Read tula Matta 20 Bible Online

Matta 20 - tula bible

Matta 20

¹Yaa diye a chirkami̱n n ti telo, wu a kun ki̱ni si̱n ki̱bau ni̱bu ka ma ki̱mi̱n nangang we ku yinabe.

²Kangu n chi a doka ka̱mbi̱r surenangu, a tung chi we ku ko.

³A ki̱la chirtewe yo ki̱swi turkubu a lame, a ku bi̱kam we fi a kwa̱ma̱re a mabu chi.

⁴A yi chi ko, ti̱yati̱ ku yinabe mi, mang fe chi a dakanitu. Yo bi̱bu a yikane,

⁵A ki̱la chirtewe ki̱ni kuko yo awa a fi yitta a yal bi̱kam ni̱bu nangam.

⁶Yo ki̱swi a fi yunuwe a chirtewe ti̱n, a ku bi̱kam a tiran a mabu chi, a yi chi ko, “A mayire ta mabu chiye?”

⁷N chi a yi ki̱n ko, “A ne nangang we.” A yi chi ko, “Ti̱ya ku yinabe mi.”

⁸Yo di a le, naba lo kuu yinabe a yi wu ki̱da̱ng ki̱mi̱n nangang kuwange ko yale ni̱bu nangangmu, fe chi sure chi, mwetuwe wu a ya kutenge n swanti̱n a wu a mwe beke.

⁹Bi̱bu a be we ki̱swi yunuwemu, n kawure yiu sure ko chi a tabe.

¹⁰Yo bi̱bu a be kaki̱mu a kuwe, a da̱u ko kate chi ya chi a la ti̱te, n chi a ya a lakanbu.

¹¹Yo a yiu di̱chi̱ne, a fwireni ki̱ni telo.

¹²Ki̱yidu ko, “Bi̱bu n chi a be kutemu a awa wiin, a mayire ka yadu a fi wiine n ti ni̱n bi̱bu nang di kuko kwadu we sureme.”

¹³Aya a ke wuka ni mi̱ni wiin we tibe chi a yi ko, fate mang suli̱nbu, di̱ne ni dokan kangu mang fenu we ka̱mbi̱r surenangu.

¹⁴Yiu ti̱mwitu yika lomo. N ke mang ni bi̱bu a talawemu a fiwine ware n ti mun.

¹⁵N ne dawe mang ma chi mang ku diye ki̱ni ka̱mbi̱r mi̱na, ka mun ma ki̱fwini ki̱ni ki̱li̱mang manga?

¹⁶“We yiko, bi̱kaki̱mu ka swan kuteng, bi̱bu a kutemu ka ti kakku.”

¹⁷Yo n Yesu n ti miyari̱m ki̱mu kub chiri burabi̱mu yaki̱ fi̱l bwa Wurchalima, a ti a ki̱ti̱ku a yi chi ko,

¹⁸“Kangu ni yika Wurchalima yangu, Bwe Nii yaka le Fa̱li wuduwe fansetiye n ti ni̱bu yungku yili̱ni̱m, n chi ka mwata ki̱mi̱n ya̱m bwam.

¹⁹N chi ka tau ki̱nu ka ni kuuti, n ke ni̱bu Yafudamiyu, n chi ka ma ki̱mi̱n ki̱fiye, ka twalati̱ ki̱nu, yinu ka kuti̱ ki̱nu a ki̱tiyang bwangu, we di wu tare ka kukku ki̱nu we furu.”

²⁰Yinu ne bwesi̱m Sa̱badime a be we di̱Yesuwe n ti bwesi̱m ki̱mu, a sung we kakku kangu a bi̱u makaku.

²¹N Yesu a bi̱u ki̱n ko, “Mun bau wureni?” A ke ko, “Ke mi bwesi̱mi burabi̱mu ka swedu wuka a kang ki̱yilang, wuka a kwantakwelang we yamo.”

²²Aya n Yesu a yi bwesi̱mu ko, “Ta yimbu chi ti̱bi̱ditu, we ta yin no ki̱dangu mang nodanga? N chi a ke ki̱mi̱n ko, Chi medu.”

²³A yi chi ko, “Ta yin no ki̱dangu aya sweki̱ku a kang ki̱yilangu ka kwatakwelange n ke ti̱tu m mi̱n mang nidi. Aya n Temi a tu a do chi mi̱n.”

²⁴Yo bi̱kamu miyari̱mi kubu a nwe ya̱m bi̱be a fwiren ki̱ni kebu bi̱bi burabi̱mu.

²⁵N Yesu a yale chi ki̱ni kwang a yi ko, ti yim mati̱m yikayu kuuti ki̱ni dukan we dur chi̱nu, yinu tikaketi chiyu ki̱yung ti̱nu we dutu chiitu.

²⁶We di̱chi̱ne, a newe yiko aya ka nang wuwule niye wu a ke ka kau wuduwe we di̱chi̱ne, ka kau bwe nangang change.

²⁷Aya wu ki̱baddu ka kau wuduwe we tibe chi̱ne, ka kau ka̱be chi̱n.

²⁸Yinangu Bwe Nii, a bebu ko ke ki̱yiu dwiyen, aya ke ki̱kau bwe nangang, ka ni ti̱kuri kitu di̱ne ka tu ni̱bu nabwen.

²⁹Yo n Yesu n ti miyari̱m ki̱mu a chir we Yeriko, ki̱tuu ni̱be nabwen a bunti̱ ki̱n.

³⁰Bi̱kam ki̱dubi burau bi̱bu ki̱swedu a wa̱remu. Yo a nwe ko n Yesu ki̱sude, n chi a yal chitu ki̱ni keru dukan ko, “Tewuduwe, Bwe Dauda, nwe ki̱bune ni̱n.”

³¹Ki̱tuu ni̱be a kwabu chi ko a lemi̱n. Aya n chi a su keru sube ki̱yalu ko, “Tewuduwe, Bwe Dauda nwe ki̱bune ni̱n!”

³²N Yesu a ti a bi̱u chi ko, “Ti̱bau wureni?”

³³N chi a yi ki̱n ko, “Tewuduwe, ni̱n baddu na kudi.”

³⁴Di̱ne ki̱bune, n Yesu a twai kwalangi chiyu. Bi̱nabi̱na n chi a kuti̱di, a bunti̱n ki̱n.