Read tula Markus 4 Bible Online

Markus 4 - tula bible

Markus 4

¹N Yesu a mweti yungki̱ku we ki̱ti̱ku laangu, tuule ni̱bu nabwen a mura we kakku kangu, yinu n ki̱n a le kwa̱mbi̱re mwe a swe we mure a mwe. Ni̱bu nabwen a muran we ki̱di̱ngu a ki̱ti̱ki̱ laangu.

²A yung chi chitu nabwen ki̱ni baltaku, yinu we yungki̱ kangu a yi chi ko,

³“Ti̱nwe, wuka nii a ya yaka fiiye cham.”

⁴Yo a yaki̱ fii dume, bi̱kamu cham a twakan a wa̱re, ki̱ni̱biyu a be chiba cham bi̱bu.

⁵Bi̱kamu a twakan a nani kwanti a ne ki̱ti̱m we nabwen, bi̱nabi̱na n chi a kiye, di̱ne ki̱ti̱mu a newe nabwene.

⁶Yo kuko a fwenge, a twi chi a kusu, di̱ne ki̱ yinange tiyangu a subu kutan.

⁷Bi̱kamu cham a twakan a kwa̱da, kwa̱da a kwaba chi a yobu ki̱nuti.

⁸Bi̱kamu a twakan a ti̱m bi̱yili̱m, n chi a dwiyen a yo ki̱nutiyu, yikayu sungi chamiyu a yo ki̱nutiyu wan ti̱ta bi̱kamu wan turukuun, bi̱kamu kuul.

⁹Yinu n Yesu a yi ko, “Wu ki̱ni ki̱tele a nwe.”

¹⁰Yo n Yesu a swe n ki̱kune, bi̱kamu ni̱bu n ti miyari̱mi kub chiri burabi̱mu, a bi̱u ki̱n ko a fwa chi baltaku ki̱yungditu.

¹¹Yinu a yi chi ko, “N ti̱n, a ni chi̱n da ta swan ti̱lairi Yaa Kwamatu, aya bi̱bu a newe ti chini̱mu, chiti kwang ka baltaku.

¹²Nang chi ‘A yo n chi ka ni̱n da̱ngdu, aya a neka swiru, n chi ka nwedu aya a neka swaanu, ka n chi a swane, ka wo ki̱ti̱mu, ka ya duku ki̱letiyangu.’ ”

¹³Yinu n Yesu a yi chi ko, “Aya ta swaanbu ki̱ku baltaka? Yinu ta medi yire ta swaan yikayu baltaku?

¹⁴Nii wu ki̱wau duume, ki̱wau ya̱m Kwamam.

¹⁵Duum bi̱bu a twakan a wa̱remu, a ti we ni̱bu a nwe ya̱m Kwamamu, aya yo n chi a nwenge, bi̱nabi̱na, n Setan a be a yitu ya̱m bi̱bu we a ni̱tu chitu.

¹⁶Bi̱kamu ni̱bu yinang ki̱nutiyu a yar a fi a kwantiyemu. Ka n chi a nwe ya̱m bi̱li̱me ki̱yidu ki̱ni furi mwe mwe.

¹⁷Aya a lebu ni̱tu chitu yinang yinang, a ne ti ke, ka riye fumake a ya chi di̱ne ya̱m Kwamame, n chi ki̱ki̱la kuteng.

¹⁸Bi̱kamu ni̱bu yinang duum bi̱ba swi a fi kwa̱da, n chi nang bi̱bu a nwe ya̱m bi̱li̱mu.

¹⁹Aya ti̱kwa̱ma̱n ti̱ti̱nitu n ti baku kulitangu, n ti kubeku chitangu a ri bwi kiyu a yitu ya̱m bi̱li̱mu, a mabu nangang ki̱yilang.”

²⁰Aya bi̱kamu ni̱bu a tiwe duum bi̱bu a fi wu yilemu. N chi a nwe ya̱m Kwamamu, a yiu, ki̱ma nangangi ki̱n, bi̱kamu ki̱ya sukku wan ti̱ta, bi̱kamu wan turukun, bi̱kamu kuul kuul.

²¹N Yesu a ki̱la yi chi ko, “Niin da̱u fiti̱la ni sunti̱ kwa̱se, ni di̱ki̱du a bwang kwa̱mbi̱ranga? Ne ni yo fiti̱la a dii, a ti̱dda?

²²Chi ti̱yingeritu be ka kwa̱la̱du, ti̱nti̱ne, ti̱tu niyang lailaiyetu ka chire dii kwa̱rikwa̱ri.

²³Ka ni ki̱ni ki̱tele, a nwe.”

²⁴Yinu a ki̱la yi chi ko, “Ta̱l chi mun nweditu yinang, kwa̱se mun swe ni̱bu mi̱ndi ki̱ne, n Kwama beka swe mi̱ndi ki̱n. Wuko ka bu mi̱ndi di̱bi̱l.

²⁵Wu ki̱ni chiye ka bu ki̱mi̱n ti̱duwe, wu a ne chi we, ka yitu ti̱tu n ki̱ni ki̱ni bayimitu.”

²⁶N Yesu a chakakku ko, “Yaa Kwama kanodi yinang; Ni a wau duum we kuu ko.

²⁷Kum n ti kuko, a yimbu ki̱dangu duum bi̱bu a kiye a dwiye ti̱nangu, ka a ma yire, n ki̱n a yimbu.

²⁸Ti̱mu ki̱yo tiniyu ki̱dwiyedu ki̱tu ti̱kulan. Cham ki̱mwedu we ti̱mwaritu, yinu ka chir duru, yinu fal ki̱nutiyu ka chiredu ti̱changri tu.

²⁹Yo chama biye, ni ka da̱u too ka bidu, di̱ne ki̱swi a lam wa kakke.”

³⁰N Yesu a yi chi ko, “Ni swe Yaa Kwama ki̱ni wureni? Ni ma nangangu ki̱ni ki̱ki̱le baltaku ke ni swe mi̱n?

³¹Yinang ki̱kwi ki̱si̱raiye, ki̱kwi wu a mwan a tamme, nii a fi a kuu ko.

³²A baki̱swi bayim, a dwiyen a kwam a lati̱ yikayu beti̱ tini we kuu lambu. A ma ki̱yange tiyu nabwen, ki̱ni̱biyu ki̱sungdu we ki̱wulang kangu ki̱ma ti̱ki̱kuli we.”

³³We ki̱ku sweku, n ki̱n a fwa chimi̱n ya̱m bi̱bu yinang kangu chi ka swani̱n ya̱m Kwamamu.

³⁴N ki̱n a yung chi chiti kwang ki̱ni sweku, aya yo n ki̱n ki̱ni ki̱kun n ti miyarri̱m ki̱me, ki̱fwa chi mi̱n ya̱m bi̱bi kwa̱rikwa̱ri.

³⁵We diko ki̱ni me, n Yesu a yi miyari̱m ki̱mu ko, “Ni yabu, nii ya ba̱la̱ng ka bwanangu.”

³⁶Yo n chi a du ki̱tuu ni̱be, miyari̱mu a le kwa̱mbi̱re mwe n chi a yikan ki̱ni ki̱n we mure, yikayu kwa̱mbi̱ri n wetuwe.

³⁷Yinu wuka ki̱fi̱be wuduwe a kune, labi mwetu ki̱baddu ka ri kwa̱mbi̱re mwe ki̱ni mwe.

³⁸N Yesu we kuteng we kwa̱mbi̱re mwe ki̱da duum ki̱ni filo, miyari̱m ki̱mu a kukku ki̱n a yi ko “Naba yungke, mwan twarbu mwiko yanang bwarada?”

³⁹N Yesu a kaban, a kwabu ki̱fi̱be, mwe laange ko, “Tii wudidi.” Ki̱fi̱be a ti, fantiyu kwang, a da wudidi.

⁴⁰A yi miyari̱m ki̱mu ko, “A mayire ta mwan ta ka̱ta̱ni ye? Ta kebu bi̱yili̱mu a lanta ki̱ka̱nga?”

⁴¹N chi a nwe tayu nabwen, yinu n chi a fwa we bwiti chiyu ko, “N wure wu ki̱fi̱be n ti mwe la ki̱nwe ya̱m ki̱me?”