Read tula Yowana 12 Bible Online

Yowana 12 - tula bible

Yowana 12

¹Yo Yiye yabake a du ditiyi yurukune, n Yesu a ya Betani, bwanu a di̱Lasa̱ru wa kukku a fure, a swe we.

²N ki̱n a chau chabti̱tu we fiko ti ni̱bu n Lasa̱ru wetuwe. Marta nang ni a kera chabti̱te.

³M Maryamu a kun a da̱u ki̱nung narding ki̱ni kwalba a wa Yesu mi̱n we naniyu. Ki̱nungu a ma fi̱rfi̱ra̱ng, ki̱ni ka̱mbi̱ru nabwen. N ki̱n a musu Yesu mi̱n naniyu ki̱ni ri dur ki̱nitu. Fi̱rfi̱re ki̱nunge a ri lo chibu.[55]

⁴Yinu n Yafuda Yiskariyoti, miyare ko wu ka kwa̱l ki̱ne a yiko,

⁵“A mayire ni̱bu a ne mi ki̱nung ki̱ku ke ni ya ka̱mbi̱r sureti [56] wan ti̱ta, di̱ne ke ni nika ti̱lusaniye?”

⁶N Yafuda a fwa ya̱m bi̱bu n ke di̱ne ki̱kur ti̱lusaniye, ti̱nti̱ne, n ki̱n daaku. N ki̱n nang wu ki̱tau swe ka̱mbi̱re. Ki̱ma kuti̱tu we a ka̱mbi̱ru.

⁷N Yesu a yi ko, “Du ki̱n a yang chi n ki̱ni ki̱ne, ki̱madu di̱ne di furki̱ mange.

⁸N ti̱n we n ti ti̱lusanitui kwadu, aya n ti̱n ti̱newe ti mi̱ni kwadu.” [57]

⁹Kangu ni̱bu Yafudam a nwe ko n Yesu wengu, n chi a be di̱ne ke chi ku Yesu ti Lasa̱ru wu n Yesu a kuku a fure.

¹⁰Tikake fansetiyu a di̱ka yi ko chi chi̱ti̱ Lasa̱ru ti̱n.

¹¹Di̱ne a kuteng ya̱m kuki̱ki̱ kangi̱m, ni̱bu Yafudam nabwen ki̱ duwe chidu, ki̱ke bi̱yili̱mu a di̱Yesu we.

¹²Bafi̱nenangeko, nabwe ni̱be a no be Yiye, a nwe ko n Yesu ki̱yika Wurchalima.

¹³N chi a da̱u ti̱kweni dabinotu, a chir ka mwate Yesu, ki̱ni bele. N chi a ma Yesu mi̱n, “Osana!” “Ko nii wa be ki̱ni dukan Tewuduwe naba delake. Ko Mai Yisrela naba delake.”[58]

¹⁴N Yesu a ya be kurunge a fi̱l ki̱yaduwe, yinanga mwal ko,

¹⁵“Ti̱wulu chi we, ni̱bu Siyona, Mai chi̱n nang wu ki̱bedu a be kurunge.” [59]

¹⁶Miyari̱m ki̱mu a no swaanbu ki̱chitu wu, aya a kuteng ki̱ku n Yesu a ya dwiyen we kunku futangu, n chi a kur chitu ni̱ba mwalitu, chitu a be fwe ti̱ni yiko.

¹⁷Ni̱bu bi̱bu a ku ki̱dangu n Yesu a yal Lasa̱ru, a kuku we furangu a chakakku ki̱fwa chi a fwetu.

¹⁸Ni̱bu nabwen a yikan, ka mwate ki̱nu, di̱ne chi ka̱ta̱ki ti̱tu n ki̱n a maatu.

¹⁹Ni̱bu Farisamu a fwa ya̱m a dutu chi ko, “Kwati̱m, chitu a ma bwar. N chi ko, ti̱ti̱niti kwang ki̱bung ki̱mi̱n ti̱du.”

²⁰Bi̱kam we ni̱bu Yelenamu, a be ka sii ki̱nu we Yiye yabake .

²¹Ni̱bu bi̱bu, a ya Filibu naba Betsaida wa Ka̱lili, a yi ko, “Tewuduwe, ni̱n baddu nang ku Yesu.”

²²N Filibu a ya Andi̱riya a fwa ki̱mi̱n, yinu n chi ki̱ni burako a ya fwa Yesu mi̱n.

²³N Yesu ko, “Ki̱swi Bwe Nii ka yin dwiyene a lam.”

²⁴Bi̱yili̱m mang fwa chimi̱nu, ki̱kwi chame a ne bwidu ka niyang fibu we ti̱mu, a bwabu a fwiti̱be, ka swedu a ne bwi bi̱kam. Aya ka nii a fiye, ka kidu, ni kadu nabwen.

²⁵Nii wu a mi̱la ti̱kurikite, ka kwa̱la̱du, aya wa mi̱labu ti̱kurikitu we ti̱ti̱nite, ka ya ti̱kuri ki̱diya kwaditu. [60]

²⁶“Wa ke ka siiye, ka bungadu ti mi̱n, ka̱be mi, ka swedu ti mi̱n kasi no a wuwule fi. Nii ka siiye, n temi ka ni ki̱n dwiyentu.”

²⁷“Ki̱ka̱ngu ni̱r mi̱nu a tureng, ma fwadu mi wureni? Kwama chaki we riye, we ki̱swi wu, aya dwi, di̱ne nang chi mang bemi̱ne ti̱ti̱niye.

²⁸Te, yiu dwiyen di̱n munitu.” Ki̱dang kangu, ker a chire a dii ko, “Dwiyentu a tu a ki̱la bwa a di̱mi̱ne, mang yungti̱ dwiyen mitu ki̱da.”

²⁹Ni̱bu bi̱bu we fikomu, ko ki̱yale, bi̱kamu ko Naba di̱tumbi̱re Kwama a fwa ki̱mi̱n ya̱m.

³⁰N Yesu a yi chi ko, “Ker di̱du a be n ke di̱ne mi̱ne, di̱ne chi̱n ke a maka chi̱n n ke mi̱n.

³¹Ki̱ka̱ngu ti̱ti̱nitu ka ya kabaku, ki̱ka̱ngu n Kwama yaka chaku tikake Mai ti̱ti̱niye n Setan.

³²A kutengu ka kuki̱yangu, yo ma du ti̱ti̱nite, ma yo ni̱bu kwang ka ke bi̱yili̱mu we di̱mi̱ne.”

³³Ya̱m bi̱bu n Yesu a fwamu, ki̱yung ki̱dum bwamu n ki̱n yaka madi̱mu.

³⁴Ni̱bu a yi ki̱n ko, “Yilang Musang nangu a yung m Masiya a ne bwaangduwe. A mayire mwang yidu mwi ni̱bu ka kuku Bwe Kwama? N ki̱n Bwe Nii wu n wure?”[61]

³⁵N Yesu a yi chi ko, “Yiiki̱ku we ti chi̱n a baki̱swi bayim. Ti̱ya yayu, ti̱fi̱u fi̱la di̱ne ki̱swi ki̱bedu wu ka du chi̱ne. Ni ki̱yada ki̱liye, a yimbu bwa ka ngan dure.

³⁶Ti̱ke bi̱yili̱mu we yiiki̱ku, yo a tibu du chi̱ne, ke ti̱kau bwesi̱m bi̱bu ki̱yiidi̱mu.” Yo n Yesu a ri ya̱m bi̱be, a yikan, a bau fi a swe we.

³⁷Kasi ki̱ku n ki̱n a ma chi ka̱ta̱kitu nabwenangu, bi̱duum ni̱bu Yafudamu a kebu bi̱yili̱mu we di̱ki̱ne.

³⁸Ti̱ta fwe ke ya̱m fa̱ku Kwama, n Yichaya fwamu a ri. A yi ko, “Tewuduwe, n wure a ke di̱mwar ni̱nu, A di̱wure wu n Kwama a yung dukan yuki̱ne?”

³⁹Di̱ne yiko, ni̱bu a kebu bi̱yili̱mu we di̱Yesuwe, di̱ne ya̱m Yichayamu a chir a wuka fi ko,

⁴⁰“Kwama a yo ni̱bu mi̱n ti̱dui we nui chiyu, a yo ni̱tu chita bwa. Ko ke n chi a kuduwe ki̱ni nuiyu, a swaan ti̱duwe ni̱tu chitu, wu ka ni chi li̱mbwi, ka wo ki̱ti̱m, we di̱Kwama wu ka be chide.”

⁴¹Feredi, n Yichaya a fwa bi̱bu di̱ne a ku dwiyen Yesute. Yinu a mwa ni̱bu we di̱Yesuwe.

⁴²A mwintuwe tikaketi kwa̱l ni̱bu Farisamu a ke bi̱yili̱mu we a di̱Yesuwe, aya a babu ka chiredu, di̱ne n chi ki̱wul tayi ni̱bu Farisamu, ko ke ki̱la a chaki̱ chi we muraku Yafudamu.

⁴³Nangki̱n, bi̱duumu ki̱mi̱la delaku ni̱banga la ki̱ka Kwamangu.

⁴⁴N Yesu a fwa ya̱mu ki̱ni dukan ko, “Nii wa ke bi̱yili̱m a di̱mi̱ne a ke bi̱yili̱ma wa twiye.”

⁴⁵Aya wu ki̱bau mi̱ne ki̱bau nii wa twiye.

⁴⁶M be ti̱ti̱nitu, m mi̱n yiiku. Nii wu ki̱ke bi̱yili̱m a di̱mi̱ne a ne swedu we ki̱liye.

⁴⁷Wa nwe ya̱m mi̱ma konge, mang mwata ki̱mi̱nbu mwataki̱ ti̱ti̱niyang, mang bebu be mang mwata ti̱ti̱ni mi̱nu, aya ke n yu chi.

⁴⁸Wu ka ko mi̱ne, ka koti̱ ti̱kwa̱liyi mite, bi̱yili̱m mi̱mu beka mwata ki̱mi̱nu we di swan kute.

⁴⁹Mang fwabu ya̱mu mang kura ni̱r mi̱ni̱m, aya kana bi̱bu n temi a yi ko n fwaam.

⁵⁰N yim yilang kangu nang wa̱re ti̱kuriye. Di̱ne yiko, chi mang fwaatu nang chi Kwama a yi ko n fwaatu.