Read tula Luka 12 Bible Online

Luka 12 - tula bible

Luka 12

¹We ki̱dang kangu, ni̱bu nabwen a muran ki̱fabati̱ bi̱kami nani. Yesu a mwe kiyi miyari̱m ki̱mu ko, “Ti̱ma daandaan ki̱ni yis ni̱bu Farisamu.” Kanang chikiye ni̱bu di̱bebelinu. [95]

²A ne chi ti̱yingeri ti̱tu a ne kwa̱laditu we. Ti̱nti̱ne, a ne chi ti̱lairi ti̱tu ni̱bu a ne yinditu we. [96]

³Di̱ne yiko, kasi no ti̱ti̱le chi ti̱tu niyang fwa kumitu ni̱bu ka nwedu yo ti̱mu a kwiyane. Yinu chitu ta fwa ta lailaiye a mure kanitu ni̱bu ka nwedu yinang yilang.

⁴“Fati̱bi̱ mi̱m, mi̱n fwa chimi̱nu, ti̱wulu taiyi bi̱bu ki̱chi̱u bwimu we, di̱ne a kuteng ki̱ku, a ne chi̱u ti̱kuritu.

⁵Aya mang yung chi̱n wu a lwe chi tayi, ti̱nwe tayi Kwama wu ki̱ni dukan ka chi̱u ti̱kuriye, yinu ka marti̱ na fara ki̱rane. Bi̱yili̱m, nang wu ni wul tai kiye.

⁶Niyang mibu kwa̱la yunu a kobo yuraba? Yiko, n Kwama a tabi̱bu ko wiin.

⁷Ki̱kumang, n Kwama a yim yinang ka rii dur niinitu wemi̱nangu. Ti̱nwedu taiyi we, di̱ne n ti̱n ti̱la kwa̱la we kakku Kwamangu.”

⁸N Yesu a yi ko, “Mi̱n fwa chimi̱nu, nii wu ka mwayi kwa̱rikwa̱ri we kakku ni̱bange, n ki̱n n wu mi̱n, Bwe Nii ka yadu ki̱ni ki̱n we kakku ni̱bu ti̱tumbi̱ri Kwamamu.

⁹Aya wu a koyi kwa̱rikwa̱ri we tibe ni̱be, Bwe Nii ka koti̱du ki̱ni chi we kakku ni̱bu ti̱tumbi̱ri Kwamamu.”

¹⁰“Kanang wuwule niye wu ka fwa ya̱m swa̱ba ni̱m a dur Bwe Nii ne, n Kwama ka duki̱mi̱n ti̱du. Aya wu ka fwa ya̱m swa̱bani̱m we dur Fi̱ki̱m bi̱bi Wauwadi̱me, a ne ya duki̱ku.”

¹¹“Yo ni̱bu ka yadu ki̱ni chi̱n a kakku muraki̱ ni̱bu Yafudam ti kakku bi̱duumang n ti bi̱bu ki̱ma mati̱n, ti̱nwedu tayi we, yinu ka a kakku tikakenge, ti̱nwedu taiyi we yinang kangu ta chaki̱ dur chi̱nangu n ti chi ta fwaditu, [97]

¹²di̱ne, Fi̱ki̱m bi̱bi Wauwadi̱mu ka yung chi̱n chi ta fwaditu we ki̱swi wuko.”

¹³Wuka we muraki̱ ni̱bangu a yi Yesu ko, “Naba yungke, yi kemi a kera kula te ni̱ne ware ti mi̱n.”

¹⁴N Yesu a ke, a yi ki̱n ko, “Nabare, n wure a yo mi̱n naba mwatake?”

¹⁵N Yesu a chakakku ki̱fwa ni̱bu mi̱nu ko, “Ti̱twar! Ti̱yodu ni̱r we kuli̱n ti̱ti̱ninu, di̱ne nabwe kuli̱ne n ke yaku ti̱kuriye.”

¹⁶Yinu n Yesu a fwa chimi̱n ki̱ku baltaku ko, “Wuka naba kuli we wu ki̱ni kuu ki̱le chitu yinange.”

¹⁷Naba kuli wu a le ki̱ma ti̱kurantu ko, “Kano ka yo chabtu ti̱tu a fi̱re, kano ka madi yire?”

¹⁸Yinu nii wu a yi dur ki̱nu ko, angso, chi mang maditu nang ti̱tu. “Mang tunga bi̱niyu ki̱ni kwang, mang mu yidui ke n yo cham mi̱mu we n ti ti̱kantu kuli̱ni mitu.

¹⁹Yinu fal mang yi dur mi̱nu mi, m mi̱ni ki̱ni chitu nabwen ti̱tu a ne ridi datii. Sweswe nang nwe ta̱ma̱ng. Chau, no! Nang nwe ta̱ma̱ngu.”

²⁰Aya n Kwama a yi ki̱n ko, m mun di̱r! Mwang bwadu ki̱ni kum wu, yoye n wure ka chau mi̱n kuli ti̱tu mwang mur dur mun mi̱nite?

²¹Nang tiyangu ka kadu ka nang wuwule niiye wu a mur dur ki̱n mi̱n kuliye aya we kakku Kwamangu, n ki̱n a ne kuliwe.

²²Yinu n Yesu a yi miyari̱m ki̱mu ko, “Mi̱n fwa chimi̱nu, ti̱kuraduwe ti ta chau wule, ka ta do wule we bwiye.”

²³Di̱ne ti̱kuritu a la chabti̱tu, bwiyu a la kuli̱nu.

²⁴Ti̱da̱ng kaartiyu, n chi a fibu chi, a kabu chi, n chi a newe ki̱ni bi̱ni, aya n Kwama ki̱chadu ki̱ni chi. N ti̱n ta labu ki̱ni̱biya?

²⁵Wuka nii we wu ka medu ka su wandiko di̱ne n ki̱n a kai ni̱ra?

²⁶Kangu neta medu ta ma ti̱ti bayi̱mitangu, a mayire ti̱kai ni̱ru we ti̱tu chiye?

²⁷“Ti̱da̱ng kangu fili̱ntu ki̱dwiyedangu, n chi a mabu nangang a kubi̱ kuli̱n. Aya kasi no Mai Solomon a dobu kuli̱nu yinang wuka we tibe chi.

²⁸Ka n Kwama ka do fili̱nu n ti swa̱ki̱ku di̱kirangiye, ki̱ku di ki̱ni ti̱kuri, fi̱nenang ki̱le ki̱range, yinu ni ki̱ni ti̱kuriye ka ya ki̱ki̱le doku? N ti̱n bi̱bu bi̱yili̱m chimu bayi̱me.

²⁹Di̱ne yiko, ti̱kuradu we ti ta chau wule ka ti̱tu ta nodite. Ti̱kuradu chi we dur ki̱nu. [98]

³⁰Di̱ne kuuti ni̱bu ti̱ti̱nimu a yimbu Kwamamu, ki̱kura ki̱chitu wu aya n Te chi̱n wu a diye a yim chi ti̱baditu.

³¹Aya ti̱bau Yaa Kwama. Ka ni chi̱n ki̱chitu wu yinang.”

³²“Ti̱wulu tayi we, kwa̱l di̱ti̱ri̱n, di̱ne Te chi̱n wu a diye ki̱nwe ta̱ma̱ng, ka ni chi̱n yaako.

³³Ti̱feki̱ kuli̱n chi̱nu ti̱ni ti̱lusani. Ti̱bau yichiyu mi̱n kuli ti̱tu a ne riditu. Fi da̱a̱ku a ne da̱du, ki̱chidi a ne twai ti̱ne.

³⁴Nangki̱n, fi kuli mwitu wemi̱ne, nang fi ni̱r munu we mi̱n ti̱ne.”

³⁵“Ti̱ma ki̱yolang, fiti̱lati chiyu a dumeduwe. [99]

³⁶Ti̱kau tiyang ka̱be ki̱yam Tewuduwe ko ka ki̱ladu a Yiye ti̱kali ki̱naye. Yo a ki̱lawe a bu kwa̱re, Bi̱nabi̱na a wudu ki̱mi̱n kwa̱ru. [100]

³⁷Ka̱biyu ka nwe ta̱ma̱ng ka Tewuduwe chi a be ya ki̱ni sobu a dabi̱ duum ki̱yang ki̱ne. Mi̱n fwa chimi̱nu, n ki̱n ka suku luke wuduwe a donge, ka yi chidu ko a sweswe, ka nabi̱du ka ni ka nang wuwule chabti̱tu.

³⁸Ka̱bi Tewuduwe ka yadu ki̱ma ki̱yolange ka nwe ta̱ma̱ng kasi no n ki̱n ka bedi ki̱tangti̱lang kuma̱ng.

³⁹Aya ti̱swaan bi̱bu, ka fangko lo a yim yo da̱a̱ku ka bede, n ki̱n a ne ni da̱a̱ku wa̱re ka mang kute we loko. [101]

⁴⁰N ti̱n fal ti̱ma ki̱yolang ti̱n, di̱ne Bwe Nii ka bedu a ki̱swi wu m mun mwang kurabe.”

⁴¹M Biti̱r a bi̱u ko, “Tewuduwe, ki̱ku baltaku a twaiti̱ ni̱na ka mun yi ni̱bi kwanga?”

⁴²Tewuduwe a ke ko, “N wure nang wakili wu ki̱ni kassane? N ki̱n nang wu naba lo ka ni da ka tau kuli̱n di̱du a lokonu yinu ka ni bi̱kamu ka̱bi ki̱ti̱me chi wu a chabte a ki̱swi wu a dakane.”

⁴³Ka̱be ka nwe ta̱ma̱ng ka Tewuduwe a ki̱lawe a ya ki̱n we nangange.

⁴⁴“Mi̱n fwa chimi̱n bi̱yili̱mu, ka yo ka̱be wu kani̱n da̱ng ki̱mi̱n kuli kitu kwang.

⁴⁵Aya ka ka̱be wu a yi ko, m babba, Tewuduwe a ti̱kawe, yinu n ki̱n a letuwe bi̱kamu ka̱bi bi̱bari̱m n ti bi̱wuti̱mu, ki̱ngau wu bwa, ki̱ma wu ye, ki̱chadu ki̱nodu ki̱tosadi ki̱ne.

⁴⁶Naba lo ka ki̱ladu wuka di, yo ka̱be a kurabu beki̱ kange, a ki̱swi wu n ki̱n a swaanbe. Tewuduwe beka wela ki̱nu yinang ka yiti̱ ki̱n ti̱duitu ka tung ki̱nu a bale bi̱bu a yimbu Kwamame.”

⁴⁷“Aya ka̱be wu a yim chi Tewuduwe ko ki̱badditu yinu n ki̱n a ko yinangu ka tum ti̱tu a dakanitange, ka ya ngachi nabwen.

⁴⁸Aya ka̱be wu a yimbu chi Tewuduwe ko ki̱badde, yinu n ki̱n a ma chi a lwe ngau chiye, ka ya ti̱twalani bayim. Nii wu ni̱bu a ni nabwene a dakan ka madu nabwen. Aya wu a mwang a ya nabwene, a dakan n ki̱n ka niti̱nu nabwen.”

⁴⁹N Yesu a yi ko, “M be mang di̱ku ki̱rang we ti̱ti̱nitu, ka nang chikiye, bi̱ngai. No n kur ki̱rangu ka mwe taku.

⁵⁰Aya m mi̱n ki̱ni batisma mang made didiin aya ni̱r mi̱nu a muten ka lami̱nti̱ yo ki̱chitu wu ka sude. [102]

⁵¹Ti̱kamadu ti m be ki̱ni li̱mang we ti̱ti̱nita? Kwako! Mi̱n fwa chimi̱nu, n be ki̱ni bi̱ngai.

⁵²We ki̱swi wu ki̱ka̱ngu, ka lo ki̱ni ni̱bi bunuwe, bi̱ngaiyu ka le tibe chi, burab kanodu a wuka ki̱swi, bi̱ta kanodu a wuka ki̱swi.

⁵³Bi̱ngai ka le tibe te n ti bwe, ka kadi yiko ti̱n we ne n ti fwa̱nu, we nela ti̱n n ti yire yinu kanodu yire n ti nela.” [103]

⁵⁴N Yesu a yi ni̱bu ko, “Ka ti̱ku twiye a da̱ we twa̱re, ti̱yidu ko ka swi mwe. Mwe ki̱swi ti̱nu.

⁵⁵Ti̱nti̱ne, yo ki̱fi̱be twa̱r wuli̱n ki̱bede, ti̱yidu tiko ti̱mu ka bisadu, ki̱bisati̱ni yiko.

⁵⁶Ni̱bu di̱bebelin, ta medu ta fwadu yinang ka ti̱mu we mi̱nangu n ti dii a ki̱switiye. Wureni a yo ta yimbu fwa chi ki̱fwedu a ki̱dangu ki̱ka̱ngange?”

⁵⁷“A mayire neta mwata yichiyu mi̱n chi a dakan ta madite?

⁵⁸Yo kano ti̱ya kan tikake naba mwataki̱nu n ti wu a Mai kememo, funti̱bwi ti̱dokan ti ki̱n we wa̱re ke ki̱la a yo n le kang naba mwatakengu, wuko ka yiddu ka ni di̱karan, di̱karanu ka yikan di̱bi̱nti̱l.

⁵⁹Mi̱n fwa chimi̱nu, ne mwang chireduwe lo di̱bi̱nti̱le a mwituwe mwang fe ka̱mbi̱ru a mwati̱ mi̱ni̱nu ki̱ni kwang.”