Read tula Yowana 2 Bible Online

Yowana 2 - tula bible

Yowana 2

¹We wu tare di, ti̱kali ki̱nai we Kana wa yaa Ka̱lili. Aya n ne Yesu we we fiko.

²Ni̱bu a yal Yesu n ti miyari̱m ki̱mu ti̱n we ki̱na wu.

³Yo mwe yinabi a riye, n ne Yesuwe a yi Yesu ko, “Mwe yinabi a ri.”

⁴N Yesu a yi ki̱n ko, “Nene, mun yaliyu ko wule? Ki̱swi mi a lambu.”

⁵N ne ki̱n a yi ni̱bu nanganmu ko, “Ti̱ma chi ka yi chi̱ne.”

⁶Ni̱bu Yafudam ki̱ni da wa nurake, ti̱kan sebi we, ti̱ta swa̱ba kwantii, ki̱yiu subiti turukun.

⁷N Yesu yi chi ko, “Ti̱ri sebi mwetu ki̱ni mwe.” N chi a ri sebiti bel ki̱ni mwe.

⁸N ki̱n a yi chi ko, “Ti̱dwe, ti̱ni fate wutabare ti̱kali ki̱naiye[4].”

⁹Kangu fate wutabare ti̱kali ki̱naitu a twai mwegu, aya mwe a kau mwe yili̱me. N ki̱n a yimbu ki̱dangu ki̱chitu wa fwengu. Aya ni̱bu nanganmu a dwe mwemu a yim. Fate wutabare ti̱kali ki̱naiye a yale bwele ki̱yiu naye,

¹⁰A yi ki̱n ko, “Ka wuwule niye ki̱mwedu, a mwe yili̱me wa li̱n li̱me didin, ka ni̱ba noo, a lwenge, yinu ka bedu ki̱ni bi̱bu a li̱mbi̱mu. Aya m mun, n lai mwe yili̱me wa li̱nli̱me, n be ki̱ni kuteng.”

¹¹N Yesu a mwe chi ka̱ta̱ki ti̱tu[5] a Kana, wa yaa Ka̱lili, a yung dukan ki̱nu, a yo miyari̱m ki̱mu, a ke bi̱yili̱mu we di̱Ki̱ne.

¹²A kuteng ki̱ku, n ki̱n a subbi bwa Kafanawu me. A ya n ti ne ki̱n n ti kebu ki̱mu n ti miyari̱m ki̱mu. N chi a swe a dabi̱ ditiyu nabwen we bwako. [6]

¹³Ki̱dangu Yiye yabake wa ni̱bu Yafuda a mwatanangu, n Yesu a yika Wurchalima.[7]

¹⁴We Kan Kwamanu, n ki̱n a ya ni̱bu ki̱feku tanti̱kai n ti kwanti n ti ki̱kubti n ti bi̱bu ki̱sute ka̱mbi̱ri̱mu, a yii nangange chi.

¹⁵Yinu n ki̱n a kwa̱r ki̱swi, a kaka ni̱bi kwang we Kan Kwamanu. N ki̱n a yai kwantiyu n ti tanti̱kayu. A ya ka̱mbi̱r ni̱bu suteki̱nu, a kurana bwa, a tungati̱ teburitu.

¹⁶A yi chi bi̱bu ki̱feku ki̱kubti̱mu ko, “Ti̱wora kuli̱ni ti̱tu, long Temiye a kadu kwa̱ma̱r we.”

¹⁷Miyari̱m ki̱ma kur chi ni̱bu a mwal we tatti̱ki̱dai yika̱riyu ko, “Mi̱laku Kan Kwamana a chau ni̱r ki̱nu.”[8]

¹⁸Ni̱bu Yafudam a bi̱u Yesu ko, “N yung ni̱n dukan di̱du mun rikandi̱nu, ni̱n baddu nang ku chi ka̱ta̱ki.”

¹⁹N Yesu a ke chi mi̱n ko, “Ti̱wur Kan Kwamana Wurchalimanu, mang muddu a ditiyi yitta.”[9]

²⁰Ni̱bu Yafudam fal a yi ko, “Kan Kwamanu ni̱ba mu swa̱ti̱tu wan taana chiri turukununu, nang wu mwiko ni̱n wur mwang muddu, a ditiyi yitta?”

²¹Aya n Yesu a fwabu Kan Kwaman di̱du n chi ki̱kuradi̱nu, ki̱fwa bwiki.

²²A kute ki̱ku n Kwama a kukku Yesu we furangu, miyari̱m Yesumu a kur ya̱m bi̱bu n Yesu a fwamu. N chi a ke bi̱yili̱mu we ya̱m Kwamamu, ni̱ba mwali̱mu n ti bi̱bu ni̱ba fwamu.

²³Ki̱dangu Yiye yabake a lamengu, aya n Yesu a yika Wurchalima. Ni̱bu nabwen a ke bi̱yili̱mu we di̱ki̱ne, di̱ne chi ka̱ta̱kitu n ki̱n a yaki̱ maditu.

²⁴Aya n Yesu a kebu ki̱ni chi, di̱ne n ki̱n, a yim chi a ni̱tu ni̱biye.

²⁵Wuka nii, a ne fwa ki̱mi̱n ni̱r ni̱nu, di̱ne n ki̱n a yim ni̱tu niibitu.