Read tula Yowana 9 Bible Online

Yowana 9 - tula bible

Yowana 9

¹Yo n Yesu a yaki̱sude, a ku nii wu ni̱bu a bi̱u ki̱duwe.

²Miyari̱m ki̱mu a bi̱u ki̱n ko, “Tete, naba yungke, naba ki̱le n wure, yo ni̱bu a bi̱u nii wu ki̱duwe? Kano nang bwenga? Kanang bi̱bu a bi̱u ki̱ni̱ma?”

³N Yesu a yi chi ko, “N ke bwe n keti̱ bi̱bu a bi̱u ki̱ni̱mu. Aya ki̱chitu wa fwe ko ke ni ku dukan Kwaman.

⁴A mwintuwe nang ma nangang wa twiyengu, kangu fi̱la wengu. Kum ki̱bedu. Ka a benge, nii a neka yim ma chi.

⁵Kweru mi̱n we ti̱ti̱ni̱nu, mi̱n nang yiiku ti̱ti̱niyangu.”[47]

⁶Yo n ki̱n a ri ya̱me, a ti̱bu ki̱tuumu a ti̱m, a lu ki̱ti̱mu ki̱ni ki̱tuumu, a wa ni wu mi̱n we nuiyu.

⁷A yi nii wu ko, “Ya, yang nura nuiyu a mwe wa far Si̱lwam ka nang chikiye wutumre.” Nii wu a yikan, a nura nuiyu, a ki̱lawe ki̱kudi.

⁸Ni̱bu a fi̱lang chiyamu, n ti bi̱ba no yim ki̱n ki̱ka̱la̱ chimu, a bi̱u ko, “Wu n ke wu niyang yim ki̱sweda fi, ki̱ka̱la̱ chiya?”

⁹Bi̱kamu ko, “N nangki̱n, bi̱kamu a yi ko, a chirkachirkane.” Aya n ki̱n, n ki̱fwan a yi ko, “Mi̱n nangki̱n.”

¹⁰N chi a yi ki̱n ko, “M ma yire, nuyu a wudene?”

¹¹A yi chi ko, “Nii wu n chi ki̱yalu ko, Yesu we a lu ki̱ti̱m a wami we nuyu. N ki̱n a ya̱i ko n yika Si̱lwam n yang nura nuyu. N ya, n yang nurawe. N ki̱lawe mi̱n kudi.”

¹²N chi a bi̱u ki̱n ko, “Nii wu a fi̱re?” Nii wu a yi ko, “Mang yimbu.”

¹³N chi a yikan, ki̱ni nii wa no ki̱duwe, a ya ni ni̱bu Farisamu.

¹⁴N Yesu a lu ki̱ti̱mu a wude nuiyu we nii wu Difi̱kare ni̱bu Yafudamu.

¹⁵Ni̱bu Farisamu fal, a bi̱u nii wa be a ti̱duye yinangu chitu a fwengu. Nii wa yi ko, “A lu ki̱ti̱m, a wa mi we nuiyu, a yiko n yang nura nuyu. Kangu mang nuranangu, nuyi miyu a wuden, mi̱n kudi.”

¹⁶We fiko bi̱kamu ni̱bu Farisamu a yi ko, “Nii wu n ke naba Kwama, yo a ma nangangu Difi̱kare ni̱bu Yafudame.” Aya bi̱kamu ko, “Nii ki̱ni ki̱letite ka medu ka ma chi ka̱ta̱ki ti̱ta? Ti̱kuran chitu a lakan.”

¹⁷A kuteng ki̱ku, n chi a ki̱latuwe nii wa no ki̱duwe, a bi̱u ki̱n ko, “Mun yal ki̱nu mwi n wure, yo n ki̱n a wudu mi̱n nuiye?” Nii wa yi chi ko, “Mi̱n yalu mi fa̱ku Kwama.”

¹⁸Bi̱duum ni̱bu Yafudamu a kebu bi̱yili̱mu ko ni wa no ki̱du aya ki̱ka̱ngu ki̱kudi. Di̱ne yuko n chi a tum ni̱bu ko a yale ni̱bu bi̱bu a bi̱u ki̱ni̱mu.

¹⁹N chi a bi̱u chi ko, “Wu nang bwe chi̱na? Wu nang bwe ta bi̱u ki̱duwa? A mayire ki̱kudiye?”

²⁰Bi̱ba bi̱bi̱mu a yi ko, “Bwe wuni̱n, ni̱n bi̱u ki̱du.

²¹Aya na yimbu kanga ma ki̱ku diyangu. Na yim ti̱bu ka n wure a be ki̱ne. Ti̱bi̱u ki̱n, n ke bweti̱re, a lwe ka fwa chi n ki̱n a yimitu.”

²²Bi̱ba bi̱u ki̱ni̱mu a fwa yiko di̱ne, n chi ki̱wul tayi ni̱bu Yafudamu. Ni̱bu Yafudamu a tu a ki̱ka yi ko nii ka yidu ko n Yesu nang Masiya, ni̱bu ka chaki̱du we muraku ni̱bu Yafudame.

²³Nang chi a yo bi̱ba bi̱u ki̱ni̱mu, a yi ko, “Ti̱bi̱u ki̱n, a wi bweti̱rengatu.”

²⁴N chi a ki̱lan ki̱robang a yale ni wa no dwiyene, a yi ki̱n ko, “Fwa bi̱yili̱mu, ni Kwama dwiyantu, ka tiinti̱na di̱ni̱ne ni wa bene naba ki̱letiye.”

²⁵N ki̱n a ke chi mi̱n ko, “Ka naba ki̱letiye mang yimbu, chitu mang yimitu a no mi̱n ki̱du, a ya ki̱ka̱ngu mi̱n kudi.”

²⁶N chi a bi̱ti̱ ki̱da ko, “A ma mi̱n wureni? A wudu mi̱n nuiyu yire?”

²⁷A ki̱nta chi ko, “A ma tu ma fwa chimi̱n ta nwebu a mayire? Ti̱badu ta nwe ti̱du ki̱da? Ka ti̱badu ta kau miyari̱m ki̱ma?”

²⁸N chi a yi ko, “A tu ki̱du wu nuiyu a wudene ko, m mun nang miyare ko! N ni̱n, m bi̱u Musa.

²⁹Ni̱n yim n Kwama a fwa ya̱mu n ti Musa, aya nang yimbu bwa wu nii a chirmi̱ne.”

³⁰Nii wu a yi chi ko, “A ti̱ya̱r mi̱n yi. A yi ko, kasi ki̱ku ta yimbu bwanu a chirmi̱nengu, a mwintuwe a wudumi nuiyu.

³¹N ki̱n a chakakku ko, ni̱n yim n Kwama a nwebu twa̱ba̱ku naba ki̱letiyengu, aya ki̱nwe ki̱ka naba bunti̱kengu, wu ki̱ma chi n ki̱n ki̱badde.

³²Feredi niyang nwengbuwe, ko nii wu ni̱bu a bi̱u ki̱duwe, a ya beku.

³³Ka no nii wu, n ke wa chire a di̱Kwama, a no neka medu ka ma ki̱chitu wu.”

³⁴N chi a kaka ki̱n ko, “Ni̱bu a bi̱u mun, a ki̱leti, be mwang fwa ni mi̱nu ko wule?”

³⁵N Yesu a nwe ya̱mu ko, n chi a kaka ni wu. Yo n chi a tekane, a bi̱u ki̱n ko, “N ke bi̱yili̱mu we Bwe Nii ya?[48]”

³⁶Nii wa ke ki̱mi̱n ko, “Tewuduwe, n ki̱na wure? N fwami ke n ke bi̱yili̱mu we di̱ki̱ne.”

³⁷N Yesu a yi ki̱n ko, “A mwang tu mwang kui, m mi̱n nang wu ki̱fwa ya̱mu ti mune.”

³⁸Yinu ni wa yi ko, “Tewuduwe, n ke bi̱yili̱m.” N ki̱n a sung a si Yesu.

³⁹N Yesu a yi ko, “N lewe ti̱ti̱nitu di̱ne ke m be, m mwata ya̱mu. Di̱ne ke bi̱bu ki̱kudimu a dwiyen, aya bi̱bu a kubu diimu a kudi.”

⁴⁰Tiyangu ni̱bu Farisamu we fiko, a nwe ya̱m bi̱bangu, n chi a yiko, “Mu yi ni̱nu mwiko n ni̱n ki̱duba?”

⁴¹N Yesu a yi chi ko, “Ka no ti̱n ki̱dube, a no, ne ki̱leti we. Aya yo ta yi tiko n ti̱n n ke ki̱dube, ki̱leti chiyu a kabi yiko.”