Read tula Matta 26 Bible Online

Matta 26 - tula bible

Matta 26

¹Yo n Yesu a ri ya̱m bi̱bi kwange, a yi miyari̱m ki̱mu ko,

²“Ti̱yim Yiye yabake a du ditiyi yurabu, wu ka ni Bwe Nii ka le fa̱li ni̱bi, ke a kuka ki̱n.”

³Yinu tikaketi fansetiye a muran a lon tikake fanse, wu di̱n ki̱nu n Kayafa.

⁴N chi a do ka tau Yesu daan, ka chi̱u ki̱nu.

⁵Aya n chi a yi ko, “N ke a ki̱swi Yiye, di̱ne ke ni̱bu a madu di̱kulan we.”

⁶Yo n Yesu we Betani didine, we lo Simun naba mwa̱liye,

⁷Wuka naye a be fi a di̱Yesuwe ki̱ni lure ki̱nung ki̱ki fi̱rfi̱range, ki̱ni kwa̱ti̱rang. A kur we dur ki̱nu, yo n ki̱n a swe ki̱chau chabte.

⁸Aya yo Miyari̱m ki̱mu a ku yiko, a fwi chi mi̱n ni̱tu, a bi̱u bwiti chiyu ko, “Ti̱tu n ke ki̱yaiya?

⁹Ki̱nungu a no chir ka̱mbi̱ru nabwen, ni ni babumbu.”

¹⁰Kangu n Yesu a swaan chi a ni̱tu chitangu, a yi chi ko, “A mayire ti̱kwa̱ma naye wuwe? A ma chitu a da̱mi.

¹¹Ka wuwule diye babumbi̱bu we ware n ti chi̱n, aya n ti̱newe n ti mi̱ni kwadu.

¹²Ki̱nung ki̱ku a kur mi a bwiyangu a ma di̱ne ki̱ do furem mi̱me.

¹³Bi̱yili̱m mi̱n fwa chimi̱nu, we ti̱ti̱niti kwang, fi ka mang di̱mware, ya̱m bi̱bu ka chiredu di̱ne kurku chitu naye wu a maatu.”

¹⁴Wuka wiin we miyari̱mi kub chiri burabi̱mu, wu di̱n ki̱nu n Yafuda Yiskariyoti, a ya we tikake fansetiye.

¹⁵A yi ko, “Ta nii wureni ka n ni chi̱n ki̱ne?” N chi a ki ka̱mbi̱r asurfanu wani ti̱ta a ni.

¹⁶A mwetuwe ki̱dang kangu, n Yafuda ki̱babba wa̱re ka kwa̱li̱n Yesuwe.

¹⁷We di wu kake wu a ki̱danne wu a ne yis we, miyari̱mu a be bwa di̱Yesu ki̱bi̱du ko, “Mun baddu nang do fi ki̱danni Yiye yabake a fi̱re?”

¹⁸A yi chi ko, “Ti̱le bi̱nu, ta ya wuka ni we, ti̱yi ki̱n ko, ‘Naba yungke a fwa ko, ki̱swi ko a mwatawe, ka chau Yiye yabake a lomo n ti miyari̱m ki̱mu.’ ”

¹⁹Miyari̱m ki̱mu a ma kangu n Yesu a fwa chi mi̱nangu, a doti̱ Yiye yabake.

²⁰Yo ti̱ma senge, a swe ki̱chau chabti̱tu n ti Miyari̱m ki̱mi kub chiri burabi̱mu.

²¹Yo n chi we ki̱chau chabti̱te, n Yesu a yi chi ko, “Bi̱yili̱m mi̱n fwa chimi̱nu wuka we tibe chi̱n ka kwa̱liyu.”

²²N chi a nwebu ta̱ma̱ng ya̱m Yesumu. N kawure ki̱yidu ko, “Ka m mi̱na, Tewuduwe.”

²³A ki̱nta chi ko, “Wu a di̱ku fa̱la̱ng we kwa̱se ware ti mi̱ne, nang wu ka kwa̱liye.

²⁴Bwe Nii ka bwadu kangu ni̱bu a mwal we di̱ki̱nengu, a ya a no nii wu ka kwa̱l Bwe Nii! Bunge no a bi̱bu nii wu.”

²⁵N Yafuda wu a kwa̱l Yesuwe, a yiko, “Tete n mi̱na?” N Yesu a ke ki̱mi̱n ko, “A mwang fwa.”

²⁶Yo n chi a yaki̱ chau chabti̱te, n Yesu a da̱u ki̱danne, a wana Kwama a wula ki̱daniyu, a ni miyari̱m ki̱mu, a yi ko, “Ti̱ngang, ti̱chau, ti̱tu nang bwimiyu.”

²⁷Yinu a da̱u kwa̱se mwe wu ki̱ni mwe ki̱danne a wana Kwama, yinu a ni chi a yi ko, “Ti̱no Ti̱ni ki̱ni kwang.

²⁸Ti̱tu nang bwa̱ki̱ ki̱tum mi̱mangu, bi̱bu mang kur di̱ne ni̱bu nabwen a duku ki̱letimu.

²⁹Aya mi̱n yi chi̱nu, a ne mang no ti̱n wuka mwe yinab we ki̱da, ka lantu di wu mang no wuka wu fwiye n ti chi̱n we a yaa Temiye.”

³⁰Yo n chi a kau tee, a chir a yika Kun setune.

³¹Yinu n Yesu a yi chi ko, “Ti̱ni ki̱ni kwang, ta wullu ta dwiyu, we kum wu, di̱ne we chi ka fwedu n ti mi̱nitu, a mwal ko, ‘Ka ngau naba tore, ki̱ran kwantinu ka yaradu.’ ”

³²“Aya a kutengu mang kunu we furangu, mang tu chi̱nu we Ka̱lili.”

³³M Biti̱r a yi ki̱n ko, “Ka n kawure ka wule, a bwin mi̱n.”

³⁴N Yesu a yi ki̱n ko, “Bi̱yili̱m mi̱n fwa mi̱nu, we kum wu mwang kwilayu da̱a̱ yitta, yinu kware ka ta̱r chi.”

³⁵M Biti̱r a yi ki̱n ko, “Kasi no mang bwadu n ti mun, a ne mang kwilanu.” Bi̱kamu miyari̱m ki̱mi kwang a fwati̱ni yiko.

³⁶Yinu n Yesu a yika wuka fi wu ni̱bu ki̱yalu ko, Kesemani, a yi miyari̱m ki̱mu ko, “Ti̱swe a fi mi̱n yika bwanu yamang twa̱ba̱ buni we.”

³⁷A yika n ti Biti̱r n ti bwesi̱m Sa̱badimi burabi̱mu, n Yakubu n ti Yowana, n ki̱n a mwe ki̱ma furi ki̱liki̱lin.

³⁸Yinu a yi chi ko, “Mi̱n ma furi ki̱lin tiyangu mang bwadang. Ti̱swe a fi, ti̱ma ki̱yolangu ware n ti mi̱n.”

³⁹Yo n ki̱n a ya kakki bayi̱me, a sung a swa kabu a ti̱m, a twa̱ba̱ bunitu, a yi ko, “Tete, ka ka fwede, dami ki̱dang ki̱ku. Aya bunti̱nu ki̱ke mi we, bunti̱n wumo ki̱ke, chi mwang ke.”

⁴⁰A ki̱la fi a Miyari̱m ki̱me, a be a ya n chi ki̱da duum, a yi Biti̱r ko, “A ne ta ma ki̱yolangu ware ti mi̱n kasi no awa wiina?

⁴¹“Ti̱ma ki̱yolang n ti twa̱ba̱ku, di̱ne ke ti̱yaruwe swaka̱ki̱ku. Aya Fi̱ki̱m a ke, bwiyu a ne dukan we.”

⁴²A ki̱la yikatuwe ki̱dang robang, a twa̱ba̱ bunitu, a yi ko, “Tete, ka riye wu a mwintuwenge, yam ki̱kemo a ri yiko.”

⁴³Yo a ki̱latewe a be ya chi ki̱da duum, di̱ne duumu a la nui chiyu.

⁴⁴A duti̱ chi ki̱da a yika twa̱ba̱ku ki̱tarang, ki̱fwa ka bi̱biini̱m.

⁴⁵A ki̱la fi a Miyari̱m ki̱me, a yi chi ko, “Lanta ki̱ka̱ngi chik ti̱da duuma? Dang awa a lam wu Bwe Nii ka le Fa̱li ni̱bu ki̱letime.

⁴⁶Ti̱kun, ni yikan! Nii wu ka kwa̱liye nang wu a lame ki̱dwan.”

⁴⁷Yo n ki̱n we ki̱fwa ya̱me, n Yafuda wu we Miyari̱m ki̱mi kub chiri burabi̱me n ti ki̱tuu ni̱be nabwen, a be ki̱ni kuli n ti dwami. Tikaketi fansetimu n ti selebu a tume chi.

⁴⁸Wu ka kwa̱liye a tu a ni chi di̱mwal swaanki̱n ko, “Wu mang kwarre nang ki̱n ti̱tau.”

⁴⁹Bi̱nabi̱na a be fi n Yesu we mi̱ne, a yi ki̱n ko, “Mun Tete naba yungke.” A kwar ti̱ni ki̱m.

⁵⁰N Yesu a yi ki̱n ko, “Fate, ma chitu mwang be mwang maditu.” N chi a ki̱re a tau ki̱n.

⁵¹We fiko, wuka ni we bi̱bu ware n ti Yesumu, a chake kul ki̱nu a mwatu ki̱tele ka̱be tikake Fanse wad.

⁵²N Yesu a yi ki̱n ko, “Di̱ki̱ti̱ kuluwe le ko, wu a da kulle, kul ka chi̱u ki̱nu.

⁵³Ta yimbu ko, mi̱ni ki̱ni dukanu mang bi̱u Temi, kasi no ki̱kang ka tumiye kwa̱li ni̱bu ti̱tumbi̱rimi kub chiri turaba?

⁵⁴Ka a mabi yiko, ka rii chitu lwangi̱n Kwamanu a fwatu yire, a mwintuwe ka fwedi yiko.”

⁵⁵We ki̱swi wuko, n Yesu a yi ni̱bu ko, “Ti̱chire ki̱ni kuli n ti dwami ke be ti̱tan mi̱n yinang dakuwa? Ka wuwule diye mi̱n swedu we yifi̱la Kan Kwamane mi̱n ma miyaku, ta taibu.

⁵⁶Aya ti̱tu a fwe yiko kwang ko ke chi fa̱kubu feredimu a mwalitu a rii yinang ka a mwal we tati̱ki̱dai yika̱riyangu.” Yo miyari̱m ki̱mu a nwe yiko, a yara ti̱ni kwang.

⁵⁷Yinu bi̱bu a tau Yesumu a yikan bwa di̱Kayafa Wuduwe fansetiye, fi ni̱bu yungku yili̱n n ti seli̱bu a muran mi̱ne.

⁵⁸Aya Biti̱r a bunti̱ chi a kuteng, yo a lam lo wuduwe Fansetiye, a le a swe n ti ti̱karani, ko ke ki̱ku kangu n chi ka madangu.

⁵⁹Tikake Fanseti n ti kwa̱l kabaki̱n a le ki̱bau wa̱re ti̱kwaniye ka chi̱n Yesu.

⁶⁰Aya n chi a yabu ki̱ni ki̱le. Kasi ki̱ku ni̱bu nabwen a chire ki̱mwe ti̱kwanitangu. Ki̱ni kutengu bi̱kami burau a chirte.

⁶¹N chi a yiko, “Nii wu a yi ko, mi̱ni ki̱ni dukan mang wur Kan Kwamanu, mang muddu a diti yitta.”

⁶²Yinu Wuduwe fansetiye a kun a titiye a yi ko, “Mun newe ki̱ni di̱ki̱li̱n yiina? Mwang fwadu ko wule we ya̱miyu ni̱bu ki̱fwadu a dur muniyu?”

⁶³N Yesu a fwabu chi. Tikake Fanse a yi ki̱n ko, “Fwa bi̱yili̱m tibemo n ti Kwama, m mun nang Masiya Bwe Kwama?”

⁶⁴N Yesu a ke ki̱mi̱n ko, “N fwa tas. Aya mi̱n yi chi̱nu we bwa kake ta ku Bwe Nii ka swedu we kang ki̱yilang Naba Dukane, ki̱bedu a ti̱twini we bwa diye.”

⁶⁵Tikake Fanse, a ngi̱ra lukei kiyu, di̱ne kaiya ni̱re, a yi ko, “Ya̱mu a ri! A swa̱ba Kwama!

⁶⁶Ti̱ku yire?” N chi a ke ko, “A dakan ka bwadu.”

⁶⁷N chi a ti̱bu ki̱ni ki̱tumu we kabu ki̱ngau ti̱nu, bi̱kamu a ngabbi wanti̱teli.

⁶⁸N chi ki̱yidu ko, “Ma nimi̱n fa̱kuitu, ka mun nang Masiya! Fwa ni̱mi̱n ni wu a nganne!”

⁶⁹We ki̱swi wuko, m Biti̱r a swenga tarre lo, di̱kan fwa̱n ka̱be wu ki̱ma nangang we fiko a be bwa di̱ki̱ne a yi ko, “Mun ti̱n no ware n ti Yesu naba Ka̱lili.”

⁷⁰Aya m Biti̱r a kwila we kakku chiyangu a yi ko, “Mang yimi̱nbu chi we dur nii wunu!”

⁷¹Yo a chir a yika sa̱ngka, wuka ka̱be fwa̱ne wu ki̱ma nanga we lo, a ku ki̱n a yi bi̱bu we fikomu ko, “Nii wu a no we ware n ti Yesu wu a Nasa̱ret!”

⁷²M Biti̱r a ki̱la kwilati̱ ki̱da ki̱ni di̱twa̱mbi̱r ko, “Mang yimbu ni wu!”

⁷³A kuteng ki̱ku a ri̱keti̱ni bayimangu, bi̱bu a tiwe fikomu a yi Biti̱r ko, “Ki̱kumang, mun a no we n ti Yesu banasarete. Ki̱swi mun fwaan ya̱me a kwa̱li̱n.”

⁷⁴N ki̱n a mwe ti̱turantu ki̱twa̱mati̱ chitu ko, “Mang yimbu ni wu!” Ki̱ri ya̱miye, kware ta̱r ti̱n.

⁷⁵M Biti̱r a kur ya̱mu n Yesu a fwa ki̱mi̱ni̱mu ko, “Mwang kwilayu ki̱da yitta, kware ka ta̱rti̱ chi.” N ki̱n a kiwii ki̱ni dukan.