Read tula Matta 24 Bible Online

Matta 24 - tula bible

Matta 24

¹N Yesu a chir we Kan Kwamanu ki̱yikadu, miyari̱m ki̱mu a yal ki̱n, a yung leran mukku a Kan Kwamanitu.

²N Yesu a yi chi ko, “Ti̱da̱ng leran mukku Kan Kwamanu. Bi̱yili̱m mi̱n fwa chimi̱nu, a ne du wuka kale a di a keko, ka wuredu ki̱ni kwang.”

³Yo n Yesu a swe a Kun setune, miyari̱m ki̱mu a be n chikun a yi ko, “Fwa ni̱mi̱n, ti̱tu ka fwedi fere? Wureni ka kau di̱mwal beki̱nu n ti di̱du a di swan kuten.”

⁴N Yesu a yi chi ko, “Ti̱ma daan, wuka ni a buti̱du chi̱n we.”

⁵Ni̱bu nabwen ka bedu a di̱n mi̱n, ka ni̱n yi chi̱nu ko, “Ni̱n nang Masiya.” Ka butu ni̱bu nabwen.

⁶Ta nwe ya̱mi kumbiyu n ti dirdi kunin ya̱mi kumbiye n ti yo kumbitu yaka fwede, ti̱wulu tayi we, a mwituwe ti̱tu ka fwedu, aya n ke di swan kute ti̱ti̱niye.

⁷Kuu ka kuladu n ti kuu, yaa ti yaa, chun ka ma ni̱bu, ti̱mu ka mi̱kadu a fantiyu dangtidangti.

⁸Aya ti̱tu mweku, riye siine a tibu bedu.

⁹Ka ni chi̱nu a fa̱li ni̱bi, ke a ni chi̱n riye, ka chi̱u chi̱nu, kuuti nabwen ka ko chi̱nu di̱ne mi̱n.

¹⁰We ki̱dang kangu, nabwen ka ki̱ladi kuteng we keku bi̱yili̱mang chiyangu, ka kwa̱l yichiyu, ka koti̱ yichiyu.

¹¹Fa̱kubu ti̱kwanimu nabwen ka chiredu, ka butu ni̱bu nabwen.

¹²Di̱ne nabwe muli̱ne, nabwen ka du mi̱laku kebu chimangu.

¹³Aya wu ka mu ni̱ri ki̱ri̱ng ka lami̱nti̱ di swan kute, ka swidu.

¹⁴Ti̱nti̱ne, ya̱m bi̱li̱m bi̱bu a Yaa Kwama, ka le ki̱teli kuuti ni̱bi kwang, yinu di swan kute ka bedu.

¹⁵Ta ku chi danduri ti̱bwilai ti̱tu fa̱ku Kwama n Daniyal a fwaatu, a ti we fi wauwade, ni ki̱kide a swaan.

¹⁶Bi̱bu a Yafudiyamu a wul kunni.

¹⁷Wu a fi̱lang ki̱fi̱kadu a kane, a lewedi̱ lo we ko be ka da̱u chi a tarre.

¹⁸Wu a kuuwe, a ki̱ladu we ko beka da̱u luke ko.

¹⁹A no nati̱bu ki̱ni lubimu n ti bi̱bu ki̱bwa̱u bwesi̱m mi̱mu we ki̱swi wuko!

²⁰Ti̱twa̱ba̱ bunitu ke bananiyu a kaduwe sa̱na̱ng ka difi̱kare ni̱bu Yafudam.

²¹Di̱ne we ki̱swi wuko, riye wu a fweenbuwe yo ti̱ti̱nitu a mwe lanta ki̱kang, duum ki̱mu a ne fweenti̱nu we.

²²Ka no n ke di̱ne a ki̱tu ditikiye, a no a ne ni wu a ti̱m ka swide we. Aya di̱ne bi̱kamu bi̱suti̱ri̱m Kwamam ka ki̱ti̱n diti chiyu.

²³We ki̱swi wuko, ka wuka ni ka ya̱nu ko, “Da̱ng Masiya, nang we! Ti̱keduwe.”

²⁴Nangki̱n, ni̱bu Masiya ti̱kwanimu n ti Fa̱kubu ti̱kwanimu nabwen ka chiredu, ka yung chi ya̱r yiitu nabwen, ke chi butu ni̱bu kono nang bi̱suti̱ri̱mu, ka no medu ka fwede.

²⁵Ti̱da̱ng, n fwa chimi̱ni fi̱la.

²⁶“Di̱ne yiko, ka bi̱kam ka yi chi̱nu ko, Masiya nang wu a di̱kire a bwa, ti̱keduwe. Ka, ka yidu ko, a bunge, ti keduwe.”

²⁷Nangki̱n, tiyangu ki̱yile a yile we bwa twa̱re ki̱swanati̱nu a ki̱twalengu, nang tiyangu Bwe Nii ka ki̱la mi̱nedangu.

²⁸Fi kwa̱me we mi̱ne, nang fi ki̱sungti̱ kwasi ki̱murande.

²⁹A kuteng riyengu, bi̱nabi̱na dii a ne yii kuko, swangu a ne ka fwiyedu. Ki̱switiyu ka twakadu we dii, dukan kwali̱n chi̱nu a twiyenu ka mi̱kadu.

³⁰A kuteng ki̱ku, Bwe Nii ka fwedu we twiye. Ni̱bu we kuuti ti̱ti̱ni yi kwang ka ma furi ki̱liki̱li. N chi ka ku Bwe Nii ki̱bedu a di̱twin ki̱ni dukan n ti dwiyen ti̱dui.

³¹Ka tume ni̱bu ti̱tumbi̱ri ki̱mu ka ku sum ki̱ni dukan, n chi ka mure bi̱suti̱ri̱m Kwamamu we twa̱ru n ti ki̱twale n ti twa̱r wuli̱nu n ti kir kulanu.

³²Ti̱miyan we tiyang sinangu. Yo ki̱yange a mwe ki̱sutedu, ki̱twaba lwangi̱n ti̱fwiye. Ti̱yin ti̱nu tii didi̱be a lame.

³³We yiko, ka ti̱ku ki̱chiti̱wu mang fwa chimi̱ne, ti yim ki̱swi a mwatawe, a tu a lame kwa̱r.

³⁴Bi̱yili̱m mi̱n fwa chimi̱nu, di̱kalan di̱du a ne sudu, ki̱chitu wu kwang a mwintuwe ka fwedu.

³⁵Dii n ti ti̱mu ka sudu, aya di̱kwa̱l yii mi̱nu a ne yara ti̱m.

³⁶A ne nii a yim dii n ti awa wu ti̱tu ka fweende we, kasi no nang ni̱bu ti̱tumbi̱rimu, kasi no nang Bwe, kana Te n ki̱kun a yim.

³⁷A lakanbu n ti ki̱dang Nufuwangu, beki̱ Bwe Nii kanodi yiko.

³⁸Yinang ki̱dang kangu, yo mwe bambi̱li̱me a tibu bede, ni̱bu ki̱chadu, ki̱nodu, kwartabu ti nati̱bu ki̱ma ki̱nati a lami̱nti̱ yo n Nufu a le kwa̱mbi̱re mwe.

³⁹N chi a yimbu chi ki̱fweditu, mwe bambi̱lake a be a wo chi kwang. Nang tiyangu di Bwe Nii ka ki̱lade kanodu we mi̱nangu.

⁴⁰We ki̱swi wuko, ni̱bi burau kanodu a kuu, ka da̱di wiin ka dudi wiin.

⁴¹Nati̱bi burau kani̱n kwa chaam ware, ka da̱du wiin, ka dudi wiin.

⁴²Di̱ne yiko, “Ti̱swe ki̱ni doku bwiyang di̱ne ta yimbu di Tewuduwe chi̱n ka ki̱la mi̱nede.

⁴³Aya ti̱yim, ka naba lo a no yim yo daaku ka bedu ki̱ni kume, a no neka da duum ki̱ni kum ka ma ki̱yolang, a ne dudu ko daaku a le lo.

⁴⁴Di̱ne yiko, ti̱swe ki̱ni doku bwiyang, di̱ne a ki̱swi ta yimbe Bwe Nii ka ki̱ladu.”

⁴⁵N wure ka̱be wuyile ki̱ni yingku, wu Tewuduwe a yo ka to lo, yinu ki̱ni bi̱kamu ka̱bi chabti̱tu a ki̱swi a dakane?

⁴⁶Naba delake ka̱be wu Tewuduwe ko beka ya ki̱nu we yii nange di ka ki̱lade.

⁴⁷Bi̱yili̱m mi̱n fwa chimi̱nu, ka yo ka̱be wu kani̱n da̱ng ki̱mi̱n kuli̱n ki̱ni kwang we lo.

⁴⁸Aya ka ka̱be wubwila, a kur we ni̱r ki̱nu ko, Tewuduwe ko a ne ki̱ladi datu.

⁴⁹N ki̱n a le ki̱basu kal ki̱nu ni̱bu nangangi̱mu, ki̱chadu, ki̱nodu n ti ni̱bu ti̱norani̱mu.

⁵⁰Ka n ki̱n a ma yiko, Tewuduwe ko ka bedu a di n ti ki̱swi n ki̱n a yimbe.

⁵¹Naba loko ka ngau ki̱nu ka mwata ki̱mi̱nu n ti ni̱bu di̱bebeli̱ni̱mu. We fi n chi ka kiwii n ti ki̱rti̱ku numang.