Read tula Matta 19 Bible Online

Matta 19 - tula bible

Matta 19

¹Yo n Yesu a ri fwaku ya̱mbi̱bange, a du Ka̱lili a yika bale Yafudiya, wu a kangu ba̱la̱ng we La Wurdune.

²Ki̱tuu ni̱be a bunti̱ ki̱n, a n ki̱n a bera chi we bwako kwang.

³We fiko, bi̱kam ni̱bu Farisamu a be ka swe ki̱nu, n chi a bi̱u ki̱n ko, “We yilangu a dakan nii ka chi̱u naye ko mi̱n ki̱na kasi no a wuwule ki̱lenga?”

⁴N ki̱n a yi chi ko, “Ta kiba? We tile bi̱rke, n Kwama a yo wubare n ti wuwiye?”

⁵Yinu a yi ko, ni ka du te ki̱n n ti ne ki̱n, ka tabadu n ti naye ko. N chi ki̱ni burako, a kabbi wiin!

⁶A lanta bwa kakke, n chi a neka kadi burau a ya ka kaddi wiin. We yiko, chi Kwama bwa̱be, wuka ni a yarkadu chi we!

⁷N chi a yi ki̱n ko, “Yinu a mayire m Musa a ru yilangu ko ni a ni naye ko lwangi̱n chiku ki̱nangu a kakane?”

⁸N Yesu a yi chi ko, “Di̱ne ni̱r chi̱ni ki̱ngki̱ngi̱nu, m Musa a ki̱nta chi ko ti̱chiu ki̱na aya a newe yiko we tile bi̱rke.

⁹A mwintuwe mi̱n fwa chimi̱nu, nii wu ka chi̱u naye ko mi̱n ki̱nange, ka n ke a di̱ne ti̱kuliye, ka yiu wuka naye, ki̱ma ti̱kuli ware.”

¹⁰Yinu miyari̱m ki̱mu a yi ki̱n ko, “Ka chiti ye we tibe kwarta n ti naye ko, a bunge ni a yidu naye we.”

¹¹Yinu a yi chi ko, ya̱m bi̱bu n ke ka nang wuwule niye ka da̱du, kana bi̱bu n Kwama a ke chi mi̱ni̱m.

¹²N Yesu a yi chi ko, “Ya̱m bi̱bu n ke bi̱bu a ni̱bi kwangi̱m di̱ne n Kwama a bi̱u bi̱kamu bi̱rabine, bi̱kamu bi̱bu a yangi fa̱la̱ng. Bi̱kamu a ke ka kau bi̱rabine di̱ne nangang Kwamang.”

¹³Ni̱bu a be ki̱ni bwesi̱mu a di̱Yesuwe ko ke a yo bwesi̱mu mi̱n delaku a twa̱ba̱ chimi̱nti̱n bunitu aya miyari̱m ki̱mu a kwabu ni̱bu a be ki̱ni bwesi̱mu.

¹⁴N Yesu a yi chi ko, “Ti̱du bwesi̱m bi̱ti̱ri̱mu a be bwa di̱mi̱ne. Ti̱nabaduwe, di̱ne Yaa Kwama n wu chi.”

¹⁵Yo a yo chimi̱n delake, a yikan ti̱n.

¹⁶We fiko bwele wu ki̱ni kuliye a be we di̱Yesuwe a yiko, “Naba yungke, mang ma ti̱ti̱le chi, ti̱tu ka yodu mang ya ti̱kuri ki̱diya kwadite?”

¹⁷N Yesu a yi ki̱n ko, “A mayire mun ma di̱bi̱du we chi ti̱yiliye? A ne chi ti̱yili we, ka n ke Kwama n ki̱kune. Ka mun baddu mwang ya ti̱kuri ki̱diya kwadite, mwang buntu yili̱ntu.”

¹⁸N ki̱n a yi Yesu ko, “Ti̱ti̱le yili̱n?” N Yesu a chakakku ko, “Chidu ni we, madu ti̱kuliwe, madu kutuwe, mwedu ti̱kwani we,

¹⁹Ni te mun n ti ne mun dwiyentu. Mi̱la bi̱bu ti̱swedu waremu tiyangu mwang mi̱la yimwiyangu.”

²⁰Yinu bwele a yi ki̱n ko, “M Bunti̱n yili̱nti kwang, a dumi wureni?”

²¹N Yesu a yi ki̱n ko, “Ka mun baddu mwang kau wu yile niye, yang feku kuli mwiti kwang, nika ti̱lusanitu mwan ya kulitu we bwa diye. Yinu bumite.”

²²Yo bwele a nwe ya̱m bi̱be, a yikan ki̱ni kaiyan ni̱re, di̱ne n ki̱n ki̱ni kulitu nabwen.

²³Yinu n Yesu a yi mi̱yari̱n ki̱mu ko, “Bi̱yili̱m mi̱n fwa chimi̱nu, ka kadu bawi naba kuli ka le Yaa Kwama.

²⁴Mi̱n fwa chimi̱n ti̱nu ki̱da, ka la chi twali̱m ka le bwang li̱bra n ti ki̱ku naba kuli ka le Yaa Kwamangu.”

²⁵Yo miyari̱m a nwe ya̱m bi̱be, n chi a ya̱r yi, a yiko, “Ka chitu ka fwediye n wure ka ya swiki̱ku.”

²⁶N Yesu a da̱ng chi ri̱i̱ng a yiko, “We ni̱bu a ne fwedu, aya we di̱Kwama chitu kwang ka fwedu.”

²⁷M Biti̱r a yi ko, “Yinu Ki̱ka̱ngu nang du chitu kwang ke ni̱n bumi̱ti̱nangu, kano nang ya wureni?”

²⁸N Yesu a yi chi ko, “Bi̱yili̱m mi̱n fwa chimi̱nu we ki̱dangu ki̱bedangu, we ki̱swi Bwe Nii ka swedu we yaako wuduwe n ti̱n bi̱bu ta buntu mi̱ni̱mu, nang bi̱bu ta swedu a ki̱di̱ng mwataki̱mu, ta mwata kutiyi kub chiri yurabu a Yisrela mi̱nu.”

²⁹Yinu ni wu a du loko n ti kebu ki̱mu bi̱bari̱mu, ka bi̱wuti̱me, ka n te ki̱ne, ka n ne ki̱ne, ka bwesi̱me ka kuniye di̱ne mi̱ne, ka ya chi a la kulite, yinu ka yati̱ ti̱kuri ki̱diya kwaditu.

³⁰Aya bi̱bu ki̱kudu ko n chi, chi la chimu ka kau bi̱ti̱ri̱m, yinu bi̱bu ki̱kudu ko n chi bi̱ti̱ri̱mu ka kau bi̱bu a la chiim.