Read tula Yowana 14 Bible Online

Yowana 14 - tula bible

Yowana 14

¹N Yesu a yi chi ko, “Ni̱tu chi̱ntu a kaiyaduwe, ti̱ke bi̱yili̱mu we di̱Kwama, n ti mi̱n.

²Bwanu a di̱Temiye, loniyu we nabwen, ka no a newe yikono ma fwa chimi̱nu. Mi̱n yikadu yama ni̱n do chimi̱n fanti yiyu.

³Ka n yikan, n do fanti Yiye, mang ki̱ladu be mang da̱u chi̱nu ni yikadu, ta swedu a bwanu m mi̱n we mi̱ne.

⁴Ti̱yim wa̱re wu a bwa mi̱n yikande.”

⁵N Toma a yi ki̱n ko, “Tewuduwe, nang yimbu bwa mun yade, nang ying wa̱re yire?”

⁶N Yesu a yi chi ko, “Mi̱n nang wa̱re, mi̱n nang bi̱yili̱mu, mi̱n nang ti̱kuritu. A ne nii ka ya bwa a di̱Temiye we, ka n ke bwa a di̱ mi̱ne.

⁷Ka no ti̱yim mi̱ne, ta yim Temi. Bwa kake fal ti̱yim Temi, ti̱ku ti̱n.”

⁸N Filibu a yi ki̱n ko, “Yung ni̱n Tewuduwe, nang chi ni̱n badde.”

⁹N Yesu a yi ki̱n ko, “Ka mang tau mi̱n swedu ti chi̱ni fere, mwang swani ba Filibu? Wa kuye a ku Temi, a mayire mwang yidu mwiko n yungi̱n Te.

¹⁰Ta kebu bi̱yili̱mu tiko mi̱n we Te, yinu Te a di̱mi̱nenga? A ya̱mu mi̱n fwa chimi̱ndi̱mu n ke bi̱mi̱m, Te wu we ware a di̱mi̱ne ki̱chake ya̱m bi̱bu.

¹¹Ti̱ke bi̱yili̱mu we di̱mi̱ne. Ti̱ke ya̱mu mang yi chi̱n mi m mi̱n we Te, yinu Te we di̱mi̱ne. Ka ta ke bi̱yili̱mu a chi ka̱ta̱kitu mang tau mi̱n madite.

¹²Bi̱yili̱m, mi̱n fwa chimi̱nu, ka n wure wa ke bi̱yili̱m a di̱mi̱ne, ka mati̱ nangi̱n ti̱tu ma tau mi̱n maditu. N ki̱n ka ma nangi̱n ti̱tu a la ti̱titu we ki̱ka̱ngu, m mi̱n, mi̱n yika bwa a di̱Temi̱yengu.

¹³Kasi no ti̱ti̱le chi ti̱tu ta bi̱du a di̱n mi̱nitu mang madu. Nang kangu n temi ka ya ri̱kaku we bwekongu.

¹⁴Kanang ti̱ti̱le chi ti̱tu ta bi̱du a di̱n mi̱nite mang madu.”

¹⁵“Ka ti̱ mi̱la mi̱ne, ta bunti̱ yili̱n mitu,

¹⁶Mi̱n mang bi̱u Te, ka tume Fi̱ki̱m ki̱mu, wu ka swedu ti chi̱n ki̱diya kwade.

¹⁷Fi̱ki̱m bi̱bu nang Fi̱ki̱mu ki̱yung bi̱yili̱m mi̱mu. Aya ti̱ti̱nitu a ne kedu di̱ne chi a kubu, a yin ti̱bu. Di̱ne a swe a di̱chine we chik ka ni̱n swedu we ni̱tu chi̱ntu.

¹⁸A ne mang du chi̱nu a babuni, ma ni̱ng be chimi̱nedu.

¹⁹Aya a ne tike, ni̱bu a ne kuyu we ti̱ti̱nitu, aya n ti̱n ta kuyu. Ti̱nti̱ne, di̱ne mi̱n wu kure, n ti̱n ta kau bi̱kuri̱m.

²⁰We di wuko ta yindu tiko, m mi̱n a di̱temiye, n ti̱n a di̱mi̱ne, m mi̱n a di̱chine.

²¹Nii wu a yiu yilang mangu, yinu a tau ki̱bunti̱ne, nang wu a mi̱laye. N Kwama ka mi̱lati̱ ki̱nu, m mi̱n mang mi̱la ki̱nu mang yung ki̱n yimiyu.”

²²Yinu n Yafuda (N ke Yafuda Yiskariyoti) a yi ko. “Tewuduwe, na swaanbu ya̱mu mwang yi mwiko mwang yung ni̱n yimwiyu a bwin ti̱ti̱niti̱mu.”

²³N Yesu a ke ki̱mi̱n ko, “Nii wu a mi̱laye, ka tau ti̱kwa̱liyi mitu, n temi ka mi̱la wuko. Nang bedu na swedu n ti nii wuko.

²⁴Aya wu a mi̱laibe, a ne bunti̱ ti̱kwa̱liyi mitu. Aya chi ta nwenge n ke ti̱mi, n ti Temi wu a tum mi̱ne.”

²⁵N fwa chimi̱n ya̱m bi̱bu ki̱ka̱ngu m mi̱n we ti chinagu.

²⁶Aya naba makare ka nang chikiye, Fi̱ki̱m Kwamam bi̱bu n temi ka tumedu di̱ne ke a suteyimu, ka miya chimi̱n chiti kwang, ka kur chimi̱nti̱ ya̱miyu mang fwaran ki̱dangu no chi̱ni wareyu.

²⁷N du chi̱n li̱mang, n ni chi̱n li̱mang mangu. A lakan n ti li̱mangu ti̱ti̱ni ki̱nidangu, ni̱tu chi̱ntu a kaiyaduwe, ti̱ka̱ta̱duwe.

²⁸Ti̱nwe yinangu ma fwa mi, mi̱n yikadu, mang ki̱late bwa a di̱ chi̱ne we, mang ya chi̱nu. Ka no ti̱mi̱laye, ta ma furi mwen, di̱ne mi̱n yika bwanu a di̱Te. N ki̱n a la mi̱n.

²⁹Mi̱n fwa chimi̱n ya̱m bi̱bu yo chitu a tibu fwede. Ke yo ti̱chitu ka fwede ta ke bi̱yili̱m.

³⁰A ne ki̱swi manni̱n fwa chimi̱n ya̱me we, di̱ne tikake Mai ti̱ti̱niye, n Setan a lame, kasi ki̱ku a ne dukan we a dur mi̱nangu.

³¹A dakan ti̱ti̱nitu ka yindu ko mi̱n mi̱la Kwama. Nang chi a yo mi̱n ma chi a ya̱iyitu yinang ka dakange. N Yesu a yi chi ko, “Ti̱kun, ni yikan.”