Read tula Yowana 17 Bible Online

Yowana 17 - tula bible

Yowana 17

¹A kuteng ki̱ku n Yesu a fwa ya̱m bi̱bangu a kukku ka̱be ko a di, a twa̱ba̱ buni a yi ko, “Tete ki̱swi a lam riye a be. Ni bwemo dwiyentu, ke a ni mun ti̱n.”

²N ni ki̱n dukanu we a ni̱bi kwang, di̱ne ke n ki̱n a ni bi̱bu a ke ki̱ni̱mu ti̱kuri ki̱diya kwaditu.

³Ti̱tu nang ti̱kuri ki̱diya kwaditu. Ke n chi a swani̱n, ko m mun nang Kwama wuyile ti Yesu Masiya naba yuke wu m mun mwang tume.

⁴N ni mun dwiyentu we ti̱ti̱nitu, di̱ne mang ma nangi̱ntu mwang nii mwiko m maatu.

⁵“Ki̱ka̱ngu Tete, ni mi̱n dwiyen ti̱tu no mi̱ni ki̱n we kakku mwangu fereditu, yo ti̱ti̱nitu a no swebitu.”

⁶N Yesu a chakakku ki̱twa̱ba̱ bunitu ko, “Bi̱bu mwang ni we a ti̱ti̱niti̱mu n yung chi mun. N chi m bi̱u mun, n ni mun chi. N chi a bunti̱ ya̱m mumu.”

⁷N chi a yim fal ko chitu mwang niitu. Kwang a be a di̱mune.

⁸N ni chi ti̱kwa̱li yitu mwang niitu. N chi a ke, a yim ko, m mi̱ni̱n be a bwa di̱mune. N chi a ke bi̱yili̱mu ko, m mun n twiye.

⁹Mi̱n twa̱ba̱du di̱ne chi, n ke di̱ne bi̱bu a ti̱ti̱nimu, aya bi̱bu a ke bi̱yili̱m a di̱ mi̱nemu, di̱ne n chi m bi̱u mun.

¹⁰Ti̱miti kwang n ti̱mun, ti̱mwitu n ti̱mi̱n. Mi̱n ya dwiyentu we ti̱tu.

¹¹A ne mang chakakku ki̱ni fiswe ti̱ti̱nite ki̱ka̱ngu, aya n chi we ti̱ti̱nitu. M mi̱n, mi̱n yika bwa a di̱mune. Tete wu wauwade, to chi bi̱bu mwang niimu ki̱ni dukan munu, di̱nu mwang niinu, ke n chi a kabi wiin yinangu n chi̱ni wiinangu.

¹²Yo mi̱n no we ti̱ti̱nitu ti chiye, n to chi a di̱n mun. N to chi a ne wa laiye we ka n ke wu wiine a laiye. Ke a ri chi ya̱m Kwamam a fwaatu.[71]

¹³“Ki̱ka̱ngu mi̱n ya bwa a di̱mune, aya mi̱n bi̱u ki̱chitu wu ki̱ka̱ngu m mi̱n we ti̱ti̱niyangu, ke ni̱bu ki̱bunti̱ni̱mu a ri ki̱ni furi mwen.”

¹⁴N fwa chimi̱n, ya̱m mumu, aya ti̱ti̱nita ko chi di̱ne n chi n ke bi̱ba ti̱ti̱nim, yinangu m mi̱n n ke wa ti̱ti̱niyangu.

¹⁵Mang twa̱ba̱bu mi n chaki̱ chi we ti̱ti̱nitu, aya mwang to chidu we fakware.

¹⁶N chi n ke bi̱bu a ti̱ti̱nim, yinangu m mi̱n n ke wa ti̱ti̱niyangu.

¹⁷Do chi wauwadu ki̱ni ya̱m mumu, di̱ne ya̱m mumu bi̱yili̱m.

¹⁸N tum chi we ti̱ti̱nitu, yinang kangu mwang twiyengu.

¹⁹N du yimiyi wauwadu ke n chi a ya wauwade. Bi̱yili̱m, n Yesu a twa̱ba̱ ni̱bu bunti̱ki̱mu mi̱ni kwang.

²⁰“Mang mabu twa̱ba̱ki̱ku di̱ne kana miyari̱m mi̱mu aya di̱ne ka wuwule niye wu ka ke bi̱yili̱m we di̱chiye, ti̱nti̱n.”

²¹Tewuduwe, mi̱n wananu, maka chi a swe a fi wiine. Yinangu mun a di̱mi̱ne m mi̱n ti̱n a di̱munengu. Ke n chi a kabi wiin yinu fal ti̱ti̱nitu ka swaanu ko m mun nang wu mwang twiye.

²²Ni chi dwiyen ti̱tu mwang niitu, ke n chi a kabi wiin yinangu n chi̱ni wiinangu.

²³M mi̱n a di̱ chiye, m mun a di̱mi̱ne. Ke a dal chi a kabi wiin. Ti̱ti̱nitu fal ka yingdu ko m mun n twiye yinu m mi̱lati̱ chi yinangu mwang mi̱la mi̱nangu.

²⁴“Tewuduwe, niye bi̱bu mwang ni mi̱n ke a nang swedu ti mi̱n kasi no fi̱remu. N chi ka ku dwiyen mitu. Dwiyen ti̱tu mwang nii di̱ne mi̱laku mwang feredi we mweku ti̱ti̱niyang.”

²⁵“Tete wu wauwade, kasi ki̱ku ti̱ti̱nitu a yimbu munangu, n yim mun, n chi a yim ko m mun n twiye.

²⁶N yung chi mi̱n ka m mun n wure, mang chakakku mani̱ng fwa chi mi̱nu ka m mun n wure, ke n chi a ya mi̱laku mwangu a di̱mi̱nengu, yinu m mi̱n mi̱fwan mang swedu ti chi.”