Read tula Markus 14 Bible Online

Markus 14 - tula bible

Markus 14

¹Yo du ditiyu yurabu ni̱bu ka ma Yiye Yabake n ti Yiye ki̱dani yiyu a fubufuweye. Tikaketi fansetiyu n ti ni̱bu yungku yili̱n Musayimu, ki̱babba fi̱li wu ka tan Yesu ka chide.

²N chi a kekan ko, “A bwin ki̱dang Yiye Yabakengu, di̱ne ke ki̱la yo kulangkulange.”

³Ki̱dangu n Yesu a lon Simun a Betani, ni wu ki̱ni burang mwa̱liye. Yo n Yesu ki̱chau chabte, wuka naye a be ki̱ni ki̱nung ki̱ki fi̱rfi̱ra̱ng, wa tiyang nardiyang, ki̱ku ki̱ni kwa̱ti̱rang a lure wu ni̱bu a mubbi ki̱ni kale alabasta. N ki̱n a wur lure ki̱nunge a kur ki̱mi̱n we duru.

⁴Bi̱kamu ni̱bu n chi ware we fikonmu a kai ni̱r ko, “A mayire ki̱kai ki̱nunge?

⁵A no ka midu a sure kuuliti ti̱ta, a no ni ti̱lusani.” N chi a kai ni̱r ko a mayire ka kai ki̱nun yi ki̱n kwa̱ti̱riye.

⁶Aya n Yesu a yi chi ko, “Ti̱du bwe naye, ti̱yidu ya̱m we. Naye wu a mami chi ti̱yili.

⁷Ti̱n ware ti ti̱lusaniti kwadu, ta medu ta maka chi we ki̱dangu ti̱baddangu. Aya a ne tike, ne mang swedu n ti chi̱ni kwadu.

⁸N ki̱n a ma chi ka maditu, a wa bwimiyu mi̱n ki̱nung ki̱ku ki̱doyu di̱ne furemang.

⁹Mi̱n fwa chimi̱n bi̱yili̱m, bwa ni̱bu ka mwan ya̱m bi̱li̱m mi̱me we ti̱ti̱niti kwang, ni̱bu ka kur chi naye wu a maatu.”

¹⁰Yinu n Yafuda Yiskariyoti wu we miyari̱mi kub chiri burabi̱me, a ya we tikaketi fansetiyu di̱ne ke ki̱ni Yesu.

¹¹N chi a nwe ta̱ma̱ng ki̱ni ya̱m bi̱bu, n chi a dokan we yichiyu ka ni Yafuda ka̱mbi̱r. A ri, n ki̱n a le ki̱babba da ka niin Yesu we.

¹²We di wu wiine wu a yiye ki̱daniye, di wu ni̱bu ki̱ma niku ki̱ni kwani we Yiye Yabake, miyari̱m Yesumu a bi̱u ki̱n ko, “Mun baddu nang do mi̱n Yiye Yabake a fi̱re?”

¹³Yinu n ki̱n a tum miyari̱m ki̱mi burau ko, “Ti̱le bi̱n Wurchalimanu, ta tekandu n ti wukane nii ki̱ni suur mwen a dur ti̱bungan n ti ki̱n.

¹⁴Lo wu ka lede, ti̱le ti̱yi naba loko, ‘Naba yungke ki̱bi̱du ko, a bwa̱le kan rungkonu, di̱du Mang chan, Yiye Yabake n ti miyari̱m mi̱mi̱nu?’

¹⁵N ki̱n ka yung chi̱n di̱kan kan di̱duun di̱du a tu a do ki̱ni fantiyi sweri. Ti̱do chabtu Yiye Yabaketu a fiko.”

¹⁶Yinu miyari̱mi burabi̱mu a kun, a le mure bi̱ne, a ya ya̱mu we yinangu n Yesu a fwa chimi̱nangu. N chi a do chabtu Yiye Yabake a fiko.

¹⁷Ki̱ni me, n Yesu a ya lo wu n ti miyari̱mi kub chiri burabi̱mu.

¹⁸Yo n chi a le ki̱chau chabti̱te, yinu n Yesu a yi chi ko, “Bi̱yili̱m mi̱n fwa chimi̱nu, wuka nii we tibe chi̱n ka miyu, wu ni̱n chau chabti̱tu ware ti ki̱ne.”

¹⁹Miyari̱mu a kai ni̱tu, n kawure ki̱yidu ko, “M mi̱na?”

²⁰N Yesu a yi chi ko, “Wiin we tibe chi̱n, n ki̱n nang wu a di̱ku falang we kwa̱se ti mi̱ne.

²¹Bwe Nii ka yikadu yinang ka a mwal we dur ki̱nangu. Aya a no nii wu ka mii Bwe Nii! A no la ki̱mi̱n chi ka ni̱bu a no bi̱bu ki̱ne.”

²²Yo n chi a le ki̱chau chatti̱te, n Yesu a da̱u ki̱dane a wana Kwama, a dwa̱kan a ni miyiri̱m ki̱mu a yi ko, “Ti̱yiu ti̱tu nang bwimiyu.”

²³A kuteng ki̱ku, a da̱u kwa̱se wu a mwe yinabi a ma di̱wan we di̱Kwama, a ni chi, n chi kwang a no we mure.

²⁴Yinu a yi chi ko, “Bi̱bu nang ki̱tum bwa̱ki̱ mi̱mu, bi̱bu mang kuru di̱ne ni̱bu nabweni̱mu.”

²⁵Mi̱n fwa chimi̱n bi̱yili̱m, nemang noti̱ mwe yinabe wu we ki̱da, ka lami̱nti̱ di wu mang no wu fwiye a Yaa Kwama.

²⁶Yinu yo n chi a kau tee, a chir a fi̱l Kun di̱du ki̱ni tini Setuniye.

²⁷N Yesu a yi miyari̱m ki̱mu ko, “N ti̱ni ki̱ni kwang ta wulu ta dwiyu we. Yinangu a mwal we ya̱m Kwamamu ko, ‘Mang chi̱u naba toke Kwantiyu ka yaradu.’

²⁸Aya we kuteng ki̱ku n Kwama ka kukiyu we furangu, mang tu chi̱nu we yikaku Ka̱lili yangu.”

²⁹M Biti̱r we fiko kabdu ko, “Kasi no n chi kwang ka yaradu, m mi̱n ne mang dunnu.”

³⁰N Yesu a yi ki̱n ko, “Bi̱yili̱m mi̱n fwa mi̱nu Biti̱r, a ne lami̱nti̱ yo kware ka ta̱ru ki̱da yurabe, mwang kwilayu ki̱da yitta mwi mwang yimbu mi̱n.”

³¹Aya m Biti̱r ki̱fundu ki̱fwadu ki̱ni dukan ko, “Kasi no ni̱bu ka chiyu ware n ti mun nemang kan yinku mwangu ko bayim.” Bi̱kamu miyari̱m ki̱mu a fwa ti̱ni yiko.

³²N chi a yika wukane fi ni̱bu ki̱yalu ko, “Kesemani.” Yinu n Yesu a yi miyari̱m ki̱mu ko, “Ti̱swe a finu Yamang twa̱ba̱ buni.”

³³N ki̱n a bungan n ti Biti̱r, n ti Yakubu n ti Yowana. Ni̱r ki̱nu a mwe ki̱kaiyadu, bwiyu a fwi kangu n ki̱n a yim chi yaka fweditangu.

³⁴Yinu a yi chi ko, “Ki̱lliye wu a ni̱r mi̱ne ka medu ka chiyu, ti̱swe a finu ti̱ma ki̱yolang.”

³⁵Yo a yika kakki bayi̱me, a sung a ti̱m a twa̱ba̱ buni ko ka mwang kenge, yo n nwedu riye we. Aya n ke di̱ne ki̱ke mi, ma ki̱kemo.

³⁶A yi ko, “Wa, Tete, a ne chi ka bwane we, ka mwang kede, da̱mi kwa̱se riye wu. Aya bunti̱ ki̱ke mo, n ke wumi.”

³⁷Yo n ki̱n a ki̱lawe, a be ya miyari̱m ki̱mu a da duum. N ki̱n a yi Biti̱r ko, “Simun, mun da duuma? Wule yo wu a ne ta medu ta swedu kasi no awa wiine?

³⁸Ti̱ma ki̱yolang, ti̱twa̱ba̱ buni ke ti̱yaru we, yo fwakware ka swe chi̱ne. Kasi ki̱ku fi̱ki̱mu we ki̱ni dukanangu aya bwiyu a fwi.”

³⁹Yinu a ki̱latuwe ki̱da, a twa̱ba̱ bunitu, ki̱fwa ya̱mu ka bi̱biini̱m.

⁴⁰Yinu a ki̱lawe, a be ya chi a dati̱ dumuwe. kwalangi chiyu a yi̱lteni ki̱ni duumu. N chi a kwala chi ka fwa ki̱mi̱nditu.

⁴¹N ki̱n a yikatuwe yinu a ki̱lawe ki̱dang tarang, a yi chi ko, “A lanta ki̱kang n ti̱n we duma, n ti̱n we ti̱fi̱kada? A ri! Ki̱swi a be, ni̱bu a ni Bwe Nii a fa̱li ni̱bu bi̱bwilame.

⁴²Ti̱kun, ni yikan! Wu ka miye nang wu a lam fiye.”

⁴³Yo n Yesu we ki̱fwa ya̱me, n Yafuda wu we miyari̱m ki̱mi kub chiri burabi̱me n ti ki̱tuu ni̱be nabwen wu ki̱ni kuli n ti dwamiye. Tikaketi fanseti n ti ni̱bu yungku yili̱ne a tume chi.

⁴⁴N Yafuda, wu ka mi Yesuwe a tu a dokan n ti chi ko, “Nii wu mang sidu ki̱ni kwarke, n nang wu ta tadde, ti̱tau ti̱yikani ki̱n, ti̱to yinang.”

⁴⁵Yo n ki̱n a lam fi a di̱Yesuwe, a kwar Yesu ko, “Tete, naba yungke!” A kwar ti̱n.

⁴⁶Bi̱nabi̱na ni̱bu a tau Yesu, a tituwe ki̱ri̱ng.

⁴⁷Aya wuka ni a chaku kul ki̱nu, a swi ka̱be wuduwe fansetiyeye mi̱n ki̱tele wad.

⁴⁸N Yesu a yi chi ko, “Ti̱chire ki̱ni kulitu n ti dwamiyu be ta tayu yinang dakuwa?

⁴⁹Kanang wuwule diye n mi̱n we ti chi̱n we Kan Kwaman Wurchalimanu mi̱n ma yungki̱ku ta taibu, aya ti̱tu a fwe ke a ri chitu a mwal we ya̱m Kwamamitu.”

⁵⁰We fiko miyari̱m ki̱mu ki̱ni kwang a du ki̱n a yarani yak.

⁵¹A ya wuka bwele we fiko n ti bi̱bu ki̱bunti̱ Yesumu, n ki̱n a ne luke we bwikiyu kana kwadu. Yo ni̱bu a tau ki̱ne,

⁵²m bwele a wuli ti̱ri̱m a du kwadu ki̱nu we a fa̱li chiyu.

⁵³N chi a yikani ki̱ni Yesu a kakku wuduwe fansetiyeyu. Tikaketi fansetiye n ti seli̱bu n ti ni̱bu yungku yili̱n Musayimu a muran we fiko.

⁵⁴M Biti̱r a bunti̱ Yesu, aya a marti̱ ki̱twalang a le mure tare lo wuduwe fansetiyeye. A swe we fiko n ti bi̱bu ki̱to Kan Kwama di̱dunu ki̱wul ki̱rang.

⁵⁵Tikaketi fansetiye n ti kwa̱l yili̱nu a muran ki̱bau nii wu ka mwe ti̱kwanitu a dur Yesunu ko a ma ki̱le ko ke chi chi̱u Yesu, n chi a yabu fi̱li ka mang ti̱te.

⁵⁶Ni̱bu nabwen a mwe ti̱kwanitu we dur ki̱nu. Aya ya̱mi chiyu dangtidangti.

⁵⁷A kuteng ki̱ku, bi̱kam a kun a fwa bi̱chimu ya̱m ti̱kwanimi ying;

⁵⁸“Ni̱n nwe a fwa ko, ‘Mang wur Kan Kwamana Wurchalimanu ni̱bu a mubbi̱nu, a ditiyi yitta mang mu di̱kan di̱du n ke nangang Fa̱liyang.’ ”

⁵⁹Ki̱ni ye ya̱m chimu a beba fi wiine.

⁶⁰Yinu wuduwe fansetiyeye a kun a ti we tibe chi, a bi̱u Yesu ko, “M mun n ne di̱kan di̱ki̱li̱n yiin wenga? We a ya̱miyu ni̱bu a fwa dur muniya?”

⁶¹N Yesu a yibu ya̱m. Yinu tikake Fansetiye a bi̱ti̱ ki̱n ki̱da ko, “M mun nang Masiya Bwe Kwama naba delaka?”

⁶²N Yesu a ke ko, “M mi̱n nang ki̱n. Aya ta ku Bwe Nii ka swedu we kang ki̱yilang Kwamangu, ki̱ni dukan Naba Wuduwenu wu ti̱ti̱nitu a fa̱la̱ng kange, ka suwedu a dii, a ti̱twini we twiye.”

⁶³Tikake fansetiye a ngi̱ra luke ko, a kur a bwa yinu a yi ni̱bu ko, “Ni bau di̱di̱le di̱kwa̱l, we ya̱m bi̱bu?

⁶⁴A ta nwe yinang kangu a swa̱ba Kwamangu, ti̱kama wureni?” Ni̱bi kwang a ke ko, “A lwe bwa.”

⁶⁵Bi̱kamu bidum fanseti fal, a mwe ki̱tibe ki̱nu ki̱ni ki̱tum, a bwa̱u ki̱mi̱n kwalangi kiyu, ki̱ngaddu ki̱ni fa̱la̱ng yinu ki̱bi̱du ko, “N ma fa̱kuitu we chi a fwe.” Yinu ni̱bu toki̱mu a yikani ki̱n ki̱twaladu.

⁶⁶M Biti̱r a ki̱ti̱bang we lo, yinu wukane be fwa̱ne wu ki̱ma nangang we lo wuduwe fansetiyeye a be fiko.

⁶⁷Yo n ki̱n a ku Biti̱r ki̱wul ki̱range, a da̱ng ki̱n yinang, a yi ko, “A mi ka n mun we wa̱re n ti Yesu Banasa̱rete?”

⁶⁸Aya m Biti̱r a kwilan ko, “Mang yimbu chi mun fwaditu fal! Mang swanbu ki̱n!” Yo a fwa ye, a yikati̱ sa̱ngka, bi̱nabi̱na, kware a ta̱r chitu.

⁶⁹Yo fwa̱n ka̱be wu a ku ki̱n we bwako, a fwa ni̱bu bi̱bu a tirana fikomu mi̱n ko, “Wu wetuwe tibe chi.”

⁷⁰M Biti̱r a kwila ti̱n ki̱da. We kuteng ki̱ku bi̱bu a ti we fikomu a mwe ki̱fwati̱nu, ko, “A mwintuwe m mun we ti chi, m mun naba Ka̱liliye ti̱n.”

⁷¹Aya m Biti̱r a mwe ki̱ni ka ti̱turan ki̱twa̱mati̱ chitu we kakku chiyangu, ko, “Mang yimbu chi ti̱fwaditu.”

⁷²Bi̱nabi̱na kware a ta̱r ki̱dang robang yinu m Biti̱r a kur ya̱m bi̱bu n Yesu a fwa ki̱mi̱ni̱mu ko, “Yibe a neka ta̱ru ka lam ki̱dang robangu, mwang kwilayu ki̱da yitta.” Yo a kur ya̱m bi̱be a mwe ki̱ni wi.