Read tula Yowana 1 Bible Online

Yowana 1 - tula bible

Yowana 1

¹We tile bi̱rke, Di̱kwa̱l we. Di̱kwa̱l di̱du we ware n ti Kwama, Di̱kwa̱l di̱du n Kwama.

²We tile bi̱rke, n ki̱n we ware n ti Kwama.

³Kanang ti̱ti̱le chiye, a fwe a di̱ki̱ne. A ne chi a kau, n ki̱na yim be we.

⁴Ti̱kuri we di̱ki̱ne, ti̱kuri ti̱tu a kau ni̱bu mi̱n yiiku

⁵Yiiki̱ku ki̱yiidu we ki̱liye.[1] Ki̱liye a dumbu.

⁶N Kwama tume wuka nii, di̱n ki̱nu n Yowana.[2]

⁷N ki̱n a be ka ma di̱mwaru we yiiku ki̱ku, ko ke ka wuwule niye, a ke bi̱yili̱mu we di̱kwa̱l di̱du.

⁸N ki̱n n ke yiiki̱ku. N ki̱n a be ka ma ka di̱mwaru we yiiki̱ku.

⁹Yiiku ki̱yilangu we, ki̱ku ki̱lewe ti̱ti̱ni kiyi ka wuwule niyengu.

¹⁰N ki̱n we ti̱ti̱nitu, kasi ki̱ku n Kwama a yo ti̱ti̱nitu ki̱ni Di̱kwa̱l di̱dangu, ti̱ti̱nitu a yimbu ki̱n.

¹¹A be ti̱m ki̱mu, ni̱bu ki̱mu a ko, a yiubu ki̱n.

¹²Aya ka nang bi̱bi̱le ni̱be, bi̱bu a yiu ki̱n, a ke bi̱yili̱mu a di̱ki̱nemu, a ni chi dwiyen, a kau bwesi̱m Kwamamu.

¹³Bi̱be wu robe n ke wu a nii n ti nii a mange, n ke wa ki̱ke bwiye, n ke wu kwarta a mange. N Kwama ki̱fwan a yung dukan ki̱nu.

¹⁴Di̱kwa̱lu a swe n ti ni̱bu, ni ku dwiyen kitu, dwiyen ti̱tu a Bwe Kwama n ki̱kuni. A ri ki̱ni li̱me n ti bi̱yili̱mu.

¹⁵N Yowana a fwa ya̱mu a dur ki̱n. A kuku keru a yi ko, “Wu nang wu mang fwa mi, ki̱bedu a kuteng mange, tikake miye. N ki̱n we feredi yo a tibu biiye.”

¹⁶Di̱ne nabwe li̱me ko, n kawure a ya delaki̱ku a riburiye.

¹⁷N Kwama a tume yilangu a kang Musa, aya li̱me n ti bi̱yili̱mu a be a di̱Yesu Masiya.

¹⁸A ne ni a kuun Kwama we, ka ke Kwama n ti kana Bweko n ki̱kun. Wu a bale Te, n ki̱n a yo ni yim Kwama.

¹⁹Bi̱duuma ni̱bu Yafudamu we Wurchalima, a tum Fanseti n ti Lawiyawa ko, a ya bi̱u chimi̱ne Yowana, n ki̱n n wure?

²⁰N Yowana a duti̱bu chi we, a fwa chi mi̱n bi̱yili̱mu ko, “M mi̱n n ke Masiya.”

²¹N chi a bi̱u ki̱n ko, “Yinu mu yal yimwiyu ko n wure? N Yiliya fa̱ku Kwama?” [3] A yi ko, “ngango.” N chi a yi ko, “Mun nang fa̱ku wu n Kwama a yi ko ka beda?” A yi ko, “Ngango.”

²²N chi a yi ko, “Yinu yoye fal m mun, n wure? Ke ni̱n ya di̱ki̱li̱n yiinu, we ni̱bu a tum ni̱nemu. M mun, n wure?”

²³N Yowana a yi chi ko, “M mi̱n ker wuka nii a di̱kir, ker di̱du ki̱fwadu ko, ti̱tau wa̱re der, yinang kangu n Yichaya fa̱ku Tewuduwe a fwawengu.”

²⁴Bi̱kamu ni̱bu Farisa bi̱bu bi̱duum Yafudamu a tumemu,

²⁵a bi̱u ki̱n ko, “Di̱ne wule mu ma batisma, ka mun n ke Masiya, n ke Yiliya, n keti̱ fa̱ku Kwama ki̱bede?”

²⁶N Yowana a yi chi ko, “M mi̱n fal mi̱n ma batisma ki̱ni mwe, a ya wuka nii we a tibe chi̱n, wu ta yim be,

²⁷n ki̱n nang ni ki̱bedu a kuteng mange, mang lwebu ma kwi ki̱mi̱n ki̱wame ko.”

²⁸Ti̱ti kwang a fwe a Betanya, a ki̱ti̱ku nabwe la wurdune, a bale twa̱re, fi Yowana ki̱mang batisma.

²⁹Bafi̱nenangeko, n Yowana a ku Yesu ki̱be bwa a di̱Ki̱ne. A yi ko, “Ti̱da̱ng be Kwane Kwama wu ki̱da̱u ki̱leti ti̱ti̱niye.

³⁰N ki̱n nang ni mang fwa mi, ka bedu a kuteng mange. N ki̱n Tikake mi, di̱ne n ki̱n we feredi, yo m mi̱n, ma ti̱bu kau niye.

³¹Mang ying ki̱mbu didin, aya m be mi̱n ma batisma ki̱ni mwe ke Yisrela a ying ki̱n.”

³²Yinu n Yowana a fwa ko, “N ku Fi̱ki̱m Kwama, ki̱suwedu yinang ki̱kube, we di, a be a swe, a dur ki̱n ko.

³³‘No ma yimbu mi, n nangki̱n, aya n Kwama wa twiye, mi̱n ma batisma ki̱ni mwe,’ a fwami ko, wu mang ku Fi̱ki̱m, ka suwedu, ka swedu, a dur ki̱ne, nang wu ki̱ma batisma ki̱ni Fi̱ki̱m Kwamame.

³⁴Yo mang kuwe fal, yinu m ma di̱mwaru mi, wu nang Bwe Kwama.”

³⁵Bafi̱nenangeko, aya n Yowana a ti n ti miyari̱m ki̱mi burabi̱mu.

³⁶Yinang ka n ki̱n, a ku Yesu ki̱sudangu, a yi chi ko, “Ti̱da̱ng be Kwane Kwama.”

³⁷Miyari̱m ki̱mi burabi̱mu a nabti̱ Yesu, ki̱dangu n Yowana a fwa chimi̱n ya̱m bi̱bangu.

³⁸N Yesu a da̱ng kutengu a ku n chi ki̱ nabi̱ ki̱nedu, a bi̱u chi ko, “Ti̱bau wule?” Bi̱ki̱mu a yi ko, “Tete” ka nang chikiye, naba yungke, “Mun sweda fi̱re?”

³⁹N Yesu a yi ko, “Ti̱be ti̱da̱ng.” N chi a yikana da̱nge fi ki̱swende, a dite kuko we bwako n ti ki̱n. Ti̱ta fwe ki̱swi a fiya yaana wi me.

⁴⁰Andi̱riya ke Simun Biti̱r, we bi̱bi burabu a nwe ya̱m Yowanamu, yinu a bunti̱ Yesumu.

⁴¹Andi̱riya a mwe a yawe ke ko n Simun, a yi ki̱n ko, “Ni̱n ya Masiya.”

⁴²Yinu Andi̱riya a be ki̱ni Simun a di̱Yesuwe. N Yesu a da̱ng Simuni ri̱i̱ng, a yi ko, “Mun nang Simun bwele Yowana? Ka ni̱n yali̱nu ko, Kefas.” di̱nu ka di̱dini̱n n ti Biti̱r, ka nang chikiye kale.

⁴³Bafi̱nenangeko, n Yesu a kur ka ya ti̱m Ka̱lili, a ya Filibu a yi ki̱n ko, “Bumite.”

⁴⁴N Filibu, naba Betsaida, bi̱n Andi̱riya n ti Biti̱r.

⁴⁵N Filibu a ya Nataniyel a yi ki̱n ko, ni̱n ya nii wu m Musa a mwal ya̱m ki̱mu a tati̱ki̱daiyu ferediye, wu fa̱kubu Kwamam a mwal a dur ki̱ne. N Yesu bwe Yusufu naba Nasa̱rete.

⁴⁶N Nataniyel a yi ki̱n ko, “Nasa̱ret a lwe fi chi ti̱yili ka chirmi̱nedea?” N Filibu a yi ki̱n ko, “M be da̱nge.”

⁴⁷N Yesu a ku Nataniyel ki̱be bwa a di̱ki̱ne, a fwa ya̱m a dur ki̱n ko, “Ti̱da̱ng naba Yisrela siine, a newe ki̱ni setayii.”

⁴⁸N Nataniyel a bi̱u ki̱n ko, “N Swani a fi̱re?” N Yesu a yi ki̱n ko, “Ki̱dangu n Filibu a tibu yali̱nangu, yo no mwang swe a tile tiyang sinangu, n kuun.”

⁴⁹N Nataniyel a ke ko, “Tete, m mun Bwe Kwama, m mun Mai Yisrela.”

⁵⁰N Yesu a yi ki̱n ko, “Di̱ne mang ya̱n mi n kuun a durti̱n tiyang sinangu, mun ke bi̱yili̱ma? Ko a mwintuwe mwang ku chi a la ti̱te.”

⁵¹Yinu n Yesu a yi ki̱n ko, “Ki̱kumang, mi̱n fwa chimi̱nu ta ku bwa diye a wuden, bi̱tumbi̱ri Kwamamu ka ni̱n fi̱lu ki̱suwedu we dur Bwe Nii.”