Read tula Markus 1 Bible Online

Markus 1 - tula bible

Markus 1

¹Ya̱m bi̱li̱mu a dur Yesu Masiya, Bwe Kwamamu a mwengi ying;

²We fa̱ku Yichaya, Kwama a fwa ko, “Da̱ng, mi̱n tum chimi̱n naba di̱tumbi̱re a kakku chang, ka do chimi̱n wa̱re.”

³“N ki̱n Ker di̱du ki̱chiredu a di̱kir; Do wa̱re di̱ne Tewuduwe!”

⁴Yinu n Yowana naba batisma a chire a di̱kir, ki̱mwa ni̱bu ko a wo ki̱ti̱m, a ma batisma ke n chi a ya duku ki̱letiyangu.

⁵Ni̱bu bi̱bu a ti̱m ni̱bu Yafudiya n ti ni̱bu bi̱bu a bi̱n Wurchalimamu a rau bwa a di̱ki̱ne, ki̱fwa ki̱leti chiyu, ki̱woti̱ ki̱ti̱mu, ki̱mati̱ batisma we laa Wurdune.

⁶N Yowana a do di̱ba̱l di̱du ni̱bu a ku ki̱ni rii ta̱li̱miye, a mu tar ki̱nu ki̱ni di̱ba̱l, chabtu ki̱ntu ki̱kwiti n ti mwe rwi.

⁷N ki̱n a ma di̱mwaru ying; “A kuteng mangu, wuka ni wuduwe wu a la mi̱ni dwiyene ka bedu, kasi no ki̱wami kiyu mang lwebu mang sungdu mang kwi ki̱mindu.

⁸Mi̱n ma chimi̱n batisma ki̱ni mwe, aya n ki̱n ka ma chimi̱nu ki̱ni Fi̱ki̱m Kwamam.”

⁹We ki̱swi wuko, n Yesu a chire a Nasa̱ret wu a yaa Ka̱lili. N Yowana a ma ki̱mi̱n batisma a laa Wurdune.

¹⁰Yo n Yesu a chire wuchak we mwe, a ku di a wuden, Fi̱ki̱m Kwamamu a sub yinang ki̱kube a sung we di̱ki̱ne.

¹¹Yinu di̱kan ker a chire a bwa diye ko, “Mun nang Bwemi wu mang mi̱lane, mi̱n nwe ta̱ma̱ng mwangu.”

¹²Bi̱nabi̱na Fi̱ki̱m Kwamamu a twa̱ku Yesu a len di̱kir.

¹³N ki̱n a ma ditiyu wan taana we di̱kiru, Setan ki̱ swa̱ka̱ ki̱nu. N ki̱n we n ti nai di̱kiri. Ni̱bu ti̱tumbi̱rimu a ya lweka ti̱ ki̱n.

¹⁴A kuteng ki̱ku ni̱bu a mar Yowana a lo di̱bi̱nti̱lengu, n Yesu a yikan ti̱m Ka̱lilimu ki̱ma di̱mwar we yaa Kwama,

¹⁵“Ki̱swi a lam, Yaa Kwama a mwatawe, ti̱wo ki̱ti̱mu, ti̱ke bi̱yili̱mu!”

¹⁶Kangu n Yesu a yaki̱sudu we ki̱ti̱ku la Ka̱lili, a ku Simun n ti ke ko n Andi̱riya, ki̱fwal dwa̱kai chiyu a mwe, n chi ni̱bu ki̱ taba chi̱ngi̱m.

¹⁷N Yesu a yi chi ko, “Ti̱bunmite, mang yo chi̱nu tani̱n be miyedu ki̱ni ni̱bu ka wo ki̱ti̱mi̱m.”

¹⁸Bi̱nabi̱na n chi a du dwa̱kai chiyu, a nabu Yesu.

¹⁹Kanga ki̱r ki̱ti̱ki bayimangu, a ku Yakubu bwele Sa̱badi n ti ke ko n Yowana a kwa̱mbi̱re mwe ki̱ do dwa̱kai chiyu.

²⁰Bi̱nabi̱na n ki̱n a yal chi. N chi a du techi n Sa̱badi we kwa̱mbi̱re mwe n ti ni̱bu suremu a nabu Yesu.

²¹N Yesu n ti miyari̱mu a yika Kafanawu. We difi̱kare ni̱bu Yafudam, n Yesu a le kan muraki̱n ki̱ma miyaku.

²²Ni̱bu a ya̱r yii ki̱ni miyaku kangu, di̱ne ni̱bu yungku kangu a ma dukan, a newe yinang ni̱bu yungki̱ yili̱n Musamu.

²³Bi̱nabi̱na wuka nii ki̱ni ki̱fi̱be wu bwila we kan muraki̱n a ngau keme.

²⁴Ki̱fwadu ko, “Lwangan mwangu wule n ti ni̱n, Yesu naba Nasa̱ret? M be mwang chi̱u ni̱n na? N yim m mun, wu wauwade Kwama.”

²⁵N Yesu a wela ki̱n ko, “Le mi̱n, chir mi̱n we bwiyu!”

²⁶Ki̱fi̱be wu bwila, a ngau ki̱ni fi̱m, ki̱ni keme, a chir.

²⁷Chitu a ya̱r ni̱bu yii, n kawure ki̱bi̱u fate ko, “Ti̱tu wureni? Miyaku ki̱fwiyang, niyang kuunbuwe. Ki̱ni dukan, ki̱chaku ki̱fi̱bti yi bwilayu, bi̱ki̱mu ki̱bunti̱ ya̱m ki̱mu.”

²⁸Bi̱nabi̱na ya̱m bi̱bu a ti̱ran we yaa Ka̱lili kwang.

²⁹Yo n chi a chir we kan muraki̱ne, a le lo bi̱u Simune n ti Andi̱riya ware n ti Yakubu n ti Yowana.

³⁰N Nela Simune bwi a mi̱kami̱kane, n chi a fwa Yesu mi̱n ya̱m bi̱bu.

³¹N Yesu a ya we ki̱dwan, a sung a tau fa̱la̱ng kangu, a kuku. Bwi kiyu a be, a kun, a ma chimi̱nti̱ nangang.

³²Ki̱ni me, kangu dii a lengu, n chi a be ki̱ni ni̱bu a bubuwemu n ti ni̱bu ki̱ni ki̱fi̱btimu.

³³Bi̱nu ki̱ni kwang a muran a kwa̱r lonu.

³⁴Yinu n Yesu a be ni̱bu buramu nabwen. A chaku ki̱fi̱bti yi bwilayu nabwen a dubu chi ko a fwa bi̱kam ya̱m, di̱ne n chi a yim ka n ki̱n n wure.

³⁵Ki̱ni kunsin yo ti̱mu a fi̱rebe, a kun, a chir, a yika wuka fi wu a ne ni we, a twa̱ba̱ buni we bwako.

³⁶Yinu m Simun n ti bi̱bu n chi waremu a yikan, ki̱ babba ki̱nu.

³⁷Yo n chi a ya ki̱ne, a yi ko, “Ni̱bi kwang ki̱ babbanu.”

³⁸N Yesu a yi chi ko, “Ni yika bi̱nti̱tu a kakitu mang ma di̱mwar ya̱m bi̱li̱m we bwako ti̱n. Nang chi a yo mang betu.”

³⁹A kanan ti̱m Ka̱lilimu ki̱ni kwang ki̱mwa ya̱m bi̱li̱mu we kambi murakitu, ki̱chaki̱ti̱ ki̱fi̱bti yi bwilayu we ni̱bu.

⁴⁰Wuka naba mwa̱liye a be sung ki̱ wana ki̱nu ko, “Tete, ka mwang kede, n lwe mwang be burang mangu.”

⁴¹Di̱ne ki̱bune, n Yesu a tar kangu a twai ki̱n a yi ko, “N ke, mang benu.”

⁴²Bi̱nabi̱na mwa̱liyu a be, ni wu a ya beku.

⁴³A ngau ki̱mi̱n ki̱kure ko, “Yikan.

⁴⁴Kedu fwa wuka ni mi̱nduwe, ya wuka fanseti a da̱ngi̱n. Yang ma niku ki̱tumang di̱ne beku mwangu, yinangu yilang m Musa a fwa chimi̱nangu ke ni̱bu a swaan ko m be.”

⁴⁵Kasi ki̱ku n Yesu a yi ki̱ni yikongu, n ki̱n a yikan ki̱fwa ni̱bu mi̱n ya̱mu, ki̱fwa chimi̱nu, ki̱ni kangu ka bengu. Ti̱chitu wu a yo n Yesu a lebu di̱kan bi̱n ni kwa̱rikwa̱ri, ki̱swedu a kuteng bi̱nang fi a ne nii we, ni̱bu ki̱bedu we di̱ki̱ne ka nang ki̱ki̱le ba̱la̱nge.