Read tula Luka 13 Bible Online

Luka 13 - tula bible

Luka 13

¹We ki̱swi wuko bi̱kam ni̱bu bi̱bu we fikomu a fwa Yesu mi̱n chibeku ni̱bu Ka̱lilimu m Bi̱latu a yo ni̱bu a chibeni̱mu a yo yaki̱ ma niku ki̱tumange.

²N Yesu a yi chi ko, “Ti̱kamadu we ti ki̱leti ni̱bu Ka̱la̱tiyamu a la yi ni̱biyu di̱ne n chi a bwa a riye we Ka̱liliye.

³A newe yiko, aya mi̱n fwa chimi̱nu, ka ta wobu ki̱ti̱mu we ki̱leti chiye, ta bwadi kwang yinang chi.

⁴Bi̱kami kub chiri nari̱bi̱mu nabwe kan di̱swa̱mi̱n a yar chimi̱ntuwe a Si̱lwam, n chi a twiyan, ti̱kudu n chi a la ni̱bu Wurchalimamu ki̱ni ki̱letiya?

⁵Mi̱n fwa chimidu a newe yiko, ka ta wobu ki̱ti̱me, ta twiyadu yinang chi.”

⁶Yinu n Yesu a ma chimi̱n kaang baltaku ko, “Wuka nii we, wu ki̱ni tini we lambu ku yinabe. N ki̱n a ya, a babba ti̱kulan we tiyang sinangu a yabu chi.

⁷A yi nii wu ki̱to lambuwe ko, duu swa̱ti̱tii ti̱ta, mi̱n bedu mi kate mang ya ti̱kulan we tiyang sinang ki̱ku mang yaangbuwe. Swi tiyang sinangu, ki̱kaiti̱ tuitu we ying a tubu chi?

⁸Nii ki̱to lambuwe a yi ko, Tewuduwe ko, du tiyangu didiin n doti̱ ki̱da swari diin.

⁹Ka a tu ti̱kulantu, a le, Ka a tube, mwang switi̱nu.”

¹⁰Wuka difi̱kare ni̱bu Yafudam, n Yesu ki̱ma miyaku a kan muraku ni̱bu Yafudamn.

¹¹Naye we fiko wu ki̱fi̱bti a kai ki̱ne. N ki̱n a ma swa̱ti̱ti kub chiri nari̱bu ki̱ni bwiyu a fwifwiye, a yimbu kunu.

¹²Ki̱dangu n Yesu a ku nayengu, a yal, a yi ko, “Naye, burang mwangu a dun.”

¹³Yinu n Yesu a kuku fa̱la̱ngu a twai naye. N ki̱n a be, a be dela Kwama.

¹⁴Wuduwe muraku ni̱bu Yafudame a ma ki̱fwini yinang kangu a ku Yesu a be naye wu we Difi̱kare Ni̱bu Yafudame. N ki̱n a kun, a yi ni̱bu a fikomu ko, “Diti nangangi yurukun yiyu ta yaan bekiyu. Ti̱be we diti yikiyu ta ya beku, aya a bwin difi̱kare ni̱bu Yafudam.”[104]

¹⁵Aya n Tewuduwe a yi ki̱n ko, “Ni̱bu di̱bebelin bi̱kusi̱m. Mare ka nang wuwule niye ki̱kwi tanti̱kai n ti kurunge ko, ko ke ki̱niye mwe we difi̱kare ni̱bu Yafudame?

¹⁶Naye wu, ki̱kuwang Yibrayim. N Setan a kwau swa̱ti̱ti kub chiri nari̱bu, a dakabu ka ya beku we difi̱kare ni̱bu Yafudama?”

¹⁷Ya̱m bi̱bu a yo ni̱bu ki̱ko ki̱ni̱mu a nwe dibwi, aya ni̱bu a nwe ta̱ma̱ng di̱ne we chi ka̱ta̱kitu n ki̱n a maatu.

¹⁸N Yesu a ke ko, “Ya Kwama kanodi yire, mang swedu ki̱ni wureni?”

¹⁹Yinang ki̱kwi ki̱si̱raiye, wu nii a rub ki̱yange a kuuko, yinu a dwiyen a kau tiyange, yinu ki̱ni̱btiyu a ma ki̱kuli we.

²⁰N Yesu a bi̱u ti̱chi ki̱da ko, “Kano mang swe Yaa Kwama ki̱ni wureni?

²¹Tiyang yis wu wuka naye a lu ki̱ni miim cham kwa̱se yitta, a lamantin yo a furane.”

²²Yinu n Yesu a tau wa̱re ki̱yika Wurchalima, a bunti̱ bi̱ntu ti̱duitu n ti ti̱ti̱ritu ki̱miya ni̱bu mi̱nu.

²³Wukane nii a bi̱u ki̱n ko, “Tewuduwe, ni̱bu bayim ka ya yuki̱ka?” N Yesu a yi chi ko.

²⁴“Ti̱funti̱bwi ti̱lenga kwa̱r di̱tiri̱nu. Mi̱n fwa chimi̱nu, ni̱bu nabwen ka funtubwi ko chi ledu, aya n chi a ne ya dawe.”

²⁵Ka Tewuduwe a tu a le, a yinge kwa̱r lokone, n ti̱n ta tida tame, tani̱ng bu kwa̱ru, ti̱yidu, tiko wudu ni̱mi̱n kwa̱ru, n ki̱n ka ki̱ledu ko, “Mang yim chinbu.”

²⁶Yinu n ti̱n ta yidu tiko, mare ni̱n chau, ni̱n no n ti mun. Ti̱nti̱ne, mare m ma miyaku we neloti niyu.

²⁷Aya n ki̱n ka yi chidu ko, mang yim chinbu ti bwanu ta be mi̱ne, ti̱yikan mi̱na fi, n ti̱n ni̱bu bi̱bwilamu.[105]

²⁸Yo ta ku Yibrayim n ti Yichaku, n ti Yakubu n ti fa̱kubu Kwamamu we Yaa Kwama ta kiwii ti ki̱rti̱ku numang.[106]

²⁹Ni̱bu ka bedu we twa̱ru n ti ki̱twale n ti Twa̱r wuli̱nu n ti kir kulanu, ka swedu ka chau chabtu ti̱kali ki̱naitu we yaa Kwamatu.[107]

³⁰“We fi fal, bi̱kaki̱mu, beka kau swan kuteng. Bi̱bu a no a kutemu beka chakakku.”[108]

³¹We ki̱swi wu, bi̱kam ni̱bu Farisamu a be yi Yesu ko, “Du fi, yika wuka fi, di̱ne m Mai Yiridu ki̱baddu ka chinnu.”

³²N ki̱n a yi chi ko, “Yati̱ yi ki̱nginge wuko tiko, mi̱n chaku ki̱fi̱bti, mi̱n beti̱ ni̱bu, we wutare di mang ri ki̱kemi.

³³A mwintuwe mang chakakku ki̱ni yayumi diwu n ti fi̱nenang n ti kirenang. Ki̱kumang a dakabu fa̱ku Kwama ka bwadu a wuka fi ka n ke Wurchalima.”

³⁴“Wurchalima! N chi̱be fa̱kubu Kwamamu, ti̱kwela bi̱bu n Kwama a tum chimi̱nemu ki̱ni kali. A dati yile, mi̱n fumbwi mang mur chi̱nu yinang ka nayibe ki̱mur betiki a mure la̱bi kiyengu, aya ta keyibu!

³⁵Ti̱da̱ng fal Kan Kwama chi̱nu a Wurchalimanu ki̱ka̱ngu a kau kanglo. Mi̱n fwa chimi̱nu a ne ta kuiti̱nu we ki̱da ka lami̱nti̱ ki̱swi wu beta yidu ko, ‘Kwama a yo delaku we di̱ki̱ne wu ki̱bedu a di̱n Tewuduwe Kwama.’ ”[109]