Read tula Yowana 6 Bible Online

Yowana 6 - tula bible

Yowana 6

¹A kuteng ki̱ku, n Yesu a yabu far di̱dun Ka̱lili, di̱du ni̱bu ki̱yalu ko far Tiberiya.

²Ni̱bu nabwen a bung ki̱mi̱n ti̱n di̱ne n chi a ku chi ka̱ta̱kitu, n ki̱n ki̱madu a ni̱bu ti̱buramitu.

³N Yesu fal a fi̱l kun a swe ware ti miyari̱m ki̱mu.

⁴Ki̱swi Yiye yabake ni̱bu Yafudame a mwatawe.

⁵Kangu n Yesu a kuku nuiyu a ku ni̱bu nabwen ki̱be bwa a di̱ki̱nengu, a yi Filibu ko, “Ni ta̱nne chabti̱tu a fi̱re wu beka lwe ni̱bu bi̱be?”

⁶N Yesu a ma di̱bi̱du di̱du, ko ke ki̱nweeng chitu n Filibu ka fwaditu. Di̱ne Yesu a tu a yim chitu ka madite.

⁷N Filibu a ke ko, “Kano chabtu ti̱tu muraki̱ ki̱duwang kani̱n chadu a sure diti kuliti turabitu a ne lwedu yinangu n kawure, ka yadi bayi̱m bayi̱mangu.”

⁸We miyari̱m ki̱mu wuka wu di̱n ki̱nu n Andi̱riya, ke Simun Biti̱r, a yi Yesu ko,

⁹“Da̱ng be bwele wu ki̱ni ki̱daniyi yunu yiyu a miim seyire, ti chingiyi yurau. Aya ki̱chitu wu ka ma nabwe ni̱be mi̱n wureni?”

¹⁰N Yesu a yi miyari̱m ki̱mu ko, “Ti̱yi ni̱bu tiko a sweswe.” Fiko ki̱ni fili̱nu n ti swa̱ki̱ku nabwen kana kwartabu bi̱bu a swemu a mwatan kuniyi yunu.

¹¹N Yesu a da̱u ki̱danniyu a twa̱ba̱ bunitu we di̱Kwama, yinu a wulan a kera ni̱bu mi̱n, n kawure a yiu yinangu ka lwe ki̱nangu, a mati̱ chingiyi yiko. N kawure a ya yinang kangu n ka ki̱badangu.

¹²Yo n chi a chab a lwenge, a yi miyari̱m ki̱mu ko, “Ti̱mur ti̱buken ti̱tu a kulenitu ke chitu a kaiyaduwe kwang.”

¹³Ti̱buken ti̱tu miyari̱m ki̱m a muritu a ri ti̱ti̱ngriti kub chiri turau. Kanang chikiye, ti̱buken seyire ti̱tu ni̱bu a chau we ki̱danni bali yunu a dubitu.

¹⁴A kuteng ki̱ku ni̱bu, a ku chi ka̱ta̱ki ti̱tu n Yesu a mangitangu, n chi a yi ko, “Ki̱kumang, wu nang fa̱ku Kwama[24] wu ka be ti̱ti̱niye.”

¹⁵Yinangu Yesu a swaan ko ni̱bu bi̱bu ki̱baddu beka tau ki̱ni dukan ka ni ki̱n maiyangu, a kun a ki̱lati̱ kunnuwe, n ki̱kun.

¹⁶Yinangu di a lengu, miyari̱m ki̱mu a suu bwa fare.

¹⁷Ti̱mu a mwe ki̱sedu we ki̱swi wuko, aya n Yesu a tibu be fi a di̱chiye. Miyari̱m ki̱mu a le kwa̱mbi̱re mwe ki̱yabu faru ki̱yika Kafanawu.

¹⁸Ki̱dang kangu, ki̱fi̱be fare a bwilan, ki̱fi̱be wuduwe a mikku faru.

¹⁹N chi a si kwa̱mbi̱re mwe yinang siriyi[25] Yuunu ka yurukune yinu n chi a ki̱la ku Yesu ki̱yadu a mwe, ki̱be bwa kwa̱mbi̱re mwe, miyari̱m ki̱mu a nwe taiyi.

²⁰Aya n Yesu a yi chi ko, “M mi̱n! Ti̱nwedu taiyu we.”

²¹Yinu fal n chi a ke ko a le kwa̱mbi̱re mwe a lam bwanu n chi ki̱yade.

²²Bafi̱nenangeko, ni̱bu a swe a ki̱ti̱ku fari̱mu, a swaan ko kwa̱mbi̱re mwe a be fiko win, n chi a twar miyari̱m Yesumu a lewe kwa̱mbi̱re mwe, n chi, n chikun. N Yesu a lebu.

²³Aya yikai kwa̱mbi̱ri mwei a benga bi̱n di̱du a Tiberiyanu, a be ti ki̱dwang n ti finu ni̱bu a chan ki̱danniye a kuteng ki̱ku, n Tewuduwe a twa̱ba̱bunitangu.

²⁴Tiyangu ni̱bu a ku a ne Yesu we fiko ka miyari̱m ki̱mangu, n chi a le kwa̱mbi̱re mwe a yika Kafanawu ki̱babba Yesu.

²⁵N chi a ya Yesu a ki̱ti̱ku lang, n chi a bi̱u ki̱n ko, “Tete, naba yungke, m be fi fere?”

²⁶N Yesu a ki̱nta chi ko, “Bi̱yili̱m tibaiyedu di̱ne ta chau ki̱danniyu ta riin fure. Aya n ke di̱ne ta ku chi ka̱ta̱kite.”

²⁷Ti̱madu nangang baku chabtu ti̱tu ka kaiyadu kaiyanetuwe. Ti̱ma nangang baku chabtu ti̱tu a ne kaiyadu kaiyadi, ti̱tu ki̱ni ti̱kuri ki̱diya kwadi. Ti̱tu nang chabti̱tu Bwe Nii ka ni chi̱nitu. N Kwama a tu a ma di̱mwar di̱du ka swani̱n Bweko wu n ki̱n a ke ki̱ne.

²⁸Ni̱bu bi̱bu a bi̱u Yesu ko, “Nang ma wule ke a ri ki̱ke Kwama?”

²⁹N Yesu a ke ko, “Chitu n Kwama ki̱baddu ta maditu nang ti̱tu. Kanang chikiye, ti̱ke bi̱yili̱m we wu n ki̱n a tumme.”

³⁰Yinu ni̱bu bi̱bu a bi̱ti̱ Yesu ki̱da ko, “Yoye chi ka̱ta̱ki ti̱tu mwang madu ke ni̱n ku ni̱n ke bi̱yili̱mitu nang ti̱ti̱le? Mwang ma wureni?

³¹Kanang chikiye, Tukebi̱ ni̱mu feredimu, a chau manna[26] we di̱kiru, yinangu ni̱bu a mwalangu ko, ‘A ni chi chabti̱tu a chirenga bwadi ke a chau.’ ” [27]

³²Yinu n Yesu a ke chi mi̱n a yi ko, “Bi̱yili̱m mi̱n fwa chimi̱nu nii wa ni chi̱n chabtu bwadite n ke Musa, aya Temi nang wu ki̱ni ki̱danniyu siiniye yiyu a bwadiyu.

³³Ki̱danni Kwama nang ki̱n wa suwe a dii ki̱ni ni̱bu ti̱ti̱nimu ti̱kuriye.”

³⁴N chi a yi ko, “Tewuduwe, nang ni ni̱n ki̱dum chabti̱m bi̱bi kwadu.”

³⁵N Yesu a ke chi mi̱n a yi ko, “Mi̱n nang chabtu ti̱tu ki̱ni ti̱kuritu. Wa be a bwan di̱mi̱ne a ne nwetu chunu we ki̱ki̱da. Wu a ke bi̱yili̱m a di̱mi̱ne, a ne ka nweeng dimwenu we.

³⁶Aya tiyangu ma fwa chimi̱nangu, ti̱kui aya ta kebu bi̱yili̱mu we di̱ mi̱ne.

³⁷Ni̱bu bi̱bu n Kwama a niiyimu kwang ka be bwa a di mi̱ne, wa be bwa a di̱mi̱ne nemang koonduwe.

³⁸N suwe a bwadi, n ke di̱ne mang ma ki̱ke miye aya mang ma ki̱ke wa twiye.

³⁹Chi wa twiye a ketu, n laiyu bi̱bu a niimu we ko win, aya ke n kuku chi we di swan kute.

⁴⁰Chi n Temi ki̱ badditu nang ti̱tu: Ni ki̱da̱ng Bwe, ki̱keti̱ bi̱yili̱m we di̱ki̱ne ki̱ni ti̱kuri ki̱diya kwaditu mang kukku ki̱nu we a di swan kute.”

⁴¹Yinu ni̱bu Yafudam a le kungakunga ki̱ni Yesu di̱ne a yi ko, “Mi̱n nang ki̱danne wa suwe a bwadiye.”

⁴²Ni̱bu Yafudam a yi ko, “Nii wu n ke Yesu, bwele Yusufu wu n ne ki̱n n ti Teki̱n niyang yima? A mayire ka yidu ko ki̱suwe bwa a diye?”

⁴³N Yesu a ki̱nta chi a yi ko, “Ti̱madu kungakunga we bwiti chiyu.

⁴⁴A ne nii ka be fi a di̱mi̱ne we, ka n ke wu Te a tume a di̱mi̱ne, mang kukku ki̱nu we di swang kute.

⁴⁵A mwal we tatti̱ki̱dai fa̱ku Kwamayu ko, ‘N Kwama ka miya chimi̱nu, n chi ki̱ni kwang,’ aya wa nwe ti wa miyawe Te, ki̱be bwa a di̱mi̱ne.[28]

⁴⁶A ne ni a kuun Te we, kana ki̱n wa be we bwa di̱Kwama. N ki̱n n ki̱kun a kuun Te we.”

⁴⁷Bi̱yili̱m mi̱n fwa chimi̱nu, ka n wure wa ke bi̱yili̱m a di̱ mi̱ne ki̱ni ti̱kuri ki̱diya kwaditu.

⁴⁸“Mi̱n nang ki̱danne wu ki̱ni ti̱kuriye.

⁴⁹Tukebu chi̱remu feredimu a chau manna we di̱kiru, aya a mwintuwe n chi a bwa.

⁵⁰Aya chabtu ti̱tu ki̱suwedu a diitu nang ti̱tu, nii ka chau ki̱danni Yiye, a ne bwadu.

⁵¹M mi̱n nang chabtu ti̱kuri ti̱tu a suwe a bwaditu. Ka wuwule nii wu ka chau chabtu ti̱te, a ne bwadu ki̱diya kwadu. Chabtu ti̱tu nam bwimiye wu mang nidu ke ti̱ti̱nitu a ya ti̱kuri ki̱diya kwadite.”

⁵²Ni̱bu Yafudam a le ki̱tuka ya̱m bi̱bu ki̱ni dukan we bwiti chiyu ko, “A mayire nii wu ka yidu ko ka ni chi̱ni nam bwikiye ni wude?”

⁵³Yinu n Yesu a yi chi ko, “Bi̱yili̱m, mi̱n fwa chimi̱nu, ka ta wubu nam Bwe Nii, ta noti̱bu ki̱tum mi̱me, ti̱newe ki̱ni ti̱kuri we bwi chiyu.

⁵⁴Kwang ka nang wuwule niye wu ki̱wu nam miye ki̱ noti̱ ki̱tum mi̱me ki̱ni ti̱kuri ki̱diya kwaditu, ma kuku ki̱nu fal.

⁵⁵Di̱ne nam bwi miye nang chabti̱tu siinitu, ki̱tum mi̱mu nang chi ti̱noriti siinitu

⁵⁶Nii ki̱wu nam bwi miye, ki̱noti̱ ki̱tum mi̱me, ki̱swedu we bwi miyu m mi̱n wetuwe a yikiyu.

⁵⁷Wu kure Te a twiye, mi̱nkadu di̱ne ki̱ne. Yiko wa wu mi̱n a kau chabtu kiye, ka swedu di̱ne mi̱n.

⁵⁸Wu nang ki̱danne wa suwe a bwadiye. A newe yinang ki̱danne wu tukebi̱ chim a chau, a bwarane. Aya ka nang wuwule niye wa chau ki̱danne we, ka kaddu ki̱diya kwadu.”

⁵⁹N Yesu a fwara ya̱mi yiyu a ki̱swi wu n ki̱n a yaki̱ miyadu a kan muraku di̱du a Kafanawu.

⁶⁰Kangu n chi a nwe ya̱m bi̱bangu, nabwen we miyari̱m ki̱mu a yi ko, “Ya̱m bi̱bu a ma bwar wure ka kedu.”

⁶¹Yinangu n Yesu a ku kungakunga a le tibe miyari̱m ki̱mangu. A yi chi ko, “Chi mang fwa a kai chimi̱n ni̱ra?

⁶²Yinu ta ma wule ka ti̱ku Bwe Nii ki̱fi̱lu ki̱yika bwanu n ki̱n a bemi̱ne?

⁶³Fi̱ki̱mu nang ti̱kuritu. Nam a nibu ti̱kuri. Chi mang fwa chimi̱ne Fi̱ki̱m n ti ti̱kuri.

⁶⁴Aya bi̱kam chimu we bi̱bu a kebu bi̱yili̱li̱mu.” N Yesu a tu a yim bi̱bu a kebu bi̱yili̱mu feredi n ti ki̱n wu ka kwa̱l ki̱ne.

⁶⁵Yesu a ki̱la fwa chimi̱n ko, “Nang chi a yo ma fwa mi, a ne ni ka medu ka be fi a di̱ mi̱ne we, ka n ke wu Te a ke ki̱mi̱ne.”

⁶⁶Di̱ne ya̱m bi̱bu Yesu a fwamu, nabwen we miyari̱mu a du ki̱n a bun ki̱mi̱nti̱bu.

⁶⁷Yinu n Yesu a bi̱u miyari̱m ki̱mi kub chiri burabi̱mu ko, “N ti̱n ti̱badu ta yika ti̱na?”

⁶⁸Simun Biti̱r a ke ki̱mi̱n ko, “Tewuduwe, nang ya bwa a di̱wure? Mun nang nii ki̱ni ya̱m bi̱bu ki̱ni ti̱kuri ki̱diya kwadi̱me. [29]

⁶⁹Ni̱n fal ni̱n ke bi̱yili̱mu, ni̱n yinti̱n ko m mun nang wu wauwade wu Kwama.”

⁷⁰Yinu n Yesu a ke ko, “N sutu chi̱ni kub chiri burau, aya wuka chi̱n n Setan.”

⁷¹Kanang chikiye, ki̱fwa Yafuda, bwele Simun Yiskariyoti, di̱ne nang nii yaka kwa̱l ki̱ne, kasi ki̱ku n ki̱n wetuwe miyari̱mi kub chiri burabi̱mu.