Read tula Matta 22 Bible Online

Matta 22 - tula bible

Matta 22

¹N Yesu a ki̱la fwa chimi̱n ti̱n ya̱mu ki̱ni baltaku, a yi ko.

²Yaa diye a chir kami̱n ti wuka mai wu ki̱badu ka ma bweko mi̱n ye ki̱nai.

³A tum kabi kiyu ko a yala ni̱bu bi̱bu a ya di̱yal we ki̱namu, n chi a ko a bebu.

⁴A ki̱la tum ti̱n bi̱kam kabi a yi ko, “Ti̱fwa bi̱bu ni̱bu a ya di̱yalmu mi̱n ko, ‘N tu n do chabti̱tu, n bita tanti̱kai yiyiliyu, n do chiti kwang ti be fi a ki̱na!’ ”

⁵Aya n chi a swa̱ba ki̱n, n ka wure a tau wuko wa̱re a yika ti̱n, wuka a yika kuko, wuka a yika kwa̱ma̱r.

⁶Bi̱kamu n chi a tau ka̱biyu a ngau, a chiti̱ chi.

⁷M mai a kai ni̱ru nabwen. A tum ni̱bu kuni̱mu ko a chiben bi̱bu ki̱kau duti̱mu, a twiti̱ bi̱nchinu kwang.

⁸Yinu a yi kabiki̱yu ko, doku ki̱nangu a ri aya bi̱bu a ya di̱yalmu a lwebu.

⁹Di̱ne yiko, ti̱bunti̱ wa̱riyu, ni wu ta yade kwang, ti yale a be ki̱na.

¹⁰Ka̱biyu a yikan we wa̱riyu a mure ka wuwule niye bi̱yili̱mu n ti bi̱kwani̱mi kwang, ki̱na a ri ki̱ni rungko chib.

¹¹Kangu m mai a le ki̱da̱ng ki̱nangu a ku wuka nii we mure wu a dobu luke ki̱na.

¹²A yi ni wu ko, fate a mayire mwan le mure mwang dowebu luke ki̱nange? Aya ni wu a kwalla chi ka fwaditu.

¹³Yinu m mai a yi ka̱biyu ko, ti kwau nii wu we Fa̱liyu n ti nani kiyu, ti̱mar ki̱n a ki̱liki̱liye wu kwane, we bwako ka ki wii ti ki̱rtiki̱ numang.

¹⁴Ni̱bu nabwen a ya di̱yalu, bi̱suti̱ri̱mi bayim.

¹⁵We fiko ni̱bu Farisamu a yikan, n chi a do kangu n chi ka si ki̱mi̱n la̱n we ya̱m ki̱mangu.

¹⁶N chi a tum miyari̱m chimu n ti bi̱kam ni̱bu Yirudu ko a yi ki̱n ko, “Tete ni̱n yim mun tum bi̱yili̱m, mun yungti̱ bi̱yili̱mu we wa̱re Kwama, ni̱bi kwang a fi wiin we di̱mune, di̱ne mwang swabu ni̱bu swabe.

¹⁷N fwa ni̱mi̱n, a dakan nang ni kaisar sangkala, ka ni̱n nidu wenga?”

¹⁸Aya n Yesu a swaan muli̱n chi̱nu a yi ko, “A mayire ti sweyu n ti̱n ni̱bu di̱bebeli̱me?

¹⁹Ti̱yungi ka̱mbi̱ru ti feen sangkali̱nu.” N chi a be ki̱mi̱ne ki̱ni ki̱nu ka̱mbi̱re.

²⁰A yi chi ko, ki̱wulang ki̱ku n ti di̱n di̱du n di̱wure?

²¹N chi a yi ki̱n ko, n di̱kaisar, yinu a yi chi ko ti̱tu n ti̱u Kaisaritu ti̱ni Kaisar aya ti̱tu n ti̱u Kwamatu ti̱ni Kwama.

²²Kangu n chi a nwengu a ya̱r yii, n chi a du ki̱n a tau ware chi a yikan.

²³We di wuko, bi̱kam ni̱bu Sadukiyamu, bi̱bu ki̱yidu ko a ne kungku kwa̱miyang wengu, a be we di̱Yesuwe, a bi̱u ki̱n.

²⁴N chi a yi ko, “Tete, m Musa a yi ko, ‘Ka nii a bwa a ne bwe wenge, keko ka na naye ko ke a bi̱u ki̱mi̱n bwesi̱m!’

²⁵Yinu bi̱kam kebu we bi̱dibiin bwesi̱m nii wiini̱m. Wusele a yiu naye, n ki̱n a bwa a yobu duumu, keko a be ki̱na naye.

²⁶A fwe yiko ti wu robe, ti wu tare, a lanti̱ wu ni̱bine.

²⁷A kutengu n chi a bwaranangu, naye wu a bwa ti̱n.

²⁸We kabaku kwa̱mingu naye wu ka kau wu wure we tibe chi wu bi̱di̱bine. Di̱ne n chi ki̱ni kwang a na naye wu.”

²⁹N Yesu a ki̱nta chi a yi ko, “Ti̱lele we ti̱kuran chi̱ntu, di̱ne ta yimbu ya̱m Kwamamu n ti dukan ki̱nu.

³⁰Di̱ne we kunki̱ kwamiyangu, kwartabu a ne ka ma ki̱na, nati̱bu a ne ki̱na we ti̱nti̱n aya chi ka chirkadu ti ni̱bu ti̱tumbi̱ri Kwamam.

³¹Aya we kunki̱ Kwa̱miyangu, ta kibu chi ya̱m Kwamamu a fwa chimi̱ni̱nta? A mwal ko,

³²Mi̱n nang Kwama wu Yibrayime, Kwama wu Yichaku n ti Kwama Yakubu we. N ki̱n Kwama ni̱bu ti̱kurime n ke wu a kwa̱miye.”

³³Kangu ni̱bu a nwe yikongu, n chi a ya̱r yii we yungku kangu.

³⁴Yo ni̱bu Farisamu a nwe n Yesu a rii ki̱ni ni̱bu Sadukiyamu, n chi a mur dutu chitu.

³⁵Wuka naba yungku yilange we tibe chi, a swe Yesu ki̱ni di̱bi̱du.

³⁶A yiko, “Tete, ki̱ki̱le yilang a la chi we yili̱ntu?”

³⁷N Yesu a ke ki̱mi̱n ko, “ ‘Mi̱la Kwama Tewuduwe ki̱ni ni̱r muni kwang n ti ti̱kuri mwitu n ti yingku mwangi kwang’

³⁸Ki̱ku nang yilang ki̱ka̱ra̱ngu, nang ki̱duwangi kwang.

³⁹Ki̱robangu yilang tiyang ki̱kakkangu ti̱n, mi̱la kemo tiyang yimwiyu.

⁴⁰Aya yili̱n ti̱tu n ti miyaku fa̱kuti kwang a swe we yili̱n ti̱ti turabitu.”

⁴¹Yo ni̱bu Farisamu a muran a fiwiine, n Yesu a bi̱u chi.

⁴²A yi ko, “Ti̱kuran chi̱ntu m Masiya bwe wure?” N chi a yi ko n ki̱n Bwe Dauda.

⁴³N Yesu a yi chi ko, yire wu n Dauda a yal ki̱n we Fi̱ki̱m Tewuduwe mu? A yi ko,

⁴⁴N Tewuduwe a yi Tewuduwe mi ko, “Swenga kan ki̱yilang mangu, ka lami̱nti̱n yo fakwarbu mi̱mu ka kau ka̱bi mwiye.”

⁴⁵Ka n Dauda ki̱yal ki̱nu ko, Tewuduwe, a mayire n ki̱n ka kau bweko?

⁴⁶We dii wuko a ne nii a ki̱l ki̱mi̱n ya̱me we. A ne nii a ki̱la ma ki̱mi̱n ti̱n di̱kan di̱bi̱de we.