tiyangu a le ka mun bau ti̱kulan ti̱yiliye. Ka tiyangu a lebe a ne tu chi ti̱yili. Ni swaan tiyangu a ti̱kulan ki.

³⁴Ti̱n soti yikwaniyu, ta medu ta fwa ti̱yiliti yire, kangu n ti̱n bi̱bwilamangu? Di̱ne ya̱mu bi̱bu a ni̱ri̱mu nang bi̱bu ki̱chire fi̱langi̱mu.

³⁵Nii wu yile, ki̱fwa chi ti̱yili ti̱tu n ki̱ni ki̱n a ni̱ritu. Wu bwila yiko ti̱n, ki̱chake ti̱bwilai ti̱tu a ni̱r ki̱ni.

³⁶Mi̱n fwa chimi̱nu, a mwintuwe ka nang bi̱bi̱le ya̱m bi̱kusum bi̱bu ni̱bu ki̱fwadi̱me, ka le kabaku we kakku Kwamangu.

³⁷Ti̱kwa̱liyi mwitu nang chi ka chaki̱nu, yinu n nanti̱ chi ka kaiyine.”

³⁸Yinu bi̱kam ni̱bu Farisa n ti ni̱bu yungku yilangmu a yi ko, “Naba yungke, ni̱n baddu mwang yung ni̱n chi ka̱ta̱ki ti̱tu ka kau ni̱mi̱n di̱mwali.”

³⁹N ki̱n a yi chi ko, “Di̱kalan di̱bwilan di̱du ki̱ma ka ti̱kuli n ke ni̱bu ni̱ri diini̱m we kakku Kwamangu! A ne di̱kan di̱mwal we di̱du a la di̱du a fa̱ku Yunanangu.

⁴⁰Yinangu n Yunana a ma ditiyi yitta kuko n ti kum we fur chi̱nge wuduwengu, we yiko ti̱n Bwe Nii ka ma ditiyu yitta kuko n ti kum we ni̱r ki̱ti̱mi̱nu.

⁴¹“We dimwatake ni̱bu Ni̱ni̱bemu ka kunu ware n ti di̱kalan di̱du. N chi ka mwata ni̱bu di̱kalan di̱di̱nu mi̱nu ko n chi bi̱bwilam, di̱ne n chi a wo ki̱ti̱m we di̱mwar Yunanangu. A ya wu a la Yunana ki̱ni dwiyene n nang wu.

⁴²We dimwatake, Cheba wuwiye Mai a ne kedu ki̱ni di̱kalan di̱du, ka yung chidu ko n chi bi̱bwilam, di̱ne n ki̱n a chire a bwa twa̱re ke be ki̱nwe dukan ya̱m yingku Mai Solomon. Aya mi̱n fwa chi mi̱nu wu a la Solomone we fi.

⁴³“Yo ki̱fi̱be wu bwila a chir we bwi niye, ki̱bwa̱ladu we fantiyu ki̱bau fi̱kaku. Ka a yaabe,

⁴⁴“N ki̱n ki̱yidu ko, ‘Mang ki̱lati̱ nii no mang swe mi̱ne we.’ Ka a be aya lo nga̱ra̱nge.

⁴⁵Ka ki̱ladu ka ka̱re yikai ki̱fi̱bti yi̱di̱bi̱n yiyu a la ki̱n ki̱ni bwilayu, ka le lo wu n ki̱n a fi̱rene ka sweduwe. We ki̱ku ki̱dang, da nii we ka kaiyadu ka la wu kake. Nang tiyangu ka fwedu ki̱ni di̱kalan di̱dangu.”

⁴⁶Yo a lekan ki̱fwa ni̱bu mi̱n ya̱me, kebu ki̱mu a lam fi̱lang. N chi a ke ka fwa ki̱mi̱n ya̱m.

⁴⁷Wuka we ni̱bu a fikomu a yi ki̱n ko, “Da̱ng! N ne mun n ti kebu mumu a fi̱lang. N chi ki̱baddu ka fwa ya̱m n ti mun.”

⁴⁸N Yesu a yi chi ko, “N Nemi nang wure? Kemi nang wure?”

⁴⁹A yung miyari̱m ki̱mu ko, “N nemi n ti kebu mi̱mu nang bi̱bu n ni̱n waremu!

⁵⁰Nangki̱n, wu ki̱tum ki̱ke Temi wu a diye, nang kebumi̱m n ti nemi.”