Read tula Yowana 10 Bible Online

Yowana 10 - tula bible

Yowana 10

¹N Yesu a yi ko, “Bi̱yili̱m ka nii a fi̱la kwale, a lebu ki̱rana kwa̱re, ti̱kitu kutu n ti wurku.

²Aya nii wu a le a kwa̱re, nang naba toku kwanti wu yile.

³Nii ki̱to ki̱rane, ki̱wudu naba toku kwantiye mi̱nu. Kwantiyu ki̱nwe ker nii wu ki̱to chidi̱nu, ki̱yal kwantiyu ki̱ni di̱nbi ki̱chiri ki̱n, ki̱yikan tame.

⁴Ka a chaku kwantiyu a chir fi̱lange, ki̱ti kakku. Kwantiyu ki̱nabi̱ ki̱na kuteng, di̱ne a me ker ki̱nu.

⁵Kwantiyu a ne bunti̱ rungko, ka wul ki̱nu di̱ne a mebu ker ki̱nu. Kwantiyu ka yaradu ka du ki̱nu we.”

⁶N Yesu a fwa chimi̱n ki̱ku baltaku aya n chi a swanbu chi n Yesu ki̱fwaditu.

⁷N Yesu fal a ki̱la fwati̱ ki̱da ko, “Mi̱n fwa chimi̱n bi̱yili̱mu, m mi̱n nang kwa̱r ki̱ran kwantinu.

⁸Bi̱ba tuiyimi kwang kana dabi̱kuum ti bi̱wuri̱li̱m. Kwantiyu a nwebu wuka nii we tibe chi.

⁹Mi̱n nang kwa̱ru, nii ki̱ledu a di̱mi̱ne ka ya swiku. We di̱mi̱ne, n chi kani̱ng ledu ki̱chiru ki̱chau cham mu a nachang.

¹⁰Daaku ki̱bedu di̱ne kuutu n ti chiku n ti wurku. Aya m mi̱n m be di̱ne ke n chi a ya ti̱kuri. Ti̱kuri ti̱ta lwei.”

¹¹“Mi̱n nang naba toke wu yile. Naba toke wu yile ki̱ni yikiyu di̱ne kwantiyu.

¹²Naba toke wu ki̱ma nangang surenge, a ne to kwantiyu yinang fangko kwantiye. Ka n ki̱n a ku nam wubare tiyang bawu ki̱bede, ki̱wulu ki̱ du kwantiyu we. Nam wubare beka chi̱be kwantiyu, ka yai ti̱ni yak.

¹³Nii wu ki̱ma nangang surenge, a wul di̱ne kwantiyu n ke yiki. Kwantiyu a bubu ki̱n ni̱r.”

¹⁴Mi̱n nang naba toke wu yile. N yim kwanti miyu, n chi a yinti̱ mi̱n.

¹⁵N yim Temi tiyangu n ki̱n a yim mi̱nangu. N ni ti̱kuri mitu di̱ne kwanti miyu.[49]

¹⁶Mi̱ni ki̱ni yikai kwanti we yiyu a newe ki̱ran di̱di̱nu. A mwintuwe mang bedu ki̱ni chi ti̱n. N chi ka nwe ker mi̱nu. Ki̱ranu kanodi diin, naba toke wiin.

¹⁷Te ki̱mi̱layu di̱ne mi̱n ni ti̱kuri miye, ti̱kuri ti̱tu mang yiu ti̱nuwei.

¹⁸A ne nii ka yitiye we, di̱ne mi̱n ni ti̱kuritu m mi̱fwan. Mi̱n ki̱ni dukanu ma ni ti̱kuri, mi̱ni ki̱ni dukanu ma yiti̱duwe. Te a ni mi̱n dukan di̱du.

¹⁹Bi̱duum ni̱bu Yafudamu a yara yichiyu we fiko, ki̱tuka ya̱m bi̱bu.

²⁰Bi̱kamu a yi ko, “Naba fangmiye, naba ki̱fi̱btiye, ti̱wassa ya̱m ki̱mu a bwa.”

²¹Aya bi̱kamu a yi ko, “Bi̱bu ya̱m n ke bi̱bu a naba ki̱fi̱btiyem. N chi a yi ko, naba ki̱fi̱btiye ka wudu ki̱du mi̱n nuiya?”

²²We chuwang kangu n Yesu a ya Yiye wurku a Wurchalima.

²³N Yesu a chir ki̱bwa̱lu we yifi̱la Kan Kwamane, a bale ki̱ni ki̱di̱ngu, n chi ki̱yalu ko, “Ki̱di̱ng Solomon.”

²⁴Bi̱duum ni̱bu Yafudamu a chire a be mura ki̱mi̱ntuwe a yi ko, “Fwa bi̱yili̱mu, laiyu chiwe, m mun nang Masiya naba yuke a ke ni̱n kamadu chi we?”

²⁵N Yesu a yi chi ko, “A mang fwa chimi̱n ta kebu bi̱yili̱mu. Chi ka̱ta̱kitu mang ma a dukan Teminitu ki̱yungdu ka m mi̱n n wure.”

²⁶Aya ta kebu bi̱yili̱mu di̱ne n chi̱n ta bunti̱bu mi̱n.

²⁷Kwantimiyu ki̱nwe ker mi̱nu, n yim chi, n chi a yinti̱ mi̱n.

²⁸Mi̱n ni chi ti̱kuri ki̱diya kwadi, n chi a ne twiyaanduwe. A ne nii ka yitu chi we fa̱la̱ng mangu we.

²⁹M temi wa ni mi̱n kwanti yiye, a la chiti kwang. A ne ni a lwe ka yitu kwanti yiyu we fa̱la̱ng kange we.

³⁰Mi̱n n ti Temi a fi wine.

³¹“Ni̱bu Yafudam a wote kaliyu ki̱da, ko chi kwela Yesu.

³²N Yesu a yi chi ko, m ma nangi̱n Temitu nabwen ka ti̱yili, ti̱kwelayu a ki̱ki̱le?”

³³Bi̱duum ni̱bu Yafudam a yi ki̱n ko “Nang kwelambu di̱ne nangang ki̱yilang ki̱ku mwang mangu. Aya di̱ne mwang swa̱ba ne, m mun nii duri ki̱li, mwang yidu mwiko m mun ti Kwama a fi wiine.”

³⁴N Yesu a yi chi ko, “Mare a mwal we yilang Musangu ko, ‘N fwami n ti̱n yinang Kwamati.’ [50]

³⁵Ka a yal bi̱bu a be ki̱ni ya̱m Kwamamu ko kwamatiye, ya̱m bi̱li̱m bi̱bu a ne sute duwe.

³⁶A mayire ti̱yidu tiko, n swa̱ba Te, di̱ne ma yi mi, m mi̱n Bwe Kwama?

³⁷Ti̱kedu bi̱yili̱mu we ka nangi̱n ti̱tu mi̱n maditu n ke ta Kwamaye.

³⁸Aya ka mi̱n ma nangi̱n Kwamaye, kono ta kebi̱ bi̱yili̱mu we di̱mi̱ne, ti̱ke bi̱yili̱mu we nangi̱ntu ta kuutu. Di̱ne ke ti̱swaan, ti̱yim tiko Kwama a di̱mi̱ne, m mi̱n a di̱ki̱ne.”

³⁹N chi a wituwe ko chi tau Yesu, n Yesu a chirtuwe tibe chi.

⁴⁰N Yesu a ki̱la ki̱ti̱ku la wurdune, a ya swe we fi n Yowana a no ki̱mang batisma. [51]

⁴¹Ni̱bu nabwen a nabi̱ ki̱ne we fiko ki̱fwadu ko, “Kasi ki̱ku n Yowana a mabu chi ka̱ta̱kitangu, aya kanang ti̱ti̱le chiye, wu n ki̱n a fwa a dur nii wune, bi̱yili̱m.”

⁴²We fiko ni̱bu nabwen a ke bi̱yili̱mu we di̱Yesu we.