Read tula Matta 27 Bible Online

Matta 27 - tula bible

Matta 27

¹Yo ti̱ma kwiyane, wuduwe fansetiye n ti seli̱bu bi̱ni̱mu, a di̱ka yii ko chi chi̱u Yesu.

²N chi a kwau ki̱n, a yikani ki̱n, a ya ni kwabna Bi̱latu.

³Yo n Yafuda wu a kwa̱l ki̱ne, a ku ya̱mu a mwatan ni̱bu yaka chi̱u Yesuwe, a ma furi ki̱liki̱li, a ki̱la bwana wuduwe fansetiye n ti seli̱bu, a niti̱ chi ka̱mbi̱r asurfanu wani ti̱tanu we.

⁴A yi ko, “M ma ki̱le, kangu mang ni wu a mabu ki̱le ke a bwangu.” Aya n chi a yi ki̱n ko, “Lwangang nang wule we ti̱tu? Ti̱tu lwangang mwang.”

⁵N ki̱n a kur ka̱mbi̱r asurfanu we Kan Kwamanu, a chir ti̱n. A yikan a ya di̱ku dwaku.

⁶Aya wuduwe fansetiye a wo Asurfa a yi ko, “A dakabu ka̱mbi̱r di̱du ni yangdu a Kan Kwaman di̱ne ka̱mbi̱r ki̱tumi̱n.”

⁷N chi a ki̱ka yii, ka tani̱n ku naba kubiye ki̱ni ka̱mbi̱ru ke a nang furen rungko.

⁸Di̱ne yiko, a yal fiko ko, “Ku ki̱tume.”

⁹Yiko, a ri chitu fa̱ku Yirmiya a fwa ko, “N chi a da̱u ka̱mbi̱r asurfan wani ti̱ta, chi a kekan ka fedu a dur Yisrelane.

¹⁰A ta̱n ku naba kubiye ki̱n, kangu n Tewuduwe a fwangu.”

¹¹N Yesu a ti we kakku kwabnangu, kwabna a bi̱u ki̱n ko, “M mun nang Mai ni̱bu Yafudama?” N Yesu a yi ki̱n ko, “N fwa tas.”

¹²Aya yo wuduwe fansetiyeyu n ti Seli̱bu, ki̱fwa ya̱m a dur ki̱ne, a yibu chi ya̱m.

¹³M Bi̱latu a yi ko, “Mwang nwebu chi ni̱bu ki̱fwadu a dur munita?”

¹⁴Aya n Yesu a ki̱l ki̱mi̱nbu di̱kwa̱l, kono we ya̱m bi̱bu ni̱bu a yi ki̱ni̱mu. Ti̱tu a ya̱r kwabna yii.

¹⁵We ki̱swi wu a Yiye yabake, n kwabna ki̱mar ni̱bu mi̱n naba ki̱le wiin wu n chi ki̱badde.

¹⁶We ki̱swi wuko, wuka nii we wu ni̱bu a yim n ki̱n naba ki̱letiye. Nii wu di̱n ki̱nu m Barabas a di̱bi̱nti̱l.

¹⁷Yo ni̱bu Yafudamu a murane, m Bi̱latu a yi chi ko, “Ti̱badu m kwiye wure? M Barabas, ka n Yesu wu ti̱yalu ko Masiya?”

¹⁸Di̱ne n Bi̱latu a yim ko, n chi a ko Yesu di̱ne kati̱ne.

¹⁹Kangu m Bi̱latu a swe we ki̱di̱ng mwatakangu, naye ko a yi ki̱n ko, “Chirmi̱n we ya̱m naba ni̱ri dini̱mu, di̱ne diwu kumi kwad n nwe riye we dur ki̱nu a dwakam.”

²⁰Tikaketi fansetiyu n ti seli̱bu a kukan ki̱rangu we ni̱bu ko, a mar Barabas, a chi̱u Yesu.

²¹Kwabna a bi̱u chi ko, “M mar chimi̱ne wure, we ni̱bi burabi̱mu? N chi a yibi kuuu ko ‘Barabas.’ ”

²²M Bi̱latu a yi chi ko, “Mang madi yire ki̱ni Yesu wu ti̱yalu ko Masiya?” N chi a yibi kuuu ko, “Ti̱kukan!”

²³M Bi̱latu a yi chi ko, “Di̱ne wule, a ma ti̱ti̱le chi ti̱kwani ti̱tu a lwe bwaatu?” N chi a su kemiyi kuuu ko, “Ti̱kukan!”

²⁴Kangu m Bi̱latu a ku ya̱mu a la dukan ki̱nangu, yinu kusi̱ru ki̱laan fikongu. A bau mwe a nura fa̱li kiyu we kakki̱ ni̱bangu, a yi ko, “Lwangang mang a newe ki̱tum nii wumu. Lwangang chang, ki̱tum ki̱mu a dur chi̱n.”

²⁵Ni̱bi kwang a ke ko, “Ki̱tum ki̱mu a swe a dutu ni̱n n ti bwesi̱m ni̱m!”

²⁶Yinu a kwi chimi̱ne Barabas. Aya n ki̱n a yi ni̱bu ko, a twala Yesu, yinu n chi a yikani ki̱n a ya kukan.

²⁷We fiko ni̱bu ki̱rangmu a yikani ki̱ni Yesu a lo kwabna, n chi a murti̱ kwa̱l chi̱nu we di̱ki̱ne,

²⁸N chi a suku ki̱mi̱n luke ko, a yau ki̱mi̱n wuka luke wurwur ki̱duum bi̱bu mati̱m ki̱yadi̱mu.

²⁹N chi a ma ki̱mi̱n salasala wa kwa̱da, a do ki̱mi̱n we duru a niti̱ ki̱twalang we kang ki̱yilang kangu, n chi ki̱chungdu we kaki̱ku kangu, ki̱ma ki̱mi̱n ki̱fiye ko, “Ni̱n siinu Mai ni̱bu Yafudam!”

³⁰N chi a ti̱bu ki̱ni ki̱tumu, a yitu ki̱twalang, a twali ki̱n we duru.

³¹Yo n chi a ri ki̱fiyenge, a suku ki̱mi̱n luke wurwure, a do ki̱mi̱nti̱ lukei kiyu we, a yikan ni ki̱n ko ke chi kuka ki̱n.

³²Yo n chi we wa̱re ki̱yikade, n chi a tekan n ti wuka naba Sairin, di̱n ki̱nu n Simun, n chi a yo nii wu ki̱ni dukan ko a da̱u ki̱tiyang bwa Yesungu.

³³Yo n chi a lam wuka fi wu ki̱yalu ko, “Kolkota” ka nang chikiye fi wu a kasire.

³⁴N chi a ni wuka mwe yinabi wu a se n ti dwamang ko a no. A ya yo n ki̱n a twaiye a ko a nobu.

³⁵Yo n chi a kuka ki̱ne, a kera ti̱n lukei kiyu we bwiti chiyu.

³⁶A kuteng ki̱ku n chi a swe we fiko ki̱da̱ngdu.

³⁷We fi a dur Yesu ne, n chi a mwal chitu ko, “WU NANG Mai NI̱BU YAFUDAME.”

³⁸N chi a kukan n ti bi̱kam dabi̱kumi burau wuka a kang ki̱yilang, wuka a kwatakwelang.

³⁹Bi̱bu ki̱sudumu, ki̱swa̱ba ki̱nu n kawure ki̱mi̱ki̱tini dur.

⁴⁰N chi ki̱yidu ko, “Mun wu mwiko mwang wur Kan Kwamanu, mwang muddu a ditiyu yitta, yu yimwiyu, suwe we ki̱tiyang bwangu ke ni̱n yim ko m mun nang Bwe Kwama!”

⁴¹Yiko tikaketi fansetiyu n ti ni̱bu yungku yili̱nmu n ti seli̱bu ki̱ma ki̱mi̱n ki̱fiye ko,

⁴²“N ki̱n a yu bi̱kamu, a yimbu yu yikiyu. Ka n ki̱n nang Mai Yisrela, a suwe we ki̱tiyang bwangu, nang ke bi̱yili̱mu we di̱ki̱ne.

⁴³A ki̱na yo ni̱ru we di̱Kwama. Yam n Kwama a yu ki̱n ki̱kangu, ka we ki̱mi̱la ki̱ne, di̱ne a yi ko n ki̱n Bwe Kwama.”

⁴⁴A fiwine, dabi̱kum bi̱bu a kukan chi waremu, n chi ki̱ti̱buti̱ ya̱m bi̱bwilam bi̱bu.

⁴⁵Ki̱ni tibe kuko, ti̱mu a ma ki̱li.

⁴⁶Yo ki̱swi a fi yitta, n Yesu a bwe wi, a yal chitu ki̱ni dukan ko, “Eli, Eli lama sabatani.” Kanang chikiye “Wa Kwama mi, Kwama mi, a mayire mwang mariye?”

⁴⁷Bi̱kamu a tiran we fikomu, kanga nwe ya̱m bi̱bangu, n chi a yi ko, “Nii wu ki̱yal Yiliya?”

⁴⁸Bi̱nabi̱na wuka we bwiti chiyu a wul a da̱a̱ soso, a di̱ka mwe wi bwangbwange, a yab we kwalu a kuku a ni ki̱n ko a no.

⁴⁹Bi̱kamu a yi ko, “Yam didiin ni da̱ng ka Yiliya we bedu ka yu ki̱ne.”

⁵⁰N Yesu a ki̱la kiti̱ wii ki̱da, ki̱ni dukan, yinu ti̱kuritu a chir.

⁵¹We ki̱dang kangu wule luke wu a yau ki̱swen fi wu wauwade, a ngi̱ran ti̱me yurau, a mwe we dii a fwe ti̱na bale ti̱me. Ti̱mu a mi̱kan, kwantiyu a wulan.

⁵²Futi̱tu a wuden, bi̱bwari̱mu bi̱bi wauwadi̱mu nabwen a kun we futi̱tu ki̱ni ti̱kuritu.

⁵³N chi a chiran we futi̱tu. A kuteng ki̱ku n Yesu a kun we furangu, n chi a le bi̱ni wauwadi̱nu, ni̱bu nabwen a ku chi.

⁵⁴We ki̱swi wuko, tikake ni̱bu ki̱rang Roma n ti bi̱bu ki̱da̱ng Yesumu, kanga ku mi̱kaku ti̱mu n ti chi a fwetangu, n chi a nwe tayi, a yi ko, “Ki̱kumang wu Bwe Kwama.”

⁵⁵Nati̱bu nabwen bi̱bu a bunte Yesu we Ka̱lili ke chi ma Yesu mi̱n nangangmu. N chi a ti kutan ki̱dange chi ki̱fweditu.

⁵⁶We tibe chi, m Maryamu wu a Maka̱dala we n ti Maryamu ne Yakubu n ti Yusufu n ti ne bwesi̱m Sa̱badime.

⁵⁷Yo me a lame, wuka naba kuli, wu a be a Arimatiya, di̱n ki̱nu n Yusufu. N ki̱n we Miyari̱m Yesumu.

⁵⁸A ya bwa di̱Bi̱latu, a bi̱u kwa̱me Yesu we. N Bi̱latu a ni ki̱n kwa̱me.

⁵⁹N Yusufu a da̱u kwa̱me Yesuwe, a dal ki̱ni luke wu a ne der we.

⁶⁰A yo a di̱kan fur di̱fwin, di̱du a tu a swa̱ba kwami̱n. A bi̱le wuka kale wuduwe, a yinge furi ki̱n, a yika ti̱n.

⁶¹M Maryamu wu a Maka̱dala n ti Maryamu wuka a swetuwe kakku furangu.

⁶²Bafi̱nenangeko, wu kuteng diwu ni̱bu ki̱do bwi di̱ne di sabwi ni̱bu Yafudamu, tikaketi fansetiyu ti ni̱bu Farisamu, n chi a muran we kakku Bi̱latu.

⁶³N chi a yi ko, “Tewuduwe diti yiya suyu, ni̱n kur chi naba di̱buti̱re wu a fwa yo we ki̱ni ti̱kuriye ko, ‘A kuteng ditiyi yitta ka kunu we furu.’

⁶⁴Di̱ne yiko, mwang yo ni̱bu ka to furu ka lanti̱n di wutare, di̱ne ke miyari̱mu a be da̱du kwa̱me ko we ki̱ni kutu, a kuteng ki̱ku beka yi ni̱bu ko a kun we furu. Ki̱ku buti̱ku nang ki̱ku niing nwedi ki̱nangu.”

⁶⁵M Bi̱latu a yi chi ko, “Ti̱ya ki̱ni ni̱bu ki̱rangmu, yati̱ to tiyangu ta medangu.”

⁶⁶N chi a yikan yaku to furu, n chi a ma kale mi̱n di̱mwal maiyin we furu, a yo ni̱bu ki̱rangmu ko a nang to furu.