Read tula Yowana 16 Bible Online

Yowana 16 - tula bible

Yowana 16

¹N Yesu a yiko, “N fwa chimi̱n ki̱chitu di̱ne ke ti ki̱ladu kuteng we ki̱ni keku bi̱yili̱mang changu.

²Ni̱bu ka naba chi̱nu we kambi muraku ni̱bu Yafudamu. Ki̱swi ki̱bedu, wu nii ki̱chi̱u chi̱ne, ka kudu ko ki̱ sii Kwamange.

³N chi ka madi yiko, di̱ne n chi a tibu yim Kwama ti Mi̱n.

⁴Mi̱n fwa chimi̱n ya̱mi yiyu, di̱ne ka ki̱swi a benge ta yindu ti̱kono n fwa chimi̱n.”

⁵“Aya ki̱ka̱ngu mi̱n yika bwa wu a tum mi̱ne, n ti̱n fal, a ne nii ki̱bi̱du ko, mu yadi bwa̱le we?

⁶Di̱ne mang fwa chimi̱n ya̱m bi̱be, ni̱tu chi̱ntu a kaiyan.

⁷Aya ki̱ka̱ngu ma fwa chimi̱nu, a la chi ki̱ku mang yikadangu. Ka mang yika̱be, Fi̱ki̱m Kwamamu a ne bedu, we di̱chine. Aya ka n yikane, ma tum chimi̱nedu.

⁸Ka Fi̱ki̱m bi̱ba benge, ni̱bu ka swaan yile we chi ni yalu ko ki̱letiye ti chi a leitu we kabaku Kwamangu.”

⁹Ki̱le chi nang di̱ne a kebu bi̱yili̱mu we di̱mi̱ne.

¹⁰Yile Yesuwe ka chakakku ti chi di̱ne mi̱n ya bwa a di̱Te, n ti̱n neta chakakku tani̱n kuyi ti̱nu ki̱da kwadu.

¹¹We mwata ki̱ku, di̱ne Kwama a tu a mwata tikake wa tau ti̱ti̱niye mi̱ne.

¹²“Mi̱ni ki̱ni ya̱mu nabwen, a ya ka la chimi̱nu la ki̱ka̱ngu.

¹³Aya yo Fi̱ki̱m bi̱yili̱mu ka bede, be ka maka chi̱nu we swangki̱ bi̱yili̱mangu, beka fwa chi a nwe, n ke bi̱ki̱m ti chi beka fwedu kake.

¹⁴N ki̱n ka ni mi̱n dwiyentu di̱ne, chi ma fwa ki̱mi̱nitu, nang ti̱tu yaka fwa chimi̱nditu.

¹⁵Chi n temi ki̱ne, kwang n ti̱ mi̱n nang chi a yo ma yi mi Fi̱ki̱mu ka yiu ya̱mu, ka fwa chi mi̱nde.”

¹⁶“A ne ti ke, a neta kuyu, a ne ti ke ti̱n ta kuyu.”

¹⁷Bi̱kamu we miyari̱m ki̱mu ko, “Ki̱bi̱bu ya̱m wurenim bi̱bu ni fwadi yemu ko, A ne ti ke ne ta kuyu, yinu a ne tike ta kuyi di̱ne miya bwa a di̱Temiyemu.”

¹⁸N chi a chakakku ko, “Ya̱m wulemu ki̱yidu ko, ‘A kutengu baki̱swi bayimangu,’ ko chi a swaanbu bi̱bu ya̱m.”

¹⁹N Yesu a yim miyari̱m ki̱mu ki̱baddu ka bi̱u ki̱n ya̱m bi̱bu. N ki̱n a yi chi ko, “Ti̱bi̱be yichiyu we ti̱kwa̱li yitu ma fwa mi, A ne tike neta kuyu, a ne tike ta kuyita.”

²⁰N Yesu a chakakku ko, bi̱yili̱m mi̱n fwa chimi̱nu, ta ki̱wii ki̱ni twa̱ba̱bune, a ya ti̱ti̱nitu kani̱n mi̱la ka ti̱chi. N ti̱n ni̱tu chi̱ntu kanodi ki̱li, aya kaiyan ni̱re chi̱n, ka ki̱ladu, ka kau ti̱mi̱lan.

²¹Yo naye a lam ka bi̱dde, ki̱nwe riye yinang, di̱ne bwe a suten. Aya yo bwe a chire, naye ki̱ma furi mween, ki̱ tabti̱ riye wa nwe, di̱ne n ki̱n a bi̱u bwe we ti̱ti̱nitu.

²²N ti̱n ki̱ka̱ngu ta nwe riye, aya be ma ku chi̱nu, nang yoko ta ma furi mwen chi̱ne. We ki̱dang kangu a ne wu ka yiti̱ chi̱n furi mwene we.

²³We diko, a ne ta bi̱i ti̱kan chi we. Bi̱yili̱m mi̱n fwa chimi̱nu, n temi ka ni chi̱n chitu ti̱baditi kwang a di̱n mi̱n.

²⁴A lanta ki̱ka̱ng, ta tibu bi̱u chi a di̱n mi̱ne. Ti̱bi̱u, ta yadu, ke furi mwen chi̱nu a lwe.

²⁵“M balta chi̱n baltane we ya̱mu ma fwamu. Aya ki̱swi ki̱bedu wu ma fwa chimi̱n ya̱m Temi kwa̱rikwa̱riye, a ne mang balta ti̱chinu we ki̱da.

²⁶We diko ta twa̱ba̱ bunitu a di̱n mi̱n. Ta bi̱u Temi n ti̱fwan, nemang bi̱u chimi̱nu.

²⁷Ki̱kumang n temi ki̱mi̱la chi̱nu, di̱ne ta mi̱laye, ta keti̱ bi̱yili̱mu tiko m be a di̱Temiye.”

²⁸N Yesu a chakakku ko, “N chire a bwa di̱Temiye, yinu n be ti̱ti̱nitu, ki̱ka̱ngu mi̱n du ti̱ti̱nitu mi̱n yika bwa a di̱Temiye.”

²⁹Miyari̱mu ko, “Angso, ko ki̱ka̱ngu mu fwa ya̱mi kwa̱rikwa̱ri, mwang baltabi̱ chi.

³⁰Ki̱kangu ni̱n swaan ko, n yim chiti kwang. Kasi no ni a ya̱nbu ya̱m. Nang chi a yo fal nang ke bi̱yili̱mu ko n mun chire a di̱Kwama.”

³¹N Yesu a ki̱nta chi ko, “Ti̱ke bi̱yili̱mu ki̱ka̱nga?”

³²Yinu a yi ko, “Ki̱swi a lame, a tu ma a lam wu ta yaradu, ta wulu, ta dwiyu we fi n kawure ka yika loko. Kasi ki̱ku mang newe m mi̱kunangu, di̱ne n Temi we wa̱re ti mi̱n.”

³³“Mi̱n fwa chimi̱n ki̱chitu wu, di̱ne ke ti̱ya li̱mangu a di̱mi̱ne, we ti̱ti̱nitu ta le riye aya ti̱mu ni̱ri kwing, di̱ne m mi̱n n la ti̱ti̱nitu.”