Read tula Luka 16 Bible Online

Luka 16 - tula bible

Luka 16

¹Wuka ki̱di n Yesu a yi miyari̱m ki̱mu ko, “Wuka naba kuli a ni wakili kuli̱n ko a na da̱ng ki̱mi̱nu. A kuteng ki̱ku naba lo a nwe ya̱mu ko wakili ko ki̱kai kuli̱n ki̱nu.”

²Yinu naba lo a yale wakili a yi ko, mi̱n nwe wule ying we durmune? Fwa tiyangu mwang ma nanga mangangu di̱ne a ne mwang chakakku ki̱ni nangang wakiliyangu.

³“Yinu wakili a kura we ni̱r ki̱nu ko, Tewuduwe yaka kakayu we nangang ki̱ku, kano mang madi yire ki̱ka̱ngu yo mang newe ki̱ni dukanu mang chuun timi̱ne, ti̱nti̱ne ka kau chi dibwi we ka̱la̱ku chiyangu.”

⁴N yim chitu mang maditu, ka a kakayu we nangang mange, ke ni̱bu a yii we loni chiyu.

⁵N ki̱n a yale ni̱bu ki̱ni kwang bi̱bu naba loko a ni chi di̱si̱ni̱mu. A mwetuwe wu a tiye kake ko, “Tewuduwe mi ki̱nabi̱ni yire?”

⁶Wuko a yi ko, “Saiye ki̱nunge olifang kuul.” Wakili a yi ko, “Yiu di̱lukene lwaginu ki̱ka̱ngu yang mwal wan tunu.”

⁷A bi̱tti̱ wuka ko, “Mun de, ki̱nabi̱ni yire?” Wuko a yi ko, “Swa̱ngi cham miyu kuul.” Wakili a yi ko, “Wo tati̱ki̱dai mwiyu, yang mwal wan nari̱bu.”

⁸“Yinu Tewuduwe a wer wakili wu a ne bi̱yili̱m we di̱ne kassan kitu. Ni̱bu ti̱ti̱nimu a swaan yinangu ka nabi̱ ni̱bu di̱kalan chini̱mu a lati̱n ni̱bu Kwamamu.”

⁹N Yesu a chakakku ki̱fwadu ko, “Mi̱n fwa chimi̱nu, ti̱ma nangangu ki̱ni kuli chi̱ntu we ti̱ti̱nitu, di̱ne ke ti̱ya fati̱bi̱bu. Di̱ne yiko ka kulitu a riye, ka yiu chi̱nu we loni chiyu we bwa diye.”

¹⁰“Nii wu a lwe ni kedi ki̱n we chi ti̱ti̱rite, ka medu ka kedi ki̱ni ki̱n we chi ti̱duiyitu. Nii wu a bunti̱bu bi̱yili̱mu we ti̱ti̱rite, ka medu ka kau wu a ne bi̱yili̱m we chi ti̱duiyitu.

¹¹Ka ta yungbu bi̱yili̱mu we kuli ta ti̱ti̱nite, n wure ka ke chi̱nu ki̱ni kuli we bwa diye?

¹²Ka ta yungbu bi̱yili̱mu we kuli wuka niin te, n wure ka ni chi̱n di̱du n du chini̱nu.”

¹³“Ka̱be a ne medu ka ma nangangu we Tewuduwe burabi̱mu, ka ka ko wu wiine, ka ma wu wiine mi̱n ti̱yiliye, ka ka swa̱ba wukane. A ne mwang medu mwang buntu Kwama ka ka̱mbi̱r a fi wiine.” [116]

¹⁴Ni̱bu Farisamu bi̱bu ki̱mi̱la ka̱mbi̱ri̱mu, nang ka nwe chitu n Yesu a fwatangu, n chi a ma ki̱mi̱n ki̱fwile.

¹⁵Aya Yesu a yi chi ko, n ti̱n nang bi̱bu ti̱badu tani̱n yungdu we kakki̱ ni̱bangu ti n ti̱n ni̱bu ti̱tum bi̱yili̱mi̱mu. Aya Kwama a yim ni̱tu chintu. Aya kwali̱n chinu ni̱bu ki̱niin chi̱n dwiyenti̱nu, n Kwama babu ka kudu.

¹⁶“Yili̱n Musatu ti tati̱ki̱dai fa̱kubu Kwamayu nang chi ni̱bu ki̱bunti̱de a lanti̱ ki̱swi n Yowana naba batisma a mwe ki̱ma di̱ mware. Aya nangu ni̱bu a tau ki̱mwa ya̱m Kwamamu, ka nang wuwule niiye ki̱funti̱bwi yinang, ke ki̱ya leku. [117]

¹⁷Ka la chi bunge dii ti ti̱mu ka sudu n ti ki̱ku di̱kwa̱li diin ka swidu a ti̱mangu we yili̱ntu.” [118]

¹⁸“Nii wu ka chakku naye ko ka na wukane, ki̱ma ti̱kuli, yinu wa na naye chire a duwe kwarta ko, ki̱ma ka ti̱kuli.” [119]

¹⁹“Wuka naba kuli we ki̱dangu ferediyangu, ki̱do ka kuli̱n di̱du ki̱ni ka̱mbi̱ri̱n, ki̱chati̱ chabtu ti̱yili diti ki̱da̱ng.

²⁰We kwa̱r lokonu wuka ni we wu ki̱ka̱la̱ chiye di̱n ki̱nu n Lasaru, wu bumbitu a ri bwi kiye. Ni̱bu ki̱da̱u ki̱nu ka nang wuwule ki̱diye ki̱ti̱u ki̱na fiko.

²¹N ki̱n ki̱baddu kani̱n chau ti̱buken chabtu ta twakani we tebur naba kuli̱nu. Kadatiyu be ki̱da̱la bumbi kitu.”

²²“Di̱lusan di̱du a be bwa, ni̱bu ti̱tumbi̱rim Kwamamu a da̱u ki̱n, a ni fiswe wuyile ware ti Yibrayim. Naba kuli wu a bwa ti̱n, ni̱bu a fur ti̱n.

²³A yika to kwa̱miye[120], ki̱nwe ka riye, yinu a kuki̱ kabu ko a ku Yibrayim n ti Lasa̱ru kutan.

²⁴Yinu a ma di̱yal a yi ko, tete Yibrayim, nwe ki̱bune mi, tum Lasa̱ru a di̱ke bewure ko a mwe ke a swa̱mi ben mi̱nu, ke a ribeni yuum, di̱ne mi̱n nwe riye we ki̱rang ki̱ku.”

²⁵“Aya Yibrayim a yi ko, kur bwemi, we ki̱dangu muna no a ti̱ti̱niyangu, muni ki̱ni kwa̱li̱n chiin di̱yili̱n, n Lasa̱ru a nwe riye. Aya ki̱ka̱ngu ki̱nwe ta̱ma̱ng, mun mu nwe riye.

²⁶A bwin yiko, tibe ni̱n ti mun nabwe bwang we ki̱swa̱ma̱ng, ki̱ku a do di̱ne bi̱bu ki̱baddu ka ya fi a di̱chi̱nemu a ne yada yabi̱ku.”

²⁷Yinu naba kuli wu a yi ko, tete mi̱n wananu, tum Lasarua lo di̱temiye.

²⁸Di̱ne mi̱ni ki̱ni kebubi bunu kwartabu, a ya fwa chimi̱n ya̱m, ke n chi a bedu finu a riyewe.

²⁹Yibrayim a yi ko, kebu mumu ki̱ni yilang Musangu n ti tati̱ki̱dai fa̱kube, yam n chi a nwe chitu ka fwa chi mi̱nditu.

³⁰Naba kuli a ke ki̱mi̱n ko, a newe yiko tete Yibrayim, aya ka nii wu a bwa a kuntuwe, a ya bwaan di̱chiye ka wo ki̱ti̱mu.

³¹“Aya Yibrayim a yi ko, ‘Ka n chi a nwebu chi yilang Musangu ti tati̱ki̱dai fa̱kubu ki̱fwadete, kasi no wukani a kun we furu a ne nwe ki̱nu.’ ”