Read tula Yowana 21 Bible Online

Yowana 21 - tula bible

Yowana 21

¹A kuteng ki̱chiti̱ wu, n Yesu a yungti̱ dur ki̱nu we miyari̱mu ki̱da a nabwe far Tiberiya. A yung dur ki̱ni ying:

²Ni̱ba fikomu n simun Biti̱r n ti Toma wu n chi ki̱yalu ko, “Ngabi burabe” N ti Nataniyel wa Kana a ya Ka̱lili n ti Bwesi̱m Sa̱badi n ti bi̱kam miyari̱m n chii burau.

³We fiko n Simun Biti̱r a yiko, “Ki̱yika taki̱u chi̱ngiyang, bi̱kamu ko chi ya ti̱nu. N chi a chir ware a le kwa̱mbi̱re mwe, [81] a yikan. N chi a ri kum, a tabu chi.” [82]

⁴Ti̱mu ki̱kwiyadi ba̱la̱ng ba̱la̱ng, n Yesu a fwe chi mi̱ntuwe a ki̱ti̱ku lang. Aya miyari̱ma swaanbu ko nang Yesu.

⁵N Yesu a yi chi ko, “Kal tayon, ti̱ya chi̱ngiya?” N chi a yi ko, “Ngango.”

⁶Yinu n ki̱n a yi ko, “Ti̱mai dwa̱ka chingiye a bale kang ki̱yilange we kwa̱mbi̱re mwe, ta yadu.” N chi a marti̱n, n chi a wo chingiyu we dwa̱ka nabwen. N chi a yabu da yinangu ka wuwedu ka yodu a kwa̱mbi̱re mwengu. [83]

⁷Miyare wu n Yesu a mi̱lane we fiko a yi Simun ko, “Wu n Tewuduwe.” Kangu Simun Biti̱r a nweeng ya̱m bi̱bangu a da̱u luke ko a yau, a kuna rituwe mwe.

⁸Bi̱kamu miyari̱m a yika ki̱ti̱ku langu kwa̱mbi̱re mwe, ki̱wuba dwa̱ka wu n chi a tau mi̱ne chingiye, ki̱ni chingiyi chibu. Ki̱ti̱ku langu a no mabu kutan, kano naniyu kuul.

⁹N chi ki̱chiredu we mwe a kuti̱ ki̱rangu ki̱ni ti̱kobi we fiko. Chi̱ngi ti ki̱danne we a ki̱rangu.

¹⁰N Yesu a yi chi ko, “Ti̱be ki̱ni yikai chi̱ngi, yiyu ta tau ki̱ka̱ngiyu.”

¹¹Yinu n simun Biti̱r a le Kwa̱mbi̱re mwe, a siye, a be ki̱ti̱ki̱ ki̱ni chingiyu n chi a tayu we mure. Dwa̱ka chingiye a ri ki̱ni ka chi̱ngi yidui. Chingiyu kuul ki̱ni ti̱wan tuunu chiri yitta. Ki̱ni nabwe chingiye wu dwa̱ka a gi̱rabu.

¹²Yinu n Yesu fal a yi chi ko, “Ti̱be ti̱chiku tumu. We miyari̱m ki̱mu a ne wu, a ru ni̱ru, a bi̱u ki̱n ko, n ki̱n n wure we. Di̱ne n chi a yim ko nang Tewuduwe.” N chi a yim ko n Yesu.

¹³Yinu fal n Yesu a ya da̱u ki̱danne a ni chi, a da̱u chingiyu a niti̱ chi.

¹⁴Ki̱ku ki̱dang ki̱tarang yinangu n Yesu ki̱yung dur ki̱nu a kutengu a kun a furangu.

¹⁵A kuteng ki̱ku n chi a si̱kiu tumangu, n Yesu a bi̱u Simun Biti̱r ko, “Simun bwe Yowana m mi̱lai a la ti̱kantu chii kwanga?” N Simun Biti̱r a ke ko, “Ngo, Tewuduwe a mwang yim kangu mang mi̱lanangu.” N Yesu yi ki̱n ko, “To kwanti yiti̱riyu.”

¹⁶N Yesu a bi̱ti̱ ki̱da ko, “Simun bwe Yowana, mun mi̱laya?” A ke ko, “Ngo, Tewuduwe, a mwang yim mi̱n mi̱lanu.” N Yesu a yiti̱ ki̱da ko, “To kwantimiyu.”

¹⁷We ki̱tarangu, n Yesu a bi̱u Biti̱r ko, “Simun bwe Yowana, mun mi̱laya?” M Biti̱r a kaiyan ni̱ru, di̱ne n Yesu a bi̱u ki̱n ki̱da yitta ko, “Mun mi̱laya?” N ki̱n fal a ke ko Tewuduwe, “A mwang yim chiti kwang. N yim mwiko mi̱n mi̱lanu.” N Yesu a yi ki̱n ko, “Nangki̱n, tabi̱du kwantimiyu we, tomi.

¹⁸Mang fwa mi̱n bi̱yili̱mu, yo ni a bwelene, ki̱do kuli̱nu n ki̱fwan, ki̱yati̱ bwa n ki̱n a ku diye. Aya yo ka̱ra̱nta be, mwang kuku fa̱liyu wuka nii ka domi̱n kuli̱nu ka yadi ki̱ni mun a bwa no mwang babbe.”

¹⁹N Yesu a fwa ya̱m bi̱bu ko ke ki̱yung ki̱dum bwamu n Biti̱r ka madu ke a ni Kwama dwiyeni̱mu. A kuteng ya̱m bi̱bangu. N Yesu a yi Biti̱r ko, bumiti̱n.

²⁰M Biti̱r a sabran a da̱ng kutengu, a ku miyare n Yesu a mi̱lane ki̱nabu chidu. Wu nang miyare wa ching bwikiyu a kwiye Yesu we ki̱da̱ng Yiye yabakenge. N nang wu a bi̱u ko, “Wa Tewuduwe, n wure yaka kwa̱li̱nu.” [84]

²¹Kangu m Biti̱r a kuwangu, a bi̱u Yesu ko, “Tewuduwe wu nide?”

²²N Yesu a ke ki̱mi̱n ko, “Ka mang ke nii wu, ka dadu ka lami̱nti̱ di ki̱lake miye, lwangang mwang wenga? Muni̱n bumite.”

²³Ya̱m bi̱bu fal a le ki̱ti̱radu we ni̱bu bunti̱ki̱ Yesumu ko, miyare wa ne bwadu. A yi ko, ka mang ke nii wu ka dadu ka lami̱nti̱ di ki̱lake miye, lwangang mwang wenga?

²⁴Wu nang miyare wu ki̱ni di̱mwar we dur ti̱chitu wune, wa mwal ti̱chitu wu mwale. Ya̱m ki̱mu ni yim bi̱yili̱m.

²⁵Aya ti̱kantu chi ti̱tu n Yesu a maatu nabwen. Ka no ka mwalu ki̱ni kwange, mi̱n kamadu, kono nang ti̱ti̱nitu a no ne ka da̱u tati̱ki̱dayu ni̱bu a no mwa̱liyu.