Read tula Matta 23 Bible Online

Matta 23 - tula bible

Matta 23

¹Yinu n Yesu a yi ki̱tuu ni̱be n ti miyari̱m ki̱mu ko,

²“Ni̱bu yungku yilangmu n ti ni̱bu Farisamu nang bi̱bu ki̱ni dukan di̱du ka miya yili̱n Musati̱mu.

³Di̱ne yiko, ti̱ma chitu a yi chinitu, ti̱bunti̱ yili̱ntu, aya ti̱madu nangi̱n chitu we, di̱ne n chi a mabu chi ki̱fwaditu.

⁴N chi ki̱yo ni̱bu ki̱ma chi ki̱ni bware, aya n chi a kebu ka madu kasi no ka twayu ki̱ni bewure.

⁵N chi ki̱ma nangi̱n chi̱ntu ko ke ni̱bu a ku ko we chi madu, ki̱bwa̱ba ti̱labti̱ri ya̱m Kwamami we kabi̱ni chiyu ki̱ dorati̱ lukeyu ki̱yung dwiyeni.

⁶N chi ki̱bau kana fanti sweri yidui we fi a yeniye n ti fanti yidui we kambi muraki̱ Kwamatu,

⁷ki̱bau di̱siir dwiyeni̱n kasi no a kwa̱ma̱r, ki̱badu ni̱bu a nang yal chidu ko, ‘Tete, naba yungke.’

⁸“Aya ti̱kedu ni̱bu a yal chi̱nu we ko ‘naba yungke,’ di̱ne Tete chire wiin, ti̱ni kwang kana kebu.

⁹Ti̱yalu wuka nii we ti̱ti̱nitu ko ‘Naba yungke,’ di̱ne Te chire wiin, n ki̱n nang wu a diye.

¹⁰Ti̱keti̱nu di̱yalu ko ‘naba yungke,’ di̱ne wu kake chi̱ni wiin nang Masiya.

¹¹Wuduwe we tibe chi̱n ka kau ka̱be chi̱n.

¹²Kanang wuwule niiye wu ka ri̱ka yikiye, ka kwala ri̱kaki̱ku, wu ka si̱ku dur ki̱ne, ka ya ri̱kaku.

¹³“A no chi̱n, ni̱bu yungku yili̱nmu n ti ni̱bu Farisamu, ni̱bu di̱bebelin! Di̱ne ti yinge ni̱bu mi̱n Yaa Kwama. N ti̱n ta leti̱bu, ti̱dangti̱ bi̱bu ki̱baddu ka ledi̱mu.

¹⁴[A no chi̱n, ni̱bu yungku yili̱nmu n ti ni̱bu Farisamu, ni̱bu di̱bebelin, di̱ne ti̱da̱u nati̱m buni̱mu mi̱n chitu n chi ki̱nitu, twa̱ba̱bune chi̱n a lebu ni̱ru, riye n Kwama ka ni chi̱ne ka la bi̱kamu.]

¹⁵“A no chi̱n, ni̱bu yungku yili̱nmu n ti ni̱bu Farisamu, ni̱bu di̱bebelin, ti̱yabbu Wima, ti̱ya fantiyu kutani ke ti̱ya wu ka wo ki̱ti̱me. Yo ta yange ti̱ mul ki̱nu a la chi̱n ki̱ni bwila kwang.

¹⁶“A no chi̱n, tikaketi ki̱dubu! Ti̱yidu ko, ‘Ka ya wu ka twa̱m chi ki̱ni Kan Kwamana Wurchalima ne, a ne ki̱lewe, aya wu a twa̱m chi ki̱ni si̱nariya a Kan Kwama ne, a mwintuwe kama chi n ki̱na twa̱mitu.’

¹⁷N ti̱n di̱bu ki̱dubi̱mu! Ti̱ti̱le a la chi, si̱nariya ka Kan Kwamanu a yo wauwade si̱nariyana?

¹⁸Ti̱fwa ti̱n ko, ‘Wu ka twa̱m chi ki̱ni se Kwama a mabu chi, aya wu a twa̱m ki̱ni ni ki̱ku a se Kwamange, a kau di̱twa̱mbi̱r di̱tabi̱ri̱n.’

¹⁹“N ti̱n ki̱dubi̱bu! Ti̱ti̱le a la chi, niki̱ka, ka se Kwama wu a ni ki̱ki wauwada?

²⁰Di̱ne yiko, wu a twa̱m ki̱ni se Kwama, a twa̱mi ki̱ni chi a dur ki̱nitu ti̱nti̱n.

²¹Aya wu a twa̱m ki̱ni Kan Kwamane, a twa̱mi ki̱n, a twa̱m ti̱n ki̱ni Kwama wu ki̱sweduwe mure.

²²Aya wu a twa̱m ki̱ni diye, a twa̱m ki̱ni dwiyen Kwamatu n ti wu a swe we.

²³“A no chi̱n, ni̱bu yungku ti̱ka yili̱ni̱mu n ti ni̱bu Farisamu, ni̱bu di̱bebelin. Ti̱ni wu wiine we kube we kuli̱n di̱du ki̱ni lwangi̱n yinang kwekwe. Aya ti̱du bunti̱ku kasi yilang ti̱duitu yinang bi̱yili̱m n ti ki̱bune n ti bwanu. A no dakan ta ma ti̱tu, a ne ti̱kati kwang.

²⁴N ti̱n bi̱bu ki̱wuba ki̱dubi̱mu! Tadubu ki̱yunge a subu kwa̱ri̱m we nori̱ntu aya ti̱mi twali̱m!

²⁵“A no chi̱n, ni̱bu yungku yili̱ni̱mu n ti ni̱bu Farisamu, ni̱bu di̱bebelin. Ti̱nura kuteng kwa̱sengu ka chibenge, aya we bwa mure a rii ki̱ni ka ki̱fule ti bwila.

²⁶Ki̱dubu ni̱bu Farisamu! Ta mwedu ta nura mure kwa̱se yinang, ke bwa kute a le.

²⁷“A no chi̱n, ni̱bu yungku yili̱ni̱mu n ti ni̱bu Farisamu, ni̱bu di̱bebelin! N ti̱n yinang futu ti̱tu a lelei we bale fi̱lange aya mure a ri ki̱ni ti̱kutu kwa̱mi n ti dutu dangtidangti.

²⁸Yinu yiko ti̱n, we a tibe ni̱be, ti̱yungdu tiko n ti̱n ni̱bu yilem aya we bwa mure ti ri ki̱ni di̱bebelin n ti muli̱n.

²⁹“A no chi̱n, ni̱bu yungku yili̱ni̱mu n ti ni̱bu Farisamu, ni̱bu di̱bebelin! Aya ti̱muba fa̱kuti mi̱n futu, ti̱dosa futu ni̱bu yile.

³⁰Ti̱yidu tiko, ‘Ka a no ni̱n we ki̱swi tukebu ni̱me a no nang chibebu fa̱kubi̱bu!’

³¹We yiko, ti̱yung tiko n ti̱n nang bwesi̱m ni̱bu bi̱bu a chiben fa̱kubu.

³²A ri fal, ti̱swan nangitu tukebu chimu a mwentu!

³³“N ti̱n sotiyu! N ti̱n beti̱ soti bara̱ka̱m! Ka madi yire ta swidu we far ki̱rangi̱ne?

³⁴Di̱ne yiko, mi̱n tum chimi̱ne fa̱kubi̱bi n ti ni̱bu yungki̱m n ti ni̱bu mwataku. Bi̱kamu ta chidu ta kuda ki̱yang bwang, bi̱kamu ta twaladu we kambi muraku chitu yinu ta bunti̱du we binti̱tu.

³⁵“Di̱ne yiko, ti̱welan ki̱tum ni̱bu yile mi kwang ka ki̱la dutu chi̱n, ka mweti̱nuwe ki̱tum Abila naba yile ka lanti̱na Sakariya bwe Barakiya, wu ta chi̱u a tibe fi wauwade n ti se Kwama wa twike.

³⁶Bi̱yili̱m mi̱n fwa chimi̱nu ti̱welan ni̱bu bi̱bu a kau dutumu ka wuran bwi ki̱ni di̱kalan di̱du.”

³⁷“Wo, Wurchalima! Ti̱chibe fa̱kubi̱bu, ti̱kwelati̱ bi̱tumbi̱ri̱mu n Kwama a tum chimi̱nemu. Ki̱da yile mi̱n baddu mang mur chi̱nu yinangu na yibbe ki̱mur bwesi̱m ki̱mu a ti̱ki̱ni kiyangu aya ta kebu.

³⁸Kan Kwamana Wurchalima ka di̱ngledu, kano a ne ni we!

³⁹N fwa chimi̱n, a mwetuwe diwu, a ne ta kui ti̱nu ki̱da ka lami̱nti̱ yo ta yidu ko, ‘Kwama a dela ki̱n wu ki̱bedu a di̱n Tewuduwe ne.’ ”