Read tula Yowana 4 Bible Online

Yowana 4 - tula bible

Yowana 4

¹Ni̱bu Farisamu a nwe ko n Yesu ki̱ya miyari̱mu ki̱ma chi mi̱ntu batisma a lati̱ Yowana.

²Aya wu ki̱ma batisma n ke Yesu, miyari̱m.

³Yo Tewuduwe a nwe ya̱m bi̱be, a chir we Yafudiya a ki̱la Ka̱lili.

⁴A ne wa̱re ka tadde we, a mwintuwe ka tau Samariya.

⁵N ki̱n a be di̱kan bi̱n a Samariya, bi̱n di̱du ni̱bu ki̱yalu ko Saikar, a kwati̱na finu n Yakubu a ni bweko n yusufu ferediye. [15]

⁶Bwir Yakubu we fiko. Kangu n Yesu a tibwi we yayuwangu, a ya swe we ki̱ti̱ku bwirangu ki̱fi̱kadu. Ti̱tu a fwe tibe kuko.

⁷Wuka na Samariya a fwadu ki̱mi̱ntuwe beka dwe mwe. N Yesu a yi ki̱n ko “Niye mwe mang nodu.”

⁸Miyari̱m ki̱mu a tu a le bi̱n yaka ta̱ne chabtu.

⁹Na Samariya a yi Yesu ko, “Wule a fwe wu m mun naba Yafuda mwan bi̱u mwe wu nore a na Samariya?” Di̱ne ni̱bu Samariyamu a yitabu chi ti ni̱bu Yafudamu. [16]

¹⁰N Yesu a yi ki̱n ko, “Ka no n yim ki̱li̱mang Kwamangu n ti nii wa ya̱n ya̱m ko n dwe ki̱mi̱ne mwe ka node, a no mwang bi̱u ki̱nu ka ni̱n mwe ti̱kuriye.”

¹¹Naye a yi Yesu ko, “Tewuduwe muni̱n newe ki̱ni chi dweku mwei, yinu bwiru a ma swa̱n, mwan ya mwe wu ki̱ni ti̱kuriye a fi̱re?

¹²Ka mwang la tenu n Yakubu wa du ni̱mi̱n bwiru a kute ki̱ku n ki̱n n ki̱fwan n ti bwesi̱m ki̱mu n ti chi yo kangi kitu a no wenga?”

¹³N Yesu a ke ki̱mi̱n ko, “Dimwenu a ne du nii wu ki̱no mwe a bwir di̱de.

¹⁴A ya ka nang wuwule niye, wu ka no mwe ma ni ki̱ne, a ne nwetu dimwenu we ki̱da ki̱diya kwadu. Mwe ma ni ki̱ne ka kau nebwi wu kani̱ng fwadu ki̱ni ti̱kuri ki̱diya kwade.”

¹⁵Naye a yi ko, “Tewuduwe, niye mwe wu, ke n nweti̱du dimwenu we ki̱da. Mang fi̱kati̱du we yaki̱ bwirangu, miyadi kwadu mi̱n dwe mwengu.”

¹⁶N Yesu a yi ki̱n ko, “Ya, yale kwartamo, tibe ware.”

¹⁷Naye wa yi Yesu ko, “Mi̱n n newe ki̱ni kwarta.” N Yesu a yi ki̱n ko, “N fwa bi̱yili̱m, mwiko muni̱n newe ki̱ni kwarta.”

¹⁸We bi̱yili̱mu, ki̱nati mwiyu a lami yunu. Di̱ne yuko, kwarta m mun we ware ki̱ka̱nge n ke wumo.

¹⁹Naye wa yi ko, “Tewuduwe, a mun fa̱ku Kwama.”

²⁰Tukebi̱ ni̱mu a sii Kwama a kun di̱du aya n ti̱n ni̱bu Yafudam tiko a dakan ni si Kwama a Wurchalima.

²¹N Yesu a yi ki̱n ko, “Naye, ke bi̱yili̱mu we chi mi̱n fwa mi̱nditu. Ki̱dangu ki̱bedu ki̱ku ni̱bu a ne sii Kwama we kun di̱du ka a Wurchalima.

²²N ti̱n ni̱bu Samariyamu ta yimbu chitu ti̱siditu. Aya ni̱n ni̱bu Yafudamu ni̱n yim chitu ni̱n siidetu. Wa̱re yuke a chire a ni̱bu Yafudam.

²³Aya ki̱swi ki̱bedu, a tu a lam, wu ni̱bu ki̱si Kwama ki̱ni ni̱ri dini̱mu ka sii ki̱nu a Fi̱ki̱m ti bi̱yili̱m, di̱ne Te ki̱bau dum bi̱bu a nang si ki̱nu.

²⁴N Kwama Fi̱ki̱m, bi̱bu ki̱sii ki̱ni̱mu kani̱ng sii ki̱nu a Fi̱ki̱m ti bi̱yili̱m.”

²⁵Naye a yi Yesu ko, “N yim Masiya wu ki̱bede, Ka benge ka yung ni̱n chiti kwang.”

²⁶N Yesu a yi ki̱n ko, “Mi̱n wu mi̱n fwa ya̱m ti mune n nangki̱n.”

²⁷N chi ki̱ri ya̱miye, miyari̱mu a ki̱lawe. N chi a ka̱ta̱n yinang ka ku n Yesu ki̱fwa ya̱m ti nayengu. Aya a ne nii a yi naye ko, “Mun bau wule? A ne wa bi̱u ki̱n ko, a mayire mun fwa ya̱mu ti naye we.”

²⁸Naye a du suuru we fiko a le bi̱nu a yi ni̱bu ko,

²⁹“Ti̱be ti̱da̱ngmi wu nii. A fwami chitu mang mangweti kwang. Ka kano nang Masiya?”

³⁰Ni̱bu a kiyawe ki̱ti̱bu a mau kwala a ya bwa a di̱Yesu we.

³¹We ki̱twalang ki̱ku, miyari̱m ki̱mu a bwal ki̱n ko “Tete ki̱chau chabtu.”

³²Aya n ki̱n a yi chi ko, “Ti̱kan chabtu we ti̱tu ma chaditu, n ti̱n ta yimbu.”

³³Miyari̱m ki̱mu a ki̱la bi̱u Yichiyu ko, “Kano wuka nii a be ki̱mi̱ne ki̱ni chabta?”

³⁴Aya n Yesu a yi ko, “Mang ma chi wu a twiyenge, nang chabtu mitu, mang ri nangang kangu.

³⁵Ka ti̱yidu ko chuwang a du swarti taananga? Aya mi̱n yi chi̱nu mi ti̱da̱ng kuniyu a bi a lam kakku.

³⁶Wu ki̱kadde ki̱ya ki̱li̱mang, ki̱mur kuli̱nu kani̱n chadu ki̱diya kwadu nang ti̱kuritu. Di̱ne wu ki̱fide ti wu ki̱kadde ke a ma furi mwemwen.”

³⁷We finu fal, Ya̱m bi̱bu ko wuka nii ki̱fidu, wuka ki̱kadi̱mu bi̱yili̱m.

³⁸N tum chi̱n ti̱kau chi ta mabu riye we. Bi̱kamu a nwe riye we aya n ti̱n ti̱nwe ta̱ma̱ng riye chiyangu.

³⁹Ni̱bu Samariyamu nabwe we bi̱n di̱du a ke bi̱yili̱mu ko nang Masiya di̱ne chi naye wa fwaatu ko, “A fwami kwang chitu mang mangwetu.”

⁴⁰Kangu ni̱bu Samariyamu a be fi a di̱Yesuwengu, a wana ki̱n ko a swe ti chi, n Yesu fal a swe ti chi ditiyi yurau.

⁴¹Ni̱bu nabwen a ke bi̱yili̱mu we a di̱Yesuwe di̱ne ya̱m ki̱mu.

⁴²Yinu ni̱bu Samariyamu a yi naye ko, “Ki̱ka̱ngu fal ni̱n ke bi̱yili̱mu, n ke di̱ne kana chi mwang fwaatu aya di̱ne ni̱n nwe n ni̱fwan ni̱n ke ti̱n ko a mwintuwe nii wu nang naba yuke wa ti̱ti̱niye.”

⁴³A kuteng ditiyi yurabangu, n Yesu a chir we ti̱m Samariyamu a yika Ka̱lili.

⁴⁴Nangki̱n, n Yesu n ki̱fwan a fwa ko, “Fa̱ku Kwama a newe ki̱ni dwiyen we ti̱m ki̱mu.”[17]

⁴⁵Kanga lam Ka̱liliyangu, ni̱bu Ka̱lilimu a yiu ki̱n kani yurabu, di̱ne n chi a yatuwe Yiye yabake a bale ni̱bu Yafudam a Wurchalima, n chi a kuute chitu n Yesu a mawetu.[18]

⁴⁶Yinu n Yesu a ki̱lati̱ bi̱n di̱da Kana wa ti̱m Ka̱lili we ka nang chikiye, finu n ki̱n a suten mwe a kau mwe yili̱me, wuka Fandu wa lo mati̱me we Kafanawu, bweko a bubuwe.

⁴⁷Yo nii wa nwe ko n Yesu a ki̱lawe Yafudiya, a be Ka̱lili, a yikan a ya wana ki̱n ko, “A Beki̱mi̱n bweko yaka bwadu.”

⁴⁸N Yesu a yi ki̱n ko, “Ka ta kubu di̱mwale ti chi ka̱ta̱kite a ne ta ke bi̱yili̱mu we ko bayim.”

⁴⁹Fandu fal a yi Yesu ko, “Tewuduwe ni yikan, ke ki̱la bwe a bwami.”

⁵⁰N Yesu a yi ki̱n ko, “Yikan bwemo a ne bwadu.” Nii wa ke bi̱yili̱mu we a ya̱m Yesumu a yika ti̱n.

⁵¹Kangu n ki̱n we a wa̱re ki̱yikadangu, ka̱bi kiyu a be teka mi̱n n ti ki̱n, a yi ki̱n ko, bwiyu a be we bwemo.

⁵²N ki̱n a bi̱u chi ko, “Bwiyu a be ki̱swi yire?” N chi a yi ko, “Ki̱dangu bwiyu a bengu, di a fiya wiine wa kuko.”

⁵³Te bwe a yim ti̱n ko nang ki̱swi n Yesu a yiin ki̱n ko, “Yikan bweko ka bede.” Nii wu a kaibu ki̱swi. N ki̱n a ke bi̱yili̱mu we di̱Yesuwe n ti di̱kulon ki̱ni kwang.

⁵⁴Ti̱tu nang ti̱robitu chi ka̱ta̱ki ti̱tu n Yesu a tu a ma a kuteng ki̱ku a du Yafudiya a yikan Ka̱lili.