Read tula Yowana 19 Bible Online

Yowana 19 - tula bible

Yowana 19

¹Yinu m Bi̱latu a ni ni̱bu kuni̱mu Yesu ko a twalan.

²Ni̱bu kuni̱m mu a mu di̱ki̱ri̱n di̱du a kwa̱da a di̱ku we dur Yesunu, a yau ki̱mi̱nti̱ luke wu wurwure.

³N chi ki̱yadu yaki̱sungdu ki̱dati kwang ki̱fita ki̱nu, ki̱siidu ko, Mai Sa̱i, Mai ni̱bu Yafudam ni̱n siinu, ki̱ngati̱ni wa̱b, we kabu ki̱ni fa̱li chiyu.

⁴M Bi̱latu a chirti̱ fi̱langu ki̱da, a yi bi̱duum ni̱bu Yafudamu ko, nang wu mi̱n be chimi̱nedi ki̱n, ke ti̱yim tiko ma kubu ki̱leko.

⁵Yo n Yesu a chire ki̱ni kuli̱n n ti kwa̱da ki̱seli di̱du ni̱bu a yau ki̱mini̱ne. M Bi̱latu a yi chi ko, “Nii nang wu.”

⁶Yinangu tikaketi fanseti n ti bi̱kamu bi̱duumu a kuwangu, a bwe kemiyu ko, “Ti̱kukan, ti̱kukan.” M Bi̱latu a yi chi ko, “Ti̱da̱u ki̱n, ti̱kukan. M mi̱n mang yabu ki̱le we di̱ki̱ne.”

⁷Ni̱bu Yafudam a ke ki̱mi̱n ko, “Ni̱nni ki̱ni yilang. We yili̱n Musatu a dakan ka bwadu. Di̱ne a yi ko, n ki̱n Bwe Kwama.”

⁸M Bi̱latu a ki̱la ka̱ta̱n nabwen yinang ka a nwe ya̱m bi̱bangu.

⁹A ki̱latuwe loko, a ya bi̱u Yesu ko, “M mun naba fi̱re? Aya n Yesu a nibu di̱ki̱li̱n yiin.

¹⁰Yinu n Bi̱latu a yi ko, mu nweyi tuna? Mwang yimbu mwi m mi̱ni ki̱ni dukanu ma yo kukaki̱ mwangu, yinu m mi̱n ti̱n, ki̱ni dukanu ma mari̱na?”

¹¹N Yesu a ke ki̱mi̱n ko, “M mun n newe ki̱ni di̱kan dukan we dur mi̱nu ka n ke di̱du n Kwama a ni ni̱ne. Aya wa tungiye a kang mwange, a la chi ki̱ni ki̱letiyu.”

¹²M Bi̱latu fal a no ke ka kwi ki̱nu. Aya bi̱duum ni̱bu Yafudamu a yi ki̱n ko, “Ka m mar nii we, mun n ke fate Kaisare. Nii wu a yung dur ki̱nu ko n ki̱n maiye, kati̱re Mai wuduwe Roma.”

¹³Yo n ki̱n a nwe ya̱m bi̱be, a chaku chi mi̱ne Yesu. Yinu m Bi̱latu a swe we kwer kabaki̱nu, di̱da bu kalinu. N chi ki̱yalu ko, “Kabata” ki̱ni yi Yafudame.

¹⁴Ki̱swi a lam fi a tibe diko, we di doku bwiyan Yiye yabake ni̱bu Yafudame. M Bi̱latu a yi ni̱bu ko, “Mai chi̱n nang wu.”

¹⁵N chi a bwe kemiyu ko, “Ti̱kukan, ti̱chiu.” M Bi̱latu a yi chi ko, “Mang chi̱u Mai chi̱na?” Tikake fansetiye a ke ko, “Ni̱n newe ki̱ni wuka Mai ka n ke Mai wuduwe Roma n Kaisare.”

¹⁶M Bi̱latu fal kangu chita bwa ki̱nangu, a ni ni̱bu kuni̱mu Yesu ko a ya kukan. N chi a tau Yesu a yikani ki̱n.

¹⁷Yinu Yesu a da̱u ki̱tiyang bwangu ki̱tosada ki̱n fal, a yikan bwanu n chi ki̱yalu ko kasire, ni̱bu Yafudam ki̱yalu ko Kolkota.

¹⁸N chi a kuka ki̱n we bwako n ti bi̱kam ni̱bi burau we ba̱li̱n kitu. A di̱ku Yesu a tibe chi.

¹⁹M Bi̱latu a mwal mwarangu, a ku we di a ki̱tiyang bwang Yesungu. N ki̱n a mwa ni̱bu we chi n ki̱n a mwale ko, “YESU NABA NASA̱RETE, Mai NI̱BU YAFUDAME.”

²⁰Ni̱bu Yafudam nabwen a ke di̱mwar di̱du. Di̱ne fi n chi a kukan Yesuwe a kwatuwe bi̱nu, a mwali yii ni̱bu Yibraniyamu n ti yii ni̱bu Yelenamu n ti yii ni̱bu Romame.

²¹Yinu tikaketi fanseti Yafudamu a yi Bi̱latu ko, a mwaluwe ko, Mai ni̱bu Yafudam. Ko n ki̱n ka mwalu ko, wa yiko n ki̱n Mai ni̱bu Yafudam.

²²M Bi̱latu a yi ko, “Chi mang mwalitu m mwal.”

²³Yinu ni̱bu kuni̱nmu, kanga ri kukaki̱ Yesungu, a da̱u kuli̱n ki̱nu a keran ti̱nti yana. Ka wuwule naba kune ki̱ni ki̱ti̱me. N chi a da̱uti̱ luke wu swa̱me wa kubu kuwe, wuki̱mari burume.

²⁴N chi yi ko, “Wu luke a neni keradu, aya a ma sutuku we, ke nii ka chade ka yiti̱nu.” A fwa ying ke ya̱m Kwamam bi̱bu ni̱bu a mwal ko, “A kera kuli̱n mi̱nu a bwiti chi, a ma sutuku we a luke miye a ri.” Ni̱bu kuni̱nmu a ma yiko.[75]

²⁵Bi̱bu a tituwe ki̱tiyang bwamu, n ne ki̱n n ti wuwiye ke ne ki̱ne n ti Maryamu naye Kilobase. Yinu n ti Maryamu wu a Maka̱dala.

²⁶Yo n Yesu a ku ne ki̱n ti miyare ko wu n ki̱n a mi̱lane, a tituwe a ki̱tiyang bwange a yi ne ki̱n ko, “Nene, bwemo n nang wuko.”

²⁷Yinu a ki̱la yi miyare ko, “Ne mun nang wuko.” Miyare a multuwe fiko a yikan lo ki̱ni naye wu.

²⁸A kute ki̱ku, n Yesu a yim ki̱ri nangangu, a yi ko, “Mi̱n nwe dimwen. Ke ya̱m Kwama ma fwamu a ri.” [76]

²⁹Di̱kan di̱kuur a no we fiko ki̱ni mwe yinabi wu bwangbwange, n chi a da̱u soso yisobi a be di̱ku we mwe wu bwangbwange, yinu a da̱u ki̱kwale yisobang a kuku soso ki̱n a di̱ku ki̱mi̱n we yi.

³⁰Yo n Yesu a twaiye, a yi ko a ri. A mar duri kwa̱lba̱ng, a bwa.

³¹Ni̱bu Yafudam a kebu kwa̱me ka lam Difi̱kare, di̱ne a le chi mi̱n ti̱n a diti Yei. Difi̱kare di wuduwe wa Yiye yabake. N chi a ya wana Bi̱latu ko, “A ni ni̱bu da a kiya naniyu we ni̱bu a ki̱tiyang bwamu, a si̱kte kwa̱miyu. Ko a dakabu kwa̱miyu kanodu a ki̱tiyang bwang we di wuduwe.”

³²Ni̱bu kuni̱mu a be a kiya naniyu we bi̱bu n chi a kukan ti Yesumu.

³³N chi a be, a ya Yesu a tu, a bwa. N chi a dutu nani kiyu ki̱ni ying, a ki̱yabu.

³⁴Aya wuka naba kune a turi ki̱ni yangu we bale kwiye kutubu. Bi̱nabi̱na, ki̱tuum ti mwe a chire we bwiyu.

³⁵Nii wu a kuwe a fwa bi̱yili̱m, di̱mwaru di̱yili̱n. A yim ko ki̱fwa bi̱yili̱m. A ma di̱mwar di̱du ko ke ni ke bi̱yili̱mu.

³⁶Ki̱chitu wa fwe ke ya̱m Kwamam a ri bi̱bu a fwa ko, a ne ki̱tiyangu ni̱bu ka ki̱da bwi kiyangiyu we. [77]

³⁷A wuka fi ya̱m Kwamam a fwa ko, n chi ka da̱ng nii wu n chi a kure. [78]

³⁸A kute ki̱ku, n yusufu naba Arimatiya, miyare wa babu ka yung dur ki̱ni kwa̱rikwa̱riye di̱ne ki̱nwe tayi ni̱bu Yafudamu, a bi̱u Bi̱latu kwa̱me Yesuwe ko yaka da̱du. M Bi̱latu a ke ki̱mi̱n. N ki̱n a be da̱u kwa̱me Yesuwe a yikani ki̱n.

³⁹N Nikodimu wa be mi̱ne we bwana di̱Yesuwe ki̱ni kume, a bungan ti Yusufu Arimatiya. N ki̱n a tatu kuli̱n furemi̱na fa̱la̱ng. N ki̱n a ya ki̱ni kuli̱n furemi̱n di̱di fi̱rfi̱ri̱n yinang mur ti los wu ni swe tureng kangu ka mwata swe bume. [79]

⁴⁰N chi a dal Yesu ki̱ni yadi wu yile, a ma nangangu ki̱ni kuli̱n furemi̱ni fi̱rfi̱ri̱nu, ki̱ku n Nikodimu a ta̱nengu. N chi a bunti̱ yili̱n furki̱ niyangi ti̱ta ni̱bu Yafudamitu.

⁴¹Fi n chi a kukan Yesuwe a kwati̱na lambu. Fur di̱fwin we lambu, di̱du a furi̱nbu wuka ni wen.

⁴²Yade ni̱bu Yafudamu ki̱do bwi yiya Yiye yabake, n chi a yo Yesu we fur di̱du, di̱ne a mabu kutan.