Read tula Yowana 11 Bible Online

Yowana 11 - tula bible

Yowana 11

¹Wuka nii we, di̱n ki̱nu n Lasa̱ru, a bubuwe. N ki̱n naba Betani, a bi̱n bi̱u Maryamu ke Marta [52]

²Lasa̱ru wa bubuwe, nang ke Maryamu we wu a kur Tewuduwe mi̱n ki̱nung ki̱ki fi̱rfi̱range, yinu a musu ki̱mi̱nti̱ nanikiyu ki̱ni ri durite.[53]

³N Yesu a ya di̱tumbi̱r we kebu Lasa̱ri̱m bi̱wuwiye ki̱mu. N chi a tum Yesu mi̱n ko, “Tewuduwe, wu mwang mi̱lane a bubuwe.”

⁴Tiyangu n Yesu a nwengu, a yi ko, “A ne bwadi ki̱n. Burang ki̱ku n Kwama ka yaang dwiyen, yinu Bwe Kwama ka yati̱ ri̱kaku we mure ti̱n.”

⁵N Yesu a mi̱la Marta ti keko wuwiye ti Lasa̱ru.

⁶Yinu yo n ki̱n a nwe ya̱m burame, a ki̱la dati̱ yikai diti yurau.

⁷A kuteng ki̱ku, a yi miyari̱m ki̱mu ko, “Ni ki̱la Yafudiya.”

⁸Miyari̱m ki̱mu a yi ko, “Tete, mun ki̱latidu we bwanu ni̱bu Yafudam a bau ka kwelanu ki̱ni kaliya?”

⁹N Yesu a yi chi ko, “We di wiine, n ke awa kub chiri yuraba? Nii ki̱ya yayu ki̱ni kuko, a ne ngau bewure. N chi ki̱kudu ki̱ni yiiku ti̱ti̱niyang.

¹⁰Aya wu ki̱ya yayu kume, ka ngau bewure, di̱ne n ki̱n a newe ki̱ni yiiku.”

¹¹A kuteng ki̱ku a fwaang ya̱m bi̱bangu, a fwati̱ ki̱da ko, “N fati̱ chire Lasa̱ru a da duum. Aya mi̱n yadu yamang kuku ki̱nu.”

¹²Miyari̱m ki̱mu ko, “Tewuduwe, ka ki̱da duume, a ta̱ma̱ngu a ya.”

¹³N chi ko kano n Yesu ki̱fwa duum bi̱bu ni kabadi̱mu. Aya n Yesu ki̱fwa bwa.

¹⁴Yinu n Yesu a fwa chimi̱n ko, “N Lasa̱ru a lai kabu.”

¹⁵A chakakku ko, “N nwe ta̱ma̱ng di̱ne mang newe bwa. A yi chi ko, bwa wu ka ni chi̱n wuka da wu ta ken bi̱yili̱m a di̱mi̱ne.” A yi chi ko, “Ni yika bwako.”

¹⁶M Toma wu n chi ki̱yalu ko, ngabi burabe, [54] a yi miyari̱mu ko, “N chi̱ni ni ya ti̱n, ka bwange ni bwa ware.”

¹⁷Yo n Yesu a lam fiko, a ya ko n Lasa̱ru a bwa. A ma ditiyi yaana we furu.

¹⁸Betani a kwatuwe Wurchalima, a lambu siriyi yurabiyu.

¹⁹ni̱bu Yafudam we fiko nabwen, a be ki̱kire Marta ti Maryamu mi̱nu we furi ki̱lina ya chiye we bwa ke chiye.

²⁰Kangu Marta a nwe ko n Yesu a lamengu, a chir yaka mwate Yesu a du Maryamu we lo.

²¹M Marta a yi Yesu ko, “Tewuduwe, ka no m mun we fiye, kemi a no bwabu.

²²N yim n Kwama a ne ko mi̱n chitu mwang bi̱ditu.”

²³N Yesu a ke ki̱mi̱n ko, “Kemo ka kabati̱nuwe.”

²⁴M Marta ko, “N fwa bi̱yili̱m, aya ka kunnu di swan kute.”

²⁵N Yesu a yi ki̱n ko, “M mi̱n nang wu ki̱kukku ni̱be, m mi̱n nang wu ki̱ni ti̱kuriye, nii a ke bi̱yili̱ma di̱mi̱ne, kono a bwa, ka kunnu.

²⁶Ka nii wu ki̱ni ti̱kuriye, a ke bi̱yili̱mu we di̱mi̱ne, a ne bwadu ki̱diya kwad. N ke bi̱yili̱ma?”

²⁷M Marta a yi ko, “We yiko Tewuduwe. N ke bi̱yili̱mu mi, m mun nang Masiya naba yuke, Bwe Kwama wu ki̱be ti̱ti̱niye.”

²⁸Yo n ki̱n a ri ya̱m bi̱be, a yikan, a ya yale keko wuwiye m Maryamu. A yi ko, “Naba yungke a be ki̱baddu ka ku numo.”

²⁹Maryamu a kaibu ki̱swi, a kuni ngi̱rtu a yika bwa a di̱Yesuwe.

³⁰N Yesu we finu m Marta a mwati̱n ki̱ne, a tibu le bi̱nu.

³¹Kangu ni̱bu Yafudam a no be siku bwangu, a ku Maryamu a chiri furtu ki̱yikadangu, a bunti̱n ko kano ki̱yika bwa fure, di̱ne furi ki̱lin ki̱nu.

³²Yo m Maryamu a lam fi n Yesu we mi̱ne, a yari fi̱m we ti̱mu ko “Tewuduwe, ka no mun we fiye, kemi a no neka bwadu.”

³³Kangu n Yesu a ku Maryamu ti ni̱bu Yafudam a bung ki̱mi̱nte ki̱kira wiiniyangu, ki̱bune a tau ki̱n.

³⁴A yi chi ko, “Ti̱fur ki̱n a fi̱re?” N chi a yi ko, “Tewuduwe, be da̱ng.”

³⁵N Yesu a ki wii.

³⁶Ni̱bu Yafudam a yi ko, “Ki̱ki wii di̱ne a Mi̱la ki̱ne.”

³⁷Bi̱kam a yi ko, “Yo n ki̱n a be ki̱duwe, a mayire n ki̱n a du nii wu a bwange?”

³⁸Kangu ni̱r Yesu a kaiyanangu, n ki̱n a yawe furu. Fura wure. N chi a yinge furu ki̱ni wuka ne ti kale.

³⁹Yesu a yi chi ko, “Ti̱bi̱li̱n kale.” M Marta wuwiye ke baki̱ti̱me a yi Yesu ko, “Tewuduwe, ka ma nunang, kangu wudiye yaana we furangu.”

⁴⁰Yinu n Yesu a yi ki̱n ko, “Mare n ya̱n mi, ka n ke bi̱yili̱me, mwang ku dukan Kwamanu.”

⁴¹Yo n chi a wum kale we fure, n Yesu a kuku nuyu we di a yi ko, “Tewuduwe, mwang ma be tiyangu mwang nwe twa̱ba̱ki̱ mangu.”

⁴²N yim mun nweyi kwadu, aya n fwa ying di̱ne ke ni̱bu bi̱bu n ni̱n waremu a swan ko m mun n twiye.

⁴³Yo a ri ya̱me, a yali ki̱ni dukan ko, “Lasa̱ru! Chire.”

⁴⁴Kwa̱me a chire ki̱ni kaniyu ti naniyu a kwabakwabane we furu ki̱ni kulunu ni̱bu a fur mi̱ni̱nu wetuwe kabuko. N Yesu a yi chi ko, “Ti̱kwiran, a ya yayu.”

⁴⁵Ni̱bu Yafudam nabwen a no be ki̱si Maryamu, a ku chitu n Yesu a maatu. N chi a ke bi̱yili̱mu we di̱Yesu we.

⁴⁶Aya bi̱kamu a ya fwa ni̱bu Farisamu mi̱n chitu n Yesu a maatu.

⁴⁷Di̱ne yiko, wuduwe fansetiyeyu n ti ni̱bu Farisamu a yal muraku ti kwa̱l yilangi̱n. N chi a yi ko, “Ni ma wureni? Nii wu ki̱ma chi ka̱ta̱kitu nabwen.

⁴⁸N chi ko ka ni du ki̱n a chakakku ki̱ni nangi̱n ti̱te, kuuti ni̱bi kwang ka ke bi̱yili̱mu we di̱ki̱ne. Ki̱chitu wu ka yo Roma beka yitu ni ti̱m chi̱remu ti Kan Kwamana Wurchalimanu.”

⁴⁹Wuka naba nii we, di̱n ki̱nu n Kayafa. N ki̱n tikake Fanse, a yi chi ko, “Ta yimbu chi ko bayim.

⁵⁰Ka la chi nii wiin ka bwadu di̱ne ti̱m ki̱mu n ti ki̱ku kuuti ni̱bi ki̱ni kwang ka bwadangu.”

⁵¹Ya̱m bi̱bu n Kaiyafa a ma fa̱kui wemu a kurbu a ni̱r ki̱n, n Kwama a yo, yade n ki̱n nang tikake Fanse we swa̱r di̱ki̱ne, n ki̱n a fwa ya̱mu ki̱yungdu n Yesu beka bwadu di̱ne kuu ni̱bu Yafudam.

⁵²Aya n ke di̱ne ni̱bu Yafudam n chikun, aya ke a ki̱bte bwesi̱m Kwamamu a yaran a yikai kuuti mu, ke a be a swe fi wiin.

⁵³A mwetuwe diko, n chi a do ya̱mu ko chi chi̱u Yesu.

⁵⁴Di̱ne yiko n Yesu a yati̱bu ki̱da kwa̱rikwa̱ri we nuyi ni̱bu Yafudamu. Aya a du bi̱nu a yika di̱kan bi̱n di̱da kwati̱n a di̱ki̱ri̱n. Ni̱bu ki̱yalu ko Yifi̱remu. A swe a bwako n ti miyari̱m ki̱mu.

⁵⁵Yo Yiye yabake wa ni̱bu Yafuda a mwatawe, Kutiyu a ti̱m bi̱ki̱miyu nabwen a yika Wurchalima di̱ne wauwade wa dutu chiye, ka ya mi̱n Yiye.

⁵⁶N chi a le Kan Kwamanu ki̱babba Yesu. N chi a ti̱ran ki̱twaiyadu ko kano we beda?

⁵⁷Aya wuduwe fansetiyeye n ti ni̱bu Farisamu a tu a na yilang ko, “Kanang wuwule niye wa ku fi n Yesu we mi̱ne, a be fwa chi mi̱n ke chi tau.”