Read tula Luka 3 Bible Online

Luka 3 - tula bible

Luka 3

¹We swa̱r di̱di kub chiri tunu di̱du n Tiberiya Kaisar wu ki̱chau mati̱n a Romamu, ki̱dangu m Babuntu Bi̱latu kwabna Yafudiyangu, n Yiridu nang wu ki̱chau mati̱n a Ka̱lili ye, ke ko n Filibu ki̱chau mati̱n Yituriyatu n ti Tarakunita. Ti̱nti̱ne, Lisaniya ki̱chau mati̱n Abilenes,

²We ki̱dangu Anana n ti Kayafa tikaketi fansetiyu, n Kwama a fwa ya̱m n ti Yowana bwe Sa̱kariya we di̱kiru.

³N Yowana a le ka nang wuwule fiye we ti̱m chimu, a kana laa Wurdunu, ki̱mwa ni̱bu ko, “Ti̱wo ki̱ti̱m, ti̱ma batisma ke n Kwama a du chimi̱n ki̱leti chiyu.”

⁴Yinang ka a mwal we ti̱kwa̱liyi fa̱ku Yichaya ko, Ker niin ki̱ma di̱mwar we di̱kiru ko, “Ti̱do ni̱tu chi̱ntu ke Tewuduwe a be swe we, ti̱ma nangang ki̱yilang.

⁵Kanang wuwule la ka ridu. ka nang ki̱ki̱le bange ti kunitu ka dadi wam. wa̱ri yi kanariyu, ka yadi der. Wa̱ri yi cha̱ki̱li cha̱ki̱liyu ka dadi twai.

⁶Kuu ti̱me ki̱ni kwang ka ku yuku Kwamangu.”

⁷N Yowana a yi muraki̱ ni̱bangu ki̱bau ki̱nu ka ma chimi̱n batismamu ko, “N ti̱n bi̱kwani̱m, yinang soti yi kwaniye! N wure a rung chi̱ne, ko ti̱wul mi̱n we ki̱fwini Kwama ki̱bede? [12]

⁸Ti̱ma nangang ki̱ku ka yungdu ti̱wo ki̱ti̱mang. Ti̱yidu tiko n te chi̱n nang Yibrayim, n ni̱ni wauwadu. N Kwama ki̱ni dukan kasi no nang kali yiyu, ka yodu ka kau Yibrayim mi̱n Bwesi̱m.[13]

⁹N Kwama a tu a do bwi ka swita tini we ki̱yineng tiyang kangu ka fwalu a ti̱m. Ka n chi a ki̱labu a duwebu ki̱letiye, n Kwama ka wela chidu nabwen, yinang ni wu ki̱swita tini yiyu a tubuchiyu ki̱twida ki̱range.”[14]

¹⁰Ni̱bu a bi̱u Yowana ko, “Yoye nang ma wureni wu ka yung duku ki̱letiyange?”

¹¹N ki̱n a ki̱nta chi ko, “Ka nii ki̱ni lukei yurabe, a keran n ti wu a newe ki̱ne. Yinu nii wu ki̱ni chabte a maka wu a newe ki̱ne.”

¹²Ni̱bu ki̱yiu sangkali̱mu a be ki̱baddu ka ma batisma, n chi a bi̱u Yowana ko, “Naba yungke, yoye nang ma wureni, ka yungdu ni̱n wo ki̱ti̱me?” [15]

¹³N ki̱n a yi chi ko, “Ti̱yiddu sangkal di̱du a la yilangnu we.”

¹⁴Bi̱kam ni̱bu ki̱rangmu ti̱nti̱n a bi̱u ko, “N ni̱n ti̱n nang ma wureni ka yungdu ni̱n wo ki̱ti̱me?” N ki̱n a yi chi ko, “Ti̱yidu ka̱mbi̱ru we ni̱bu ki̱ni dukan, ti̱mwedu ti̱kwanituwe a dur niin, ti̱ma bwanu ki̱ni chi ni̱bu ki̱fe chi̱ne.”

¹⁵Ni̱bu ki̱yam beku Masiyamu, n chi ki̱kamadu ko ka kano n Yowana nang ki̱ne.

¹⁶N Yowana a yi chi ko, “Mi̱n ma chimi̱n batisma ki̱ni mwe, aya wukani ki̱bedu wu mang mwatanbu chi n ti ki̱ne, mang lwebu mang chuku ki̱wami kiyu, wu dwiyen kitu a su ti̱tu ni̱bu ka swe mi̱nu warete. N ki̱n ka ma chimi̱n batisma ki̱ni Fi̱ki̱m Kwamam n ti ki̱rang.

¹⁷N ki̱n ki̱bedu ki̱ni swaye ka chaku bi̱yili̱mu ni̱bu we bi̱bwilamu, kanodu yinang yo nii ki̱chaku ki̱nuti a furi chaam n ti tui kiye. Ka yo bi̱yili̱mu ni̱bu a fi wu yile, yinang ka ni̱bu ki̱yang ki̱nuti baliyang. Aya ka ni bi̱bwilamu riye yinang ka ni̱bu ki̱twi furitu n ti tuitu a ki̱rang ki̱ku a dumebudumene.”

¹⁸N Yowana a ma nangangu ki̱ni wa̱riyu nabwen, ko ke ni̱bu a swaan, a yiu ya̱m bi̱li̱mu.

¹⁹Aya n kwabna Yiridu wu n Yowana a wela ki̱n di̱ne a da̱u Yirudiya, naye ke ko n ti ti̱kantu chi ti̱tu n ki̱n ki̱madu a lebite. [16]

²⁰A kuteng ki̱ku, n Yirudu a su bwila, a yi ni̱bu ko a tau Yowana a mar a di̱bi̱nti̱l, ni̱bu a mati̱n.

²¹Aya yo n Yowana a tibu le di̱bi̱nti̱le, n ki̱n a ma ni̱bu mi̱n batisma, yinu a ma Yesu mi̱n ti̱n. Yo n Yesu a le twa̱ba̱ ke, di a wuden.

²²Fi̱ki̱m Kwamam yinang ki̱kube a sub we dur Yesunu, yinu di̱kan ker a chire a bwadi ko, “M mun nang bwemi, wu mang mi̱lane, mi̱n nwe ta̱ma̱ng mwangu yinange.”[17]

²³Ki̱dangu n Yesu a mwe nangang kangu, a ya swa̱tu kitu wan ti̱ta. Ni̱bu ki̱yal Yesu ko bwe Yusufuwe, n Yusufu, bwe Yeliye.

²⁴Yeli bwe Mattat, bwe Lawi, bwe Malki, bwe Yana, bwe Yusufu,

²⁵Matatiya, bwe Amos, bwe Nawum, bwe Asaliya, bwe Nachaya.

²⁶N nachaya bwe Maata, bwe Matatiya, bwe Chimeyen, bwe Chosek, bwe Yafuda.

²⁷Yoda bwe Yonana, bwe Refaya, bwe Sarubabel, bwe Chatila, bwe Neri,

²⁸N Ni̱ri bwe Malki, bwe Adi, bwe Kosama, bwe Almada, bwe Er.

²⁹N Yer bwe Chochuwa, bwe Yeliyeseer, bwe Yorim, bwe Mattat, bwe Lawi.

³⁰N lawi bwe Simiyon, bwe Yafuda, bwe Yusufu, bwe Yonam, bwe Yeliyakim.

³¹N Yeliyakim bwe Malaya, bwe Mainana, bwe Matata, bwe Natan, bwe Dauda.

³²N Dauda bwe Yesse, bwe Obed, bwe Bwas, Bwas bwe Salmon, bwe Nasun.

³³N Nasun bwe Aminadab, bwe Aram, bwe Yesruna, bwe Feresa, bwe Yafuda.

³⁴N Yafuda bwe Yakubu, bwe Yichaku, bwe Yibrayime, Bwe Tera, bwe Nangor.

³⁵N Nangor bwe Seruk, Seruk bwe Reyu, bwe Felek, bwe Eber, bwe Chela.

³⁶N Chela bwe Kenan, bwe Arfacha, bwe Chem, bwe Nufu, bwe Lamek,

³⁷n Lamek, bwe Metusela, bwe Yenok, bwe Yareb, bwe Malalel, bwe Kenan.

³⁸N Kenan bwe Enosi̱k, bwe Chetu, Chetu bwe Adamu, Adamu Bwe Kwama.