Read tula Matta 3 Bible Online

Matta 3 - tula bible

Matta 3

¹We ki̱dang kangu n Yowana naba Batisma a beki̱ma di̱mwar ya̱m Kwamanu a di̱si̱lachangi̱n Yafudiya,

²ko, “Ti̱wo ki̱ti̱m, di̱ne Yaa Kwama a mwatawe!”

³N ki̱n nang wu n Fa̱ku Yichaya a fwaan ya̱m feredi ko, “We di̱chi̱lachangi̱nu wuka nii ki̱ma di̱yal ko, ‘Ti̱do Tewuduwe mi̱n wa̱re, ke n ki̱n a yawe wa̱re tibeni ture.’ ”

⁴N Yowana a do luke wu a ma ki̱ni ri ta twalumiye. N ki̱n a mu tar ki̱nu ki̱ni ki̱biyang di̱ba̱la̱ng. Chabtu kitu ki̱kwiti n ti mwe rwiye.

⁵Ni̱bu Wurchalimamu n ti bi̱bu a yaa Yafudiya mi kwang n ti bale La Wurdune ki̱rwaa bwa a di̱ki̱ne kutukutu.

⁶Ki̱wo ki̱ti̱mu, n ki̱n ki̱ma chimi̱nti̱ batisma we La Wurdune.

⁷Yo n Yowana a ku ni̱bu Farisamu n ti ni̱bu Sadukiyamu ki̱bedu ka ma batisma, a yi chi ko, “N ti̱n soti yi bwilaiyu, n wure a mwa chi̱n ko ti̱wul we ki̱fwini Kwama ki̱bede?

⁸Ti̱ma nangang ki̱ku ka yungdu ti̱wo ki̱ti̱mang.

⁹Ti̱da̱ngdu we ti ta fwadu we yi chiyu ko Yibrayim n te chi̱ne. Mi̱n fwa chimi̱nu n Kwama ki̱ni da ka kuku kali, ka kau bwesi̱m Yibrayim.

¹⁰Ki̱ka̱ngu a tu a yo yii twa̱ne we ki̱yineng tiyange; Kanang ki̱ki̱le tiyang ki̱ku a tubu chi ti̱yiliyange, ka ki̱sedu, ka twidu a ki̱rang.”

¹¹“Mi̱n ma chimi̱n batisma ki̱ni mwe, ke a yung ti̱wo ki̱ti̱m, aya wu ki̱bedu a kuteng mange, a la mi̱n ki̱ni dwiyentu. Kasi no ki̱wami kiyu mang lwebu mang tadu. N ki̱n ka ma chimi̱n batisma ki̱ni Fi̱ki̱m Kwamam n ti ki̱rang.

¹²Nii wu ki̱ni kwefi̱ra we fa̱la̱ng kangu, ka chaku ki̱nuti chaam we tuitu, ka kur ki̱nutiyu a bi̱ne, ka yaa furitu n ti tuitu ka twidu a ki̱rang ki̱ku a ne dumedu dumeneng.”

¹³We ki̱swi wuko n Yesu a kune we Ka̱lili, a ya bwana di̱Yowana we La Wurdune, fiki̱mang batisma ko ke a ma ki̱mi̱n batisma.

¹⁴N Yowana a no kebu ka ma ki̱mi̱n batisma, a yi ki̱n ko, “M mi̱n wu mi̱n baddu mwang ma mi batisma, nang wu ki̱la mwang bedu mwi m ma mi̱na?”

¹⁵N Yesu a yi ki̱n ko, “A kabi yiko ki̱ka̱ngu, di̱ne wu nang wa̱re niing riin yile Kwama.” Yinu n Yowana a ke fal.

¹⁶Yo n Yesu a chire we mwe wu n ki̱n a mang batisma, bi̱nabi̱na dii a wuden, a ku Fi̱ki̱m Kwamamu ki̱suwedu we dii yinang ki̱kube a be sung we di̱ki̱ne.

¹⁷Yinu ker a chire we dii ko, “Wu nang Bwe Ni̱re mi, m mi̱lan, mi̱n nwe ta̱ma̱ng ki̱ni ki̱n.”