Read tula Yowana 15 Bible Online

Yowana 15 - tula bible

Yowana 15

¹N Yesu a yi ko, “Mi̱n yinang tiyang yinabe ki̱yilang. M temi nang naba toke.”

²Ka wuwule ki̱yange wa tubu chiye, ki̱swidu ki̱mara bwa, aya wu ki̱tu chiye, ki̱dodu ko ke a tu chitu yinang.

³N ti̱ni wauwadu ki̱ka̱ngu, di̱ne ya̱mu mang fwa chimi̱ni̱mu.

⁴Ti̱swe a di̱mi̱ne. M mi̱n nang ki̱yange yinab wuyile. Ki̱yange a ne tu chi, ka a ne bwi wenge. N ti̱n a ne ta ma chi, ka ta tibu a di̱mi̱nenge.

⁵“Mi̱n yinang bwi tiyang yinabe n ti̱n yinang ki̱yangti. Wu ki̱sweda di̱mi̱ne yinu m mi̱n a di̱ki̱ne, ka kadu nang ki̱yange wu ki̱tu chitu nabwene. Ka n ke mi̱ne a neta medu ta ma chi.”

⁶Kanang wuwule nii wu a sweba di̱mi̱ne, n ki̱n a lakabu ti ki̱yange a kusu niyang mar a bwa. Yiyu ki̱yangti a kau yimwari a ki̱rang.

⁷Ka n ti̱n we ti mi̱ne yinu ti̱kwa̱li yi mitu a swe a di̱chine, ta bi̱u chitu ti̱baditu, mang ni chi̱nu.

⁸Nang tiyangu n temi ka ya dwiyen tangu, ta tu ti̱kulantu nabwen. Ti̱tu ka yung ni̱bu ko n ti̱n miyari̱m mi̱mitu.

⁹“Yinangu Temi a mi̱layangu, nang tiyangu mang mi̱lang chinagu. Ti̱swe we mi̱laku mi̱n ma chimi̱ndangu.

¹⁰Ka ti̱bunti̱ yili̱n mite, ta swedu we mi̱laku mangu, yinangu m mi̱n mang bunti̱ yili̱n Tetangu, mang swetuwe a ki̱ke kongu.

¹¹N fwa chimi̱n bi̱bu ke furi mwen chi̱nu a dudu chi̱n we, aya ke furi mwen chi̱nu a ri i chibu.

¹²Yilang mangu nang ki̱ku. Ti̱mi̱la yichiyu, yinang ka mang mi̱la chi̱nangu.[68]

¹³Mi̱laku ki̱duwang ki̱ku wuka nii a mangbuwengu nang ki̱ku, nii a ni ti̱kuri kitu di̱ne fati̱bi̱ ki̱m.

¹⁴N ti̱n fati̱bi̱ mi̱m, ka ti̱ma chi ma yi chi̱ne.

¹⁵Bwa kake, fal a ne mang yal chi̱nu mi ka̱bi, di̱ne ka̱be a yimbu chi Tewuduwe ko ki̱maditu. A la chi, n yal chi̱n mi fati̱bu. Kanang ti̱ti̱le ti̱tu mang miyawe a di̱Tewuduwe, n fwa chimi̱ni kwang.

¹⁶Ta sutiyebu, aya m mi̱n n sutu chi̱n. N sutu chi̱n mi yati̱ma nangang ki̱yilang ki̱ku a ne kaiyadu kaiyaneng. Ka ti̱maye, n temi ka ni chi̱n kasi no ti̱bi̱u ti̱ti̱le chi ti̱tu ta bi̱du a di̱n mi̱nitu.

¹⁷Yilang mangu n ki̱u, ti̱mi̱la yichiyu.”

¹⁸“Ka ni̱bu ti̱ti̱nitu a ko chi̱ne, ti̱kur ti a mwe a ko mi̱n.

¹⁹Ka no n ti̱n ni̱bu ti̱ti̱nime, ni̱bu ti̱ti̱nimu a no mi̱la chi̱nu ko m bi̱u chi. Aya di̱ne n ti̱n n ke bi̱bu a ti̱ti̱nime, n ti̱n bi̱suturi̱m mi̱m, a yo ti̱ti̱nitu a ko chi̱n.

²⁰Ti̱tabu chitu mang fwa chimi̱nita? Ka̱be a labu Tewuduwe ko. Ka n chi a fuma mi̱ne, ka fumati̱ chi̱nu. Ka a ke ya̱m mi̱me ka keti̱ bi̱chimu. [69]

²¹Aya ta nwe wu riye di̱ne di̱n mi̱ne, n chi ka madi ying, di̱ne n chi a yimbu wa tum mi̱ne.

²²Ka no ma bebu ma fwa chi mi̱nbe, a no, ne ki̱le we di̱chiye. Aya ki̱ka̱ngu, n chi a ne la̱ta̱yi we a ki̱leti chiyu.

²³Wu a ko mi̱ne, a koti̱ Temi ti̱n.

²⁴N nangi̱ntu nabwen ti̱tu wuka ni a mangbuwetu, ka no mang mabe, a no kau chi mi̱n ki̱leti. Ki̱ka̱ngu n chi a ku chitu mang matu, a mwintuwe n chi a koi a koti̱ Temi.

²⁵Ki̱chitu wu a fwe ko ke a ri yili̱ntu a mwal a tatti̱ki̱dai Musatu ko, ‘A koi tuwe ying a ne ti̱kan chi we.’ ” [70]

²⁶“Ka Fi̱ki̱m Kwama ma benge, wu mang tumedu we bwa a di̱Tenge, Fi̱ki̱m bi̱yili̱mu bi̱bu ki̱chiredu a di̱Temiyemu, ka ma di̱mwaru we di̱mi̱ne.

²⁷N chi̱n ti̱n ta mwayu we ni̱bu, di̱ne n ti̱n, we ware ti mi̱n feredi.”