Read tula Markus 8 Bible Online

Markus 8 - tula bible

Markus 8

¹We diti yikiyu wuka ki̱tuu ni̱be a muratewe. Yo ni̱bu a ne chi ka chade we, n Yesu a yale miyari̱m ki̱mu a yi chi ko,

²“Mi̱n nwe ki̱bune ki̱tuu ni̱be, di̱ne wu diye yitta n chi ware n ti mi̱n a yabu chi a chabu.

³Ka n du chi a yikane, chunu ka chi̱u bi̱kamu we wa̱re di̱ne bi̱kamu a be kutan.”

⁴Miyari̱m ki̱mu a yi ki̱n ko, “Yinu ni ya chabti̱tu a fi̱re we di̱kir di̱du, ni ni chi ka chade?”

⁵N Yesu a bi̱u chi ko, “N ti̱ni ki̱ni ki̱daniyi yile?” N chi a yi ko, “Yi̱di̱bi̱n.”

⁶N ki̱n a yi ki̱tuu ni̱be ko a swe a ti̱m. A da̱u ki̱daniyi yidibiniyu a wana Kwama, yinu a dwa̱kan a ni miyari̱m ki̱mu ko, “Ti̱kera ni̱bu mi̱n.” Bi̱ki̱mu a kera ti̱n.

⁷Aya n chi ki̱ni beti̱ chi̱ngi bayim. N ki̱n a wana Kwama yinanga ma we ki̱danniyangu, a ni miyari̱mu ko a keran, bi̱ki̱mu a kera ti̱n.

⁸Ni̱bu a chau n kawure a ri furu. Miyari̱m a mur ti̱bukentu a ri ti̱ti̱ngriti ti̱dibin.

⁹Ni̱bu a fikomu a lam kuniriti taana, a kuteng ki̱ku a yo ni̱bu n chi a yara ti̱n.

¹⁰Bi̱nabi̱na a le kwa̱mbi̱re mwe n ti miyari̱m ki̱mu, a yika ti̱m Dalmanuta.

¹¹Kangu ni̱bu Farisamu a nwe ko n Yesu a bengu, a mure ka tukadu n ti Yesu. N chi a swe Yesu ki̱ni di̱bi̱du ko, yung ni̱n chi ka̱ta̱ki ti̱tu ka chiredu a twiyetu.

¹²N Yesu a ma ki̱fwile ki̱ni dukan yinu a fwa ko, “Di̱ne wule di̱kalan di̱du ki̱bau ka chi ti̱ka̱tariye? Bi̱yili̱m mi̱n fwa chi mi̱nu, a ne chi ti̱ka̱ta̱ri ti̱tu ki̱dang ki̱ku ka kuditu we.”

¹³N ki̱n a du chi a leti̱ kwa̱mbi̱re mwe we, a yabu kangu ba̱la̱ng we.

¹⁴Miyari̱m Yesumu a kur chi tabu chiya bebi̱ ki̱ni ki̱danniyu aya kana ki̱danne wiin, wu n we kwa̱mbi̱re mwe.

¹⁵N Yesu a ngau chimi̱n ki̱kure ko, “Ti̱ma daan, ti̱ma daandaan ki̱ni yis ni̱bu Farisamu n ti wu Yiridu se.”

¹⁶N chi a twaiyan bi̱bu we yichiyu yinu a fwa ko, “Di̱ne n chi̱ni ni newe ki̱ni ki̱danniyu.”

¹⁷N Yesu a swaan ti̱kuran chitu, yinu a bi̱u chi ko, “A mayire ti̱kuran chi̱ntu a kana ki̱danniye? Lanta di ta kubu di ta swaanti̱ba? A mwintuwe ki̱ka̱ngu ta swaanbu ta twar ti̱ba? Ni̱tu chinti ki̱ngki̱nga?

¹⁸N ti̱ni ki̱ni kwalangi ta kuba? N ti̱ni ki̱ni ki̱teliyu ta nweba? Ta kurti̱bu chi ko bayim?”

¹⁹Yo mang kera ni̱bu kuuniyi yuunu mi̱n ki̱danniye, “Ti̱ti̱ngriti ti̱ta a ri ki̱ni ti̱bukenitu tiile?” N chi a ke ko, “Kub chiri turau.”

²⁰Yinu yo mang kera ni̱bu mi̱n ki̱daniyu kuniyi yaana, “Ti̱ti̱ngriti tiile, ti̱tu a ri ki̱ni ti̱bukenitu?” N chi a yi ki̱n ko, “Ti̱dibin.”

²¹Yinu n Yesu a yi chi ko, “A lanta ki̱ka̱ng ta swaanbu ya̱m mi̱ma?”

²²Yo n chi a be Betsaidange, bi̱kam ni̱bu a twa̱ke ki̱du, a wana Yesu ko a twai ni wu ke a be.

²³N Yesu a tau fa̱la̱ng ki̱duwangu, a chir kuteng bi̱nangi ki̱n. Yo a ti̱bu ki̱tumu we nui ni wuye, yinu a yo ki̱mi̱n fa̱la̱nge, n Yesu a bi̱u ki̱n ko, “We mun ku diya?”

²⁴Ki̱du a kukku duru a yi ko, “Mi̱n ku ni̱bu yinang tiyang ki̱yadi dila̱ng dila̱ng.”

²⁵Yinu n Yesu a twaiti̱ nuiyu ki̱da, yinu nuiyu a wuden, dukan kuku diyangu a ki̱lawe, n ki̱n ki̱ ku kanang ti̱ti̱le chiye yinang.

²⁶N Yesu a yi ki̱n ko, “Yika lo, ledu bi̱nu we yo kano mun yika lo.”

²⁷N Yesu n ti miyari̱m ki̱mu a yika beti̱ bi̱ni yiyu a kwati̱na Kaisariya Filibu. We wa̱re n ki̱n a bi̱u miyari̱m ki̱mu ko, “Ni̱bu ki̱yidu ko n mi̱ni̱n wure?”

²⁸N chi a ke ki̱mun ko, “Bi̱kamu ko n Yowana wu ki̱ma Batisma, bi̱kamu ko n Yiliya, bi̱kamu ko m mun wukane we fa̱kubi̱bu.”

²⁹Yinu a bi̱u chi ko “N ti̱n de, ti̱ yidu ko m mi̱ni̱n wure? Yinu m Biti̱r a ke ki̱mi̱n ko, ‘M mun nang Masiya, naba yuke wu n Kwama a tume.’ ”

³⁰N Yesu a wu chimi̱n ki̱tele ko a fwadu wukane nii mi̱n duwe ka n ki̱n n wure.

³¹We ki̱dang kangu, n Yesu a mwe ki̱yung chidu ko, a mwintuwe Bwe Nii ka nwe riye dangtidangti. Tikake seli̱bu, n ti bi̱duumu fanseti n ti ni̱bu yungku yili̱n Musati̱mu ka ko ki̱nu, ka chi̱u ki̱nu. We kuteng bwakongu, ka kunu we di wu tare ki̱ni ti̱kuri.

³²A fwa chi mi̱n ya̱m bi̱bi kwa̱rikwa̱ri. M Biti̱r a yal ki̱n a ki̱ti̱ku, a kwabu ki̱n ko a fwadu ya̱m bi̱bu we.

³³Aya yo n Yesu a ki̱l kabu ki̱dang miyari̱me, a kwabu Biti̱r ko, “N da̱n bwi a fi, Setan! Ti̱kuran mwitu ti̱tu a bwi, n ke ti̱tu a di̱Kwamatu.”

³⁴Yinu a yal ki̱tuu ni̱be n ti miyari̱m ki̱mu a yi chi ko, “Nii wu ki̱baddu ka bumitede, a mwintuwe ka ko yikiyu, ka da̱u ki̱tiyang bwang kangu ka bumitedu.

³⁵Aya wu ka yidu ko ka to ti̱kuri kite, ka kwaladu. Aya wu ka kwala ti̱kuri kitu di̱ne mi̱n n ti ya̱m bi̱li̱m mi̱me, ka yu ti̱kuri kitu.

³⁶Li̱mang kangu wule, ka ni a ya ti̱ti̱nitu ki̱ni kwang a kwala ti̱kurikite?

³⁷Ti̱nti̱ne, mwan ni wureni ke n yu ti̱kuri mwite?

³⁸A mwintuwe ni wu ka nwe dibwi mi n ti dibwi ya̱m mi̱me we ki̱dang ki̱ku ni̱bu a bunti̱bu Kwama yinange, ki̱ma kana ti̱kuli n ti ki̱letiye, Bwe Nii ka nwe dibwi ko we di ki̱lake ko wu n ki̱n ka bedu ki̱ni dwiyen Te ki̱nitu n ti bwesi̱m ti̱tumbi̱ri bi̱bi wauwadi̱mu.”