Read tula Luka 19 Bible Online

Luka 19 - tula bible

Luka 19

²Wuka nii we fiko di̱n ki̱nu n Sa̱ka. N ki̱n nang wuduwe we ni̱bu ki̱ yiu Sangkali̱mu, n ki̱n naba kuli.

³N ki̱n a ke, ka ku nii wu ni̱bu ki̱yalu ko n Yesu we aya di̱ne ki̱ni kwanti̱le a yabu dawe di̱ne ki̱tuu ni̱be.

⁴Di̱ne yiko, n ki̱n a wul kakku a ya fi̱l kaang tiyang sinang ko ke ki̱ku Yesu di̱ne n Yesu ki̱bunte wa̱re wuko.

⁵Yo n Yesu a lam fiko, a ku Sa̱ka we tiyangu a yi ko, “Sa̱ka, suwe datu! Diwu mang swedu a lomo.”

⁶Bi̱nabi̱na Sa̱ka a suwe, a yiu ki̱n ki̱ni furi mwewen.

⁷Kanang wuwule niye wu a ku chitu a fwete, a mwe kungakunga, chi ki̱yidu ko, “N ki̱n a ya ka swedu a lo naba ki̱letiye.”

⁸N Sa̱ka a kun a ti a yi Tewuduwe ko, “Da̱ng Tewuduwe! We fi ki̱ka̱ngu mang kera kuli̱n mi̱nu ti̱nti yurau mang ni babumbu. Ka ma ful wuka nii a ti̱kan chiye, mang fe ki̱nu ki̱dati yaana we chi mang fuli̱n ki̱nitu.”

⁹N Yesu a yi ki̱n ko, “Yuki̱ku a be lomo diwu, di̱ne nii wu bwe Yibrayime.”

¹⁰Nangki̱n Bwe Nii a be ki̱baddu, ka yu bi̱bu a laiyimu.[130]

¹¹Yo n chi a le ki̱nwe ya̱m bi̱be, n Yesu a chakakku ki̱fwa chimi̱n kaang baltaku di̱ne n ki̱n a mwatawe Wurchalimange, ni̱bu a ki̱la ki̱kuradu ko kano Yaa Kwama a mwatawe.

¹²Yinu a yi chi ko, wuka nii wuduwe a yika di̱kan bi̱n kutan, ko ke ni̱bu a tau ki̱n Mai, ka ki̱latedu.

¹³Nii wu a yal bwesi̱m bi̱ka̱li̱li̱m ki̱mi kubu[131] a ni ka nang wuwule niye ka̱mbi̱r ko a mang di̱be, ka lami̱nti̱ yo ka ki̱lade.

¹⁴Ni̱bu bi̱n ki̱ni̱mu a ko ki̱n, a tum ni̱bu we di̱ki̱ne ko, nang babu ni wu ka kau Mai ni̱n.

¹⁵Nii wu a ya mati̱ntu, a ki̱la lo. N ki̱n a yale bwesi̱m bi̱ka̱li̱mu n ki̱n a nika ka̱mbi̱ri̱mu, ke a da̱ng yinangu n chi a ma di̱bengu.

¹⁶Wu a tiye kake a yi ko, Tewuduwe, ka̱mbi̱ru mwang ninu a bwii a lam ki̱da kubu we chi mwang niye.

¹⁷Tewuduwe a yi ki̱n ko, “Kwele, bwe wu yile! Yo kwer mwang ma kwa̱mbi̱ru we ti̱ti bayimite, mwang tau bi̱nti̱ti kubu.”

¹⁸Wu robe a be yi ko, Tewuduwe, ka̱mbi̱ru mwang ninu a bwii a lam ki̱da yunu.

¹⁹Naba lo a yi ki̱n ko, mwang tau bi̱nti̱ti tunu.

²⁰Wuka a be a yi ki̱n ko, Tewuduwe, kangu mwang niyangu, nang kangu mang laiyinti̱nang.

²¹N nwe taiyi mwi, di̱ne m mun nii wu ki̱si̱ne. Mun da̱u chi mwan yobitu, mun kau chitu mwang fibitu.

²²Tewuduwe a yii ki̱n ko, mun bwe wu kuse! Ti̱kwa̱li yi mwitu a kau mi̱n la̱n. Yo mwang yim mwiko mi̱ni ki̱si̱n, mi̱n da̱u chi n ke ti̱miye, mi̱n kau chi mang fibe.

²³A mayire, mwang yangbu ka̱mbi̱r mi̱nu a bi̱ne ke yo mang ki̱lade mang ya ri̱keku we dur ki̱ne?

²⁴N ki̱n a yi bi̱bu a ti̱ya fikomu ko, yiu ka̱mbi̱r di̱du fam wiini̱nu, ni wu fam kube.

²⁵Aya chi a yi ki̱n ko, Tewuduwe, ki̱ni fam kubu!

²⁶N ki̱n a ke ko, ka nang wuwule niye wu ki̱ni nangang a mabu ti̱kali ki̱ne, ka ya nangi̱ntu nabwen. Aya wu a newe ki̱ni nangange, ba ki̱ku bayim n ki̱n ki̱madangu ka kwala ti̱nu.[132]

²⁷Aya fakwarbu mi̱m bi̱bu n chi a kebu mang ma mati̱n chimu, ti̱be miye ki̱n, ti̱chi̱be chi a kakku mang.

²⁸A kuteng ki̱ku n Yesu a ri ya̱ma̱ngu, a chakakku ki̱ni yayu ko ki̱yika Wurchalima.

²⁹Kanga mwata Betafachi n ti Betani wu a ba̱le kun di̱du ki̱ni tini Setuniye, a tum miyari̱m ki̱mi burau ko,

³⁰“Ti̱ya be bi̱ne a kakku change, ka ti̱le bi̱ne, ta ya le kurunge wu ni̱bu a kwakwabe, ni a fi̱li̱nbuwe. Ti̱kwi ti̱be fi ki̱n.”

³¹Ka wuka nii a bi̱u chi̱n ko, wule yo ti̱kwide? Ti̱yi ki̱n ko, “Tewuduwe ki̱baddu.”

³²Bi̱bu ni̱ba tumi̱mu, a ya, a ya ti̱n yinangu n Yesu a fwami̱nangu.

³³Kangu n chi a yaki̱ kwidangu, Tewuduwe kurunge a bi̱u chi ko, “Wule a yo ti̱kwi kurunge?”

³⁴N chi a yi ko, “N Tewuduwe ki̱baddu.”

³⁵N chi a be Yesu mi̱ne ki̱n, a yaba kuli̱ni chitu we kurunge, a maka Yesu, a swe we.

³⁶Yo n ki̱n a yaki̱ yikade, ni̱bu ki̱mau lukei chiyu we wa̱re, we bwa n Yesu ki̱yade.

³⁷Yo n ki̱n a mwata wa̱re a subi bwa Kun Setuniye, kwala miyari̱me ki̱ni kwang a mwe ki̱dela Kwama ki̱ni ti̱mi̱lan ki̱ni ker di̱dun we chi ka̱ta̱kiti kwang n chi a kuutu.

³⁸N chi ki̱bedu ko, “Naba delaku Mai wu ki̱bedu a di̱n Tewuduwe Li̱mang we bwadi n ti dwiyen ti̱dui!” [133]

³⁹Bi̱kam ni̱bu Farisamu we nabwe ni̱be a yi Yesu ko, “Naba yungke, wela miyari̱m mumu a du kemiyu!”

⁴⁰N Yesu a yi chi ko, “Ka a yinge yini chiye, kaliyu ka sute chidu.”

⁴¹Kanga mwata Wurchalimangu, a ku bi̱nangu, a kii wii.

⁴²A yi ko, “Ka no ti̱n, ti̱yim we wudiye di chi ka be chimi̱nedu ki̱ni li̱mange aya ki̱ka̱ngu ti̱lairi we nui chiyu.

⁴³Ditiyu ka be chimi̱nedu ki̱dangu fakwarbu chimu ka kang chi̱nu a ka wuwule fwiti̱ne. Ni̱bu ki̱rangmu ka di̱ku chi̱nu a tibe, ka yinge chi̱nu a ne bwin ki̱ti̱ku.

⁴⁴Ka yai chi̱ni kasikasi, n ti̱n n ti Bwesi̱m chimu we mure ya kwale chi̱n. Ka tunga ti̱muban chinti kwang a ne du ti̱kan chi kiir di̱ne ta kubu ti n Kwama a be ka yu chi̱nu.”

⁴⁵Yinu n ki̱n a le tanti̱lange Kan Kwama di̱duna Wurchalimanu ki̱kaka ni̱bu ki̱feku naiyu a niku ki̱tumangu.

⁴⁶N ki̱n a yi chi ko, “Ya̱m Kwamamu a fwa ko, Lomi ka kau lo twa̱ba̱ke. Aya n ti̱n ti̱mar a kau lo wu dabi̱kum ki̱laiyinde.” [134]

⁴⁷Kanang wuwule diye n ki̱n ki̱miyadu we Kan Kwama di̱duna Wurchalimanu. Aya wuduwe fansetiyeye n ti ni̱bu yungku yili̱n Musati̱mu n ti seli̱bu a bau ka chi̱u ki̱nu. [135]

⁴⁸Aya n chi a yabu wa̱re ka chi̱n ki̱ne, di̱ne ka nang wuwule niye ka baddu ka nwe ki̱nu.