Read tula Nangi̱n Fandubi̱m 1 Bible Online

Nangi̱n Fandubi̱m 1 - tula bible

Nangi̱n Fandubi̱m 1

¹Tiyofilu, we yo mang mwe mang mwal mi̱ne, m mwal mi̱n ki̱ni kwang chitu n Yesu a mwe ki̱madu, ki̱yung ti̱nitu.

²Yinu a lami̱ntu dii a da̱u ki̱n a yikan bwa diye, a kuteng ki̱ku n ki̱n a ngau fandubu mi̱n ki̱kure we wa̱re Fi̱ki̱m Kwamame.

³A kuteng riye kongu, yo a kun we fure, a ma ditiyu wan taana we ti̱ti̱nitu ki̱yung yikiyu we miyari̱mu ko n ki̱n we ki̱ni ti̱kuritu ki̱mwati̱ ya̱m Kwamamu.

⁴Wuka di yo n ki̱n a swe ware ti chiye, a wu chimi̱n ki̱tele ko, “Ti̱dudu Wurchalima we, ka lami̱ntu ki̱swi Tewuduwe ka tume Fi̱ki̱m Kwamamu, yinangu mang fwa chimi̱n ferediyangu.”

⁵N Yowana a ma batisma ki̱ni mwe, aya we ditiyu ki̱bediyu, n Kwama ka ma chimi̱n batisma ki̱ni Fi̱ki̱m Kwamam.

⁶Yo miyari̱mu a muran n ti Yesu we, a bi̱u ki̱n ko, “Tewuduwe, ki̱ka̱ngu be mwang ru ni̱mi̱n mati̱n ni̱ntu, n ni̱n Yisrela?”

⁷N Ki̱n a yi chi ko, “A ne lwangang chang we, ditiyu n ti ki̱switiyu ki̱chitu wu ka fweendiyu.

⁸Aya ta ya dukanu yo Fi̱ki̱m Kwamamu ka bedu we di̱chi̱ne. Di̱ne yiko, ta kau ni̱bu mwari̱m mi̱m we Wurchalima n ti Yafudiya n ti Samariya n ti ti̱ti̱nitu ki̱ni kwang,”

⁹A kuteng ki̱ku a fwa bi̱bangu, a da̱u ki̱n we nui chiyu, yinu di̱twin a da̱uki̱n, n chi a kuti̱bi̱ ki̱n ki̱da.

¹⁰Kangu n chi a kur nuyu ki̱da̱ng twiyengu, bi̱nabi̱na ni̱bi burau a fwe chimi̱ntuwe fiko ki̱ni kuli̱ni mwemwe.

¹¹N chi a bi̱u ko, “Ni̱bu Ka̱lili, a mayire ta ti ti̱da̱ng twiye? N Kwama a da̱u Yesu we di̱chine a yika dii, aya wuka di ka ki̱ladu a wa̱re wiine wu ta ku a yikamine.”

¹²Yinu miyari̱m Yesumu a duwe di̱kun Setunu, a ki̱la Wurchalima wu kutanu kilomita wiin we difi̱kare.

¹³Yo n chi a lame, a ya fi̱l kan di̱du a diin we lo n chi a no ki̱ sweende. Di̱mbi chitu m Biti̱r n ti Yowana n ti Yakubu n ti Andi̱riya n ti Filibu n ti Toma n ti Bartolomi n ti Matta n ti Yakubu bwe Alfiyus n ti Simun wu n chi ki̱yidu ko ki̱bau ti̱m chime n ti Yafuda bwe Yakube.

¹⁴N chi ki̱muradu a fiwiine, ki̱twa̱ba̱ bunitu n ti Maryamu ne Yesuwe n ti bi̱kam nati̱bu nabwen n ti kebu Yesumu.

¹⁵We diti yikiyu, kebu ni̱bu bunti̱kumu a muran kuul ki̱ni wan turab a fiwiine. M Biti̱r a kun a fwa ya̱m ko,

¹⁶“Kebu mi̱m, ya̱m Kwamamu a dakan ka ridu bi̱bu Fi̱ki̱m Kwamam a fwa feredi a yii Fa̱ku Dauda we ya̱m Yafuda wu a ti ni̱bu ki̱rangmu mi̱ne kakke bi̱bu ka tau Yesumu.

¹⁷N Yafuda a no we ti chi̱ni, yinu a mati̱ nangang Kwamangu ware n ti chi̱ni.”

¹⁸[N Yafuda a ta̱n kuu ki̱ni ka̱mbi̱r ni̱r di̱yani̱n ki̱nu, nanti̱ kuu n ki̱n a ya bwa mi̱ne. Yatu kitu a chire fi̱lang di̱ne fur ki̱nu a fwe.

¹⁹Ya̱m bwa komu a ti̱ran we Wurchalima kwang. N chi a yal fiko ki̱ni yii Aramaya ko, Akaldama ka nang chikiye kuu ki̱tume.]

²⁰M Biti̱r a chakakku ko, “A mwal we taki̱da Sabura ko, ‘Ti̱du fiiko a kau kanglo, ta kebu wuka nii a swedu we mure. Wuka nii ka sute ki̱nu.’

²¹“Di̱ne yiko, a dakan ni sutu ni wu ka sute Yafuda. Ni da̱ngdu we bi̱bari̱mu we ware n ti chi̱ni ki̱dangu niyang swe n ti Tewuduwe Yesuwangu.

²²A mwetuwe ki̱dangu n Yowana a ma ki̱mi̱n batisma a lanta dii a da̱u ki̱n we tibe chire, kasi no n wure ni swadde ka kau naba di̱mware we kungku Yesuwangu.”

²³Yinu n chi a chake ni̱bi burau. N Yusufu wu ni̱bu ki̱yalu ko m Barsaba, a wu ki̱yal ti̱nu ko n Yustu n ti Matiya.

²⁴Yinu n chi a twa̱ba̱ bunitu ko, “Tewuduwe, mun n yim ni̱tu ni̱nti kwang. Yung ni̱n we bi̱bi burabi̱mu ni mwang swabe.

²⁵Wu ka chakakku ki̱ni nangang fandu ki̱ku n Yafuda a mar yinu a yika bwanu a daka ki̱ne.”

²⁶Yinu n chi a ma sutuku we bi̱bi burabi̱mu. N chi a sutu Matiya wu a be a rii fandubu kub chiri wiine.