Read tula Markus 16 Bible Online

Markus 16 - tula bible

Markus 16

¹Yo difi̱kare ni̱bu Yafudam a suwe, m Maryamu wu a Maka̱dala n ti Salomi n ti Maryamu ne Yakubu a ta̱ne ki̱nung furem,[3] ke chi wa kwa̱me Yesu mi̱n.

²We di wu kake we difi̱kare, ki̱ni si̱n ki̱dangu dii a yongu, n chi a yawe furu.

³We wa̱re n chi ki̱twayadu ko, “N wure ka maka ni ka bi̱l kale we yaku furi̱nu?”

⁴Aya yo n chi a lam fikonge, a da̱ng furu aya nabwe ti kale a bi̱len we yaku.

⁵Yo n chi a le fure, a ku wukane bwele a swe a ba̱le kang ki̱yilange, ki̱ni luke mwemwe we bwi kiyu, n chi a nwe tayi nabwen.

⁶Yinu nii wu a yi chi ko, “Ti̱nwedu tayuwe, m yim ti̱ba Yesu Banasa̱rete wu ni̱bu a kukane? A newe finu, a kun, Ti̱da̱ng fi a no ti̱n ki̱ne nang wu.

⁷Aya ti̱yikan ti̱fwa miyari̱m ki̱mu mi̱n n ti Biti̱r tiko n Yesu a kakku chang ki̱yika Ka̱lili, ta ku ki̱nu a bwako, yinangu a fwa chimi̱nangu.”

⁸Nati̱m bi̱bu a chir we furu kana banani, n kawure bwiyu ki̱yiu yilang di̱ne taye a ne wu ki̱fwa ya̱me we. Yinu chi a fwa Biti̱r mi̱n n ti ni̱bu ki̱mu a kutengu n Yesu a tum chi̱n we fwiti̱netingu. [4]

⁹[Yo n Yesu a kun we fure ki̱ni kunsin we difi̱kare ni̱bu Yafudame, a mwe a tekan n ti Maryamu wu a Maka̱dala a chaku ki̱mi̱n ki̱fi̱bti yidibine.

¹⁰Naye wu a yikan a ya fwa bi̱bu no n chi waremu mi̱n, a ya n chi a le furi ki̱lin ki̱ni wiini.

¹¹Aya yo bi̱ki̱mu a nwe naye a yi ko ki̱ku Yesu ki̱ni ti̱kuriye, n chi a kebu bi̱yili̱mu.

¹²A kuteng ki̱ku n Yesu a fwadu miyari̱m ki̱mi burabu mi̱ntuwe ki̱ni wuka kabu, yo n chi a chire ki̱yika bi̱ne.

¹³Bi̱bi burabi̱mu a ki̱lan, a ya fwa bi̱kamu mi̱nti̱n. Aya a lanta ki̱ka̱ng n chi a kebu bi̱yili̱mu ki̱ni ya̱m bi̱bu.

¹⁴A kuteng ki̱ku n Yesu a yung yikiyu a kakku miyari̱m bi̱bi kub chiri wini̱mu yo n chi yaki̱ chau chabte, a wela chi di̱ne kwalan keku bi̱yili̱mang chiyange, n ti ni̱tu chiti ki̱ngki̱ngi ti̱tu a yo n chi a kebi̱ ki̱ni bi̱bu a fwa chimi̱n ya̱m kunku kangimitu.

¹⁵A yi chi ko, “Ti̱ya ti̱ti̱niti kwang, ti̱mwa ni̱bu mi̱n ya̱m bi̱li̱m mi̱mi kwang kasi no fi̱re.

¹⁶Kanang wuwule niye wu a ke bi̱yili̱me, a mati̱ batisma ka ya yuku. Aya wu a ko keku bi̱yili̱mange ka twiyadu kwako.

¹⁷Ti̱mwalitu ka nabu ni̱bu a ke bi̱yili̱mi̱mu: N chi ka chaku ki̱fi̱bti a di̱n mi̱n. N chi ka fwa ya̱mu ki̱ni yiini yifwi.

¹⁸N chi ka tau sootiyu ki̱ni fa̱li chi. Ka n chi a no yi̱neng ki̱ku ni̱n bwa̱di ki̱nangu, a ne ma chimi̱n chi. N chi ka yo fa̱li chiyu we bwi naba burangeyu, ka ya beki̱ku.”

¹⁹We kuteng ki̱ku n Tewuduwe Yesu a fwa chimi̱n ya̱m bi̱bangu, yinu a da̱u ki̱n a fili̱n bwa diye, a swe a kang ki̱yilang Kwama.

²⁰Yinu miyari̱mu a chir, ki̱ma di̱mwaru ka nang file, n Tewuduwe we ware n ti chi, ki̱yung bi̱yili̱m ya̱m chimu we a chi ka̱ta̱kitu n chi ki̱maditu.]