Read tula Markus 9 Bible Online

Markus 9 - tula bible

Markus 9

¹N Yesu a chakakku ko, “Bi̱yili̱m mi̱n fwa chimi̱nu, bi̱kam bi̱bu a tiran a fini̱mu a ne ka ku bwa aya ka ku Yaa Kwama yo ka fwadedu ki̱ni dukan ki̱ne.”

²A kuteng diitiyi yurukunangu n Yesu a da̱u Biti̱r n ti Yakubu n ti Yowana, a fi̱l ti chi a kun we bwako n chikun, we bwako bwikiyu a suten we kakku chiyangu.

³Lukei kiyu ki̱yiladi mwe, a ne kuli̱n di̱du ni ka yindu ka twa̱di yikonu we ti̱ti̱nitu.

⁴N fa̱ku Yiliya n ti fa̱ku Musa a fwe chi mi̱ntuwe ki̱fwa ya̱mu n ti Yesu.

⁵M Biti̱r a yi Yesu ko “Tete, a le yinangu n ni̱n we finangu, du ni̱n ti ti̱kubiti ti̱ta, di̱kanu n di̱mun, di̱kanu n di̱Musa, yinu di̱kanu n di̱Yiliya.”

⁶M Biti̱r n ti bi̱kamu tayu a tau chi nabwen. M Biti̱r a kwala chi ka fwaditu.

⁷Yinu di̱kan di̱twin a yinge chi, n chi a nwe di̱kan ker a chire we di̱twin di̱du, ki̱fwadu ko, “Wu nang Bwemi, wu mi̱n mi̱lade, ti̱ nwe ki̱n.”

⁸A tibuke n chi a da̱ng finu n chi we mi̱ne, a kuti̱bu wukane nii, kana Yesu we ware n ti chi.

⁹Yo n chi yaki̱ suwedu we kune, n Yesu a wu chi mi̱n ki̱tele ko a ti a fwadu wukane nii mi̱nu we, n chi, n chi a kuwe we, aya ka lami̱nti̱ yo Bwe Nii ka kunu we furangu.

¹⁰Di̱ne yiko, n chi a du bi̱bu ya̱m, a ki̱lanki̱bi̱u yichiyu ko kano “Kunku furangu” ki̱yung wureni?

¹¹Yinu n chi a bi̱u ki̱n ko, “Wureni a yo ni̱bu yungku mu a yi ko fa̱ku Yiliya ka tiye kakku yinu m Masiya ka buntede?”

¹²N Yesu a ki̱nta chi ko, “Bi̱yili̱m fa̱ku Yiliya ka tiye kakku, beka do ka ti̱ti̱lle chiye. Aya a mwalbu ko Bwe Nii ka nwe riye nabwen, ni̱bu ka ko ki̱na?

¹³Aya mi̱n fwa chi mi̱nu n Yiliya a tu a be, ni̱bu a ma ki̱mi̱n chi, n chi a kuditu, yinang ka mwal ko, ka fwedangu.”

¹⁴Yo n chi a ki̱la fi a bi̱kamu miyari̱me, n chi a ya ki̱tuu ni̱be a di̱bi̱r chi yinu ni̱bu yungku yili̱ni̱mu ki̱tukadu n ti chi.

¹⁵Yinangu n chi a ku Yesuwangu, ki̱tuu ni̱be a ya̱r yii nabwen, n chi a kiyani ki̱ti̱bu ki̱yadu ka sii Yesu.

¹⁶N Yesu a bi̱u miyari̱m ki̱mu ko, “Ti̱tuka wureni n ti chi?”

¹⁷Wukane nii we ki̱tuu ni̱be a ke ki̱mi̱n ko, “Naba yungke, da̱ng n be ki̱ni bwemi wu ki̱fi̱bti yibwilai a kwau ben ki̱ne, ki̱lwa̱bu ya̱mu lwa̱be.

¹⁸Yo burang ki̱ku a kunenge, ki̱fi̱u ki̱nu a ti̱m, yii ko ki̱chir ka ki̱fwiye, ki̱ki̱rti̱ti̱ numu, bwi kiyu ki̱ni ka dukan. N yi miyari̱m mumu mi a chaku ki̱fi̱fti yiyu, aya n chi a bwal a yabu dawe.”

¹⁹N Yesu a yi chi ko, “Ni̱bu ki̱dang, ki̱ku a newe ki̱ni keku bi̱yili̱mange, ti̱badu mang swedu n ti chi̱ni yire? Ka lanti̱ fere ma ni̱n yung chi̱nu. Ti̱be ki̱ni bwe.”

²⁰Yinu n chi a be ki̱mi̱ne ki̱ni bwe. Yo ki̱fi̱bti yiyu a ku Yesuwe, bi̱nabi̱na a ngau bwe bwikiyu ki̱mi̱ka kana mi̱ka ku a mau ki̱n we ti̱mu ki̱bi̱nti̱ledu, yiiko ki chire ka ki̱fwiye.

²¹Yinu n Yesu a bi̱u te bwe ko, “Ti̱chitu wu a mwe ki̱ni fere? Te bwe a yiko, a mwe yi bwesi̱n.”

²²“Ki̱fi̱btiyu ki̱yo ki̱nu ki̱yaru a ki̱rang ka mwenge, ko ke a bwa, aya ka mwang mede, nwe ki̱bune ni̱n, maka ni̱n.”

²³N Yesu a yi ki̱n ko, mwi mang meda? “Kanang ti̱ti̱le chiye ka fwedu we ni a ke bi̱yili̱me.”

²⁴Bi̱nabi̱na te bwe a yi ko, “N ke bi̱yili̱mu, Temiya makai n tituwe di̱kwa̱l di̱du.”

²⁵Yo n Yesu a ku ki̱tuu ni̱be ki̱wulede, a wela ki̱fi̱bti ko, “Ki̱fi̱be lwa̱bke, mi̱n ya̱nu chir we di̱ki̱ne, ki̱lateduwe.”

²⁶Ki̱fi̱be a bwe keme, a yingle bwe yinang, yinu a chir. Bwe a yar we ti̱mu yinang kwa̱me, bi̱kamu ni̱bu a da̱u ko kanodu a bwa.

²⁷Aya n Yesu a tau Fa̱la̱ng bwengu a kuki̱ ki̱n, n ki̱n a kun a ti ki̱ni naniki.

²⁸Yo n Yesu a le mure longe, miyari̱m ki̱mu a bi̱u ki̱n a bura ko, “A mayire nang yimbu chaki̱de?”

²⁹N Yesu a yi ko, “Ki̱dum bi̱bu a chirbu ka n ke ki̱ni twa̱ba̱ku.”

³⁰Yinu n ki̱n n ti miyari̱m ki̱mu a du fiko a chakakku ki̱ni yayu chi a bunti̱ bi̱n Ka̱lili. Aya n Yesu a kebu ko wukane ni ka yim finu n chi wemi̱ne,

³¹di̱ne n ki̱n miya miyari̱m ki̱mu ko, “Ka ni Bwe Nii a fa̱la̱ng ni̱bang, n chi ka chi̱u ki̱nu, a kutengu ditiyi yittayu ka kunti̱nu.”

³²Aya n chi a swaanbu chi ki̱miya chimi̱ne, n chi ki̱nwe tayi yinangu ka bi̱u ki̱nangu.

³³N chi a lam Kafanawu. Yo n Yesu a le lo, a bi̱u miyari̱m ko, “No ti̱tuka wureni we wa̱re?”

³⁴Aya n chi a le si̱ng, di̱ne n chi a no ki̱tukadu we wa̱re ko wu a la chiye n wure we tibe chi.

³⁵Yo n ki̱n a swe, a yal bi̱bi kub chiri burabi̱mu a yi chi ko, “Wu ki̱baddu ka ti kake, a mwintuwe n ki̱n na wu ka swan kutenge, ka kau ka̱be ni̱be kwang.”

³⁶Yinu n Yesu a yo wuka bwe wuti̱re a ti we tibe chi. Yinu a da̱u bwe a kwar kware, a yi chi ko,

³⁷“Nii wu a mar yikiyu yinang bwe wuti̱re ye, nang wu ki̱ke yiye, aya wu a ke yiye, ki̱bau wu a tuiyenge.”

³⁸N Yowana a yi ki̱n ko, “Naba yungke, ni̱n kuu wukane nii ki̱chaku ki̱fi̱bti ki̱ni di̱n mun, ni̱n ki̱l ki̱n di̱ne n ki̱n a newe n ti chir.”

³⁹N Yesu a yi chi ko, “Ti̱ ki̱lu ki̱n we, di̱ne a ne ni ka ma chi ti̱ka̱ta̱ri ki̱ni di̱n mi̱n yinu bi̱nabi̱na ka tuye we.

⁴⁰Aya ka nang wuwule niye, wu a kobu chiniye n wu chir.

⁴¹“Mi̱n fwa chimi̱n bi̱yili̱m, ka nang wuwule ni wu a ni chi̱n mwe wu nore a kwa̱se, di̱ne n ti̱n m bi̱u Masiya, bi̱yili̱m mi̱n fwa chimi̱nu a ne kwalan ki̱ti̱me ko we.

⁴²“Ka kau chi ki̱bunei we ki̱n wu a yo wuka we bwesi̱m bi̱ti̱ri̱mu a ke bi̱yili̱mu mi̱n yare, ka la chi ni̱bu ka kwau ki̱mi̱n ner a kwiir, ka mar ki̱na la.

⁴³Ka fa̱la̱ng mwangu ki̱yonu a ki̱lenge, mwatu. Ka la mi̱n chi mwang le Yaa Kwama ki̱ni fa̱la̱ngi kiin n ti ki̱ku bwi mwiyi kwang ka le far ki̱ranu, fi ki̱ranga dumebudumene.”

⁴⁴Rwa̱ti yiyu ki̱wudiyu a bwabu we fiko, yinu ki̱rang ki̱ku a dume ti̱bu.

⁴⁵Ka nang mwangu ki̱yonu a ki̱le, mwatu. Ka la mi̱n chi mwang le Yaa Kwama ki̱ni nangi kiin n ti ki̱ku bwi mwiyi kwang ka le far ki̱ranu.

⁴⁶Rwa̱ti yiyu ki̱wudiyu a bwabu we fiko, yinu ki̱rang ki̱ku a dume ti̱bu.

⁴⁷Ti̱nti̱ne, ka numo ki̱yonu a ki̱le, chaku. Ka la mi̱n chi mwang le Yaa Kwama ki̱ni nu wiin n ti ki̱ku nuyi kwang ka le far ki̱ranu.

⁴⁸Rwa̱ti yiyu a fikoyu a bwabubwa, yinu ki̱rangu we fikongu a dumebudumene.

⁴⁹“Kanang wuwule niye, ka sii ki̱nu ki̱rang, tiyangu nibu ki̱si bumangu.”

⁵⁰“Bumu chi ti̱yili aya ka bumu a kwala li̱mang ka̱nge, ka madi yire li̱mang kangu ka ki̱lade? Yinu ti̱kau yinang bum we lwekaki̱ changu. Ti̱ma fiswe li̱mang n ti kawure.”