Read tula Yowana 5 Bible Online

Yowana 5 - tula bible

Yowana 5

¹A kute ki̱ku n Yesu a yika Wurchalima di̱ne Yiye ni̱bu Yafudam.

²Di̱kan far we Wurchalima, ki̱dwan n ti kwa̱r kwanti di̱du n chi ki̱yalu ko Betasdan[19] ki̱ni yi ni̱bu Yafudam, n chi a kana far di̱ki̱nu ki̱ni ti̱kubiti tunu.

³Ni̱bu bi̱bu a bubuwemu ki̱daradu we ti̱kubi ti̱ti kwadu. [We fiko ki̱dubi̱bu ti ki̱kubtiyu n ti bi̱bu a ngi̱rmani̱mu n we.

⁴Wuka Naba di̱tumbi̱re Kwama ki̱bedu beki̱ luku mwe a fare, naba burange ka mwedu, ka le mwe wa lukune ki̱be ti̱du kono a ki̱ki̱le ki̱dum burame.]

⁵We fiko, wuka naba bura we wa ma swa̱ti̱tu wan ti̱ta chiri nari̱bu ki̱ni burang kange.

⁶N Yesu a da̱ng ni wu, a yim ti̱n ko burang ni wangu ki̱ka̱ra̱ng. N Yesu a bi̱u ni wu ko, “Mu baddu mwang beda?”

⁷Naba burange a ke ki̱mi̱n ko, “Tewuduwe mi̱ni ki̱ni wure wu ka makayu ka di̱ki̱yu we faru yo mwe a lukene. Ka n yo mi mang kune, wuka nii ki̱tui ti̱nu.”

⁸Yinu n Yesu a yi ki̱n ko, “Kun, da̱u chi ti̱dari mwitu, yikan.”

⁹Bi̱nabi̱na nii wu a be, a da̱u chi ti̱dari kitu a yikan. Ti̱tu a fwe difi̱kare ni̱bu Yafudam, ka nang chikiye Disabwi.

¹⁰Ni̱bu Yafudam a ku ye, a yi nii wu a benge ko, “Di wu difi̱kare, we yili̱n musatu a dakabu mwang da̱u kwa̱mbi̱re mwemo mwang yikadu.” [20]

¹¹Nii wu a ke chi mi̱n ko, “Nang chi nii wu a beye a fwaatu, a yi ko, ‘N da̱u chi ti̱dari mwitu yikan.’ ”

¹²N chi a bi̱u ko, “N wure ki̱niko wa ya̱n ko n da̱u chi ti̱darimitu, n yikane?”

¹³Nii wa benge a yimbu ka n wure a be ki̱ne, di̱ne ki̱chitu wa fwe a fina ki̱tuu ni̱be. N Yesu a setuwe ni̱bu.

¹⁴A kutengu ki̱ku n Yesu a ya ki̱n a Kan Kwaman, a yi ki̱n ko, “Da̱ng, a mwang be. Dang, du ki̱letiyu, ke ki̱la chi a la ti̱te a fwe.”

¹⁵Kangu n ki̱n a swaan Yesungu, a yikan a ya yi bi̱duum ni̱bu Yafudamu ko n Yesu nang ni a beki̱ne.

¹⁶Di̱ne yiko, ni̱bu Yafuda a mwe ki̱fuma Yesu ko a mayire kani̱n ma ki̱chitu wu difi̱kare.

¹⁷Yinu n Yesu a yi chi ko, “N Temi ki̱ma nangangu a lanta ki̱ka̱ng, m mi̱n ti̱n mi̱n ma ti̱du.”

¹⁸Ya̱m bi̱bu a ni ni̱bu Yafudam dukan di̱du ki̱baddu ka chi̱u Yesunu. N chi a yi ko, “N ke di̱ne a ki yilang difi̱kare, aya a ki̱la yi ti̱n ko Kwama n Teki̱n. N ki̱n a mar yikiyu yinang Kwama.”

¹⁹Yinu n Yesu a ki̱nta chi ko, ki̱kumang mi̱n fwa chimi̱nu, bwe a ne ma chitu n ki̱fwan ka a kubu Teki̱n ki̱made, di̱ne chi Te ki̱maditu ki̱ni kwang nang chi bwe ki̱ma ti̱ne.

²⁰Nangki̱n, Te ki̱mi̱la Bwe, ki̱yungti̱ chi n ki̱ni ki̱fwan ki̱maditu. Ka yungti̱ nangi̱n ti̱tu a la ti̱titu. Ka kau chimi̱n chi ka̱ta̱ki.

²¹Ti̱nti̱n, tiyangu Te ki̱kukku kwa̱miyu ki̱ni ti̱kuriyangu yiko. Bwe ki̱ni wu n ki̱n a ku diye ti̱kuritu.

²²Te a kaba ni̱bu mi̱nbu ya̱m aya a ni Bwe dukan di̱du kani̱n mwata ya̱mi̱nu.

²³Di̱ne ke ni̱ba ni Bwe dwiyentu tiyangu n chi ki̱ni Tengu. Kwang nii wa nibu Bwe dwiyente, a niti̱bu wa tume ki̱ne.

²⁴“Bi̱yili̱m mi̱n fwa chimi̱nu, ka nang wuwule niye wu ki̱nwe ya̱m mi̱me, wu ki̱ke bi̱yili̱m we nii wa twiye, ki̱ni ti̱kuri ki̱diya kwaditu. Mwataku ya̱ma̱ng a ne we di chiye, n chi a yabi̱ bwa, a ya ti̱kuri.

²⁵Bi̱yili̱m mi̱n fwa chimi̱nu, ki̱swi ki̱bedu, a tu a be wu ni̱ba bwamu ka nwe ker Bwe Kwama. Bi̱bu a nwe mu fal ka ya ti̱kuri.

²⁶Nangki̱n, tiyangu Te n ki̱fwan nang dur ti̱kurinu, yiko a yoti̱ Bwe ko dur ti̱kuriin.

²⁷A ni ki̱n dukan di̱du a mwata ki̱nu di̱ne n ki̱n Bwe Nii.”

²⁸“Ti̱ka̱ta̱du ya̱m bi̱bu we, di̱ne ki̱swi ki̱bedu wu ni̱ba futumu ka nwe ker Bwe Kwamane.

²⁹Ka chiredu, bi̱bu a ma chi ti̱yili̱mu ka kunu, ka kadu aya bi̱bu a tumbu bi̱yili̱mu, ka kunu, ka wuran bwi ki̱ni ki̱fwini Kwama. [21]

³⁰Mang mebu mang mabu chi mi̱ni mi̱kun, mi̱mwata ya̱m mi̱mu yinangu Kwama fwamiyangu. Di̱ne yiko, kabaku mangu ki̱yilang di̱ne ma bunti̱bu chitu mi̱n kuri, kana chitu wa twiye ka badditu.”

³¹N Yesu a chakakku a yi ko, “Ka m ma di̱mwaru a dur mi̱ne, di̱du n ke di̱mwar di̱yili̱n.”

³²Aya wukani we ki̱ma di̱mwaru we dur mi̱nu, n yim ki̱ma di̱mwar di̱yili̱n we dur mi̱nu.

³³Ti̱tum ni̱bu we di Yowana wu ki̱ma batisma, n ki̱n ti̱n a fwa chimi̱n bi̱yili̱mu. [22]

³⁴A ya a bwin yiko, mang bunti̱bu di̱mwar niin. N fwa ying ke ti̱ya yuku.

³⁵N Yowana fiti̱la wu ki̱takira, wu ki̱yii chiye, ti̱n fal ti̱ke ti̱n ta ma furi mwen ki̱ni yiiku kangu a baki̱swi bayim.

³⁶Aya m mi̱n ki̱ni di̱mi̱n di̱mwar we dur mi̱nu di̱du a lati̱ di̱du n Yowana a mwa a dur mi̱ni̱nu. Chitu mi̱n maditu, a wu n Temi a ni ko m ma, chitu a kau di̱mwar mi̱nitu a yung Te a twiye.

³⁷Ti̱nti̱n, Te wa twiye n ki̱fwan a kau di̱mwar mi̱n. Ta nweembu ker ki̱nu we, ta kuun ti̱bu we yinangu n ki̱n wemi̱nangu. [23]

³⁸Ya̱m ki̱mu a swebu we ni̱tu chi̱ntu di̱ne ta kebu bi̱yili̱mu we wa tum ki̱ne.

³⁹Ti̱lekan we a tatti̱ki̱dai Kwamayu ni̱ba mwa̱liyu di̱ne we kuraku changu, ta ya ti̱kuri ki̱diyatu a di̱chiye. Yiyu tatti̱kiki̱dai Kwamai fal nai yiyu ki̱ma di̱mwar a dur mi̱niyu.

⁴⁰Aya a mwintuwe tiko tiyangu ta be bwan di̱ mi̱ne ke ti̱ya ti̱kuritu.

⁴¹“Mang yibu dwiyen we ni̱bu.

⁴²Aya n yin chi̱n, ti̱nti̱n n yim ta mi̱labu Kwama we ni̱tu chi̱ntu.

⁴³M be a di̱n Tenu, ta yiibu, aya ka wuka ni a be a di̱n dur ki̱ne ta yiu ki̱nu.

⁴⁴Ta ke bi̱yili̱mi yire kangu ti̱funti̱ bwi ta ya delaki̱ku a bwiti chiyangiyu, aya ta funti̱bu bwi ta ya delaki̱ku ki̱chiredu a bwanu a di̱Kwama ki̱ku n ki̱kunangu?”

⁴⁵“Ti̱kamadu we ti ma Mai keme chi̱n a bwa Te, nii ki̱mai keme chi̱ne nang Musa, wu ti̱kuradu ti ka maka chi̱ne.

⁴⁶Ka no ti̱ke bi̱yili̱mu we di̱Musa, no ta ke bi̱yili̱mu we di̱mi̱ne. Di̱ne m Musa, a mwal ya̱mu a dur mi̱n.

⁴⁷Aya ka ta kebu bi̱yili̱mu we chi n ki̱n a mwale, yire ta ke bi̱yili̱mu we ya̱m mi̱me?”