Read tula Nangi̱n Fandubi̱m 10 Bible Online

Nangi̱n Fandubi̱m 10 - tula bible

Nangi̱n Fandubi̱m 10

¹Wuka nii we bi̱n Kaisariya, di̱n ki̱nu n Korneliyu. N ki̱n wuka wuduwe we ni̱bu ki̱rang Romamu, wu a tau kwa̱l ni̱bu ki̱rangmu wu a kwa̱l Yitaliyanu.

²N ki̱n n ti loko ki̱wul tayi Kwamayu, ki̱siti̱ Kwama. N ki̱n ki̱funti̱bwi ki̱maka ti̱lusani ni̱bu Yafudamitu ki̱ twa̱ba̱ti̱ bunitu a di̱Kwama kwadu.

³Wuka di ki̱ni kuko yo di a awa yitta, n Ki̱n a ku naba di̱tumbi̱re Kwama a dwakam bi̱yili̱m wu a be fi a di̱ki̱ne a yal ki̱n ko, “Korneliyu!”

⁴Wuko a kur nuyu ki̱ni tayi ko, “Wureni Tewuduwe?” Naba di̱tumbi̱re a yi ki̱n ko, twa̱ba̱ku mwangu n ti makaki̱ babumbangu a lam kakku Kwamang. “A kau chi kurki̱ we kakku Kwamangu.”

⁵Tum ni̱bu ki̱ka̱ng a Yafa a yale Simun wu ni̱bu ki̱yalu ko Biti̱re.

⁶N ki̱n wu ki̱dadu n ti Simun wu ki̱fu ti̱ba̱li̱ne. Loko a ki̱ti̱ku Wimang.

⁷Yo naba di̱tumbi̱re a yikane, n Korneliyu a yale ka̱bi kiyi burau n ti wuka naba ki̱range wu ki̱nwe tayi Kwamai we bi̱bu ki̱ma ki̱mi̱n nangangi kwadi̱mu.

⁸A fwa chi mi̱n chi a fweeti kwang yinu a tum chi we Yafa.

⁹Bafi̱nenangeko ki̱ni kuko, yo ni̱bu bi̱bu a mwata fiko, we ki̱swi wuko a ya m Biti̱r a fi̱l dii a kan ka twa̱ba̱ buni.

¹⁰Chun a bu ki̱n we fiko ki̱bau chi ka chade, aya yo ni̱bu we ki̱si chabti̱te, n ki̱n a ma dwakam bi̱yili̱m.

¹¹N Ki̱n a ku dii a wuden, ti̱kan chi ki̱suwedu we dii yinang si̱re ki̱ni fwiti̱netiyi yaana.

¹²We mure nai we dangtidangti yiyu ki̱ni nani yaanaiyu n ti yiyu yinang sotiyu n ti yiyu yinang ki̱fariyu n ti yiyu yinang ki̱ni̱biyu.

¹³N ki̱n a ki̱la nwe di̱kan ker ko, Biti̱r kun, bi n wu.

¹⁴M Biti̱r ko, “Tewuduwe, a ne mang medu di̱ne mang chabu chitu n ke wauwaditu, mang wuti̱bu ki̱dum nai a lebiyu.”[6]

¹⁵Yinu keru a fwate ki̱da ko, “Yidu chi Kwama a do wauwaditu we mwi n ke wauwadumu.”

¹⁶Ki̱chitu wu a fwe ki̱da yitta, yinu a da̱u a ki̱lati̱ dii we ki̱n.

¹⁷Ti̱tu a ya̱r Biti̱r yii, yo n ki̱n a le ki̱ kura chi ki̱chitu wu ki̱yungde, ni̱bu n Korneliyu a tumemu a lante di̱ne n chi a tu a bi̱u lon Simune.

¹⁸N chi a ma di̱siiru a bi̱u chitu ka n Simun wu ni̱bu ki̱yalu ko m Biti̱r a siku we lo.

¹⁹Yo m Biti̱r we ki̱ta̱l chitu n ki̱n a ku we dwa̱kwame, Fi̱ki̱m Kwamamu a yi ko, “Ni̱bi bi̱tta[7] ki̱ bannu a kwa̱r.”

²⁰Kun n sub bunti̱ chi we bwati̱be, yan ya chi, kuradu chi we, m mi̱n n tum chiye.

²¹Yinu m Biti̱r a yawe kwa̱ru, a yi ni̱bu bi̱bu ko, “M mi̱n nang ni ti̱badde. Ti̱be wureni?”

²²N chi a yi ki̱n ko, “N Korneliyu a tum ni̱ne, n ki̱n naba kunne wuduwe we kuu Roma, naba yile wu ki̱nwe tayi Kwamaye, wu ki̱ni ki̱siyange we ni̱bu Yafudami kwange. Naba di̱tumbi̱re a yi ki̱n ko a yali̱n a loko ke a nwe chi mwang fwa ki̱mi̱ne.”

²³Yinu m Biti̱r a yiu kebu bi̱bu a ni fidare. Bafi̱nenangeko a bunga ware n ti chi n ti bi̱kam ni̱bu bunti̱ki̱m bi̱bu a Yafamu.

²⁴N chi ya lame Kaisariya bafi̱nenangeko. Yade n Korneliyu a swe ki̱yang chide, a murte kebu ki̱mu n ti fati̱bi̱ ki̱mu.

²⁵Kangu m Biti̱r a leen longu, a teka ti̱n n ti Korneliyu, n Korneliyu a sung a ri̱ka Biti̱r.

²⁶Aya m Biti̱r a yi ki̱n ko, “Kun, m mi̱n ni, m mi̱n n ke Kwama.”

²⁷Yo m Biti̱r yaki̱ fwa ya̱mu n ti ki̱ne, m Biti̱r a kun a le mure a ku ni̱bu nabwen a muran.

²⁸N ki̱n a yi chi ko, n ti̱n n ti̱fwan ti̱yim a dakabu naba Yafudiya ka lwekadu, ka ya siram a wukane kuu ni̱be bi̱bu chi a da̱u a newe wauwade. Aya n Kwama a tu a yungi ko n yalu wuka nii we mi n ke wauwadu ka wubwilange[8] we Dimasku

²⁹Di̱ne yiko, yo mang ya di̱yale, mang kobu. Ki̱ka̱ngu m be mang nwe di̱yalu.

³⁰Yinu n Korneliyu a yi ki̱n ko, we kuten diti yaana a suyu, yo mang le twa̱ba̱ ke, wuka nii a fwetewe kakku mangu, ki̱ni kuli̱n di̱du ki̱yiladu yilanen.

³¹N ki̱n a ya̱i ko, “Korneliyu, n Kwama a yiu twa̱ba̱ku mwangu, a kur yinangu mun maka babumbangu.

³²Di̱ne yiko, tum ni̱bu a yal mi̱ne Biti̱r a Yafa. N ki̱n ki̱dadu a lon Simune wu ki̱fu ti̱ba̱li̱ne. Wu loko a ki̱ti̱ku wimange.

³³Nang chi a yo mang yali̱ne, mwang mabe yinangu mwang bengu. Ni̱n nang bi̱bu nang ngaban we kakku Kwamangu, fwa ni̱mi̱n chi n Tewuduwe ki̱baddu mwang fwa ni̱mi̱nde.”

³⁴Yinu m Biti̱r a mwe ki̱fwa ya̱mu ko, “Ki̱kumang n swaan ki̱ka̱ngu, n Kwama a sutubusute.”

³⁵Aya ki̱yiu ka nang wuwule niye kasi no a wuwule kuu, bi̱bu ki̱nwe tayi kiyi ki̱tumti̱ yilemu.

³⁶A ta yim ya̱mu n Kwama a tum Yisrela mi̱nemu, fwaki̱ya̱m bi̱li̱m Yesu Masiyamu n ki̱n Tewuduwe kwang.

³⁷Ti̱yim ne chitu a fwe we ti̱m Yafudiyamitu. Ya̱mu a mwe a Ka̱lili a kuteng di̱mwar batisma n Yowana a manu.

³⁸Ti̱yim yinangu Kwama a sutu Yesu wu a Nasa̱rete a rii ki̱ni Fi̱ki̱m ki̱mu n ti dukanangu. Di̱ne n Kwama we ware n ti ki̱ne, n ki̱n a le fansetiyu nabwen ki̱maka ni̱bu ki̱beti̱ bi̱bu n Setan a tu a kwabi̱mu.

³⁹N ni̱n, ni̱n ku chi n Yesu a maatu we ni̱bu Yafudamu n ti Wurchalima. N chi a chi̱u ki̱n, a yau ki̱n a tiyang.

⁴⁰Aya n Kwama a kukku ki̱n we diwutare, yinu a du ki̱n ke a yung yikiyu ke ni̱bu a ku ki̱n.

⁴¹Ni̱bu ki̱ni kwang a kuubu ki̱n aya n ni̱n bi̱bu n Kwama a tu a sutu ni̱n feredimu ni̱n ku ki̱n. N ni̱n nang bi̱bu nang chau chitu waremu, nang nokan ware a kutengu a kun we furangu.

⁴²N ki̱n a yi ni̱n ko ni̱n ma ni̱bu mi̱n di̱mwaru, ni̱n fwa chimi̱n ti̱n ko n ki̱n nang wu n Kwama a sutu ki̱n ka mwata bi̱kuri̱mu n ti bi̱bwari̱mu mi̱ne.

⁴³Fa̱kubu ki̱ni kwang a ma di̱mwaru we di̱ki̱ne ko ni wu a ke bi̱yili̱mu a di̱n ki̱ne ka ya dukku ki̱letiyangu.

⁴⁴Yo m Biti̱r we ki̱fwa ya̱me, Fi̱ki̱m Kwamamu a ri ni̱bu a swe ki̱nwe ya̱m bi̱li̱mi̱mu.

⁴⁵Ni̱bu bunti̱ki̱m a bii laar a Yafudamu a bunga we n ti Biti̱r a ya̱r yii yinangu a ku yikayu kuuti a yati̱ ki̱li̱mang Fi̱ki̱m Kwamamangu.

⁴⁶Di̱ne n chi a nwe ki̱fwa ya̱mu ki̱ni yiiniyu dangtidangti, ki̱dela Kwama. Yinu m Biti̱r a yi ko,

⁴⁷“N wure ka yidu ko ni madu ni̱bu bi̱bu mi̱nu batisma wenge? N chi a tu a ya riku Fi̱ki̱m Kwamamu yinang chi̱ni.”

⁴⁸Yinu n ki̱n a ni da ko ni̱bu a ma chi mi̱n batisma a di̱n Yesu Masiya. We kuteng ki̱ku n chi a yi Biti̱r ko a ma yikai diti n ti chi.