Read tula Luka 10 Bible Online

Luka 10 - tula bible

Luka 10

¹A kuteng ki̱ku, n Tewuduwe a ni ni̱bu wan ti̱dibin chiri burabi̱mu nangang. A tum chi, burau burau. N chi ka yadu ka tu ki̱nu we fantiyu n ki̱n yaka yadiyu.[68]

²N Yesu a yi chi ko, “Nangangu a kakkangu nabwen, aya ni̱bu nanganmi bayim. Di̱ne yiko, ti̱twa̱ba̱ Tewuduwe naba kakke ke a tume bi̱bu ka ma makaku we kuu komu.[69]

³Ti̱ya! Mi̱n tum chi̱nu yinang kwanti a ti̱be bawutiye.[70]

⁴Ti̱da̱du ka̱mbi̱r we, ka swenge, ka ki̱wamiye, ti̱tiradu chi we wa̱re.”[71]

⁵Kanang ki̱ki̱le ki̱daang ki̱ku ta le lo niyange, ti̱yi ko li̱me Kwama a swe we lo wuko.

⁶Ka wuka nii ki̱ni li̱me we lo wuko, ka ya li̱me chi̱n. Ka ne wenge li̱me chi̱n ka ki̱la chimi̱n teduwe.

⁷We fi ni̱ba yiu chi̱ne, a kau lo wu ta si̱ki̱nde. Ti̱chau, ti̱no kasi no ka ni chi̱n wureni. N fwa yiko di̱ne naba Kwa̱mbi̱re nangange a dakan ka chau tureko. We bi̱nu n ti̱n wemi̱ni̱nu, ti̱sutedu loniyu we.[72]

⁸Kanang di̱di̱le bi̱n ta ledi̱ne, ka ni̱bu a yiu chi̱ne, ti̱chau chitu ka ni chinitu a ne ti̱kwilan we.

⁹Ti̱bera ni̱bu buri̱ni̱mu, ti̱mwa ni̱bu tiko, ki̱ku nang ki̱dangu Yaa Kwama ki̱dwan n ti chi̱nangu.

¹⁰Aya ka ti̱le bi̱nu ni̱ba kebu chi̱ne.[73]

¹¹“Ti̱chir ti̱ya nelo ti̱fwa bi̱bu, ‘Kasi no kur ki̱ti̱n di̱du a bi̱n chini̱nu a tabatuwe nani chiyu, ti̱bu chimi̱ntuwe, aya ta yindu ko Yaa Kwama a mwatawe ki̱dwan.’ ”

¹²“Mi̱n fwa chimi̱nu, we di swankute, ki̱dangu n Kwama ka mwata ni̱bu mi̱n ya̱ma̱ngu, n ki̱n ka nwe ki̱bune bi̱n Sodom, ka la bi̱n di̱du ni̱bu a kon ki̱ni̱nu.”[74]

¹³Yinu n Yesu a fwa ya̱m we ni̱bu a bi̱ntu ti̱tu n ki̱n a mang chi ka̱ta̱ki nabwenitu, a yi ko, “N Kwama ka wela chi̱n ni̱bu Korasinu n ti ni̱bu Betsaidamu. Ka no n ma chi ka̱ta̱kitu mang ma a di̱chi̱netu we bi̱ntu Taya n ti Sidon, a no yadu n chi a wo ki̱ti̱m we ki̱leti chiyu. A no yadu a do ti̱yaki̱sani kuli̱ni, a wauti̱ buken we bwiti chiyu ke a yung woku ki̱ti̱mang chiyangu.[75]

¹⁴We di̱swang kute, n Kwama ka wela chi̱nu ka la Sidon n ti Taya di̱ne n ti̱n ti̱ku chi ka̱ta̱kitu mi̱n maditu a ya ta kebu bi̱yili̱mu.

¹⁵Aya n ti̱n ni̱bu Kafanawu, ti̱kamaduwe ti n Kwama ka da̱u chi̱nu a bwadiye, a ne fwedu aya ka mar chi̱nu a far ki̱ran.”[76]

¹⁶Yinu n Yesu a yi miyari̱m ki̱mu ko, “Ka nii a sii ki̱tele a nweti̱ miyari̱m mi̱mu, a ke ya̱mu ti̱miya chimi̱ndi̱mu, ka kadu yinang wu a nwe mi̱n n ti miyaku mange. Wu ka ko chi̱ne, a ko ti̱mi̱n, wu a ko mi̱ne, a koti̱ ki̱n wu a tum mi̱ne.” [77]

¹⁷Ni̱bu wan ti̱dibin chiri burabi̱mu a ki̱lawe ki̱ni furi mwemwen. N chi a yi Yesu ko, “Tewuduwe, ki̱fi̱bti ki̱nwe ni̱nu di̱ne di̱n mune.”

¹⁸N Yesu a yi ko, “N ku Setan ki̱yaredu nang ki̱yile we dii.”

¹⁹N Yesu a chakakku ko, “N ni chi̱n dukan di̱du ta yadu kasi no a soti yi kwani, ka ki̱naiye a ne ma chimi̱n chi. N ni ti̱chin dukan di̱du ta laan dukan Setane, a ne chi ka ma chi̱ne we ko bayim.[78]

²⁰Aya ti̱mi̱ladu chi we ti ki̱fi̱bti ki̱wul chi̱nu, ti̱ma ti̱mi̱lantu di̱ne n Kwama a tu a mwal di̱nbi chi̱ntu we taki̱da ti̱kuriye wu a ni̱bu ka le yaako ki̱diya kwadi̱mu.”

²¹We ki̱swi wu, Fi̱ki̱m Kwamamu a yo Yesu a ma furi mwemwen, yinu a yi Kwama ko, “Tewuduwe mi, mun ma mati̱n chititu n ti ka wuwule niye, we ti̱ti̱nitu n ti bwadiye. Mi̱n delanu, di̱ne mwang dubu bi̱bu a yim chimu n ti bi̱bu a me chimu a yim ki̱chitu wumu, wu mang fwa miyari̱m mi̱mu mi̱ne. Yinu mi̱n delanu di̱ne mwang yung bi̱bu a kukabu dutu chiti̱mu n ti bi̱bu a ke muni̱mu yinang bwesi̱m bi̱ti̱ri̱mu. A le mi̱n Kwama mwang madi yiko.”

²²“Te a nii chiti kwang. A ne nii a yim Bwe we ka n ke Te. Ti̱nti̱ne, a ne wu a yim Te we, ka n ke Bwe, aya bi̱bu a ke mang yung chi Temimu, a yim yinangu Te siine wemi̱nangu.”[79]

²³Yinu n Yesu a fwa ya̱m ti miyari̱m ki̱mu a bwin ki̱tuu ni̱be, a yi chi ko, “N Kwama a dela chi̱n we chi ya̱rku yiiyangitu ta kuutu.

²⁴Mi̱n fwa chimi̱nu fa̱kubu Kwamamu n ti mati̱m mu nabwen, a bau ka ku chitu ta kuutu, aya a yabu da. A bau ka nwe chitu ta nwetu, aya a nwebu.”

²⁵Wuka di Yiye, wuka naba yungku yili̱n Musante, a kun ka swe Yesu. N ki̱n a bi̱u Yesu ko, “Naba yungke, mang ma wureni ke n ya ti̱kuri ki̱diya kwadite?”[80]

²⁶N Yesu a ke ki̱mi̱n ko, “Mun ki yili̱n Kwamatu ko wule? We ya̱m ti̱kuri ki̱diya kwaditi̱mu?”

²⁷Tewuduwe a yi ko. “Mi̱la Tewuduwe Kwama mo ki̱ni ni̱r muni diin, ki̱ni ti̱kuri mwitu, ki̱ni dukan muni kwang yinu n ti ti̱kuran mwiti kwang. Ti̱nti̱ne mi̱la kemo yinang ka mwang mi̱la yimwiyangu.”[81]

²⁸N Yesu a yiko n fwa bi̱yili̱m, “Ya, ya ma yiko, mwang ya ti̱kuri ki̱diya kwaditu.”[82]

²⁹Di̱ne nii wu ki̱baddu ka chaku dur ki̱nu ko n ki̱ni wauwade, a ki̱la bi̱u Yesu ko, “Kemi n wure?”

³⁰N Yesu a ni di̱ki̱li̱nu ko, “Wuka nii a chire, a Wurchalima ki̱suddu ki̱yika Yeriko, n ki̱n a ya teka mi̱n n ti dabi̱kuum. N chi a wur ki̱n. A yiti̱ ki̱n ka̱mbi̱ru n ti chi n ki̱ni ki̱ne kwang a dumbu kuli̱nu. N chi a ngau ki̱n a duba fa̱li bwai.

³¹Aya wuka we Fanseti ni̱bu Yafudam a taa wa̱re wuko, yo n ki̱n a ku niwe, a bal we kangu ki̱ti̱ku a suti̱n.

³²We ki̱ twalan kangu, wuka naba Lawiye a yaki̱sudu, a ku nii wu dabi̱kuum a ngabbe, a bal we kang ki̱ti̱ki̱ku, a suti̱n, a makabu.

³³Yinu wuka naba Samariya, a tatte wa̱re wu, a be, a ku nii wu dabi̱kuumu a ngabbe, ki̱bune a tau ki̱n.[83]

³⁴N ki̱n a ya we nii wu, a wara ki̱mi̱n ki̱nung n ti yim we bumbitu, a mu ki̱mi̱nti̱ ti̱luktenitu. A da̱u nii wu a yo we be kuringe ko, a yikan lo wu ni̱bu ki̱si̱ki̱nde, a ya maka ki̱n.

³⁵N chi a da we bwako, bafi̱nenangeko, n ki̱n a chake ka̱mbi̱r sure diti yurabi̱n, a ni naba toku lo si̱ki̱ke ko, temiya da̱ngmi ni wu, ka ka̱mbi̱ru ka ride yo mang ki̱lade, be mang sudu.”

³⁶Yinu n Yesu a bi̱u naba yingku yili̱ne ko, “We da̱ngki̱ mwangu, wuwule nang ke ni wu ni̱bu a ngabbe, we ni̱bi bi̱ta bi̱bu?”

³⁷Naba yingku yili̱ne a ke ki̱mi̱n ko, “Wu a ma makake.” N Yesu a yi ki̱n ko, “Mun ti̱n ya, yang ma ti̱ni yiko.”

³⁸Kangu Yesu n ti miyari̱m ki̱mu a chakakku ki̱yika Wurchalimangu, a yikan, a lam wuka be bi̱ne. Wuka naye we fiko, a yal chi a loko. Naye di̱n ki̱nu m Matta. [84]

³⁹M Matta ki̱ni keko wuwiye di̱n ki̱nu m Maryamu, wu a swe ki̱dwan n ti Tewuduwe ki̱nwe ya̱mu ki̱miya ki̱mi̱ndi̱mu.

⁴⁰Aya m Matta a lekan we nanga chabtangu, a ne ki̱swi wu n ki̱n ka swedu ka nwe ya̱m Yesume we. N ki̱n a ya bwa di̱Yesuwe, a yi ko, “Tewuduwe, mang kurbu mwi kemi wuwiye a dumi nangang chabtangu m mi̱n m mi̱kuna? Yi ki̱n mwi a be makai.”

⁴¹Tewuduwe a ke ki̱mi̱n ko, “Matta, mun n lekan, ti̱kuran mwitu a yika kwa̱li̱n chi̱nu nabwen.

⁴²Aya ti̱me chi wiin we mure. M Maryamu a sutu ti̱ta leetu. Ti̱tu wuka nii a ne yitu ki̱nitu.”