Read tula Luka 24 Bible Online

Luka 24 - tula bible

Luka 24

¹We a di wu kake wu a difi̱kare, ki̱ni kunsiin, nati̱bu a yika furu ki̱ni ki̱nungi fi̱rfi̱ra̱ng.

³Aya yo n chi a le mure, a kubu kwa̱me Tewuduwe Yesu we furu.

⁴Yo n chi we ki̱kura ti̱te, Bi̱nabi̱na bi̱kam ni̱bi burau a tiye ki̱dwang ti chi, a do lukeyi mwemwei ki̱yiladu yinang kali yili.

⁵Di̱ne taya tau chiye, nati̱bu a swa kabi̱ni chiyu a ti̱m. Aya ni̱bu bi̱bu a yi chi ko, “A mayire ti̱baba wu kure a bi̱bwari̱me?”

⁶N ki̱n a newe fi, a kun! Ti̱kur chitu a fwa chimi̱nitu we ki̱dangu n ti̱n no ware a Ka̱lili yangu ko. [170]

⁷“Ni̱bu ka ni Bwe Nii a kani ni̱bu ki̱leti̱m, ka kuka ki̱nu aya we wu tare di ka kunu.”

⁸Yinu n chi a kuri ki̱ni ya̱m Yesumu.

⁹Yo n chi a ki̱la we bwana fure, n chi a fwa bi̱bi kub chiri wiini̱mu mi̱n n ti bi̱kami kwang.

¹⁰Maryamu wu a Maka̱dala n ti Yowena n ti Maryamu ne Yakubu n ti bi̱kamu nati̱bu n ti chi bi̱bu a fwa fanduti mi̱n ya̱m bi̱bumu.

¹¹Aya n chi a kebu ki̱ni ya̱m nati̱bi̱mu. Di̱ne ya̱m chimu ki̱madu yinang ti̱kwani.

¹²M Biti̱r a tababu bwi, a kun, a wul, a yika bwa fure. Yinu yo n ki̱n a lam kwa̱r furune, a sung, a da̱ng, a ku kana luke kwa̱me. Yinu a ki̱lawe, chitu a fwetu a ya̱r ki̱n yi. [171]

¹³We ka di wu wiine, burau we miyari̱m Yesumu ki̱ya wuka be bi̱ne ni̱bu ki̱yalu ko Yimi̱wasu. Yimi̱wasu a lam Siriyu kub chiri wiin we Wurchalima.

¹⁴N chi ki̱fwadu we yichiyu kanang ti̱ti̱le chiye ti̱tu a fwetu.

¹⁵Kangu n chi a chakakku ki̱ni twayakangu, n Yesu a fwadi chi mi̱ntuwe, ki̱bungadu ware n ti chi.

¹⁶Aya n chi a swaanbu ki̱n di̱ne n Kwama kwa̱l chi mi̱nbu.

¹⁷A bi̱u chi ko, “Ti̱twaya wureni we a yayu chi̱n ti̱yade wu.” N chi ki̱ni burako a ti we fiko yi ki̱ni kaiyan ni̱re.

¹⁸Wiin we mure chi, wu di̱n ki̱nun Kiliyobase, a bi̱u ko “N mun nang rungko a Wurchalima wu mwang yimbu chitu a fwe we diti yitta?”

¹⁹Yinu a yi chi, “Wule fwe.” N chi a yi ki̱n ko, “Chi a fwe n ti Yesu Banasa̱rete. N ki̱n fa̱ku wu ki̱ni dukan we nangaritu n ti ya̱mu we kakki̱ Kwamangu n ti ni̱bu ki̱ni kwang.”

²⁰Wu tikaketi fanseti n ti mati̱mu a ni ki̱n ko ni̱bu a chi̱u, ni̱bu a kukan a ki̱tiyang bwang.

²¹Ni yo ni̱ru ko ki̱n nang nii wu ka yu Yisrela! Aya ki̱ka̱ngu a lam ditiyi yitta kangu ti̱chitu wu a fwe mi̱nangu.

²²A kuteng ki̱ku bi̱kamu nati̱bu a ya̱r ni̱n yii, n chi a ya furu ki̱ni kunsiin wu.

²³Aya n chi a yabu bwikiyu, Yo n chi a ki̱lawe, a be yi ni̱n ko, chi ku Naba di̱tumbi̱re Kwama wu a yi chi ko n we ki̱ni ti̱kuriye.

²⁴Bi̱kamu ni̱bu ni̱m we tibe ni̱n a ya bwa fure, a ya a lakanbu n ti ya̱mu nati̱bu a fwa chimi̱ni̱mu aya n chi a kuwebu ki̱n.

²⁵N Yesu a yi chi ko, “A mayire ta kasabu kassane, ta ki̱tan we keku bi̱yili̱mang change we chitu fa̱kubu Kwamama fwaatu.

²⁶Tayimbu tiko a mwintuwe m Masiya ka nwe riye, yinu ka le dwiyen kita?”

²⁷Yinu n Yesu a fwa chimi̱n chitu ki̱ni kwang ti̱tu a mwal a dur ki̱nitu we taki̱da Kwama, a mwetuwe yilang Musangu a lanti̱ tati̱ki̱dai fa̱kubu Kwamamu kwang.

²⁸Yo n chi a mwatawe be bi̱ne wu n chi ki̱yade, n Yesu a ma yinangu ka sudang.

²⁹Aya n chi a wana ki̱n ki̱ni dukan ko, “Swe ti ni̱n, a ya me a lam, dii a mwatan ka ledu.” Yinu n ki̱n a ya swe ware ti chi.

³⁰Yo n chi a yaki̱ chau chabte, yinu a da̱u ki̱danniyu, a wana Kwama, a wulan a nika chi.

³¹Bi̱nabi̱na nui chiyu a wuden, n chi a swaan ti̱n ko n Yesu. N chi a bau ki̱ni si̱ng.

³²N chi ki̱bi̱be yichiyu ko, “Ni̱tu chi̱retu a li̱mbu we wa̱re ki̱dangu n ki̱n yaki̱ fwa ni mi̱n ya̱m Kwamamma?”

³³N chi a du fiko a ki̱la Wurchalima, a ya bi̱bi kub chiri wiini̱mu, a swe ware ti bi̱kam ni̱bu.

³⁴Ki̱yidu ko, “Bi̱yili̱m, Tewuduwe a kun! A fwe Simun Biti̱r mi̱ntuwe.”

³⁵Yinu n chi bi̱bi burabi̱mu a fwa chi a fwetu we wa̱re, n ti yinangu n chi a swaan Yesu a kuteng ki̱ku a kera ki̱danniyangu.

³⁶Ki̱daangu n chi a le ki̱fwa ya̱m bi̱bangu, n Yesu a fwetuwe tibe chi fwadu, a yi chi ko, “Li̱mang a be chimi̱ne.” [172]

³⁷Taiyi a tau chi, bwiyu chiyu ki̱mi̱kadu, n chi ko kano chi ku butu.

³⁸A yi chi ko, “A mayire ta mi̱kane, a mayire ti̱ma ti̱kaman we dutu chinte?

³⁹Ti̱da̱ng fa̱li miyu n ti nani miyu, m mi̱n, m mi̱fwan. Ti̱twaiyi, ti̱da̱ng, buti̱tu a newe ki̱ni nam bwiye ka ti̱kute, yinangu ta kuiyangu.”

⁴⁰Yo n ki̱n a fwa bi̱be, a yung chi fa̱li kiyu n ti nani kiyu.

⁴¹Kangu n chi a tibu kebi̱yili̱mu didinangu di̱ne nabwe furi mwemwenu n ti ya̱r yii chi a bi̱u chi ko, “N ti̱ni ki̱ni chabtu we fi ta chadda?”

⁴²N chi a ni ki̱n chi̱nge wukere.

⁴³N ki̱n a yiu, a wu, we kakku chiyangu.

⁴⁴N ki̱n a yi chi ko, “Ti̱tu nang chi mang fwa chimi̱n we ki̱dangu mi̱n no we ti chi̱nangu. Kanang ti̱ti̱le chiye ti̱tu ni̱bu a mwal a dur mi̱n we yilang Musangu n ti fa̱kubi̱bu n ti Sa̱bura.”

⁴⁵Yinu n ki̱n a wudu chimi̱n ki̱kwa̱mi chiyu ke n chi a swaan ya̱m Kwamamu.

⁴⁶N ki̱n a yi chi ko, “Ti̱tu nang chi a mwale ko, ‘M Masiya ka nwe riye, we di wu tare, ka kunti̱nuwe furu.’

⁴⁷Yinu di̱mwar woki̱ ki̱ti̱mangu we ki̱leti ni̱biyu ka mwadu we dinkinu we kuuti kwang, ka mweti̱nu we Wurchalima.

⁴⁸N ti̱n ti̱ku ti̱chitu wu ki̱ni nui chi̱n.

⁴⁹Mi̱n yikadu yamang tum chimi̱ne chi n Temi a bwa̱bitu. Aya Ti̱swe we bi̱n di̱du ka lami̱nti̱ yo ta ya dukan Kwamane.” [173]

⁵⁰Yo n ki̱n a ya ki̱ni chi a tanti̱lange Betani, a kuku fa̱liyu a yo chi mi̱n delaku. [174]

⁵¹Yo n ki̱n we ki̱yo chimi̱n dela ke, a da̱u ki̱n, a yikan di, a du chi.

⁵²Yinu n chi a si ki̱n a kun a ki̱la Wurchalima ki̱ni furi mwemwenu yinang.

⁵³N chi a da̱u ki̱swi we Kan Kwamana Wurchalimanu ki̱ dela Kwama.