Read tula Markus 13 Bible Online

Markus 13 - tula bible

Markus 13

¹Yo n Yesu a chire we Kan Kwama di̱dune, wukane we miyari̱m ki̱mu a yi ki̱n ko, “Naba yungke, da̱ng ki̱duum kalim bi̱bu ti yinang ku ti̱mubanta lengu!”

²N Yesu a yi ki̱n ko, “Ka we ti̱ku ti̱muban ti̱yili ti̱te? Ki̱swi ki̱bedu wu a ne kale ka swedu a di a keko we, ka tungadi kwang.”

³Kangu n Yesu a swe we Kun di̱du a tini Setuniye, di̱du ki̱da̱ng Kan Kwamana Wurchalimanu, m Biti̱r, n ti Yakubu, n ti Yowana, n ti Andi̱riya a bi̱u ki̱n a bura ko,

⁴“Fwa ni̱mi̱n, ti̱chitu wu ka fwedi fere? Nang ku di̱mwal di̱du i yire yoko ti̱tu kanodu yaka fwede?”

⁵Yinu n Yesu a yi chi ko, “Ti̱twar, wuka ni a buti̱du chi̱n we.

⁶Ni̱bu nabwen ka bedu ki̱ni di̱n mi̱n, ka yidu ko n chi nangki̱n, ka butu ni̱bu nabwen.

⁷Ka ti̱ nwe ya̱mi kumbiyu n ti ya̱mi ki̱ngasiyu a kunniye, ti̱wulu we. A kau ti̱chitu wu ka fwedi yiko. Aya di swa̱n kute a lanbu didin.

⁸Kuu ka makadu n ti kuu. Yaa ka kuladu n ti yaa. Ti̱mu ka mi̱kadu we fantiyu dangtidangti, sunu ka ma ni̱bu. Aya ti̱tu n ke riye siine. Ti̱tu mweku riyeng.

⁹“Ti̱ma dandan ki̱ni dur chi̱nu, ni̱bu ka tau chi̱nu ka yikan kambi mwataki̱, ka twala chi̱nu we kambi murakitu, ni̱bu ka yikadu ki̱ni chi̱n a kakku mati̱m, we fiko ta kau chi mi̱n ni̱bu di̱mwari̱m.

¹⁰Aya di̱mwar ya̱m bi̱li̱mi̱nu ka mwedu ka le ki̱teli ni̱biyu didiin we kuuti ki̱ni kwang.

¹¹Yo ni̱bu ka tau chi̱nu ka yikan bwana kan mwataki̱ne, ti̱wulu tayi we, ti ta fwadu ko wule. Chi ka chiredu a yii chi̱ne ti̱fwa, di̱ne n ke bi̱chim, ya̱m Fi̱ki̱m Kwamam.

¹²“Ke ka ni keko ni̱bu ka chidu. Te ka madi yiko n ti bweko, bwesi̱mu ka makadu n ti tebi̱bu ka nebe, ka yo bwa chi.

¹³Ni̱bu ka ko chi̱nu di̱ne di̱n mi̱ne. Aya nii wu ka mu ni̱ru ka lami̱nti̱ di swan kute, ka swidu.”

¹⁴N Yesu a chakakku ko, “Ki̱swi ki̱bedu yo ta ku chi danduriye ti̱tu ki̱bedu ki̱ni kaiyakitu we fi a no dakabe. (Nii ki̱ kii ya̱m bi̱be a swaan) bi̱ba ti̱m Yafudiya a wul a fi̱l kuni.[2]

¹⁵Nii wu a ya, a fi̱l kwere a yifi̱la, a ki̱ladu lo we ko da̱a̱ ti̱kan chi.”

¹⁶Nii wu a ya, a chir kuuwe, a ki̱ladu lo we ko beka da̱u luke.

¹⁷A no chi̱n! Nati̱m lubimu n ti bi̱bu ki̱ka̱r bwesi̱mu we ki̱swi wuko.

¹⁸Ti̱twa̱ba̱ bunitu, ti̱chitu a fweduwe yi sa̱nang.

¹⁹Nangki̱n, riye diti yikiye ka bwiladu, a ne ni swe ki̱nu ki̱ni wuka riye yinangu n Kwama a yo mi̱ne ti̱ti̱nitangu. A neka fwenti̱nuwe ki̱da.

²⁰Ki̱kumang ka n ke, n Tewuduwe ka ki̱tu ki̱swi riye, kuuti ti̱ti̱niyu ki̱ni kwang ka twiyadu. Aya di̱ne bi̱suti̱ri̱m ki̱mu, n ki̱n ka ki̱tu ditiyu a dubi bayim.

²¹“We ki̱swi wuko, ka ni a ya̱n ko, ‘Da̱ng m Masiya nang wuwe, Ka ka yidu ko da̱ng n nang wu a bwa, ti̱kedu we.’

²²Nangki̱m Masiyati ti̱kwaniyu n ti fa̱kubu ti̱kwanimu ka chiredu ka yung di̱mwal chi ka̱ta̱kitu n ti chi ya̱r yiitu ke a butu ni̱bu, kasi no nang bi̱suti̱ri̱m Kwamamu ka, ka kadde.

²³Di̱ne yiko, ti̱ti yinang! Di̱ne n tu n fwa chimi̱n yo ki̱swi a tibi̱ lande.

²⁴“Aya we diti riye yikiyu, a kuteng riyengu, Dii ka madi chitu, swangu a ne yii ti̱mu

²⁵Ki̱switiyu ka twakadu, kwali̱n chi̱n di̱du a dii twiyenu ka mi̱kadu.

²⁶“Yinu ka nang wuwule niye ka ku Bwe Nii ka fwedu a ti̱twini ki̱ni nabwe dukane n ti dwiyen.

²⁷N ki̱n ka tum ni̱bu ti̱tumbi̱ri ki̱mu ka mure bi̱suti̱ri̱mu Kwamamu we fwiti̱neti ti̱ti̱niyu, we bwa ti̱ti̱nitu a kur mi̱ne n ti bwa ti̱ti̱ni twiyetu a kur mi̱ne.

²⁸“Ki̱ka̱ngu ti̱miya chi we tiyang sinangu; ka ki̱yange ti kiyu a mwe ki̱sute yikiye, yinu lwangi̱n kitu a mwe ki̱twa̱de, ti̱yindu tiko didi̱be a mwatawe.

²⁹We yiko, ka ti̱ku ki̱chitu wu a mwe ki̱fwede, taswan ti̱nu tiko ki̱laki̱ kangu a mwatawe, a lam kwa̱r.

³⁰Mi̱n fwa chimi̱n bi̱yili̱m, yo ki̱dang ki̱ku a tibi̱ sude, ki̱chitu wu kwang ka fwedu.

³¹Dii n ti ti̱mu ka twiyadu. Aya ya̱m mi̱mu a ne ka twiyadu ki̱diya kwadu.

³²“A ne nii a yim di n ti ki̱swi ki̱lake we, kono nang ni̱bu ti̱tumbi̱ri Kwamamu, ka Bwe Kwama, aya kana Kwama Te n ki̱kun.

³³Aya yo ta yimbu yo ki̱chitu wu ka fwede, ti̱swe sobu ti̱nang ma ki̱yolang.”

³⁴“Ni swe ki̱laki̱ Bwe Nii yangu ki̱ni nii wu a du loko a yika di̱bwale. Yo yaka yikade, a kera ni̱bu nanganmu mi̱n nangangitu n kawure ka madangu. Yinu a yi naba nii ki̱to kwa̱re ko a ma ki̱yolang we di ki̱lake ko.

³⁵“Di̱ne yiko, ma ki̱yolang yinang, di̱ne ta yimbu ki̱swi Tewuduwe ka ki̱lade, ka menge, ka kume, ka ki̱tangti̱lang kumange, ka kunsine ka si̱ne.

³⁶A yanuwe mun da duum, di̱ne ka ki̱ladu a ne di̱mwar we.

³⁷Chi mi̱n mang fwa chimi̱ne, n fwa ka nang wuwule niye mi̱n ti̱n. Ti̱ma ki̱yolang!”