Read tula Luka 20 Bible Online

Luka 20 - tula bible

Luka 20

¹Wuka di n Yesu a le ki̱ma miyaku n ti di̱mwar we yifi̱la Kan Kwamana Wurchalimane, wuduwe fansetiye, n ti ni̱bu yungku yili̱n Musanti̱mu, n ti seli̱bu a be ya ki̱n.

²N chi a yi ki̱n ko, “Fwa ni̱mi̱n ka mun ma ti̱chitu wu ki̱ni dukan wurene?”

³N ki̱n a yi chi ko, “Mang bi̱u ti̱chinu, ti̱fwa mi.

⁴Batisma Yowana ki̱madu ki̱ni dukan Kwamana ka dukan ni̱bi̱na?”

⁵N chi a twaiyan we tibe chi ko, “Ka ni yi ko a be a di̱Kwama, ka yidu ko ‘A mayire niyang kebe?’

⁶Aya ka ni yi ko, ‘A be a ni̱be,’ ni̱bi kwang ka kwela nidi kali, di̱ne n chi ki̱da̱du ko n Yowana fa̱ku Kwama.”

⁷N chi a yi Yesu ko, “Nang yimbu bwana bemi̱nege.”

⁸N Yesu a yi ko, “Mi̱n ti̱n ne ma fwa chimi̱nu ka mi̱n ma ti̱chitu wu ki̱ni dukan wurene.”

⁹Yinu n Yesu a fwa ni̱bu mi̱n ki̱ku baltaku, “Wuka nii a fi ku Yinabe, a dub a fa̱li bi̱kam ni̱bu bi̱bu ki̱suti̱m ka̱mbi̱ri̱m, a yikati̱n bi̱kam ti̱m, a da̱u ki̱swi.”[136]

¹⁰Yo chuwangu a lame, a tum bwe wu ka̱li̱le ko, ko a ya yi ni̱bu ki̱su ku yinabimu, a ni ki̱ne ti̱kulan yinabitu. Aya ni̱bu ki̱su kumu a ngau ki̱n a ki̱lte nii wu kwako.

¹¹Yinu a tume wu robe nii, ni̱bu ki̱su kumu a ngauti̱ wuko, a ni riye, a ki̱late fa̱li kwako.

¹²A tum ti̱wutare, n chi a nwe wuko mi̱ne burang, a maiye ki̱na tame.

¹³Yinu Tewuduwe kuu yinabe a yi ko, Kano mang ma wureni? Ma tum bwe ni̱re mi, ka n chi we ku ki̱siyang kange.

¹⁴“Yo ni̱bu ki̱su kumu a ku bwe ni̱re konge, n chi a twaiyan we tibe chi ko, wu nang bwe kulako. Ni chi̱u ki̱n, ke ni chau kulako.”

¹⁵N chi a mau a kuteng ku yinabe a chi̱u ki̱n. Kanodu Tewuduwe kuu yinabe ka ma chimi̱n wureni?

¹⁶Ka bedu ka chi̱be ni̱bu ki̱su ku yinabe mu ka ni bi̱kam ni̱bu ku. Yo ni̱bu bi̱bu a nwenge, chi a yi ko, “Ti̱chitu wu a ne fweenduwe.”

¹⁷N Yesu a da̱ng chi a bi̱u ko, “Yinu ya̱m Kwamamu ki̱fwadu ko wule?” Kale ni̱bu muki̱mu a konge, nang kale la chi ki̱ni nangange. [137]

¹⁸“Nii ka yaru we kwame, ka yaradi yiii, aya nii wu kwam ka yara dur ki̱ne ka kau buktem.”

¹⁹Ni̱bu yungku yili̱n Musanti̱mu, n ti wuduwe fansetiye a bau ka tau Yesu ki̱dang kangu, di̱ne n chi a swaan ko a fwa ya̱m baltakumu a dur chiin. Aya n chi ki̱nwe tayi ni̱biyu.

²⁰N chi a le ki̱del ki̱nu, yinu a tum ni̱bu ki̱yolami burau yinang ni̱bu bi̱yili̱m. N chi a ke Yesu ka kwaba ya̱m ke chi tami̱n chi nii wuduwe kwabna Roma ki̱ma mati̱n ne.

²¹Ni̱bu ki̱yolamu a bi̱u ki̱n fal ko, “Naba yungke, ni̱n yim mun fwadu, mun yungti̱ bi̱yili̱mu, aya mwang kobu wukani, mun miya bi̱yili̱mu yinang ka Kwama ki̱baddu ni̱bu ka ya yayuwangu.

²²A da yiko nang ni Kaisar sangkala ka daba?”

²³Aya n Yesu a swaan kassan chiitu, yinu a yi chi ko,

²⁴“Yungi ka̱mbi̱r suren. Wule wure, n ti di̱n wuren we ka̱mbi̱ru?”

²⁵N chi a ke ko, “N Kaisar.” N ki̱n a yi chi ko, “Ti̱tu n ti̱u Kaisaritu ti̱ ni Kaisar. Ti̱tu n ti̱u Kwamatu ti̱ni Kwama.”

²⁶We fi n chi a kwala kangu ka tau ki̱nu we ya̱m bi̱bu a fwayi kwa̱rikwa̱rimu. N chi a ya̱r yi we di̱ki̱li̱n di̱du, a lengi si̱ng.

²⁷Bi̱kamu ni̱bu Sadukiyamu, bi̱bu ki̱fwadu ko a ne kunki̱ we kute bwangu, a be bwa di̱Yesuwe, a bi̱u ki̱n ko, [138]

²⁸“Naba Yungke, Musa a mwal ni̱mi̱n ko, ka ni a bwa a du naye ko a ne bwesi̱m wenge, a dakan ke kwarta ka nadu ke n chi a ya bwesi̱m.

²⁹Kang ki̱dang bi̱kam kebu we chi bi̱dibiin. Wusele a yiu naye a bwa a bi̱bu bwe.

³⁰Wu robe a na nabune, a bwa a neti̱ bwe we.

³¹Wu tare a fwe ti̱ni yi ko. A kau n chi ki̱ni kwang a na nabune, a bwarati̱n a ne bwesi̱m we.

³²A kuteng ki̱ku nabune a bwa ti̱n.

³³We di swang kute, naye wu kanodu wu wure yo n chi ki̱ni bi̱dibiin a na ki̱ne?”

³⁴Yesu a yi chi ko, “Ki̱na a ti̱ti̱ni.

³⁵Aya ni̱bu ka dakadu ka kunu we kuteng bwamu, chi ka swedu we di̱kalanu ki̱bedi̱nu, kwartabu a ne yiu nati̱bu, a ne naye ka ma ki̱na we.

³⁶N chi a ne bwati̱du we ki̱da. We yiko chi kanodu yinang bwesi̱m ti̱tumbi̱rim. Ka kau bwesi̱m Kwamamu di̱ne n chi a kun we bwa.

³⁷We ya̱mu a twiku be di̱ki di̱lukenemu, m Musa a laibulaiye a yi ko, ni̱bu a bwarani̱mu ka kunti̱duwe. N ki̱n a yi ko Tewuduwe nang Kwama Yibrayim n ti Kwama Yichaku, n ti Kwama Yakubu a siye, [139]

³⁸N Kwama, wu a ni̱bu ti̱kurime, n ke wu a ni̱bu a bi̱bwari̱m. We a di̱ki̱ne ni̱bu kwang ki̱ni ti̱kuri.”

³⁹Bi̱kam ni̱bu yungku yili̱n Musati̱mu a yi ki̱n ko, “Naba yungke, m fwa der!”

⁴⁰A ne nii a ru ni̱ru ka ma di̱kan di̱bi̱de we.

⁴¹M Masiya a bi̱u chitu ko, “A mayire ni̱bu ki̱yidu ko n Yesu bwe Daudange?

⁴²Dauda ki̱n ki̱fwan a yi we Taki̱da Sa̱bura ko, Tewuduwe a yi Tewuduwe mi ko, Swe a kang ki̱yilang mang.”[140]

⁴³Ka lami̱nti̱ yo mwang fau fakwarbu mumu a nani mwiye.

⁴⁴Dauda a yal Masiya ko Tewuduwe, ka madi yire m Masiya ka kau bwe Daudange?

⁴⁵Yo ni̱bu kwang a swe ki̱nwe ki̱ne, a yi miyari̱m ki̱mu ko,

⁴⁶“Ti̱ma dandan n ti ni̱bu yungku yili̱ni̱mu, n chi ki̱mi̱la chirku ki̱ni kuli̱n di̱du, a mi̱lan ni̱bu kani̱n sii chidu we fantiya kwa̱ma̱riyu. N chi ki̱bau ka fanti yiyili we fi murake n ti fantiya mabwi.

⁴⁷N chi ki̱sul nati̱m buni̱mu we loni chiyu. Ki̱twa̱ba̱ bunitu swa̱n ko ke ni̱bu a yim chi. Ni̱bu bi̱ki̱mu ka nwe riye ka la bi̱kamu.”